కుష్టు వ్యాధి రహిత జిల్లాగా తీర్చిదిద్దేందుకు ప్రతి ఒక్కరు అవగాహన కలిగి ఉండాలని జిల్లా కలెక్టర్ డా.కె.మాధవీలత పేర్కొన్నారు. సోమవారం రాజమండ్రి జిల్లా
కలెక్టర్ సమావేశం మందిరంలో నిర్వహించిన కుష్టు వ్యాధి నిర్మూలనపై అవగాహన పక్షోత్సవ కార్యక్రమాన్ని కలెక్టర్ ప్రారంభించారు. ఈ సందర్భంగా కలెక్టర్
డాక్టర్ కె. మాధవీలత మాట్లాడుతూ కుష్టు వ్యాధి నిర్మూలన పై ఈ నెల 30వ తేదీ నుండి ఫిబ్రవరి 13వ తేదీ వరకు జిల్లాలో వైద్యాధికారులు వారి సిబ్బంది ఇంటింటి సర్వే కార్యక్రమాన్ని నిర్వహించి కుష్టు వ్యాధి నిర్మూలన పై ప్రజలకు అవగాహన కల్పించిన ఉన్నారని పేర్కొన్నారు. ఆజాదీ కా అమృత్ మహోత్సవ్ నిర్వహించుకుంటున్న ఈ తరుణం లో జిల్లా ప్రజలు, జిల్లా పరిపాలన విభాగానికి చెందిన అందరు కుష్టు వ్యాధి నుంచి వ్యాధి గ్రస్తులను విముక్తి చేయడానికి వున్న ఏ అవకాశాన్ని వదులుకోమని ఈ సందర్భంగా ప్రకటించారు. కుష్టు వ్యాధి విముక్తి కొరకు పోరాడి , కుష్ఠు వ్యాధిని గత చరిత్రగా మార్చేద్దామని పేర్కొన్నారు.
ఈ సందర్భంగా పలువురు కుష్టు వ్యాధిగ్రస్తులకు జిల్లా కలెక్టర్ మాధవీలత స్టీలు బిందెలు, దుప్పట్లు , పండ్లు పంపిణీ చేశారు. జిల్లా లెప్రసీ , ఎయిడ్స్ టీవీ కంట్రోల్ అధికారిణి డా.ఎన్. వసుంధర మాట్లాడుతూ జిల్లాలో ఇప్పటివరకు 70 కేసులు గుర్తించామని, చికిత్స పొందుతున్న 740 డిఫార్మటీ కేసెస్ ( కాళ్లు చేతులు లేని ) వారు ఉన్నారన్నారు. వీరందరికీ ప్రభుత్వ పరంగా ప్రతినెలా పెన్షన్ అందజేయడం జరుగుతుందని తెలిపారు. కుష్టు వ్యాధిని సులభంగా గుర్తించ వచ్చునని, దీనిని చికిత్స ద్వారా పూర్తిగా నయం చేయవచ్చు అన్నారు. జిల్లాలో వున్న అన్ని కుష్ఠు వ్యాధి కేసులను ప్రారంభ దశలోనే కనుగొనుటకు పూర్తిగా కృషి చేస్తామన్నారు. ఈ లక్ష్యాన్ని సాధించడానికి జిల్లాలో వున్న అన్ని వనరులను వినియోగించుకుంటా మన్నారు.
సమాజములో కుష్టు వ్యాధిగ్రస్తుల పట్ల వున్న వివక్షను, చిన్న చూపును తొలగించి వారిని ప్రధాన జన జీవన స్రవంతిలోకి తీసుకురావడానికి అన్ని విధాలా కృషి
చేస్తామన్నారు.కుష్టు వ్యాధికి కారకమైన బ్యాక్టీరియా పేరు మైకోబ్యాక్టీరియం లెప్రే (Mycobacterium leprae) ద్వారా వ్యాధి వ్యాప్తి చెందుతుందన్నారు. అంత
సులభంగా అంటుకునే అంటువ్యాధి కాదన్నారు. దాప్ సొన్ రిఫాంప్సిలిన్ టబ్లెట్, ఇతర మందులు చాలా ఉన్నాయి. ప్రభుత్వం ఉచితంగా మందులు ఇవ్వడం జరుగుతుందని డి ఎల్. ఓ డా .వసుంధర పేర్కొన్నారు. ఈ కార్యక్రమంలో జాయింట్ కలెక్టర్ ఎన్ తేజ్ భరత్, డిఆర్ఓ జి. నరసింహులు, జిల్లా వైద్య అధికారులు, కుష్ఠు వ్యాధి పీడితులు, పలువురు అధికారులు, స్వచ్చంధ సంస్థల ప్రతినిధులు, తదితరులు పాల్గొన్నారు.
