కేంద్ర గిరిజన వ్యవహారాల మంత్రిత్వ శాఖ కార్యదర్శి అనిల్ కుమార్ ఝా గిరిజన సంక్షేమశాఖ కార్యదర్శి కాంతిలాల్ దండే తో కలిసి  మండలంలోని మూలపేట గ్రామ పంచాయతీ పాలమామిడి ఆదివాసీ గిరిజన గ్రామాన్ని మంగళవారం సందర్శించారు. ఉదయం 6.30 గంటలకు డౌనూర్  చేరుకుని  బచ్చింత గ్రామం నుంచి కాలినడకన వెళ్లి గెడ్డ దాటి సుమారు నాలుగు  కిలోమీటర్ల దూరం (ఒక ప్రక్క) కొండలపైకి నడిచి మూలపేట పంచాయతీ పాలమామిడి గ్రామాన్ని చేరుకున్నారు. గ్రామస్తులతో మాట్లాడుతూ సమస్యలను అడిగి తెలుసుకున్నారు. డోలీ మోతల నివారిస్తామని చెప్పారు గ్రామానికి విద్యుత్, తాగునీరు, రహదారి, పాఠశాల భవనం లేదని గిరిజనులు  ఆయన దృష్టికి తీసుకెళ్లారు.  గ్రావిటీ తాగునీటి పథకం, రహదారి నిర్మాణం పాఠశాల  భవనం నిర్మిస్తామని చెప్పారు. ఆర్వో ఎఫ్ ఆర్  పట్టాలు ఎంత మందికి మంజూరు చేసారని ఆరా తీశారు.  పంచాయతీ లో 400 ఎకరాలకు పట్టాలు పంపిణీ చేశామని సబ్ కలెక్టర్ వివరించారు. డోలీ మోతల గ్రామాల కష్టాలను ఐటీడీఏ పిఓ రోణంకి గోపాల క్రిష్ణ వివరించారు. గతొలుత డౌనూర్ గిరిజన సంక్షేమ బాలుర ఆశ్రమ పాఠశాలను సందర్శించారు. పాఠశాల లో జరిగిన మన బడి నాడు పనులు పరిశీలించి సంతృప్తి వ్యక్తం చేశారు. మరుగుదొడ్లు పరిశీలించారు. వంట పరిశీలించి మెనూ అడిగి తెలుసుకున్నారు. ఆ తరువాత డౌనూర్ గ్రామ సచివాలయం, ప్రాధమిక ఆరోగ్య కేంద్రం సందర్శించారు. సచివాలయం వ్యవస్థ, వాలంటీరు వ్యవస్థల ద్వారా ప్రజలకు అందిస్తున్న సేవలను గిరిజన సంక్షేమ శాఖ కార్యదర్శి కాంతిలాల్ దండే వివరించారు. ప్రాధమిక ఆరోగ్య కేంద్రంలో సేవను అడిగి తెలుసుకున్నారు. ప్రసూతి, పురుషులు వార్డు, ఫార్మసీలో మందులు, ల్యాబ్ ను పరిశీలించారు. ఆసుపత్రి ప్రాంగణంలో ఔషధ మొక్కలు నాటాలని, పరిసరాలు పరిశుభ్రంగా ఉంచాలని సూచించారు. ఈ కార్యక్రమంలో  ట్రైకార్ ఎం డి ఈ.రవీంద్రబాబు ,గిరిజన సంక్షేమశాఖ డిడి  జి.విజయకుమార్, ఎస్ ఈ  ఎస్.శ్రీనివాస్ తదితరులు పాల్గొన్నారు.

రాజు తలచుకుంటే డబ్బులకు, దెబ్బలకు కొదవే వుండదనే నానుడి మీకు గుర్తుండే వుంటుంది.. రాష్ట్రప్రభుత్వంలోని ఏ ప్రభుత్వ శాఖ ఉద్యోగులూ చేయని విధంగా గ్రామ, వార్డు సచివాలయశాఖలోని ఉద్యోగులు సాధారణ సెలవుదినాల్లోనూ ఉచితంగా చేసే అధనపు విధులు చూస్తే అచ్చు అదే గుర్తుకు వస్తుంది అందరికీ.. ఏంటీ ఏదో తేడా కొడుతుంది అనుకుంటున్నారా..నిజంగానే తేడా కొట్టింది.. ప్రభుత్వ సెలవుల్లో ప్రత్యేకంగా అదనపు విధులు విధులకు పిలిచి సాధారణ ఉద్యోగ సమయం కంటే అధికంగా  పనిచేయించుకోవడానికి అడ్డు రాని నిబంధనలు హఠాత్తుగా ప్రభుత్వానికి ప్రసూతి సెలవులు పెట్టిన మహిళా ఉద్యోగుల సర్వీసులు రెగ్యులర్ చేయడానికి నిభందనలు అడ్డువచ్చాయని వారిని ఓ ఆరు నెలలు వెనక్కి నెట్టేందుకు చూస్తున్నారు అధికారులు. వాస్తవానికి సర్వీసు నిబంధనల ప్రకారం సాధారణ సెలవుల్లో ఉద్యోగులకు అదనపు విధులు ప్రభుత్వం అప్పగించకూడదు. అలా తప్పక అప్పగిస్తే చేసిన పనికి లెక్క కట్టాలి.. అది జీతంతోపాటు కలిపి ఇవ్వాలి. కానీ అది గ్రామ, వార్డు సచివాలయ శాఖలో జరగదు, ప్రభుత్వానికి అసలు ఆ నిబంధనే గుర్తులేదు. ప్రభుత్వ ఉద్యోగులకు దొరికే ఆ ఒక్కరోజు ఆదివారం, లేదా రెండవ శనివారాల్లోనే ప్రభుత్వానికి, సచివాలయ శాఖలో మిలితంగా వున్న 11 ప్రభుత్వ శాఖలకు అత్యవసరంగా పని పడుతుంది. అనుకున్నదే తడువుగా జిల్లా అధికారులు మండల స్థాయి అధికారులతో వారికి ఆ సెలవు రోజుల్లోనే ప్రత్యేకంగా డ్యూటీలు వేస్తారు. అదేమంటే చెప్పింది చేయడమే మీ పని.. దానికి లాజిక్కులు, జీఓలు, రూల్సు మాట్లాడకూడదు అంటూ బెదిరింపులకు దిగుతారు అధికారులు. అసలే కొత్తగా వచ్చిన ఉద్యోగం, పూర్తిస్థాయిలో జీతం రాకపోయినా ఇచ్చే ఆ రూ.15వేలతో పూర్తిస్థాయిలో విధులు నిర్వహించే సచివాలయ ఉద్యోగులకు ఇపుడు వారానికి దొరికేది ఒక్కరోజు సాధారణ సెలవులు ఇంట్లో కనీసం బట్టలు ఉతుక్కునే అవకాశం కూడా లేకుండా ఆదివారం, రెండవ శనివారాలు ప్రత్యేకంగా చేసే ఉచిత విధులకే పోతున్నాయి. అయినా పర్లేదు ప్రభుత్వం తమని గుర్తిస్తుందీ అనుకుంటే ఇపుడు గుండెలపై బండరాయి వేసింది. అదే రెండేళ్ల కాలంలో ప్రసూతి సెలవులు మహిళా ఉద్యోగులు పెట్టుకున్న ఆ సెలువులు పూర్తయ్యే వరకూ సర్వీసు రెగ్యులైజేషన్ పూర్తికాదనే అతి బరువైన మాట. 

తోటి ఉద్యోగులంతా రెండేళ్లు పూర్తికాగానే వారి సర్వీసులు రెగ్యులర్ అయిపోతున్న తరుణంలో మహిళా ఉద్యోగులు మాత్రం తమకు మాత్రుత్వం మిగిల్చిన కష్టంతో మరో ఆరు నెలలు వేచి వుండే పరిస్థితి దాపురించింది. రూల్ ఈజ్ రూల్ రూల్ ఫర్ ఆల్ అనే నిబంధన ప్రభుత్వాలు తూచా తప్పకుండా పాటిస్తాయి. కానీ రాష్ట్రప్రభుత్వంలోని ఒక్క సచివాలయ శాఖలోనే ఆ నిబంధన అమలు కాలేదు. కాదు కాదు అమలు చేయలేదు. సెలవు రోజుల్లో  అదనపు విధులు చేయించుకున్న ప్రభుత్వానికి ఆ సమయంలో గుర్తుకి రాని నిబంధనలు..తీరా తమ సర్వీసులు రెగ్యులర్ చేసే సమయానికి మాత్రం అసలైన జీఓలన్నీ తెరపైకి వస్తున్నాయంటూ మహిళా ఉద్యోగులు కన్నీరు మున్నీరవుతున్నారు. గర్భం దాల్చిన సమయంలోనూ తమతో సెలవు రోజుల్లోనే ప్రత్యేకంగా ఉచితంగానే అదనపు విధులు చేసేలా చేసిన మండల, జిల్లా అధికారులు ఇపుడు తీరా సర్వీసు రెగ్యులైజేషన్ సమయం వచ్చేనాటికి మాత్రం నోరు మెదపడం లేదని మహిళా ఉద్యోగులు ఆవేదన వ్యక్తం చేస్తున్నారు.. రాష్ట్రంలోని 13 జిల్లాల్లోని సుమారు లక్షా 24 వేలకు పైగా వున్న ఉద్యోగుల్లో 50శాతం వున్న మహిళా ఉద్యోగుల్లో ప్రసూతి సెలువులు పెట్టిన వారికి సర్వీసులు మరో ఆరు నెలలు పొడిగించే కార్యక్రమానికి అధికారులు తెరలేపారు. గ్రామ, వార్డు సచివాలయాల్లోని ఉద్యోగులకు రెండేళ్లు పూర్తయిన వారందరికీ సర్వీసు క్రమబద్దీకరణ చేస్తున్న తరుణంతో ఈ ప్రధాన అంశం తెరపైకి వచ్చింది. మెటర్నటీ లీవుతోపాటు, మెడికల్ లీవులు పెట్టిన వారికి సైతం సదరు సెలవులు పూర్తయ్యే వరకూ వారియొక్క సర్వీసు ప్రొబేషన్ డిక్లరేషన్ చేయడానికి నిబంధనలు అడ్డువస్తున్నాయని ప్రభుత్వం చెబుతోంది.

ఈ తరుణంలో గ్రామ, వార్డు సచివాలయ శాఖలో ఉన్న ఉద్యోగ సంఘాల నేతలు మాత్రం ప్రభుత్వానికి తమ తప్పులేదని చెప్పే ఉద్దేశ్యంలో మహిళా ఉద్యోగుల ప్రసూతి సెలవులను, ఇతరుల మెడికల్ లీవ్ లను పరిగణలోకి తీసుకోకుండా వారికి సర్వీసులు రెగ్యులర్ చేయాలని ఒక అర్జీ పెట్టి ఊరకుండిపోయింది. అర్జీతోపాటు రెండేళ్లుపాటు కరోనా వైరస్ భయంకరంగా విజ్రుంభించిన వేళ ప్రాణాలకు తెగించి విధులు నిర్వహించారని గానీ, ప్రస్తుతం కూడా సాధారణ సెలవుల్లోకూడా ఉచితంగానే అదనపు విధులు సచివాలయ ఉద్యోగులు చేస్తున్నారని గానీ, రెండేళ్లలో పేస్కేలు జీతంలో చాలా కోల్పోయారని కానీ, ప్రత్యేక సమయంలో అదనపు పనిగంటలు కార్యాలయాల్లో పనిచేస్తున్నారని గానీ, కోవిడ్ వేక్సినేషన్ లో ప్రత్యేకంగా విధులు నిర్వహిస్తున్నారనే అంశాలను ఆ అర్జీలో పొందు పరచలేదు. సచివాలయ ఉద్యోగులతో ప్రభుత్వం ఏ స్థాయిలో పనిచేయించుకుందో వాస్తవానికి ప్రభుత్వానికే తెలియాలి. గ్రామ, వార్డు సచివాలయాలు ఏర్పాటు చేసిన తరువాత రికార్డుస్థాయిలో కోవిడ్ సమయంలోనూ ఉద్యోగులు పనిచేశారని, చాలా మంది కోవిడ్ భారిన పడి ప్రాణాలు కూడా కోల్పోయారని.. ఇన్ని తెలిసిన ప్రభుత్వం ఉద్యోగుల సర్వీసు రెగ్యులరైజేషన్ చేసే సమయంలో నిబందన కొర్రీలు పెట్టడం చాలా ఆవేదనకు గురి చేస్తుందని సచివాలయ ఉద్యోగులు విచారం వ్యక్తం చేస్తున్నారు. అందునా మహిళా ఉద్యోగులైతే బిడ్డలకు జన్మనిచ్చిన సమయంలో తీసుకున్న సెలవులే తమకు శాపాలయ్యాయని పడుతున్న బాధ వర్ణణా తీతం. ఈ తరుణంలో ప్రభుత్వం ఏవిధంగా అయితే సర్వీసు నిబంధనలను పక్కన పెట్టి సాధారణ సెలవుల్లోనూ, కరోనా స్పెషల్ డ్యూటీ, రెండవ శనివారాల్లో ఇంటింటి సర్వేలు, పంచాయతీ పన్నులు వసూళ్లు, మదింపులు విధులు సచివాలయ ఉద్యోగులతో ఉచితంగానే చేయించుకుందో..అదే రీతిగా వీరి ప్రసూతి, మెడికల్ లీవ్ లను పరిగణలోకి తీసుకోకుండా రెండేళ్లు పూర్తయిన ఉద్యోగులకు సర్వీసులు రెగ్యులర్ చేయాల్సి వుందని పరిశీలకులు భావిస్తున్నారు. చూడాలి.. అదనపు పని చేయించుకోవడానికి నిబంధనలు అడ్డురావు కానీ.. సర్వీసు రెగ్యులైజేషన్ కి మాత్రం ఖచ్చితంగా నిబంధనలు వర్తిస్తాయని చెబుతుందా.. లేదంటే ప్రభుత్వం కోసం, ప్రజలకు సేవలు అందించడం కోసం సెలవు రోజుల్లో చేసిన అదనపు సెలవులను గుర్తుంచుకొని అందరికీ రెండేళ్లు పూర్తికాగానే ప్రొబేషన్ డిక్లేర్ చేసి సర్వీసులు రెగ్యులర్ చేస్తుందో..!

ఆంధ్రప్రదేశ్ ప్రభుత్వం గ్రామ సచివాలయాల్లో పనిచేస్తున్న గ్రేడ్-5 కార్యదర్శిలకు జీఓనెంబరు.149 ద్వారా అధికారాలు బదలాయించే విషయంలో పంచాయతీరాజ్ శాఖ ముఖ్య కార్యదర్శి, కమీషనర్ ఇంకామీన మేషాలు లెక్కిస్తూనే ఉన్నారు. ఓ పక్క ముఖ్యమంత్రి వైఎస్.జగన్మోహనరెడ్డి నెత్తీనోరూ కొట్టుకుంటూ ఏపనైనా ప్రభుత్వ జీఓ ప్రకారమే ఖచ్చితంగా చేయాలని ప్రతీ సమావేశంలో ఆదేశించినా.. జీఓలను అతిక్రమమించ వద్దని సూచించినా పంచాయతీరాజ్ శాఖ అధికారులకు మాత్రం పట్టడం లేదు. ఫలితంగా గ్రామసచివాలయ వ్యవస్థ ఏర్పాటై అక్టోబరు 2 నాటికి రెండేళ్లు పూర్తిచేసుకున్నా ఇంకా రాష్ట్రవ్యాప్తంగా గ్రామ సచివాలయాల్లో పనిచేస్తున్న గ్రేడ్-5 పంచాయతీ కార్యదర్శిలు ఎలాంటి అధికారాలకు నోచుకోలేదు. పేరుకి సచివాలయంలో కార్యదర్శిగా ఉన్నా ఎలాంటి అధికారం ప్రభుత్వం కల్పించకపోవడం వీరంతా నేటికీ ఉత్సవ విగ్రహాల్లానే నిలబడాల్సి వస్తుంది. అసలు తమను ప్రభుత్వం ఏ ఉద్దేశ్యంతో సచివాలయాలకు కార్యదర్శిలుగా నియమించిందో అర్ధం కావడం లేదని, అమలు చేయని జీఓలను ఎందుకు విడుదల చేసిందో తెలియడం లేదని గ్రేడ్-5 కార్యదర్శిలంతా తీవ్ర నిరసన వ్యక్తం చేస్తున్నారు. ప్రస్తుతం పనిచేస్తున్న గ్రేడ్-1 నుంచి గ్రేడ్-4  పంచాయతీ కార్యదర్శిలకంటే అత్యధికంగా పంచాయతీల్లో పనులు చేస్తున్నా,  తమను మాత్రం ప్రభుత్వం చిన్నచూపే చూస్తుందని ఫలితంగా ప్రజలకు అధికారికంగా ఎలాంటి సేవలు అందించలేని స్థితిలో ఉన్నామని వాపోతున్నారు. దేశం మొత్తం తొంగిచూసేవిధంగా ఒక వ్యవస్థను ఏర్పాటు చేసి దానికి తమను సిబ్బందిగా నియమించిందనే పేరు, ఆనందం కంటే.. నియమించి ఎలాంటి అధికారాలు ఇవ్వలేదనే బాధ, నిరాసే అధికంగా వుందని కార్యదర్శి మొహాలు చిట్లిస్తున్నారు. ఒక దశలో తాము ఎందుకు పనిచేస్తున్నామో తెలియడం లేదంటూ ఆవేదన వ్యక్తం చేస్తున్నారు. దేశంలో ఏ రాష్ట్రప్రభుత్వమైనా ఒక జీఓను విడుదల చేస్తే దానిని అమలు చేస్తుందని..విచిత్రంగా జీఓ ఇచ్చిన తరువాత రెండేళ్లు గడిచినా జీఓలను అమలు చేయని రాష్ట్రప్రభుత్వ అధికారులను ఇక్కడే చూస్తున్నామని సచివాలయ సిబ్బంది చీదరించుకుంటున్నారు. ప్రజలకు ఏదో చేద్దామని ఎంతో ఉన్నత ఆశయంతో ఉద్యోగాల్లోకి చేరితే..నాటి నుంచి నేటి వరకూ ఏ అధికారం లేకుండా ఉన్న సిబ్బందిని సూపర్ వైజ్ చేయడానికి తాము పనిచేస్తున్నట్టు అవుతుందని చెబుతున్నారు. ఆదిలోనే పరిస్థితి ఇంత దారుణంగా ఉంటే ఇక రాబోయే రోజుల్లో ఇక జీఓలను పూర్తిగా తమ శాఖ ఉన్నతాధికారులే పక్కనపెట్టేస్తారని దానికి ప్రత్యేక ఉదాహరణ జిఓనెంబరు 149 గా నిలుస్తుందని అంటున్నారు.

మరోరా సారి కోర్టులో భంగపాటు తప్పదా..?

ఆంధ్రప్రదేశ్ ప్రభుత్వానికి హైకోర్టులో మరోసారి భంగపాటు పంచాయతీరాజ్ శాఖ ద్వారానే కలిగేటట్టు కనిపిస్తుందనే  సంకేతాలు స్పష్టంగా కనిపిస్తున్నాయి. ప్రభుత్వ వ్యతిరేక విధానాలు అవలంభించి, నిబంధనలను, జీఓలను అమలు చేయని శాఖగా అత్యధిక కోర్టు కేసులు ఎదుర్కొంటున్న  పంచాయతీరాజ్ శాఖ గ్రేడ్-5 కార్యదర్శిలు తమ అధికారాలు, విధులు, నిధులు బదాలాయింపు జీఓనెంబరు 149 ద్వారా చేయాలని కోర్టుకి వెళితే మరోసారి సారి వార్తల్లో నిలిచేలా వుందంటున్నారు విశ్లేషకులు. పంచాయతీరాజ్ శాఖ ముఖ్య కార్యదర్శి, కమిషనర్ లు ఉద్దేశ్య పూర్వకంగానే గ్రేడ్-5 కార్యదర్శిలకు రావాల్సిన అధికారాల బదాలాయింపు జీఓనెంబరు 149ని తొక్కిపెట్టారనే విషయం ఇప్పటికే రెండేళ్లుగా స్పష్టమవుతూనే వుంది. దీనిని ప్రత్యేకంగా ప్రస్తావించే పనికూడా ఉండదు. వాస్తవానికి సర్వీసు నిబంధనల ప్రకారం అధికారులు, సిబ్బందికి ఇవ్వాల్సిన అధికారాలన్నీ ప్రభుత్వం జీఓ ద్వారానే కల్పిస్తుంది. అలా అధికారాలు ఇవ్వడానికే ఇచ్చిన జీఓనెంబరె 149ని మాత్రం గ్రేడ్-5 కార్యదర్శిలకు ప్రభుత్వం ఇప్పటి వరకూ అలుచేసి అధికారాలు కల్పించలేదు. అధికారాలులేని ఉద్యోగం కల్పించడం ఎందుకని రేపుపొద్దున్న వీరంతా వేసిన కేసులో కోర్టు ప్రశ్నిస్తే అధికారులు అక్కడ కూడా తెల్లమొహం వేసే పరిస్థితి ఎదురవుతుంది. 

ఇప్పటికే డిడిఓ అధికారాలు పంచాయతీ కార్యదర్శి నుంచి వీఆర్వోలకు బదిలీ చేసిన విషయంలో కోర్టు నుంచి మొట్టికాయలు తిన్న పంచాయతీరాజ్ శాఖకు అప్పట్లో కోర్టు చేసిన కీలక వ్యాఖ్యలు..అదే పంచాయతీలు ఉండగా గ్రామసచివాలయాలు ఎందుకు అదనంగా ఏర్పాటు చేశారనే గుర్తున్నా.. ఆమాటలతో మళ్లీ డిడిఓ అధికారాలు పంచాయతీ కార్యదర్శిలకే అప్పగించినా.. ఎందుకనో గ్రేడ్-5 కార్యదర్శిల విషయంలో మాత్రం మొండి వైఖరి అవలంభిస్తోంది. ఈ సమయంలోనే తమ సర్వీసులు రెగ్యులర్ కాకుండా కోర్టు వ్యవహారాలకు దూరంగా ఉండాలని బావించిన గ్రేడ్-5 కార్యదర్శిలంతా సర్వీసు రెగ్యుల్ అయిన మరుక్షణం తమ అధికారాల కోసం కోర్టుకి వెళ్లి ప్రభుత్వాన్ని, పంచాయతీరాజ్ శాఖను ఇరకాటంలో పెట్టేందుకు సిద్ధమవుతున్నట్టు తెలిసింది. ఇంత వరకూ తాము అధికారులే జీఓనెంబరు 149 అమలు చేస్తారని భావించామని, ఈ విషయంలో ఎంపీడీఓలు, డీపీఓలు, జెసి, జిల్లా కలెక్టర్ ఆఖరికి పంచాయతీరాజ్ శాఖ ముఖ్యకార్యదర్శికి సైతం వినతి పత్రాలు ఇచ్చినా అవి బుట్టదాఖలే అయ్యాయని ఆరోపిస్తున్నారు. ఇలాంటి సమయంలో తమకి న్యాయం జరగాలన్నా, ప్రజలకు తమను నుంచి సేవలు అందాలన్నా అధికార బదలాయింపు జరగాల్సిందేనంటున్నారు గ్రేడ్-5 కార్యదర్శిలు. చూడాలి రాబోయే రోజుల్లో ఏం జరగబోతుందనేది..!

ఆంధ్రప్రదేశ్ ప్రభుత్వం ఎంతో ప్రతిష్టాత్మకంగా ప్రవేశపెట్టిన గ్రామ, వార్డు సచివాలయ ఉద్యోగుల రెండేళ్ల ప్రొభేషన్ డిక్లరేషన్, సర్వీసు రెగ్యులైజేషన్ కి సాంకేతిక కారణాలు, హైకోర్టులో దాఖలవుతున్న కేసులు ప్రతిబంధకంగా మారుతున్నాయి. ఈ కారణాలన్నీ గట్టెక్కాలంటే కనీసం 6 నెలల నుంచి ఏడాది సమయం పట్టే అవకాశాలు పుష్కలంగా కనిపిస్తున్నాయి. ఈ వార్త చదివే వారందరికీ కాస్త ఇబ్బందిగా ఉండొచ్చు. కాని సాంకేతిక కారణాలు, ఎదురుగా కనిపిస్తున్న సమస్యలు సంగతి తెలుసుకుంటే సచివాలయ ఉద్యోగులంతా ముక్కున వేలేసుకోక తప్పదు. వాస్తవానికి ఇదంతా ప్రభుత్వం కావాలని చేసినది కాకపోయినా రెగ్యులర్ జాబ్ కి పాటించాల్సిన నియమ నిబంధనలు ప్రభుత్వ శాఖలు ఖచ్చితంగా పాటించక తప్పని పరిస్థితి. అక్కడే అసలు చిక్కంతా వచ్చి పడింది. అదే సమయంలో కొందరు మండల అధికారులు, డివిజనల్ స్థాయి అధికారులు వారికేదో ప్రభుత్వం ప్రత్యేకంగా పిలిచి మరీ చెప్పినట్టుగా.. సచివాలయాల సందర్శనకు వచ్చిన సమయంలో పనిగట్టుకొని మరీ చేస్తున్న ప్రచారాలు కూడా గ్రామ, వార్డు సచివాలయ ఉద్యోగుల్లో ఆందోళన మరింత పెంచేస్తున్నాయి. దీనితో సచివాలయ ఉద్యోగాలు రెండేళ్ల ప్రొబేషన్ పీరియడ్ సమయంలో కాకుండా మరో ఆరు నెలల నుంచి ఏడాది కాలం పట్టేయవచ్చే ప్రచారం ఊపందుకుంది. సాంకేతిక కారణాలు, కొందరు అధికారులు చేస్తన్న ప్రచార విషయం ఇదే శాఖలో వున్న కొందరు ఉద్యోగ సంఘాల నేతలకు సైతం తెలియకపోవడం, వారికి తోచినట్టుగా ప్రకటనలు మీడియాకి జారీ చేయడం పరిస్థితి తీవ్రతకు అద్దం పడుతున్నాయి.

గ్రామ, వార్డు సచివాలయాలు ఏర్పాటై అక్టోబరు 2 నాటికి రెండేళ్లు పూర్తయ్యాయి. రాష్ట్రంలోని 13 జిల్లాల్లో 10వేల 4 గ్రామ, వార్డు సచివాలయాల్లో సుమారు ఒక లక్షా 24వేలకు పైగా ఉద్యోగులు ప్రస్తుతం విధులు నిర్వహిస్తున్నారు. అందులో అత్యధిక శాతం మంది ఉద్యోగులు అక్టోబరు నెలలోనే విధుల్లోకి చేరలేదు. అక్టోబరు నుంచి ఫిబ్రవరి వరకూ విధుల్లోకి చేరిన వారూ ఉన్నారు. అంటే వారు విధుల్లో చేరిన దగ్గర నుంచి రెండేళ్లు పూర్తిస్థాయిలో సర్వీసు పూర్తిచేసుకుంటేనే ఉద్యోగుల సర్వీసులు రెగ్యులర్ చేయడానికి ప్రభుత్వానికి ఆస్కారం వుంటుంది. అలా కాకుండా మెడికల్ లీవులు పెట్టినా, ప్రసూతి సెలవులు పెట్టి మళ్లీ సర్వీసు రెగ్యులైజేషన్ ను వాడుకున్న సెలవులన్నీ పూర్తి అయ్యేవరకూ అంటే.. విధుల్లోకి చేరిన తేది తరువాత ఆరునెలలు దాటితేనే(ప్రసూతి, మెడికల్ సెలవులకు అయితే) వారి ఉద్యోగాలు రెగ్యులర్ చేయడానికి మాత్రమే వీలుపడుతుంది. అంతేకాకుండా ఈ మధ్యకాలంలో కోవిడ్ వైరస్ వచ్చి 14 రోజులు మెడికల్ సెలవులు తీసుకున్నా, అంతకంటే అధికంగా సెలవులు తీసుకున్నా అదే పరిస్థితి ఉద్యోగులకు వర్తిస్తుంది. ఈ విషయం చాలా మంది ఉద్యోగులకు తెలియదు. ఈ అంశాలన్ని గ్రామ, వార్డు సచివాలయ ఉద్యోగులకు తప్పించాలని ఉద్యోగ సంఘాలు ప్రభుత్వానికి లేఖలు రాసినా, సర్వీసు రూల్స్ ని రెగ్యులర్ ఉద్యోగులకు ఖచ్చితంగా అమలు చేసి తీరక తప్పని పరిస్థితి ప్రభుత్వానిది. ఆ విధంగా నిబంధనలు పొందుపరిచారు.

ప్రభుత్వంలో ఏ శాఖలోని రెగ్యులర్ జాబ్ అయినా ప్రొబేషన్ పూర్తి అయి సర్వీస్ రెగ్యులర్ కావాలంటే.. ఖచ్చితంగా రెండేళ్లు ప్రొబేషన్ పూర్తిచేసుకొని తీరాల్సిందే. దీర్ఘకాలిక సెలవులు పెట్టకూడదు. శాఖపరమైన శిక్షణ పూర్తిచేసుకొని ఉండాలి. డిపార్ట్ మెంటల్ టెస్టులు కూడా ఖచ్చితంగా పాసై వుండాలి. అన్నింటికంటే మించి ప్రభుత్వ ఉద్యోగికి సర్వీస్ రెగ్యులర్ కావాలంటే సర్వీస్ రిజిస్టర్(ఎస్.ఆర్) ప్రారంభంతో పాటు పోలీస్ వెరిఫికేషన్ పూర్తి అయి వుండాలి. అవన్నీ ఏ ఉద్యోగి అయితే క్లియర్ చేసుకుంటారో వారికి మాత్రమే ప్రభుత్వం సర్వీసుని రెగ్యులర్ చేస్తుంది. అలాకాకుండా ఏ ఒక్కటి మిగిలిపోయినా వారి సర్వీసు అనుకున్న సమయానికి రెగ్యులర్ కాకపోగా, నిబంధనలను అనుసరించి సమయం వచ్చే వరకూ ప్రభుత్వానికి సర్వీసు రెగ్యులర్ చేసే అవకాశం వుండదు. అందులోనూ ఆంధ్రప్రదేశ్ లో భారీ స్థాయిలో నోటిఫికేషన్ ఇచ్చి డిస్ట్రిక్ట్ సెలక్షన్ కమిటీ ద్వారా ఎంపికైన సచివాలయ ఉద్యోగుల విషయంలో ఏ నిబంధన అమలు చేయకపోయినా సదరు శాఖ జిల్లా అధికారులు, డిఎస్సీ చైర్మన్, జిల్లా కలెక్టర్ ఇరకాటంలో పడే అవకాశాలు మెండుగా ఉన్నాయి.

ఇక గ్రామ, వార్డు సచివాలయ శాఖలో సాంకేతిక కారణాలను ఒక్కసారి పరిశీలిస్తే.. రాష్ట్రవ్యాప్తంగా ఈ శాఖలో ఉన్న ఉద్యోగులంతా వారి విధుల్లోకి ఒకే సమయానికి చేరలేదు. అక్టోబరు 2 నుంచి ఫిబ్రవరి నెలాఖరు వరకూ విధుల్లో చేరుతూనే ఉన్నారు. అలా చూసుకుంటే వీరి ప్రొబేషన్ సమయం పూర్తవ్వాలంటే ఫిబ్రవరి వరకూ ఆయా ఉద్యోగుల విధుల్లో చేరిన నెలను బట్టి ఆధార పడి వుంటుంది. అంతేకాకుండా అన్నిశాఖల ఉద్యోగులకు శాఖాపరమైన శిక్షణ పూర్తికాలేదు. చాలా మందికి డిపార్ట్ మెంటల్ పరీక్షలు కూడా పూర్తికాలేదు. అన్నింటికంటే మించి 60శాతం ఉద్యోగులకు పోలీస్ వెరిఫికేషన్ ఇంకా పూర్తికాలేదు. కొన్నిశాఖల ఉద్యోగులకు డిపార్ట్ మెంటల్ పరీక్షలు పూర్తయినా వారు పాస్ అయ్యారో, లేదో వారి ఫలితాలు వెలువడకపోవడం కూడా మరో కారణం. వీటితోపాటు పలు కేసులు హైకోర్టులో ఫైనల్ జడ్జిమెంట్ రాకపోవడం. ఇంత వరకూ ఒక ఎత్తైతే కొందరు మండల అధికారులు, డివిజనల్ స్థాయి అధికారులు సచివాలయ ఉద్యోగుల సర్వీసు రెగ్యులైజేషన్ కావడానికి మరో ఏడాది సమయం పడుతుందని, అప్పటి వరకూ ఇప్పుడిచ్చే జీతం రూ.15వేలు కాకుండా రూ.20వేలకు పెంచి ఇస్తారని ప్రచారం చేస్తున్నారు. కాగా అక్టోబరు 2 నాటికి ఎంతమంది ఉద్యోగులకైతే రెండేళ్లు పూర్తయిందో వారి సర్వీసులను సర్వీస్ రూల్స్ ను అనుసరించి రెగ్యులర్ చేయాలంటూ గ్రామ, వార్డు సచివాలయ ముఖ్యకార్యదర్శి నుంచి వచ్చిన సర్క్యులర్ ఆధారంగా జిల్లాల్లో గ్రామ,వార్డు సచివాలయ జెసీలు ఉద్యోగుల ప్రొబేషన్ డిక్లరేషన్ రిపోర్టులు సిద్ధం చేస్తున్నారు. అదీ కూడా పైన పేర్కొన్న అంశాలను పరిగణలోకి తీసుకొని మాత్రమే. 

మరోపక్క గ్రామ,వార్డు సచివాలయ ఉద్యోగుల ప్రొబేషన్ డిక్లరేషన్ విషయంలో ప్రసూతి సెలవుల అంశాన్ని పరిగణలోకి తీసుకోకుండా సర్వీసు రెగ్యులర్ చేయాలని, మెడికల్ లీవులు(కరోనాలీవ్,  సిక్ లీవ్)ను కూడా పరిగణలోకి తీసుకోకుండా చూడాలని ఉద్యోగ  సంఘాలు చేసిన వినతిపత్రాలను కూడా ప్రభుత్వం పరిగణలోకి తీసుకుంది(ఇంకా పరిశీలన దశలోనే ఉంది). అంతా బాగుంది అనుకుంటే మహిళా పోలీసులను జీఓ నెంబరు 59 ద్వారా పోలీసుశాఖలో విలీనం చేయడం చట్టవిరుద్దమంటూ హైకోర్టులో కేసుపడటం, అంతేకాకుండా జీవో నెంబరు 2 ద్వారా గ్రామకార్యదర్శిలకు కాకుండా వీఆర్వోలకు డీడీఓ అధికారాలు కట్టబెట్టిన అంశం కూడా హైకోర్టు పరిధిలోనే వుంది. ఈ విషయంలో ప్రతివాది పంచాయతీలు ఉండగా ఎందుకు గ్రామసచివాలయాలను ఏర్పాటు చేయాల్సివచ్చిందనే ఘాటు వ్యాఖ్యలను కూడా హైకోర్టు చేయడం ప్రభుత్వం తీవ్రంగానే పరిగణలోకి తీసుకుంది. పైగా సుమారు 5 నుంచి 10 శాతం మంది ఉద్యోగులు లంచం తీసుకుంటూ ఏసీబీకి పట్టుబడటం, మరి కొందరు ఉద్యోగులను జెసిలు, జిల్లా కలెక్టర్లు కొన్ని కొన్ని శాఖాపరమైన అంశాల్లో సస్పెండ్లు చేయడం(కొందరికైతే ఇంకా రీపోస్టింగ్ ఆర్డర్లు కూడా ఇవ్వలేదు) ఇలా ఉద్యోగుల సర్వీసు రెగ్యులైజేషన్ కు అడుగడుగునా అవాంతరాలే కనిపిస్తున్నాయి. అయితే ప్రభుత్వం నుంచి వచ్చిన ఉత్తర్వలను, సర్వీసు నిబంధనలను  అనుసరించి 19ప్రభుత్వ శాఖల్లో ఉద్యోగులకు సంబంధించి జిల్లా అధికారులు జాబితాలను సిద్దం చేస్తున్నప్పటికీ పరిస్థితి ఇప్పుడప్పుడే తీరేటట్టుగా అయితే కనిపించడం లేదనే విషయం ఎదరుగా వున్న కొరకరాని కొర్రీలే స్పష్టం చేస్తున్నాయి. చూడాలి ప్రభుత్వం గ్రామ, వార్డు సచివాలయ ఉద్యోగుల విషయంలో ఎలాంటి నిర్ణయం తీసుకుంటుంది.. వీరి సర్వీసును రెండేళ్లు ప్రొబేషన్ పూర్తిచేసుకున్నవారికి ఎంతమందికి సర్వీసు రెగ్యులర్ చేస్తుందో.. పేస్కేలు ఏవిధంగా  అమలు చేస్తుందో..!

ఆంధ్రప్రదేశ్ రాష్ట్ర హైకోర్టు ప్ర‌ధాన న్యాయ‌మూర్తి  ప్ర‌శాంత్ కుమార్ మిశ్రా శుక్రవారం ఉదయం తిరుమల శ్రీ వేంకటేశ్వర స్వామి వారిని దర్శించుకున్నారు. సతీసమేతంగా ఆలయం వద్దకు వచ్చిన జస్టిస్ ప్ర‌శాంత్ కుమార్ మిశ్రాకు ఈవో డాక్టర్ కె ఎస్ జవహర్ రెడ్డి, అద‌న‌పు ఈవో  ఎవి.ధ‌ర్మారెడ్డి క‌లిసి స్వాగతం పలికారు. ప్రధాన అర్చకులు శ్రీ వేణుగోపాల దీక్షితులు ఇతర అర్చకులు ఆయనకు ఇస్తికఫాల్ స్వాగతం పలికారు. స్వామివారి దర్శనం అనంతరం రంగనాయకుల మండపంలో చీఫ్ జస్టిస్ కు పండితులు వేద ఆశీర్వాదం చేశారు.  అనంత‌రం ఈవో, అదనపు ఈవోలు కలిసి  ప్ర‌శాంత్ కుమార్ మిశ్రాకు స్వామివారి తీర్థ ప్రసాదాలు, చిత్ర పటం, అగరబత్తులు, 2022 డైరీ క్యాలెండరు అందజేశారు.  శ్రీవారి దర్శనం అనంతరం జస్టిస్ ప్ర‌శాంత్ కుమార్ మిశ్రా దంపతులు అఖిలాండం వద్ద  కర్పూరం వెలిగించి కొబ్బరికాయ కొట్టారు. తరువాత శ్రీ బేడీ ఆంజనేయ స్వామి వారిని దర్శించుకున్నారు.  ఈ కార్యక్రమంలో సుప్రీంకోర్టు న్యాయమూర్తులు జస్టిస్ జేకే మహేశ్వరి, జస్టిస్ హిమా కోహ్లీ, ఆంధ్రప్రదేశ్  హైకోర్టు  న్యాయమూర్తులు జస్టిస్ ల‌లిత‌కుమారి, జస్టిస్ స‌త్య‌నారాయ‌ణ మూర్తి, ఛత్తీస్‌గఢ్ హైకోర్టు న్యాయమూర్తి జస్టిస్ పార్త్ ప్రతీం సాహు, జస్టిస్  నరేంద్ర కుమార్ వ్యాస్, కేరళ హైకోర్టు న్యాయమూర్తి జస్టిస్ పి.సోమరజన్, సివిఎస్వో  గోపినాథ్ జెట్టి, ఇత‌ర అధికారులు పాల్గొన్నారు.

ఆంధ్రప్రదేశ్ ముఖ్యమంత్రి  వైఎస్ జగన్మోహన్ రెడ్డి చాలా సాధారణంగా ఉంటూ సంప్రదాయాలకు విలువ ఇచ్చేవ్యక్తి అని మంత్రాలయం పీఠాధిపతి శ్రీశ్రీశ్రీ సుబుదేంద్ర తీర్థ స్వామి చెప్పారు. టీటీడీ చైర్మన్  వైవి సుబ్బారెడ్డి దంపతులు, ఈవో డాక్టర్ కెఎస్ జవహర్ రెడ్డి దంపతులు, అదనపు ఈవోధర్మారెడ్డి దంపతులు మంగళవారం తిరుమల లోని శ్రీ రాఘవేంద్ర స్వామి మఠాన్ని సందర్శించి స్వామి వారి పూజలో పాల్గొన్నారు. అనంతరం వీరు పీఠాధిపతి శ్రీశ్రీశ్రీ సుబుదేంద్ర తీర్థ స్వామివారిని కలిసి ఆశీస్సులు తీసుకున్నారు. ఈ సందర్భంగా శ్రీశ్రీశ్రీ సుబుదేంద్ర తీర్థ స్వామి మాట్లాడుతూ, రాఘవేంద్రస్వామివారి కుల దైవం శ్రీ వేంకటేశ్వర స్వామి అన్నారు. బ్రహ్మోత్సవాల సందర్భంగా తిరుమలకు రావడం ఇదే తొలిసారి అని చెప్పారు. స్వామివారి ఆదేశంతో తిరుమల కు వచ్చి శ్రీ వేంకటేశ్వర కన్నడ భక్తి ఛానల్ ప్రారంభ కార్యక్రమంలో పాల్గొనడం స్వామివారి దయతోనే జరిగిందన్నారు. కార్యక్రమం చాలా బాగా, సంప్రదాయ బద్దంగా నిర్వహించారని టీటీడీని అభినందించారు.