మావోయిస్టు నేత రామకృష్ణ అలియాస్ అశోక్ ను అదుపులోకి తీసుకున్న నేపథ్యంలో 33 మంది పార్టీ సభ్యులు, 27 మంది మిలీషియా సభ్యులు డిజిపి హరికృష్ణ ఎదుట లొంగిపోయిన విషయం విదితమే.  ఈ సందర్బంగా లొంగిపోయిన 60 మంది సభ్యులతో జిల్లా కలెక్టర్ సుమిత్ కుమార్, ఎస్పీ సతీష్ కుమార్, ఐటిడిఏ ప్రాజెక్ట్ అధికారి రోణంకి గోపాల కృష్ణ, ఏఎస్పీ తుహిన్ సిన్హా  మంగళవారం సాయంత్రం ఎఎస్పీ కార్యాలయ సమావేశ మందిరంలో కలసి ముచ్చటించారు. ఈ సందర్బంగా కలెక్టర్ మాట్లాడుతూ మీ అవసరాలను మాకు తెలియచేస్తే మేము పరిష్కార చర్యలు చేపడతామని హామీ ఇచ్చారు. కొన్ని సమస్యలను వెంటనే పరిష్కరిస్తామని, కొన్ని సమస్యల పరిష్కారానికి కొంత సమయం పడుతుందని కలెక్టర్ వివరించారు.  లొంగిపోయిన సభ్యులలో కొండ్రుం, జూముడుం, తగ్గుపాడు, జుడిగూడ మొదలగు గ్రామాలకు చెందిన శ్రీకాంత్, లక్ష్మి, సూరిబాబు, కిల్లో శ్రీను తదితరులు ఆయా గ్రామాలలో రోడ్ లేదని, త్రాగు నీటి సదుపాయం లేదని, ఆధార్ లేదని, రేషన్ కార్డు లేదని, అంగన్వాడి భవనం లేదని, పాఠశాలకు అరకు నుండి ఒక టీచర్ వారానికి రెండు సార్లు పాఠశాలకు వస్తారని, కొండ్రుంగు గ్రామ వాలంటీర్ నెలకు రెండు సార్లు పాడేరు నుండి వస్తారని కలెక్టర్ దృష్టికి తీసుకు వచ్చారు. కలెక్టర్ స్పందిస్తూ మీ గ్రామాలకు రెండు,మూడు రోజుల్లో వస్తామని, సమస్యలు పరిశీలించి పరిష్కార చర్యలు తీసుకుంటామని స్పష్టం చేసారు. జిల్లాలో 6.50 లక్షల మందికి అభివృద్ధి సంక్షేమ కార్యక్రమాలు అందుతున్నాయని, ఇంతకాలం మీరు అటువైపు ఉండి మీ జీవితాలనే కాకుండా పిల్లల భవిష్యత్తును కూడా త్యాగం చేసిసాధించింది ఏమీ లేదని, ఇప్పుడు జన జీవన స్రవంతిలో కలిశారు.  మేము అందించే ఫలితాలు చూస్తారని అందుకు కొంత సమయం పడుతుందని చెప్పారు. మీ సమస్యలు విన్నవించటానికి ఎప్పుడైనా నన్ను నేరుగా కలవొచ్చని కలక్టర్ స్పష్టం చేసారు. 

             ఐటీడీఏ పిఓ రోణంకి గోపాలకృష్ణ మాట్లాడుతూ జమిగూడ నుండి బూసిపుట్టు వరకు రోడ్ నిర్మాణం జరుగుతోందని, రెండు మూడు రోజుల్లో తారు  వేస్తామని గుర్తు చేసారు. అదేవిధంగా, ప్రభుత్వం తరపున మేము మీకు అండగా ఉంటామని, మమ్మల్ని నమ్మండి అని సూచించారు.  ఇటీవల జమిగూడ నుండి 120 మంది సమస్యలపై  నన్ను కలవటానికి వచ్చినప్పటికీ రాత్రి వరకు కలవలేకపోయానని, వారి సమస్య విని వారికి భోజనాలు పెట్టించి ప్రత్యేక వాహనంలో వారి గ్రామానికి పంపించిన విషయం గుర్తు చేసిన పిఓ మీకోసం మేమున్నామన్న నమ్మకం  కలిగి ఉండాలని కోరారు.  ముందుగా ఎస్పీ సతీష్ కుమార్ మాట్లాడుతూ పోలీసులు, ప్రభుత్వం మీకు శత్రువులు కాదని, మీ హితం కోరే మిత్రులుగా గుర్తించాలని కోరారు.  చాలామంది తెలీకుండానే మావోయిస్టుల వైపు వెళుతున్నారని, అది సరి కాదని, సమస్యలుంటే జిల్లా యంత్రాంగానికి చెప్పి పరిష్కరించుకోవాలని సూచించారు . అభివృద్ధి ఒక్క రోజులో జరిగేది కాదని, వేచి చుస్తే అభివృద్ధి కనిపిస్తుందని వివరించారు.  ఈ కార్యక్రమంలో ఎఎస్పీ తుహిన్  సిన్హా, డిఎస్పీ (ఎసిబి) వెంకట రావు, పలువురు సి ఐలు, ఎస్ ఐలు , లొంగిపోయిన పార్టీ, మిలీషియా సభ్యులు పాల్గొన్నారు. 

శంఖవరం మండలం అన్నవరం జాతీయ రహదారిపై సుమారు రూ. 20,000,00 విలువచేసే 58 బస్తాల నిషేధిత గుట్కా ప్యాకెట్లను అన్నవరం పోలీసులు స్వాధీనం చేసుకున్నారు. ఈ రహదారిపై ఉన్న శ్రీవీరవెంకట సత్యనారాయణ స్వామి నమూనా ఆలయం సమీపంలో మంగళవారం ఉదయం 9 గంటల సమయంలో ఎస్సై. ఎస్.రవికుమార్ నేతృత్వంలో పోలీసు సిబ్బంది వారి రోజు వారీ విధుల్లో భాగంగా వాహనాలు తనిఖీ చేస్తుండగా తుని నుండి కత్తిపూడి వైపు వెళుతున్న ఎ.పి.37 టిఈ 4567 నెంబర్ ఐషర్ వ్యానులో రవాణా అవుతున్న ఈ అక్రమ సరుకును పోలీసులు పట్టుకున్నారు. వ్యాన్ డ్రైవర్, క్లీనర్ తోపాటు సొత్తుకు యజమానులైన ఇద్దరు వ్యాపారస్తులను కలపి మొత్తం నలుగురురిని అదుపు లోనికి తీసుకున్నారు. వాహనాన్నీ, సరకునూ స్వాధీనం చేసుకున్నారు. నిందితులపై నేరాన్ని, అభియోగాలను నమోదు చేసారు. వీరిని ప్రత్తిపాడు కోర్టులో న్యాయమూర్తి ముందు హాజరు పరచగా వారికి  

తాత్కాలిక కారాగార వాస నిర్బంధాన్ని విధించారు. పోలీసు స్టేషన్ ఆవరణలో విలేకర్ల సమావేశంలో అమలాపురం డీఎస్పీ. అరిటాకుల శ్రీనివాసరావు ఈ వివరాలను వెల్లడించారు. ఈ నిషేధిత గుట్కా ప్యాకెట్ల అక్రమ రవాణాపై స్పెషల్ బ్రాంచ్ పోలీసులు జిల్లా ఎస్పీ రవీంద్రనాథ్ బాబుకు ఇచ్చిన నిర్దిష్ట సమాచారం మేరకు ఆయన ఆదేశాలకు అనుగుణంగా అన్నవరం ఎస్.ఐ. రవికుమార్, ఆయన సిబ్బంది సంయుక్తంగా వాహనాలను ఆకస్మిక తనిఖీ చేసి ఈ అక్రమ సొత్తు అక్రమ రవాణా గుట్టును రట్టు చేయడంతో ఈ నేరం వెలుగు చూసిందని అమలాపురం డీఎస్పీ అరిటాకుల శ్రీనివాసరావు పాత్రికేయులకు వివరించారు.

ఏపీ సీఎం వై.ఎస్. జగన్ మోహన్ రెడ్డి, రాష్ట్ర హోం మంత్రి, దళిత మహిళా నాయకురాలైన మేకతోటి సుచరిత పై అనుచిత వ్యాఖ్యలు చేసిన టిడిపి నేత మాజీ మంత్రి చింతకాయల అయ్యన్నపాత్రుడు విశాఖలోని పైవన్ టౌన్ పోలీస్ స్టేషన్ లో ఫిర్యాదు దాఖలైంది. శనివారం ఈ మేరకు  విశాఖ జిల్లా గ్రంథాలయ చైర్మన్ పర్సన్ కొండా రమాదేవి, వైఎస్సార్సీపీ రాష్ట్ర అధికార ప్రతినిధి కొండా రాజీవ్ గాంధీ లు ఈ ఫిర్యాదు చేశారు. ఈ సందర్భంగా వారు మాట్లాడుతూ, శుక్రవారం గుంటూరులో జరిగిన ఒక సభలో చింతకాయల అయ్యన్నపాత్రుడు మాట్లాడుతూ  సీఎంపైనా, హోమంత్రిపైనా అసభ్యపదజాలంతో వివాదాస్పద వ్యాఖ్యలు చేశారన్నారు. దిశా చట్టం పై తప్పుడు ప్రచారాలతో ప్రజలని తప్పుదోవ పట్టిస్తూ ప్రభుత్వ ప్రతిష్టకు భంగం కలిగించారని ఆరోపించారు. ఆ కారణాలపైనే చింతకాయల అయ్యన్నపాత్రుడు పైన కఠిన చర్యలు తీసుకోవాలని పోలీసులకు ఫిర్యాదు చేశామన్నారు. ఈ కార్యక్రమంలో కార్పొరేటర్ కందుల నాగరాజు, రాష్ట్ర గిడ్డంగుల సంస్థ డైరెక్టర్ కాకి పద్మ , 39వ వార్డు ఇంఛార్జి కొల్లి సింహాచలం, వార్డు అధ్యక్షుడు సురాడ తాతారావు, రాష్ట్ర యువజన విభాగం కార్యదర్శి అలమండ్ విజయ్, 36 వ వార్డు అధ్యక్షుడు కోరుకొండ సూర్యప్రసద్, సిటిమోటర్ వెంకటేశ్వరరావు తదితరులు పాల్గొన్నారు. 

శ్రీ‌వారి దర్శన టిక్కెట్ల బ్లాక్ మార్కెటింగ్‌తో సంబంధం క‌లిగి ఉన్నారనే ఆరోపణలపై టిటిడి నిఘా మ‌రియు భద్రాతా విభాగం ఇచ్చిన ఫిర్యాదుల మేరకు పోలీసులు రెండు నెల‌ల‌లో వ్య‌వ‌ధిలో 25 ఎఫ్‌ఐఆర్‌లు నమోదు చేసి, 41 మందిని అరెస్టు చేశారు. జూలై మరియు ఆగస్టు నెలల్లో భక్తులకు స్వామివారి దర్శన టిక్కెట్లను అధిక ధరలకు విక్ర‌యిస్తున్న దళారులను టిటిడి విజిలెన్స్ విభాగం గుర్తించింది. ఇందులో కొంతమంది ప్రజా ప్రతినిధుల నకిలీ లేఖలు, నకిలీ వెబ్‌సైట్లు, ట్రావెల్ ఏజెన్సీలు భక్తులను మోసం చేస్తున్నట్లు గుర్తించారు. భక్తులను మోసం చేయ‌డానికి ప్రయత్నించినందుకు, వారి మనోభావాలు దెబ్బ‌తిసేలా న‌డుచుకున్న ద‌ళారుల‌పై  తిరుమల, తిరుపతిలోని వివిధ పోలీస్ స్టేషన్లలో టిటిడి విజిలెన్స్ విభాగం అధికారులు ఫిర్యాదులు నమోదు చేశారు. భక్తులు దళారులను నమ్మొద్దని, దర్శనం కోసం నకిలీ వెబ్‌సైట్‌లు,  ట్రావెల్ ఏజెన్సీలను సంప్రదించవద్దని టిటిడి ఇప్పటికే అనేకసార్లు హెచ్చరించింది. టిటిడి అధికారిక వెబ్‌సైట్ www.tirupatibalaji.gov.in నుంచి మాత్ర‌మే ఆన్‌లైన్ టిక్కెట్లను బుక్ చేసుకోవాలని టిటిడి మ‌రోసారి విజ్ఞప్తి చేస్తున్నది. దళారులు, నకిలీ వెబ్‌సైట్ నిర్వ‌హ‌కులు, ట్రావెల్ ఏజెన్సీలపై నేరం రుజువైతే టిటిడి చట్టపరంగా తీవ్రమైన‌ చర్యలు తీసుకుంటుందని హెచ్చరిస్తోంది.

విశాఖలోని ఆరిలోవ పోలీస్ స్టేషన్ పై శుక్రవారం ఏసీబీ అధికారులు ఆకస్మిక దాడులు చేశారు. ఓ పాత నిందితుడు వద్ద కేసు మాఫీకు సంబంధించి వ్యవహారంలో ఏడు వేల రూపాయలు లంచం అడిగిన ఎస్ ఐ శ్రీనివాస్రావు ఏసీబీ అధికారులకు రెడ్ హ్యాండెడ్గా దొరికిపోయాడు.  కేసులో నిందితులైన బొడ్డేపల్లి వైకుంఠ రావు అనే వ్యక్తి నుంచి లంచం డిమాండ్ చేస్తున్నారని ఏసీబీ అధికారులకు ఫిర్యాదు చేశారు. దీంతో ఉదయం పక్కా ప్రణాళికతో ఏసీబీ అధికారులు రెడ్ హ్యాండెడ్ గా ఎస్ఐని పట్టుకున్నారు. గత కొంతకాలంగా ఆరిలోవ పోలీస్ స్టేషన్లో ప్రతి పనికి డబ్బులు డిమాండ్ చేస్తున్నారన్న ఆరోపణలు, ఫిర్యాదులు కూడా ఉన్నాయి. బాధితుల నుంచి భారీగా లంచాలు డిమాండ్ చేస్తున్నారన్న విమర్శలు వెల్లువెత్తుతున్నాయి. ఈ పోలీస్ స్టేషన్ లో అడుగు పెట్టాలంటే నే బాధితులు భయపడే పరిస్థితి తీసుకొచ్చారని పలువురు బాధితులు గగ్గోలు పెడుతున్నారు. ఈ నేపథ్యంలో శుక్రవారం జరిగిన ఏసీబీ దాడులు మరింత బలాన్ని చేకూర్చాయి. ఇక్కడ పనిచేస్తున్న ఎస్ఐ శ్రీనివాసరావు శైలి ముందు నుంచి కూడా వివాదా స్పదంగా ఉందన్న వాదనలు ఉన్నాయి. పోలీస్ స్టేషన్కు వచ్చిన బాధితులను భయపెట్టి బెదిరించి సెటిల్మెంట్లు చేశారన్న ఆరోపణలు కూడా ఉన్నాయి. ఎట్టకేలకు శ్రీనివాసరావు పాపం పండింది. నిందితుడైన బొడ్డేపల్లి వైకుంఠరావు నేరుగా ఎసిబి అధికారు లకు సమాచారం ఇచ్చి రెడ్హ్యాండెడ్గా లంచం ఇస్తూ పట్టుబడినట్లు చేశారు. పోలీస్ స్టేషన్లో ఏసీబీ దాడులు జరగడంతో ఒక్కసారిగా పోలీసుశాఖ ఉలిక్కి పడింది.ఈ దాడుల్లో ఎసిబి డిఎస్పీ బివిఎస్ రామన మూర్తి సిఐలు లక్ష్మణమూర్తి, ఎస్ రమేష్,ఎస్ కే గఫుర్,ప్రేమకుమార్,తదితరులు పాల్గొన్నారు. ఎస్సై శ్రీనివాస్ ను రిమాండ్కు తరలించారు.

 

శంఖవరం మండలం కత్తిపూడి గ్రామంలో అక్రమంగా నిల్వ ఉంచిన 4.6 మెట్రిక్ టన్నుల రేషన్ బియ్యాన్ని సివిల్ సప్లై అధికారులు దాడి చేసి  పట్టుకున్నారని పెద్దాపురం డివిజన్ అసిస్టెంట్ సివిల్ సప్లై ఆఫీసర్ ప్రసాద్ తెలిపారు. శనివారం ముందుగా అందిన సమాచారం మేరకు సివిల్ సప్లైస్ అధికారులతో తనిఖీలు నిర్వహించగా కత్తిపూడి గ్రామంలో ఒక ఇంటిలో  మల్లిపాముల బాబ్జి అనే వ్యక్తి   అక్రమ రేషన్ బియ్యాన్ని నిల్వ ఉంచడాన్ని కనుగొన్నామని ఏఎస్ ఓ తెలిపారు. వీటిని సీజ్ చేసి అతనిపై 6 ఏ కేసు నమోదుచేసినట్టు అధికారులు వివరించారు. అక్రమంగా నిల్వ ఉంచిన రేషన్ బియ్యం విలువ రూ.92 వేలు గా నిర్ధారించామన్నారు. ఈ బియ్యాన్ని సీల్ చేసి  దగ్గర్లో ఉన్న ఎంఎస్ ఓ పాయింట్ కి తరలించినట్టు వివరించారు.ఈ దాడులలో డివిజనల్ అసిస్టెంట్ సివిల్ సప్లై ఆఫీసర్ ప్రసాద్, తుని , శంఖవరం, జగ్గంపేట సివిల్ సప్లై డిప్యూటీ తాసిల్దార్ లు రామారావు ,ఇస్మాయిల్, కృష్ణ  పాల్గొన్నారు.

మహిళలపై అమానీయమైన ఘటనలకు పాల్పడుతున్న మృగాళ్ళకు కఠిన శిక్షలు అమలు జరిగేలా చర్యలు తీసుకుంటామని రాష్ట్ర హోం మరియు విపత్తుల నిర్వహణ శాఖ మంత్రి మేకతోటి సుచరిత పేర్కొన్నారు.  రొంపిచర్ల మండలం తుంగపాడు గ్రామంలో అత్యాచారానికి గురై గుంటూరు ప్రభుత్వ సమగ్ర ఆసుపత్రిలో చికిత్స పొందుతున్న వికలాంగ మహిళను గురువారం  రాష్ట్ర హోం మరియు విపత్తుల నిర్వహణ శాఖ మంత్రి మేకతోటి సుచరిత, రాష్ట్ర మహిళాభివృద్ధి మరియు శిశు సంక్షేమ శాఖ మంత్రి తానేటి వనిత, జిల్లా కలెక్టర్ వివేక్ యాదవ్ తో కలిసి పరామర్శించారు. బాధిత మహిళకు ధైర్యం చెప్పి, రాష్ట్ర ముఖ్యమంత్రి బాధిత కుటుంభాన్ని ఆదుకోవటానికి ప్రకటించిన రూ.5 లక్షల చెక్కును  మంత్రులు అందించారు. అనంతరం రాష్ట్ర హోం మరియు విపత్తుల నిర్వహణ శాఖ మంత్రి మేకతోటి సుచరిత, రాష్ట్ర మహిళాభివృద్ధి మరియు శిశు సంక్షేమ శాఖ మంత్రి తానేటి వనిత చిన్నపిల్లల విభాగంలో చికిత్స పొందుతున్నఏడునెలల చిన్నారిని, విద్యుత్ షాక్ గురై అత్యవసర విభాగంలో చికిత్స పొందుతున్న యువకుడు కుటుంబసభ్యులను పరామర్శించి, వారికి మెరుగైన వైద్యసేవలు అందించాలని వైద్యులకు సూచించారు. 

 ఈ సందర్భంగా రాష్ట్ర హోం మరియు విపత్తుల నిర్వహణ శాఖ మంత్రి మేకతోటి సుచరిత విలేకరులతో మాట్లాడుతూ మాట్లాడలేని, వినపడని మహిళ పశువులు కాయటానికి వెళ్ళినప్పుడు ఆమె పై జరిగిన అత్యంత దారుణంగా జరిగిన అత్యాచార సంఘటన సభ్యసమాజం తలదించుకోవాల్సిన పరిస్థితిలో ఉంది అన్నారు. మహిళలపై వేధింపులకు గురి చేస్తున్న వారిని శిక్షించేందుకు  కఠిన చట్టాలు అమలు చేసినా మృగాళ్ళు రెచ్చిపోవటం చాలా బాధాకరంగా ఉందన్నారు. అత్యాచారానికి గురైన మహిళ కనీసం తన బాధను సైతం తెలపలేని పరిస్థితిలో చాలా భయపడి పోయి బ్రతకలేను అని ఆవేదన వ్యక్తం చేస్తుందన్నారు. ఘటనకు పాల్పడిన వ్యక్తిపై  ప్రాధమిక విచారణ అనంతరం ఇప్పటికే 376 సెక్షను క్రింద కేసు నమోదు చేయటం జరిగిందని, కేసు పూర్తిగా ఎగ్జామిన్ చేయటం జరిగిందని, దీని ప్రకారం నిందితునిపై మరిన్ని  సెక్షన్లు క్రింద కేసులు నమోదు చేసి కఠినంగా శిక్షించం జరుగుతుందన్నారు. మహిళలపై అత్యాచారాలకు, వేదింపులకు పాల్పడుతున్న వ్యక్తులకు కఠినంగా శిక్షలు అమలు చేయటానికే దిశా చట్టంను రూపొందించటం జరిగిందన్నారు. గతంలో అత్యాచార సంఘటనలు జరిగితే దర్యాప్తు సమయం 100 నుంచి 180 రోజలు ఉండేదని, దిశ చట్టం వచ్చిన తరువాత 50 రోజుల్లో పూర్తి చేయటం జరుగుతుందన్నారు. 

అత్యాచార ఘటనను రాష్ట్రముఖ్యమంత్రి వైఎస్ జగన్మోహన్రెడ్డి దృష్టికి తీసుకెళ్ళిన వెంటనే ఆయన బాధిత కుటుంబానికి రూ.5 లక్షల సాయం అందించాలని సూచించటంతో చెక్కును అందించామన్నారు. బాధితురాలి సోదరుడుకు అవుట్ సోర్సింగ్ విధానంలో ఉద్యోగం అందించనున్నామన్నారు. రాష్ట్ర మహిళాభివృద్ధి మరియు శిశు సంక్షేమ శాఖ మంత్రి తానేటి వనిత మాట్లాడుతూ  చెవి, మూగ యువతిపై అగంతకుడు దాడి చేసి, హింసించి, అత్యాచారం చేసిన దారుణ సంఘటనకు బాధపడుతూ తీవ్రంగా ఖండిస్తున్నామన్నారు.  జాలీ పడే స్థితిలో ఉన్న వికలాంగురాలిపై సైతం అఘాయిత్యానికి పాల్పడిన వ్యక్తిని కఠినంగా శిక్షించేందుకు ప్రభుత్వం సిద్ధంగా ఉందన్నారు. ఇప్పటికే నిందితున్ని కస్టడీలోకి తీసుకోవటం జరిగిదన్నారు. ఇటువంటి దారుణ, కృర సంఘటనలకు పాల్పడే వ్యక్తులను క్షమించేది లేదన్నారు. రాష్ట్ర ముఖ్యమంత్రి వైఎస్ జగన్మోహన్రెడ్డి ఆదేశాల మేరకు బాధిత కుటుంబానికి రూ. 5 లక్షల చెక్కును అందించామని, బాధితురాలి తమ్మునికి ఉద్యోగం కల్పించేందుకు చర్యలు తీసుకుంటున్నామన్నారు. బాధిత కుటుంబానికి ప్రభుత్వం అండగా ఉంటుందన్నారు.

రాష్ట్ర ముఖ్యమంత్రి మహిళలపై దాడులకు పాల్పడే వారిని కఠినంగా శిక్షించేందుకు దిశా చట్టంను అమల్లోకి తీసుకువచ్చి దిశా పోలీస్ స్టేషన్లను ఏర్పాటు చేశారన్నారు.  మహిళలకు అన్ని వేళల సహాయం అందించేందుకు దిశా యాప్ పై ప్రతి ఒక్కరికి అవగాహన కల్పించటం జరుగుతుందన్నారు. నేరప్రవృత్తి మనస్తత్వంతో చట్టాలంటే భయం లేకుండా మహిళలపై ఆఘాయిత్యాలకు పాల్పడే వారిని ఖచ్చితంగా శిక్షించటం జరుగుతుందన్నారు. కార్యక్రమంలో తూర్పు నియోజకవర్గ శాసనసభ్యులు మొహమ్మద్ ముస్తఫా, నగరపాలక సంస్థ మేయరు కావటి శివనాగ మనోహర నాయుడు, ప్రభుత్వ సమగ్ర ఆసుపత్రి సూపరింటెండెంట్ డా. ప్రభావతి, జిల్లా మహిళాభివృద్ధి, శిశు సంక్షేమ శాఖ ప్రాజెక్టు డైరక్టర్ మనోరంజని, జీజీహెచ్ వైద్యులు పాల్గొన్నారు.

తిరుమల శ్రీవారి దర్శనం కోసం రూ 300 టికెట్లతో పాటు కళ్యాణోత్సవం లాంటి కొన్ని ఆర్జిత సేవా టికెట్లు రాబోయే నెల కోటా ప్రతి నెల 20వ తేదీ ఆన్లైన్ లో విడుదల చేస్తున్నారు.  కొంతమంది దళారులు, ట్రావెల్స్ సంస్థలు తాము దర్శనం టికెట్లు బుక్ చేయిస్తామని భక్తుల నుంచి ఎక్కువ మొత్తం వసూలు చేస్తున్నారని ఫిర్యాదులు వచ్చాయి. చెన్నై కి చెందిన రేవతి ట్రావెల్స్ సంస్థ భక్తులనుంచి ఎక్కువ డబ్బులు వసూలు చేస్తూ ఆన్లైన్లో దర్శనం టికెట్లు ఏర్పాటు చేస్తున్నట్లు తెలిసింది. దీంతో సదరు సంస్థపై టీటీడీ విజిలెన్స్ అధికారులు పోలీసులకు ఫిర్యాదు చేసి కేసు నమోదు చేయించారు.. భక్తులు www tirupatibalaji.ap.gov.in వెబ్సైట్ ద్వారా ఆన్లైన్ లో తమ ఆధార్ కార్డ్ నంబర్, చిరునామా తో టికెట్లు బుక్ చేసుకునే సదుపాయం టీటీడీ కల్పించింది. భక్తులు దళారులను ఆశ్రయించి నష్ట పోవద్దని టీటీడీ విజ్ఞప్తి చేస్తోంది. స్వామివారి దర్శనం టికెట్లు, సేవా టికెట్లతో వ్యాపారం చేసే దళారులు, ట్రావెల్స్ సంస్థలపై కఠిన చర్యలు తీసుకుంటామని టీటీడీ హెచ్చరిస్తోంది.