జిల్లాలో చేపట్టే అభివృద్ధి కార్య‌క‌లాపాలు భేష్

నీతి ఆయోగ్ యాస్పిరేష‌న‌ల్ డిస్ట్రిక్ట్ ప్రోగ్రాంలో భాగంగా జిల్లాలో చేప‌డుతున్న కార్య‌క‌లాపా లు సంతృప్తిక‌రంగా ఉన్నాయ‌ని కేంద్ర వైద్య‌, ఆరోగ్య కుటుంబ సంక్షేమ శాఖ మంత్రి మ‌న్ సుఖ్ మాండ‌వీయ పేర్కొన్నారు. నిర్దేశిత ల‌క్ష్యాల‌ను చేరుకునేందుకు అమ‌లు చేస్తున్న విధ‌నాలు, ప‌థ‌కాలు అభివృద్ధి అంత‌రాల‌ను తొల‌గించేందుకు ఉప‌క‌రిస్తాయ‌ని అభిప్రాయ‌ప‌డ్డారు. విజయనగరం జిల్లా ప‌ర్య‌ట‌న‌లో భాగంగా క‌లెక్ట‌రేట్ ఆడిటోరియంలో స‌మీక్షా స‌మావేశం అనంత‌రం మంగ‌ళ‌వారం ఆయ‌న మీడియాతో మాట్లాడారు. యాస్పిరేష‌న‌ల్ డిస్ట్రిక్ట్ ప్రోగ్రాం కార్య‌క్ర‌మం అమ‌లును ప‌ర్య‌వేక్షించేందుకు చేసిన‌ ప‌ర్య‌ట‌నలో ఆయ‌న గ‌మ‌నించిన అంశాల‌ను వివ‌రించారు. ప్ర‌ధాన మంత్రి దేశ అభివృద్ధిని కోరుకుంటున్నార‌ని, దానిలో భాగంగా ఈ రోజు విజ‌య‌న‌గ‌రం జిల్లాలో ప‌ర్య‌టించాన‌ని, త్వ‌ర‌లోనే జిల్లాలో అభివృద్ధి చెందిన జిల్లాల స‌ర‌స‌న చేరుతుందని మంత్రి ఆకాంక్షించారు. జిల్లాకు మ‌ళ్లీ వ‌స్తాన‌ని అప్ప‌టికి జిల్లాలో ఆశించిన ఫ‌లితాలు సాధ్య‌మ‌వుతాయ‌ని ఆశాభావం వ్య‌క్తం చేశారు. అయితే యాస్పిరేష‌న‌ల్ డిస్ట్రిక్ట్ ప్రోగ్రాంలో చేప‌డుతున్న ప‌నుల్లో కొన్నింటిని మ‌రింత ప్ర‌ణాళికాయుతంగా నిర్వ‌హించవ‌ల‌సి ఉంద‌ని మంత్రి అభిప్రాయ‌ప‌డ్డారు. ప్ర‌ధాన మంత్రి ఆవాస్ యోజ‌న, ఇత‌ర‌ ప‌థకాల ద్వారా జిల్లాలోని ప్ర‌జ‌లు సంతృప్తిక‌ర జీవ‌నం సాగించేందుకు అవ‌స‌ర‌మైన అన్ని ర‌కాల మౌలిక వ‌స‌తులు, జీవ‌నోపాధి అవ‌కాశాలు ల‌భిస్తున్నాయ‌ని పేర్కొన్నారు. ఒక‌టి, రెండు సంవ‌త్స‌రాల్లో ఆశాజన‌క జిల్లాల జాబితా నుంచి బ‌య‌ట ప‌డి అభివృద్ధి చెందిన జిల్లాల జాబితాలో విజ‌య‌న‌గ‌రం చేరుతుంద‌ని అన్నారు. జిల్లాలో ప్ర‌స్తుతం జ‌రుగుతున్న ప‌నులు భవిష్య‌త్తు అభివృద్ధికి సూచిక‌గా నిలుస్తాయన్నారు. గ్రామ స‌చివాల‌యాలు, పేద‌లంద‌రికీ గృహాలు, వెల్ నెస్ సెంట‌ర్ సేవ‌లు, ఉపాధి హామీ ప‌థ‌కం ప‌నుల అమ‌లు తీరు సంతృప్తిక‌రంగానే ఉన్నాయ‌ని, అభివృద్ధి ప‌నులు కూడా బాగానే జ‌రుగుతున్నాయ‌ని పేర్కొన్నారు.

విద్యుత్ సాంకేతిక నష్టాలను అధిగమించాలి

విద్యుత్ సరఫరాలో సాంకేతిక నష్టాలను పూర్తిస్థాయిలో నియంత్రించేందుకు డిస్కంలు చర్యలు తీసుకోవాలని రాష్ట్ర ఇంధన శాఖ మంత్రి  పెద్దిరెడ్డి రామచంద్రారెడ్డి ఆదేశించారు. సచివాలయంలోని మంగళవారం ఈస్ట్, సెంట్రల్, సౌత్ డిస్కం సిఎండిలతో సమీక్షా సమావేశం నిర్వహించారు. ఇంధన శాఖ కార్యదర్శి బి.శ్రీధర్, ట్రాన్స్ కో విజిలెన్స్ జెఎండి మల్లారెడ్డి పాల్గొన్న ఈ సమావేశంలో డిస్కంల పనితీరుపై సమీక్షించారు.ఈ సందర్బంగా మంత్రి  పెద్దిరెడ్డి రామచంద్రారెడ్డి మాట్లాడుతూ విద్యుత్ రంగంలో డిస్కంల పాత్ర కీలకమైనదని అన్నారు. ప్రజలకు, పరిశ్రమలకు, వ్యవసాయానికి విద్యుత్ ను అందించడంలో వారధిగా నిలుస్తున్న డిస్కంలు తమ పనితీరును మరింత మెరుగు పరుచుకోవాలని కోరారు. విద్యుత్ చౌర్యాలను పూర్తిస్థాయిలో అరికట్టడం, ఓవర్ లోడ్, లో ఓల్టేజీ వంటి సమస్యలను నియత్రించేందుకు కట్టుదిట్టమైన చర్యలు తీసుకోవాలని సూచించారు. అలాగే వ్యవసాయానికి అందిస్తున్న ఉచిత విద్యుత్ విషయంలోనూ ట్రాన్స్ ఫార్మర్ లు ఫెయిల్ అయిన వెంటనే డిస్కం అధికారులు తక్షణం స్పందించాలని కోరారు. వారం రోజుల్లో వ్యవసాయ విద్యుత్ ట్రాన్స్ ఫార్మర్ లను మార్చాలని, లేనిపక్షంలో రైతులు పంట నష్టపోయే పరిస్థితి ఏర్పడుతుందని అన్నారు. కొన్ని సందర్భాల్లో రోజుల తరబడి ట్రాన్స్ ఫార్మర్ లను మార్చడంలో జాప్యం చేస్తున్నారనే విమర్శలు ఉన్నాయని అన్నారు. దీనిపై డిస్కం సిఎండిలు దృష్టి సారించాలని, క్షేత్రస్థాయిలో సిఎండిలు పర్యటించడం ద్వారా పరిస్థితిని ఎప్పటికప్పుడు అర్థం చేసుకుని, నిర్ణయాలు తీసుకునేందుకు వీలవుతుందని అన్నారు. ట్రాన్స్ ఫార్మర్ ల నాణ్యత విషయంలో ఎట్టి పరిస్థితుల్లోనూ రాజీ పడకూడదని సూచించారు. ట్రాన్స్ ఫార్మర్ ల ఫెయిల్యూర్ రేటును మరింత తగ్గించాలని అన్నారు.  క్వాలిటీ టెస్టింగ్ , సిపిఆర్ఐ డిజైన్లు, నిబంధనల ప్రకారం పరీక్షించిన తరువాతే ట్రాన్స్ ఫార్మర్ ల కొనుగోళ్ళు చేయాలని అన్నారు.  ఇందుకోసం మొత్తం రూ.4,113 కోట్లు వ్యయం అవుతుందని తెలిపారు.

'జగనన్న కాలనీలు సీఎం మానస పుత్రికలు'

జగనన్న కాలనీలు సీఎం శ్రీ వైయస్ జగన్ మానస పుత్రికలని, కాలనీలకు విద్యుత్ సదుపాయాన్ని కల్పించడాన్ని ప్రాధాన్యతగా తీసుకోవాలని మంత్రి శ్రీ పెద్దిరెడ్డి రామచంద్రారెడ్డి ఆదేశించారు. దేశంలో ఎక్కడా లేని విధంగా 31 మంది పేదలకు ఇళ్ళస్థలాలు, పక్కాగృహాలను మంజూరు చేశారని, వాటిని అన్ని వసతులను కల్పించాలనే సీఎం గారి లక్ష్యానికి అనుగుణంగా విద్యుత్ దీపాలు, గృహ విద్యుత్ కనెక్షన్లు, మంచినీటి సరఫరాకు విద్యుత్ సదుపాయం వంటి అంశాలపై దృష్టి పెట్టాలని సూచించారు. జగనన్న కాలనీలకు ఫేజ్ -1 కింద 10,067 లేఅవుట్ల లోని 14.80 లక్షల ప్లాట్ లకు రూ.4500 కోట్లతో విద్యుత్ సదుపాయాన్ని కల్పిస్తున్నామని ఈ పనుల విషయంలో పురోగతిని ఎప్పటికప్పుడు సమీక్షించుకోవాలని సూచించారు.

కేంద్రప్రభుత్వ మార్గదర్శకాల ప్రకారం స్మార్ట్ మీటర్ల ఏర్పాటుపై అధికారులు మంత్రికి వివరించారు. ఆర్డిఎస్ఎస్ కింద రాష్ట్ర వ్యాప్తంగా మొత్తం 59.19 లక్షల స్మార్ట్ మీటర్లను ఏర్పాటు చేయాల్సి ఉందని, 2023 డిసెంబర్ నాటికి 46.41 లక్షల మీటర్లు భిగించాల్సి ఉందని తెలిపారు. అలాగే 2025 మార్చి నాటికి మరో 12.77 లక్షల మీటర్లను భిగించాల్సి ఉంటుందని తెలిపారు. 

 సమీక్షలో ఇంధన శాఖ కార్యదర్శి బి.శ్రీధర్, ట్రాన్క్ కో విజిలెన్స్ జెఎండి మల్లారెడ్డి, డిస్కం సిఎండిలు జె.పద్మాజనార్థన్ రెడ్డి, (సిపిడిసిఎల్) కె.సంతోషరావు (ఇపిడిసిఎల్), హెచ్ హరనాథ్ రావు(ఎస్పిడిసిఎల్), ఇంధన శాఖ డిప్యూటీ సెక్రటరీ కుమార్ రెడ్డి తదితరులు పాల్గొన్నారు.

సచివాలయాలను వెక్కిరిస్తున్న ‘స్పందన’

ప్రజల ఇంటి ముంగిట సమస్యలను పరిష్కరించడం కోసం ఆంధ్రప్రదేశ్ ప్రభుత్వం ఎంతో ప్రతిష్టాత్మకంగా 2019 అక్టోబరు 2న ప్రవేశపెట్టిన గ్రామ, వార్డు సచివాలయాలను నాటి నుంచి నేటి వరకూ స్పందన కార్యక్రం వెక్కిరిస్తూనే ఉంది. వినడానికి కాస్త బాధగానూ, వింతగానూ ఉన్నప్పటికీ ఇది అక్షర సత్యం. వైఎస్సార్సీపీ ప్రభుత్వం అధికారంలోకి రాగానే గ్రామ, వార్డు సచివాలయాలు ఏర్పాటు చేసి అక్కడే గ్రామస్థాయిలో స్పందన కార్యక్రమం నిర్వహించి సమస్యలు పరిష్కరిస్తామని చెప్పంది. ప్రభుత్వం ఏర్పాటై సుమారు మూడేళ్లు దాటున్నా నేటికీ సచివాలయాల్లో స్పందన ఊసేలేదు. నేటికీ స్పందన కార్యక్రమం అంటే ప్రతీ ఒక్కరికీ గుర్తొచ్చేది జిల్లా కలెక్టర్, జిల్లా కార్యాలయాలు మాత్రమే. సచివాలయాల్లో సిబ్బంది మొత్తం మధ్యాహ్నాం 3 నుంచి 5 గంటలవ రకూ అందుబాటులో ఉంచే విధంగా తీన్ మార్ బయోమెట్రిక్ అమలు చేస్తున్నా.. సచివాలయాల్లో మాత్రం స్పందన కార్యక్రమం జరగడం లేదు. అదేమంటే ప్రభుత్వం పెట్టిన ప్రతీదీ అమలు చేయాల అంటున్నారు ఇటు జిల్లా అధికారులు, మరో పక్క సచివాలయాల్లో తెగ పనిచేసేస్తూ కష్టపడిపోయే పంచాయతీ కార్యదర్శిలు. ఎవరైనా మండల అధికారులు, జిల్లా అధికారులు పర్యటనలకు వచ్చే సమయంలో మాత్రం సచివాలయాల ముందు సబ్బరంగా బ్లీచింగ్ చల్లించి, ఆరోజు ఒకరిద్దరిచేత స్పందన దరఖాస్తులు స్వీకరించి దుఖాణం కట్టేస్తున్నారు. ఇదే వరస కొనసాగుతూ వస్తోంది. ప్రతీ ఒక్కరూ తమ సమస్యలపై జిల్లా కలెక్టర్ కార్యాలయానికే వెళ్లేటట్టు అయితే గ్రామ పంచాయతీ, వార్డుల పరిధిలో సచివాలయాలు ఎందుకనే మాట ప్రతీనోట దారుణంగా వినిపిస్తుంది. అసలు నేటికీ సచివాలయల్లో ఎంత మంది సిబ్బంది, ఏఏ సేవలు అందుతాయో రాష్ట్రంలో 20శాతం మంది ప్రజలకు కూడా పూర్తిస్థాయిలో అవగాహనలేదంటే పరిస్థితి ఏ విధంగా అర్ధం చేసుకోవచ్చు. రాష్ట్రంలో 13 జిల్లాలు ఉండే సమయంలో జిల్లా కలెక్టర్లు, ఎస్పీలు, జిల్లా పంచాయతీ అధికారులు, ఇతర శాఖల అధికారులకు భారం చాలా ఎక్కువగా ఉండేది. కానీ ఇపుడు 13 జిల్లాలు కాస్తా, 26 జిల్లాలుగా మారి అధికారుల సంఖ్య పెరిగినా కూడా జిల్లా అధికారులు కాదు గదా, జిల్లా కలెక్టర్లు సైతం గ్రామ, వార్డు సచివాలయాల్లో మధ్యాహ్నం 3 నుంచి 5 గంటల వరకూ ప్రతీ రోజూ స్పందన కార్యక్రమం నిర్వహించే చర్యలు తీసుకోలేకపోతున్నారు. మొదట్లో అంటే సచివాలయాలు ఏర్పాటైన ఆరు నెలలకు ఈఎన్ఎస్ నేషనల్ న్యూస్ ఏజెన్సీ, అధికారిక మొబైల్ ఈఎన్ఎస్ లైవ్, న్యూస్ వెబ్ సైట్ www.enslive.net ద్వారా సచివాలయాల్లో స్పందన ఎక్కడ అనే విషయాన్ని రాస్తే.. గ్రామ, వార్డు  సచివాలయాలు ఇప్పుడే పుట్టిన పురిటి బిడ్డలు, అన్నప్రాసన రోజే ఆవకాయ అన్నం పెట్టేస్తారా అని ఒంటి కాలిపై లేచారు రాష్ట్ర అధికారుల నుంచి జిల్లా అధికారులు, కలెక్టర్లు, ఆఖరికి  సచివాలయ సిబ్బంది వరకూ. రేపు అంటే 2022 అక్టోబరు 2 వస్తే గ్రామ, వార్డు సచివాలయాలు ఏర్పాటై మూడేళ్లు పూర్తవుతాయి. అంటే ప్రభుత్వంలో ఒక ప్రతిష్టాత్మకమైన వ్యవస్థను ప్రవేశపెట్టి అమలు పరుస్తున్నప్పటికీ కూడా జిల్లా అధికారులుగానీ, జిల్లా కలెక్టర్లు గానీ ఆ వ్యవస్థను పూర్తిస్థాయిలో ప్రజలకు చేరువ చేయలేకపోతున్నారంటే దానిని ఏమనాలో ప్రభుత్వం చెప్పాల్సి వుంది. ఒకప్పుడు గ్రామ పంచాయతీలో కార్యదర్శి, గుమాస్తా పారిశుధ్యసిబ్బంది మాత్రమే ఉండేవారు. తరువాత కాలంలో వీఆర్వోలు అందుబాటులోకి వచ్చారు. వైఎస్సార్సీపీ ప్రభుత్వం ఏర్పాటైన తరువాత ఏకంగా సచివాలయాల్లో 11 నుంచి 16 ప్రభుత్వ శాఖల సిబ్బంది అందుబాటులోకి వచ్చినా నేటికీ సచివాలయాల్లో పూర్తిస్థాయిలో స్పందన కార్యక్రమాన్ని అమలు చేయలేకపోతున్నారంటే లోపం ఎక్కడుందోప్రభుత్వంలోని పెద్దలు, రాష్ట్రస్థాయి, జిల్లా అధికారులకే తెలియాలి.. ఇదేదో గ్రామ, వార్డు సచివాలయాలపై అక్కసుతో మేము అంటున్న మాటలు కాదు. వాస్తవ పరిస్థితిని ప్రభుత్వం ద్రుష్టికి తీసుకెళ్లే మాటలు సందర్భంలోనే అనేక ప్రస్తుత అంశాలను గుర్తుచేస్తున్నాం. మేము అనడం కాదు.. స్పందన కార్యక్రమాలు గ్రామ, వార్డు సచివాలయాల్లో జరగడం లేదు అనడానికి సాక్ష్యాలుగా జిల్లా నలుమూలల నుంచి ప్రతీ సోమవారం జిల్లా కలెక్టరేట్లలో అందుతున్న అర్జీలే వాటికి నిదర్శనం. నిజంగా గ్రామ, వార్డు సచివాలయాల్లో స్పందన కార్యక్రమం నిర్వహించి గ్రామస్థాయిలో సమస్యలు పరిష్కరిస్తే.. జిల్లా కలెక్టర్ కార్యాలయానికి కేవలం పెద్ద పెద్ద సమస్యలు మాత్రమే అర్జీలుగా నమోదు అయ్యేవి. కానీ గ్రామస్థాయి సమస్యలకు కూడా ప్రజలు నేటికీ జిల్లా  కలెక్టర్ కార్యాలయాలకే వెళుతున్నారంటే ప్రభుత్వం ఎంతో ప్రతిష్టాత్మకంగా ప్రవేశపెట్టిన గ్రామ, వార్డు సచివాలయాల ద్వారా ఏ స్థాయిలో సేవలు అంతున్నాయి. ఏ స్షాయిలో స్పందన నిర్వహిస్తున్నారో జిల్లా అధికారులే సమాధానం చెప్పాలి. ప్రస్తుతం ప్రభుత్వం రోజుకి మూడు సార్లు సచివాలయ సిబ్బంది బయోమెట్రిక్ వేయాలని నిబంధన పెట్టినపుడే స్పందన కార్యక్రమం ఇక్కడ అమలు జరగడం లేదంటే లోపాన్ని జిల్లా పంచాయతీ అధికారితోపాటు ఇతర జిల్లా శాఖలు, కలెక్టర్, జిల్లా ఎస్పీలు గుర్తించాల్సి వుంది. పాత పెద్దజిల్లాల సమయంలో ఎలాగూ సచివాలయాలను ప్రభుత్వం గానీ, జిల్లా యంత్రాంగం గానీ చక్కదిద్దలేకపోయింది. ఇపుడు జిల్లాలు రెండింతలై.. అధికారులు కూడా అదే స్థాయిలో రెండింతలు పెరిగారు. ఇప్పటికైనా గ్రామ, వార్డు సచివాలయాల్లో పూర్తిస్థాయిలో స్పందన నిర్వహించి, కామన్ సర్వీస్ సెంటర్ సేవలన్నీ అందుబాటులోకి తీసుకోవాలని ఆశిద్దాం.. అంతేకాదు ఏం జరుగుతుందనేది వేచి చూద్దాం. అప్పటీకీ స్పందన కార్యక్రమం జరగలేదంటే మాత్రం అటు ప్రభుత్వానికి, ప్రభుత్వంలోని అధికారులకు..ముఖ్యంగా జిల్లా అధికారులకు ఒక ప్రత్యేక నమస్కారం పెడదాం..!

తెరపైకి కొత్తగా మున్సిపల్ కార్పోరేషన్లు..

ఆంధ్రప్రదేశ్ ప్రభుత్వం ఎంతో ప్రతిష్టాత్మకంగా రాష్ట్రంలోని 13 జిల్లాలను 26జిల్లాలుగా విభజించింది. అదే సమయంలో ప్రధాన జిల్లాల్లో అంతర్భాగంగా వున్న మున్సిపల్ కార్పోరేషన్ లను మరోసారి విభజించే ప్రక్రియ చేపట్టాలని యోచిస్తుంది. దానికి అనుగుణంగా రాష్ట్రంలోని ప్రస్తుతం వున్న మున్సిపల్ కార్పోరేషన్లు ఏఏ జిల్లాలకు అందర్భాలుగా ఉన్నాయి..కొత్త జిల్లాల్లో అయితే ఏఏ జిల్లాల్లో మున్సిపల్ కార్పోరేషన్లు ఏర్పాటు చేయాలి. అనే అంశాలను పట్టణ పురపాలక శాఖ ద్వారా అంచనాలు వేస్తున్నట్టు వార్తలొస్తున్నాయి. జిల్లాలను విభజించిన ప్రభుత్వం ఇపుడు మున్సిపల్ కార్పోరేషన్లను కూడా విభజించకపోతే అభివ్రుద్ధి పూర్తిగా కుంటుపడిపోతుంది. జనాభాలెక్కల ప్రాతిపదిక కూడా 2026నాకిటి ఈ ప్రక్రియ పూర్తిజరగాల్సి వుంది. దానికోసం ప్రస్తుతం ఏ మున్సిపల్ కార్పోపరేషన్ పరిధి ఏ కొత్తజిల్లాలో భాగంగా వుంది. ఏ జిల్లా నుంచి మున్సిపల్ కార్పోరేషన్ ను విడదీసి ఏ జిల్లాలో కొత్తగా మున్సిపల్ కార్పోరేషన్ ఏర్పాటు చేయాలి అనే అంశాలను ప్రభుత్వం పరిశీలిస్తుంది. కొత్తజిల్లాలతోపాటు, మున్సిపల్ కార్పోరేషన్లను కూడా విభజించడం ద్వారా కేంద్ర ప్రభుత్వం ద్వారా స్మార్ట్ సిటీల నిధులు అధికంగా వచ్చే వెసులు  బాటు వుంది. అదే సమయంలో జిల్లాలు మారిపోయిన తరువాత ఏ ప్రధాన పని కావాలన్నా ఇపుడు పాత జిల్లా కేంద్రంలోని మున్సిపల్ కార్యాలయంలోకి వెళ్లి పనులు చేయించుకోవాల్సి వస్తుంది. అలా చేసిన సమయంలో జిల్లా పేరు, ద్రువీకరణ మారిపోతుంది. ప్రస్తుతం కొత్తజిల్లాలు విభజన జరిగిపోయిన తరువాత చాలా మంది ఆధార్ కార్డులు, ఇతర ఇంటి అడ్రసులన్నీ మార్పులు చేర్పులు చేయించుకుంటన్నారు. ఇలాంటి సమయంలో నగరపాలక సంస్థ పరిధిలో కూడా మార్పులు చేయించుకోవాలంటే కొత్తగా మారిన జిల్లాల్లోనే కొత్త కార్పోరేషన్లు ఉండాలి. అలా కాకుండా జిల్లా ఒక దగ్గర, కార్పోరేషన్ ద్రువీకరణ మరో జిల్లాలోనూ ఉంటే సాంకేతిక ఇబ్బందులు వచ్చే ప్రమాదం వుందని ప్రభుత్వం గుర్తించి నట్టు సమాచారం. ఉదాహరణకు మహావిశాఖ నగరపాలక సంస్థనే తీసుకుంటే శివారు ప్రాంతమైన అనకాపల్లి జిల్లా జివిఎంసీ పరిధిలో వుంటుంది. నేటికీ జివిఎంసీ జోనల్ కార్యాయలయం అనకాపల్లిలోనే వుంది. కానీ జిల్లా మారినపుడు, నరగరపాలక సంస్థ కూడా మారాలి. కానీ నేటికీ మారలేదు. ఇదే విషయాన్ని ఇటు జివిఎంసీ అధికారులు, ఇటు కొత్తగా ఏర్పాటైన జిల్లా కలెక్టర్, జేసిలు ప్రభుత్వం ద్రుష్టికి తీసుకు వెళ్లనట్టు సమాచారం అందుతుంది. దీనితో కొత్త జిల్లాల పరిధిని బట్టి, మున్సిపాలిటీలుగా వున్నవాటిని కలుపుతూ, నగర పాలక సంస్థలుగా మార్చాలా, లేదంటే జిల్లా కేంద్రంలోనే మున్సిపల్ కార్పోషనర్లు ఏర్పాటు చేయాలనే విషయమై ప్రభుత్వం చాలా సుదీర్ఘంగా మంతనాలు చేస్తోంది. కొత్తజిల్లాల్లో కొత్త మున్సిపల్ కార్పోరేషన్లు, మున్సిపాలిటీలపై జూలై నెలాఖరుకి ఒక కొలిక్కి వస్తుందని తెలుస్తుంది. అదే జరిగితే జివిఎంసీ నుంచి అనకాపల్లి విడిపోయి.. అనకాపల్లి నుంచి నర్సీపట్నం వరకూ పరిధిని పెంచి అనకాపల్లి మున్సిపల్ కార్పోరేషన్ చేస్తారనే ఊహాగానాలు వినిపిస్తున్నాయి. ప్రస్తుతం జివిఎంపీ పరిధిలో పలు అనుమతుల కోసం పడుతున్న ఇబ్బందులు, ప్రభుత్వం ఆలోచిస్తున్నతీరు, కొత్త జిల్లాలో కొత్త మున్సిపల్ కార్పోరేషన్ల ఏర్పాటుపై ప్రభుత్వం ప్రకటన చేయాల్సి వుంది. మహానగరపాలక సంస్థలను విడదీస్తారా.. కొత్త నగరపాలక సంస్థలను ఏర్పాటు చేస్తారా.. అలాకాకుండా ఎక్కడి కార్పోరేషన్లను అక్కడే వుంచి పరిపాలనా సౌలభ్యం కోసం కొద్ది పాటి మార్పులు చేస్తారా అనేది వేచి చూడాలి..

తిరుప‌తికి చేరిన సేంద్రియ శ‌న‌గ‌లు

తిరుమ‌ల శ్రీ‌వారి ప్రసాదాల తయారీకి  ప్ర‌కృతి వ్య‌వ‌సాయంతో పండించిన  వంద ట‌న్నుల శ‌న‌గ‌లు టిటిడి అద‌న‌పు ఈవో  ఎవి.ధ‌ర్మారెడ్డి స‌మ‌క్షంలో అధికారులు అందుకున్నారు. తిరుప‌తిలోని మార్కెటింగ్ గోడౌన్‌లో శ‌నివారం అద‌పు ఈవో శాస్త్రోక్తంగా పూజ‌లు నిర్వ‌హించి ఈ కార్య‌క్ర‌మాన్ని ప్రారంభించారు.  ఈ సంద‌ర్భంగా అద‌న‌పు ఈవో మీడియాతో మాట్లాడుతూ,  గో ఆధారిత వ్య‌వ‌సాయంతో పండించిన పంటలతో గోవిందుడికి నైవేద్యం స‌మ‌ర్పించాల‌ని  ధ‌ర్మ‌క‌ర్త‌ల మండ‌లి నిర్ణ‌యించింద‌న్నారు. ఇందులో భాగంగా గ‌త ఏడాది అక్టోబ‌రులో రాష్ట్ర ముఖ్య‌మంత్రి  వైఎస్‌.జ‌గ‌న్‌మోహ‌న్ రెడ్డి స‌మ‌క్షంలో రైతు సాధికార సంస్థ‌, మార్క్‌ఫెడ్‌ల‌తో టీటీడీ  ఒప్పందం చేసుకుంద‌ని చెప్పారు. దాదాపు 2500 మంది రైతులు ఎలాంటి ర‌సాయ‌న ఎరువులు, పురుగు మందులు ఉప‌యోగించ‌కుండా,  ప్ర‌కృతి వ్య‌య‌సాయంతో పండించిన శ‌న‌గ‌ల‌ను రైతు సాధికార సంస్థ ద్వారా సేక‌రించి, మార్క్‌ఫెడ్ ద్వారా, త‌మ మిల్ల‌ర్ల‌లో టిటిడి అవ‌స‌రాల‌కు త‌గిన విధంగా రూపొందించి ఇస్తోంద‌న్నారు.  ప్ర‌తి ఏడాది ల‌డ్డూ ప్ర‌సాదాల త‌యారీకి 7 వేల ట‌న్నుల శ‌న‌గ‌లు, 896 ట‌న్నుల రెడ్ గ్రామ్ దాల్‌, 215 ట‌న్నుల బ్లాక్ గ్రామ్ దాల్‌, 474 ట‌న్నుల  బెల్లం, 54 ట‌న్నుల ధ‌నియాలు, 25 ట‌న్నుల ప‌సుపు, 237 ట‌న్నుల సోనామ‌సూరి బియ్యం, 22 ట‌న్నుల జీల‌క‌ర్ర, 83 ట‌న్నుల ఎండు మిర్చి, 284 ట‌న్నుల పెస‌రప‌ప్పు, 25  టన్నుల శ‌న‌గకాయ‌లు సేంద్రియ వ్య‌వ‌సాయం చేసే రైతుల నుండి  ఒక‌టి, రెండు సంత్స‌రాల్లో కొనుగోలు చేయ‌నున్న‌ట్లు తెలిపారు. ఈ ఏడాది  గో ఆధారిత వ్య‌వ‌సాయంతో పండించిన 2300 టన్నుల శ‌న‌గ‌లు అందుతాయ‌న్నారు. ఇప్ప‌టివ‌ర‌కు 1800 ఎద్దులు, వ‌ట్టిపోయిన ఆవులను రైతుల‌కు అందించామ‌ని, శ్రీ‌వారి ప్ర‌సాదంగా భావించి వారు పూజ‌లు చేసి పోషించుకుంటున్నారని వివ‌రించారు. అంత‌కుముందు అద‌న‌పు ఈవో మార్కెటింగ్ గోడౌన్‌లో స్వామి, అమ్మ‌వారి చిత్ర‌ప‌టాల‌కు పూజలు నిర్వ‌హించారు. ఈ కార్య‌క్ర‌మంలో డెప్యూటీ ఈవో  న‌టేష్‌బాబు, మేనేజ‌ర్  సుబ్ర‌మ‌ణ్యం, మార్క్‌ఫెడ్ మేనేజ‌ర్ శ్రీ‌ధ‌ర్, ఇత‌ర అధికారులు పాల్గొన్నారు.

శ్రీవారి భక్తులకు వేగంగా టైమ్ స్లాట్లు

తిరుమ‌ల శ్రీ‌వారి ద‌ర్శ‌నానికి విచ్చేసే భ‌క్తుల‌కు మ‌రింత వేగంగా, సౌక‌ర్యవంతంగా టైంస్లాట్ టోకెన్లు జారీ చేసేందుకు ప‌టిష్ట‌మైన కార్యాచ‌ర‌ణ ప్ర‌ణాళిక‌లు రూపొందిచాల‌ని టీటీడీ ఈవో డాక్ట‌ర్ కెఎస్‌.జ‌వ‌హ‌ర్‌రెడ్డి అధికారుల‌ను ఆదేశించారు. తిరుపతిలోని సర్వదర్శనం టోకెన్ల జారీ  కౌంటర్లను శ‌నివారం ఈవో, అద‌న‌పు ఈవో  ఎవి.ధ‌ర్మారెడ్డితో క‌లిసి ప‌రిశీలించారు. సర్వదర్శనం టైంస్లాట్ టోకెన్ల విధానం పునరుద్ధరించాలని టీటీడీ యోచిస్తున్న విషయం తెలిసిందే. ఈ నేపథ్యంలో ఆ కౌంటర్ల వద్ద భక్తుల సౌకర్యార్థం మరింత మెరుగ్గా చేపట్టాల్సిన ఏర్పాట్ల గురించి ఇంజినిరింగ్ అధికారులు ఈవో, అద‌న‌పు ఈవోల‌కు వివ‌రించారు. అన్నప్రసాదాలు అందించేందుకు, అవ‌స‌ర‌మైన చోట్ల షెల్ట‌ర్‌ల ఏర్పాటు, భక్తుల సౌక‌ర్యార్థం క్యూలైన్లలో మార్పులు త‌దిత‌ర అంశాల‌పై చ‌ర్చించారు. ముందుగా అలిపిరి భూదేవి కాంప్లెక్స్ వద్దగల కౌంటర్లను పరిశీలించారు. ఆ తరువాత శ్రీనివాసం యాత్రికుల వసతి సముదాయం, గోవిందరాజస్వామి సత్రాల వద్దగల కౌంటర్లను ఈవో పరిశీలించి, అధికారుల‌కు ప‌లు సూచ‌న‌లు చేశారు. ఈవో వెంట జెఈవో  వీర‌బ్ర‌హ్మం, సివిఎస్వో  నరసింహ కిషోర్, ఎస్ఇ (ఎల‌క్ట్రిక‌ల్)  వెంక‌టేశ్వ‌ర్లు, అద‌న‌పు సివిఎస్‌వో  శివ‌కుమార్ రెడ్డి, ఐటి విభాగాధిపతి  శేషారెడ్డి, విజిఓ  మనోహర్, డిఎస్‌పి ముర‌ళీకృష్ణ‌ ఇతర ఇంజనీరింగ్ అధికారులు ఉన్నారు.

వైఎస్సార్ సున్నావడ్డీ రూ.1.261కోట్లుజమ

ఆంధ్రప్రదేశ్ లోని 9.76 డ్వాక్రా సంఘాల్లో సుమారు కోటి మందికిపైగా మహిళలకు డా.వైఎస్సార్ సున్నా వడ్డీ పథకానికి సంబంధించిన వడ్డీ రూ.1.261 కోట్లు నగదును మాఫీకి సంబధించి రాష్ట్రంలోని అన్ని డ్వాక్రా సంఘాల మహిళలకు ముఖ్యమంత్రి వైఎస్.జగన్మోహనరెడ్డి ఒంగోలు నుంచి కంప్యూటర్ మీట నొక్కి ప్రారంభించారు. అనంతరం ఆయన బహిరంగ సభలో మాట్లాడుతున్నారు. ఆ కార్యక్రమాన్ని ఈఎన్ఎస్ లైవ్ పాఠకుల కోసం ప్రత్యక్షంగా అందిస్తున్నాం. డ్వాక్రా సంఘాల అకౌంట్లకు నగదు జమ చేసిన తరువాత నేరుగా అన్నిజిల్లాల నుంచి లబ్దిదారులతో సీఎం నేరుగా వర్చువల్ విధానం ద్వారా మాట్లాడుతున్నారు. ఈ కార్యక్రమంలో మంత్రులు, రాష్ట్ర ఉన్నతాదికారులు పాల్గొన్నారు.

రాష్ట్ర ఐటీ మంత్రిగా బాధ్యతలు స్వీకరణ..

ఆంధ్రప్రదేశ్ లోని అమరావతి సచివాలయంలో తన ఛాంబర్‌లో కుటుంబ స‌భ్యుల‌తో క‌లిసి ప్రత్యేక పూజల చేసిన‌ అనంతరం  పరిశ్రమలు, మౌలిక సదుపాయాలు, పెట్టుబడులు, ఐటీ శాఖ మంత్రిగా గుడివాడ అమర్‌నాథ్‌ బాధ్యతలు చేపట్టారు. త‌న‌కు మంత్రిగా అవకాశం కల్పించిన ముఖ్యమంత్రి వైయ‌స్‌ జగన్‌మోహన్‌రెడ్డికి ప్రత్యేక కృతజ్ఞతలు తెలిపారు. అదే విధంగా త‌న‌ను ఎమ్మెల్యేగా గెలిపించి మంత్రి స్ధానంలో కూర్చోబెట్టే అవకాశం ఇచ్చిన అనకాపల్లి ప్రజలకి ఎప్పటికీ రుణపడి ఉంటాన‌న్నారు. ఈ సందర్భంగా రామాయపట్నం పోర్టుకి అవసరమైన భూసేకరణలో భాగంగా రైతులకి ఇచ్చే రూ.8కో ట్ల పరిహారంపై తొలి సంతకం చేశారు. అనంతరం మంత్రి గుడివాడ అమర్‌నాథ్‌ మీడియాతో మాట్లాడుతూ, సీఎం వైయ‌స్ జ‌గ‌న్ త‌న‌పై గురుతరమైన బాధ్య‌త ఉంచార‌ని, మంత్రిగా రాష్ట్రానికి మంచి చేస్తా.. బాధ్యత సక్రమంగా నిర్వర్తిస్తానని స్ప‌ష్టం చేశారు. రాష్ట్రానికి పెట్టుబడులు, పరిశ్రమలు, ఐటీ విషయంలో ఏపీకి మంచి జరిగే విధంగా కృషి చేస్తాన‌ని గుడివాడ అమ‌ర్ చెప్పారు. ఏపీలో పారిశ్రామిక అభివృద్ది, ఐటీకి చిరునామాగా ఉన్న విశాఖ నుంచి వచ్చిన వ్యక్తిగా పారిశ్రామిక రంగాన్ని అభివృద్ది చేస్తాన‌ని వివ‌రించారు. విశాఖకి ఐటీ ఆద్యుడైన దివంగత మ‌హానేత వైయ‌స్ రాజ‌శేఖ‌ర‌రెడ్డి ఆశయాలకి అనుగుణంగా పనిచేస్తాన‌ని చెప్పారు. చెన్నై, బెంగుళూరు, ముంబయి లాంటి నగరాలతో పోటీ పడగల అవకాశం విశాఖ‌ప‌ట్నానికి ఉంద‌న్నారు. ఆంధ్ర‌ప్ర‌దేశ్ రాష్ట్రం పారిశ్రామిక అభివృధ్దికి, పెట్టుబడులకి అనుకూలమైంద‌ని, 900 కి.మీలకు పైన తీరప్రాంతం, జాతీయ రహదారులు, నాలుగు పోర్టులు ఉన్నాయ‌న్నారు. దేశంలోనే గొప్ప పరిపాలనాధ‌క్షుడైన సీఎం వైయ‌స్ జగన్ ఆధ్వర్యంలో పనిచేయడం అదృష్టంగా భావిస్తున్నాన‌ని,  దివంగత మంత్రి గౌతమ్ రెడ్డి సేవలను కూడా ఈ సందర్బంగా గుర్తుచేసుకున్నారు.. ఆయన ఆశయాలని కొనసాగిస్తాన‌ని మంత్రి అమర్‌నాథ్‌ అన్నారు.

ప్రభుత్వ చీఫ్ విప్ గా ఎం. ప్రసాదరాజు

ఆంధ్రప్రదేశ్  ప్రభుత్వ చీఫ్ విప్ గా  ముదునూరి ప్రసాద రాజు గురువారం ఉదయం బాధ్యతలు చేపట్టారు. అమరావతిలోని ఆంద్రప్రదేశ్ శాసన సభ భవనంలో  కేటాయించిన ఛాంబరులో శాస్త్రోక్తంగా పూజలు నిర్వహించిన తదుపరి ఆయన  ఈ బాధ్యతలను చేపట్టారు. ప్రభుత్వ చీఫ్ విప్ గా  బాధ్యతలు చేపట్టిన వెంటనే పలువురు అధికారులు, అనధికారులు ఆయన పుష్పగుచ్చాలు అందజేస్తూ అభినందనలు తెలిపారు. ఈ సందర్బంగా  ఆయన మాట్లాడుతూ ప్రభుత్వ చీఫ్ విప్ బాధ్యతలను అప్పగించిన గౌరవ ముఖ్యమంత్రి వై.ఎస్.జగన్మోహన్ రెడ్డి గారికి హృదయ పూర్వక కృతజ్ఞతలు తెలిపారు. శాసన సభ సజావుగా జరిగేలా, విప్ లు మరియు సభ్యులు అందరినీ సమన్వయ పరుస్తూ ప్రభుత్వానికి మంచి పేరు  వచ్చేలా, ప్రజాసమస్యలపై శాసన సభలో సమగ్రంగా చర్చ జరిగేలా మరియు ప్రతిపక్షాలు చేస్తున్న విమర్శలను సమర్థవంతంగా ఎదుర్కోవడానికి శక్తి వంచన లేకుండా కృషిచేస్తానని ఆయన తెలిపారు. అన్ని వర్గాలు, ప్రాంతాల వారికి క్యాబినెట్ లో సముచిత స్థానం కల్పిస్తూ సుస్థిర మైన  పాలనను ప్రజలు అందజేస్తున్న ప్రజా నాయకుడు ముఖ్యమంత్రి  వై.ఎస్.జగన్మోహన్ రెడ్డి అని కొనియాడారు. ప్రజా రంజకంగా ముఖ్యమంత్రి అందజేస్తున్న పాలనను ప్రజ లందరూ మెచ్చుకుంటూ స్థానిక సంస్థల ఎన్నికల్లో ఘన విజయాన్ని కట్టబెట్టారన్నారు.  

కొత్త జిల్లాలకు సరికొత్త యూనివర్శిటీలు..

ఆంధ్రప్రదేశ్ ప్రభుత్వం 13 జిల్లాలను 26 జిల్లాలను చేయడంతోపాటు, ఆయా కొత్తజిల్లాలో విద్యావ్యవస్థను పూర్తిస్థాయిలో పటిష్టం చేయడానికి జిల్లా ప్రాధాన్యతను బట్టి ఆ జిల్లాలో సంబంధిత యూనివర్శిటీ ఏర్పాటు చేయాలని భావిస్తున్నది. ఇప్పటికే పార్వతీపురం మన్యంలో సెంట్రల్ ట్రైబల్ యూనివర్శిటి వచ్చింది.  అదేవిధంగా అగ్రికల్చర్ యూనివర్శిటీ, హార్టికల్చర్, ఇన్ఫర్మేషన్ టెక్నాలజీ ఇలా ఆయ ఉత్తమ విద్యావిభాగాలకు చెందిన యూనివర్శిటీలను కొత్తజిల్లాల్లో ఏర్పాటు చేసి జిల్లాలను విద్యా కేంద్రాలుగా అభివ్రుద్ధి చేయాలని యోచిస్తున్నట్టు సమాచారం అందుతోంది. దానికితోడు అన్ని కొత్త జిల్లాల్లో కొత్తగా మెడికల్ కాలేజీలు వస్తుండటంతో విద్య, వైద్యం, ఆరోగ్యం పరంగా అన్ని రకాల ఆరోగ్య సమస్యలకు ఆసుపత్రులను అభివ్రుద్ధి కూడా చేస్తారని ప్రభుత్వ పెద్దలు చెబుతున్నారు.  మెడికల్ కాలేజీతోపాటు, డిప్లమా నర్శింగ్, డిగ్రీ నర్శింగ్, పీజీ నర్శింగ్ కళాశాలలు కూడా కొత్తజిల్లాల్లోనే ఏర్పాటు చేయడం ద్వారా ప్రభుత్వ ఆసుపత్రులు, ఇతర వైద్యసేవలకు కావాల్సిన వైద్యులను, పారామెడిక్స్ ను ప్రభుత్వ కళాశాలలు, యూనివర్శిటీల ద్వారా తయారు చేయాలన్నది ప్రభుత్వ లక్ష్యంగా కనిపిస్తుంది. ముఖ్యంగా వ్యవసాయం, వాణిజ్యం అభివ్రుద్ధి చెందాలంటే అక్కడ నూతన వంగడాల ఆవిష్కరణలు జరగాలి.. అలా జరగాలపంటే పరిశోధనలు జరగాలి. దానికోసం యూనివర్శిటీలు ఏర్పాటు ఒక్కటే మార్గమని ప్రభుత్వం భావిస్తున్నది. కేజీ నుంచి పీజీ వరకూ మొత్తం విద్యను ప్రభుత్వపరంగా అందించడం ద్వారా విద్యతోపాటు, ఉపాది, ఉద్యోగ అవకాశాలు పూర్తిస్థాయిలో కల్పించవచ్చుననే ఆలోచనకు ప్రభుత్వం వచ్చంది. ఐటీ రంగాన్ని అభివ్రుద్ధి చేయడం ద్వారా సాఫ్ట్ వేర్ హబ్ లను ఏర్పాటు చేయాలని కూడా ప్రభుత్వం భావిస్తున్నది. దానికోసం యూనివర్శిటీ స్థాయిలోనే పలు కొత్త కోర్సులను కూడా ప్రవేశపెట్టాలని కూడా అంచనాలు వేస్తున్నారు. దానికోసం విశాఖపట్నం, విజయవాడ, తిరుపతి లాంటి జిల్లాల్లో ఐటీ హబ్ లను కూడా ప్రభుత్వం ఏర్పాటు చేయడానికి కార్యాచరణ మొదలు పెట్టింది. ఇప్పటికే పాఠశాల విద్య నుంచి ఇంటర విధ్య వరకూ ఆరు విధానాలను అమల్లోకి తీసుకు వచ్చిన ప్రభుత్వం ఆపై డిగ్రీ, పీజీలలో కూడా సరికొత్త విధానాలను అమలు చేయడం ద్వారా విద్యార్ధి చదువుకునే సమయంలోనే ఏదో ఉద్యోగానికి ఎంపిక అయ్యేలా కూడా కార్యాచరణ చేపడుతున్నది. ప్రైవేటు పాఠశాలలు, కళాశాలలు, యూనివర్శిటీలకు ధీటుగా కొత్త విద్యా విధానాలు, కోర్సులను ప్రవేశపెట్టి విద్యార్ధులుగా ఉన్నప్పుడే ఉద్యోగులుగా మార్చాలన్నది ప్రభుత్వ లక్ష్యం. ప్రస్తుతం కొత్తగా 13 జిల్లాలు ఏర్పాటు అయినందున ఏఏ కొత్త జిల్లాల్లో యూనివర్శిటీలు ఏర్పాటు చేయాలనే కోణంలో ఇప్పటికే ప్రభుత్వం నిపుణుల నుంచి సలహాలు స్వీకరిస్తున్నది. అన్నీ అనుకున్నట్టు జరిగితే 2014 నాటి  26 జిల్లాల్లో 26 యూనివర్శిటీలు ఉండే విధంగా ప్రభుత్వం చర్యలు తీసుకుంటోంది.

ఆధార్ కార్డులో జిల్లాల పేరు మార్పులు..

ఏపీలో కొత్త జిల్లాలు అమల్లోకి వచ్చాయి. అయితే సంక్షేమ పథకాలు పొందడానికి ఆధార్ కార్డులను అధికారులు ప్రామాణికంగా తీసుకుంటున్నారు. ఈ నేపథ్యంలో ఆధార్ కార్డులో పాత జిల్లా పేర్ల స్థానంలో కొత్త జిల్లా పేర్లను చేర్చే విషయంపై అధీకృత సంస్థతో చర్చిస్తున్నామని ఏపీ సీసీఎల్‌ఏ కార్యదర్శి బాబు వివరించారు. ఆధార్ కార్డులో చిరునామా మార్పుపై సమావేశం నిర్వహించినట్లు ఆయన తెలిపారు. ఆధార్ కార్డులో మార్పు చేర్పులకు సంబంధించి పలు అంశాలపై సమావేశంలో చర్చించినట్లు పేర్కొన్నారు. మండలం, పిన్‌కోడ్ మ్యాపింగ్ చేసి వాటి ఆధారంగా మార్పులు చేస్తే ఆధార్‌లోనూ జిల్లా పేర్లు వాటంతట అవే మారేలా చేయవచ్చని సీసీఎల్‌ఏ కార్యదర్శి బాబు వెల్లడించారు. ఏవైనా అభ్యంతరాలుంటే స్వీకరించి సరిదిద్దవచ్చని తెలిపారు. అయితే ఇది ప్రతిపాదన మాత్రమే అని.. ఇంకా ఆమోదించలేదని పేర్కొన్నారు. ప్రస్తుతానికి ఆధార్‌లో పాత చిరునామా ఉంటుందని.. ప్రింట్ తీసుకున్నా దాని ప్రకారమే వస్తుందని వివరించారు. తెలంగాణలోనూ కొత్త జిల్లాలు అమల్లో ఉన్నాయని.. అక్కడ కూడా ఇదే సమస్య ఉందని సీసీఎల్‌ఏ కార్యదర్శి గుర్తుచేశారు.

తిరుమలలో మరో దాత‌ల కౌంట‌ర్..

తిరుమ‌ల‌లోని మాతృశ్రీ త‌రిగొండ వెంగ‌మాంబ అన్న‌ప్ర‌సాద భ‌వ‌నంలో బుధవారం దాత‌ల కోసం మరో కౌంట‌ర్‌ను టిటిడి అద‌న‌పు ఈవో ఎవి.ధ‌ర్మారెడ్డి ప్రారంభించారు. ఈ సంద‌ర్భంగా ప్ర‌త్యేక పూజ చేశారు. దాతలు విరాళాలు అందించేందుకు ఇప్పటికే ఇక్కడ ఒక కౌంటర్ ఉంది.  దాత‌లు చిన్నమొత్తంలో అన్నప్రసాదం ట్రస్టుకు విరాళాలు స‌మ‌ర్పించేందుకు వీలుగా యూనియ‌న్ బ్యాంక్ సౌజ‌న్యంతో ఈ కౌంట‌ర్ ఏర్పాటు చేశారు. భ‌క్తులు రూ.100/- నుండి విరాళాలు అందించ‌వ‌చ్చు.  ఈ కార్య‌క్ర‌మంలో డెప్యూటీ ఈవో  హ‌రీంద్ర‌నాథ్‌, ప్రత్యేకాధికారి  జిఎల్ఎన్‌.శాస్త్రి, యూనియ‌న్ బ్యాంకు రీజనల్ మేనేజర్  శాస్త్రి, బ్రాంచి మేనేజర్ సాంబశివరావు పాల్గొన్నారు.

YSR నిర్మాణ్ మరింత వేగం పెంచాలి..

దేశంలో ఏ రాష్ట్రంలోనూ లేని విధంగా ప్రజలకు సంక్షేమ, అభివృద్ధి కార్యక్రమాలను ప్రభుత్వం చేరువ చేస్తోందని రాష్ట్ర గనులు, ఇంధన, అటవీ, పర్యావరణ శాఖ మంత్రి  పెద్దిరెడ్డి రామచంద్రారెడ్డి, గృహనిర్మాణ శాఖ మంత్రి జోగి రమేష్ తెలిపారు. ఈ అభివృద్ధి కార్యక్రమాలకు, భారీ ఎత్తున తలపెట్టిన నిర్మాణాలకు అవసరమైన సిమెంట్ ను తమకు నిర్ధేశించిన లక్ష్యాలకు అనుగుణంగా సిమెంట్ కర్మాగారాలు అందించాలని విజ్ఞప్తి చేశారు. సచివాలయంలోని మూడోబ్లాక్ లో మంగళవారం వైయస్ఆర్ నిర్మాణ్ లో భాగంగా సిమెంట్ పరిశ్రమల ప్రతినిధులతో వారు భేటీ అయ్యారు. ఈ సందర్భంగా రాష్ట్రంలో ప్రభుత్వ ఆధ్వర్యంలో జరుగుతున్న నిర్మాణ కార్యక్రమాలకు సిమెంట్ కొరత ఏర్పడుతున్న నేపథ్యంలో ఆయా పరిశ్రమల ప్రతినిధులతో సమీక్ష నిర్వహించారు. గతంలో ప్రభుత్వంతో చేసుకున్న అవగాహన మేరకు పరిశ్రమలు సిమెంట్ ను అందించాల్సి ఉందని, అయితే కొన్ని కంపెనీలు తమకే నిర్ధేశించిన దానిలో ముప్పైశాతం కూడా అందించలేకపోవడం పట్ల అసంతృప్తి వ్యక్తం చేశారు. దేశంలో ఎక్కడా లేని విధంగా సీఎం  వైయస్ జగన్ 31 లక్షల మందికి ఇళ్ళస్థలాలు ఇచ్చారని, మొదటి దశలో 16 లక్షల ఇళ్ళ నిర్మాణం ప్రారంభించారని మంత్రులు తెలిపారు. అలాగే ప్రతి గ్రామంలోనూ సచివాలయాలు, విలేజ్ క్లీనిక్స్, బల్క్ మిల్క్ సెంటర్లు, డిజిటల్ లైబ్రరీలు ఇలా ప్రజలకు మంచి పాలన అందించేందుకు ఏర్పాటు చేసిన ప్రభుత్వ విభాగాల పక్కా భవనాలు నిర్మాణం జరుగుతోందని, నాడు-నేడు కింద కూడా పాఠశాలలు, ఆసుపత్రుల అభివృద్ధి జరుగుతోందని అన్నారు. ఈ నిర్మాణ పనులకు సిమెంట్ అవసరాలను ఆయా కంపెనీలు తీర్చాల్సి ఉండగా, అనుకున్న మేర సిమెంట్ సరఫరా చేయడం లేదని అన్నారు. సిమెంట్ కంపెనీల ప్రతినిధులు తమ సమస్యలు ఏవైనా ఉంటే వాటిని తమ దృష్టికి తీసుకురావాలని, సీఎం గారితో చర్చించి వాటిని పరిష్కరించేందుకు కృషి చేస్తామని హామీ ఇచ్చారు. ప్రజలకు మేలు చేయాలనే లక్ష్యంతో పనిచేస్తున్న ప్రభుత్వానికి పరిశ్రమలు కూడా తమ వంతు సహకారాన్ని అందించాలని కోరారు. నిర్మాణాలకు అవసరమైన సిమెంట్ విషయంలో కొరత ఏర్పడితే అంతిమంగా ప్రజలకు నష్టం జరుగుతుందని, దానిని కూడా దృష్టిలో పెట్టుకోవాలని అన్నారు. దీనిపై సిమెంట్ కంపెనీల ప్రతినిధులు కూడా మరోసారి సమీక్షించుకోవాలని, తమకు నిర్ధేశించిన లక్ష్యాలకు అనుగుణంగా సిమెంట్ సరఫరాను సకాలంలో అందించాలని కోరారు. మంత్రుల విజ్ఞప్తిపై సిమెంట్ కంపెనీల ప్రతినిధులు సానుకూలంగా స్పందించారు. నిర్ధిష్ట కాలవ్యవధిలోనే సిమెంట్ సరఫరాను పెంచుతామని హామీ ఇచ్చారు. ఈ సమావేశంలో గృహనిర్మాణశాఖ స్పెషల్ చీఫ్ సెక్రటరీ అజయ్ జైన్, గృహనిర్మాణ సంస్థ ఎండి నారాయణ్ భరత్ గుప్తా, పరిశ్రమల శాఖ డైరెక్టర్ సృజన, గనులశాఖ సంచాలకులు విజి వెంకటరెడ్డి తదితరులు పాల్గొన్నారు.

వైఎస్సార్సీపీ రీజనల్ కోఆర్డినేటర్స్ వీరే..