ENS Live Breaking News

Tadepalli

2021-08-05 03:29:34

ప్రభుత్వ తప్పిదం.. సచివాలయ ఉద్యోగులకు ఇరకాటం..

ఆంధ్రప్రదేశ్ లోని గ్రామ, వార్డు సచివాలయ ఉద్యోగుల పరిస్థితి పెనం పై నుంచి పొయ్యిలో పడ్డట్టు అయ్యింది. అక్టోబరు 2వ స్తే సచివాలయాలు ఏర్పాటు చేసి రెండేళ్లు పూర్తవుతుంది. ప్రభుత్వ నిబంధన ప్రకారం రాష్ట్రంలోని 13 జిల్లాల్లోని 15వేల సచివాలయాల్లోని లక్షా 20 వేల మంది ఉద్యోగుల సర్వీసును ప్రభుత్వం రెగ్యులర్ చేయాల్సి వుంది. అయితే అదే సమయంలో ఉద్యోగుల సర్వీసు రెగ్యులర్ కావాలంటే క్రెడిట్ బేస్డ్ అసెస్ మెంట్ సిస్టం(సిబీఏసి) పరీక్షను పెడతామని, అది పాసైతే ప్రొబేషన్ అన్న ప్రభుత్వం ఇపుడు అలాంటి పరీక్షలేవీ లేవని, పెట్టబోమని ముఖ్యమంత్రి వైఎస్ జగన్మోహనరెడ్డి ప్రత్యేక కార్యదర్శి అజయ్ కల్లాం ప్రకటించి ఇక్కడో మెలిక పెట్టారు. సిబీఏసి పరీక్ష అయితే ఉండదు గానీ.. ఆయా శాఖలకు చెందిన డిపార్ట్ మెంటల్ టెస్టులు పాసవ్వాల్సి వుంటుందని ఇపుడు ప్రకటించారు. వాస్తవానికి 16 ప్రభుత్వ శాఖల్లోని సచివాలయ ఉద్యోగులకు వీరి ఉద్యోగాలకు సంబంధించి శాఖల వారీగా అందరికీ జీఓలు గానీ, గెజిట్ పబ్లికేషన్లు గానీ ప్రచురించలేదు. అలా ఏశాఖ ఉద్యోగులకై గెజిట్ పబ్లికేషన్లు ప్రకటించారో, జీఓవో పలానా శాఖ డిపార్ట్ మెంటల్ టెస్టులు పాసవ్వాలని పెట్టారో ఆ మేరకు కొందరే పరీక్షలు రాసి ఉత్తీర్ణులయ్యారు. మరికొందరు తమ సర్వీసులు రెగ్యులర్ అయిన తరువాత పదోన్నతుల కోసం తర్వాత రాసుకుందామని వదిలేశారు. కాలక్రమంలో 2 నెలలు తక్కువ రెండేళ్లు గడిచిపోతున్నాయి. దీనంతో కధ మళ్లీ మొదటికి వచ్చింది. ఇపుడు తాజాగా ప్రభుత్వం సర్వీసు రెగ్యులర్ కావాలంటే సచివాలయ ఉద్యోగులకు నిర్ధేశించిన(ఇప్పటికీ కొందరు ఉద్యోగులకు జీఓలు విడుదలచేయకపోయినా) డిపార్ట్ మెంటల్ పరీక్షలు పాసవ్వాలనేది కొత్త నిబంధన పెట్టారు.వాస్తవానికి రాష్ట్రప్రభుత్వం ఏశాఖలో అయినా రెగ్యులర్ ఉద్యోగాలను భర్తీచేసే సమయంలో ఇబ్బందులు తలెత్తకుండా ఉండేందుకు ముందుగానే ప్రత్యేక జీఓలు విడుదల చేసిన తరువాత వాటి ఆధారంగా భర్తీ కార్యక్రమం చేపడుతుంది. ఆపై గెజిట్ పబ్లికేషన్ చేపట్టి ఏ జీఓ ద్వారా అయితే ఉద్యోగాలు భర్తీ చేస్తున్నారో.. అందులోనే సర్వీసు రెగ్యులర్ కావడానికి ఏఏ డిపార్టమెంటల్ పరీక్షలు రాయాలో పొందుపరుస్తారు. దీనితో ఉద్యోగాల్లోకి చేరిన వారంతా వారి రెండేళ్ల ప్రొబేషన్ కాలంలో నాలుగు సార్లు నిర్వహించే డిపార్ట్ మెంటల్ పరీక్షలను పాసై తమ సర్వీసులను రెండేళ్లు పూర్తికాగానే రెగ్యులర్ చేయించుకుంటారు. కానీ గ్రామ, వార్డు సచివాలయ శాఖలోని సుమారు 16 రకాల ఉద్యోగాలను ప్రభుత్వం భర్తీ చేసే సమయంలో కేవలం గ్రేడ్-5 కార్యదర్శి ఉద్యోగాలకు మాత్రమే గెజిట్ నోటిఫికేషన్(రాజముద్ర) పబ్లిష్ చేసి.. మిగిలిన శాఖ ఉద్యోగుల విషయంలో ఎలాంటి ఉత్తర్వు విడుదల చేయకుండా ఉండిపోయింది. అలా రాజముద్ర విడుదల చేయకపోతే ప్రభుత్వ ఉద్యోగాలకు కూడా చట్ట బద్ధత ఉండదనేది ఒక అంశంగా చెబుతున్నారు విశ్లేషకులు. ఈ సమయంలోనే ప్రభుత్వం ఉద్యోగుల సర్వీసు రెగ్యులర్ కావాలంటే క్రెడిట్ బేస్డ్ అసెస్ మెంట్ సిస్టం(సిబీఏసి) పరీక్షను పెట్టం కానీ సచివాలయ ఉద్యోగులు డిపార్ట్ మెంటల్ టెస్టులు పాస్ కావాలని చెప్పడంతో... సదరు ఉద్యోగులు డిపార్టమెంటల్ పరీక్షలు పాసైన వారు ఆనందం వ్యక్తం చేస్తుండగా, పరీక్ష రాయని వారు తాము ఆ.. పరీక్షలు పాసయ్యేంత వరకూ రూ.15వేలు జీతంతోనే కాలం వెల్లదీయాలా అంటూ ఆందోళన వ్యక్తం చేస్తున్నారు.ప్రభుత్వం వివిధ శాఖల ప్రిన్సిపల్ సెక్రటరీలు, కమిషనర్లు ద్వారా శాఖ పరమైన జీఓలు ఉద్యోగాలు భర్తీ చేసే సమయంలో విడుదల చేస్తాయి. ప్రభుత్వం ఏ నిబంధన ద్వారా అయితే జీలో విడుదల చేసి జిల్లాల్లో కలెక్టర్లకు పంపుతారో దానిని సదరు ప్రభుత్వ శాఖ జిల్లా అధికారులు ఎంపీడీఓ ద్వారా సచివాలయాల్లోని ఉద్యోగులకు జీఓలోని అంశం చేరేటట్టు తెలియజేయాలి. తద్వారా కొత్తగా విధుల్లోకి చేరిన ఉద్యోగాలకు ప్రభుత్వం తమ ఉద్యోగాలకు సంబంధించి ఏఏ నిబంధనలు పెట్టిందో సిబ్బందికి తెలుస్తుంది. కానీ గ్రామ, వార్డు సచివాలయ శాఖ ఉద్యోగుల విషయంలో నేటికీ ఆవిధానం అమలు జరగడం లేదు. ఆ దిశగా ప్రయత్నాలు కూడా చేయలేదు. దీనితో ప్రస్తుతం గ్రామ, వార్డు సచివాలయాల్లో పనిచేసే ఉద్యోగులకు ఏ ఏ డిపార్ట్ మెంటల్ పరీక్షలు రాయాలో తెలియకుండా పోయింది. ఆ కారణంతోనే చాలా మంది ఉద్యోగులు డిపార్టమెంటల్ పరీక్షలు రాయలేదు. రెండేళ్ల పాటు ఆయా ప్రభుత్వ శాఖల ముఖ్యకార్యదర్శిలు, కమిషనర్లు ఈ విషయంలో లైట్ తీసుకోవడమే ఇపుడు ప్రధాన లోపంగా కనిపిస్తుంది. ఇపుడు 2 నెలల్లో సచివాలయ ఉద్యోగుల సర్వీసు రెగ్యులర్ అవుతుందని తెలిసిన వేళ.. సదరు ప్రభుత్వ శాఖల్లో ఏఏ డిపార్టమెంటల్ పరీక్షలు పాసైతేనే మీ సర్వీసులు రెగ్యులర్ అవుతాయని చెప్పడంతో ఉద్యోగుల గుండెల్లో మళ్లీ రాయి పడినట్టు అయ్యింది. ఉద్యోగాల్లోకి చేరి దాదాపు రెండేళ్లు కావొస్తున్న సమయంలో ప్రభుత్వం ఇప్పుడా ఆ డిపార్టమెంట ల్ పరీక్షల కోసం మెలిక పెట్టడమా అని ఉద్యోగులంతా ఆగ్రహం వ్యక్తం చేస్తున్నారు.ప్రభుత్వం ప్రకటించినట్టుగా ఖచ్చితంగా డిపార్టమెంటల్ టెస్టులు రెండేళ్ల ప్రొబేషన్ సమయంలోనే పాసవ్వాలనే నిభందన అమలు చేస్తే..ఈ విషయంలో ఆయా ప్రభుత్వశాఖల ముఖ్యకార్యదర్శిలు, జిల్లా కలెక్టర్లు, జిల్లాశాఖల అధికారులదే తప్పు అవుతుంది. కారణమేంటంటే ప్రభుత్వ శాఖలకు సంబంధించిన విధి విధానాలు ఏ జీఓ రూపంలో నేటికీ ప్రభుత్వం విడుదల చేయకపోవడమేనని ఉద్యోగులు బల్లగుద్ది చెబుతున్నారు. అప్పటికీ సమాచార హక్కుచట్టం దరఖాస్తు ద్వారా గ్రామ సంక్షేమ, విద్య సహాయకులు తమ పదోన్నతులు సంగతేంటని కోరినా.. రాష్ట్ర అధికారులే ఇంకా అలాంటి నిబంధనలు, ప్రత్యేక అంశాలు ఇప్పటి వరకూ ప్రభుత్వం ఏమీ పెట్టలేదని, ఒక వేళ పెడితే జిల్లా అధికారుల ద్వారా తెలియజేస్తామని, ఆ సమయంలో వారిని సంప్రదించాలని ఆ సమాచార హక్కుచట్టం దరఖాస్తులో జవాబుగా తెలియజేశారు కూడా. ఈ విషయం ఇప్పటిది కాదు 2020లో జరిగిన సంఘటన ఆ తరువాత కూడా ప్రభుత్వం గ్రామ, వార్డు సచివాలయ శాఖల్లో ప్రస్తుత పనిచేస్తున్న ఉద్యోగులు ఎవరైతే ఉన్నారో, ఎవరికైతే పదోన్నతులు, డిపార్ట్ మెంటల్ టెస్టుల విషయంలో క్లారిటీ ఇవ్వలేదు. కానీ ఇద్దామనుకుంటే సమయం చాలానే ఉండేది. కరోనా సమయంలో కాలం రివ్వున తిరిగిపోయినా.. అధికారులు ఎలాంటి జీఓలు విడుదల చేయలేదు. ఇపుడు తాజాగా సర్వీసులు రెగ్యులర్ కావాలంటే కనీసం డిపార్ట్ మెంటల్ పరీక్షలు పాసవ్వాలని ఎలా చెబుతున్నారో తమకు అర్ధం కావడం లేదని.. జిల్లా శాఖల అధికారులు కూడా ఈ విషయం తమకు నోటీసుల ద్వారా కూడా చెప్పలేదని వాపోతున్నారు. సర్వీసు రెగ్యులర్ లో తమకు అన్యాయం జరిగితే ప్రభుత్వం చేసిన నిర్లక్ష్యం, తప్పులను కోర్టుకి విన్నవించి న్యాయపోరాటం చేస్తామంటున్నారు ఏ సమాచారం లేకుండా డిపార్ట్ మెంట్ పరీక్షలు రాయకుండా ఉండిపోయిన అభ్యర్ధులంతా. నిజంగా అదే జరిగితే అటు రాష్ట్ర స్థాయిలో ప్రిన్సిపల్ సెక్రటరీ, ప్రభుత్వశాఖల ముఖ్య కార్యదర్శిలు, కమిషనర్, జిల్లా స్థాయిలో కలెక్టర్, సదరు జిల్లా అధికారులు కోర్టుముందు సమాధానం చెప్పాల్సి వస్తుంది. చేసిన తప్పు ఒప్పుకోవాల్సి వస్తుంది. అలాకాకుండా ఇపుడు వారి సర్వీసులను రెగ్యులర్ చేసి.. ఆపై కొంత సమయం ఇస్తున్నట్టు ప్రకటన చేసి అప్పటి కూడా సచివాలయ ఉద్యోగులు డిపార్ట్ మెంటల్ పరీక్షలు పాస్ కాపోతే అపుడు తమపై చర్యలు తీసుకోవచ్చునని ఉద్యోగులు ప్రభుత్వానికి విన్నవిస్తున్నారు. అటు ఉద్యోగ సంఘాల నేతలు కూడా తమ గ్రామ, వార్డు సచివాలయ ఉద్యోగాలను రెండేళ్లు పూర్తయిన సందర్భంగా రెగ్యులర్ చేయాలని ముఖ్యమంత్రి వైఎస్.జగన్మోహనరెడ్డికి వినతి పత్రాలు సమర్పించారు తప్పితే.. రాష్ట్ర అధికారులు చేసిన తప్పువలన నేటికీ చాలా మంది డిపార్టమెంటల్ పరీక్షలు రాయలేపోయారని, దానికి కారణం వివిధ శాఖల ఉద్యోగులకు నేటికీ పదోన్నతులు, డిపార్ట్ మెంటల్ పరీక్షలు, సర్వీసు రెగ్యులర్ కి సంబంధించి జీఓలు విడుదల చేయలేదని అడగక పోవడం విశేషం. దీనితో గ్రేడ్-5 పంచాయతీ కార్యదర్శిలు మాదిరిగానే అన్ని గ్రామ, వార్డు సచివాలయ ఉద్యోగులకు శాఖల వారీగా గెజిట్ నోటిఫికేషన్లు, జీఓలు విడుదల చేసి ఒక నిర్ధిష్ట్ ఉత్తర్వులు విడుదల చేస్తే తాము ఈ డిపార్టమెంటల్ పరీక్ష గందర గోళం విషయం నుంచి బయట పడతామని ఉద్యోగులంతా ముక్తకంఠంతో ప్రభుత్వాన్ని కోరుతున్నారు. ఈ క్రమంలో ప్రభుత్వం చేసిన తప్పును ఒప్పుకుంటుందా.. నాలుగైదు ప్రభుత్వ శాఖలను కలిపి ఇంజనీరింగ్ అసిస్టెంట్లను, నాలుగు శాఖలను కలిపి విద్యా, సంక్షేమ సహాయకులను, రెండు శాఖలను కలిపి సర్వేయర్ల ఉద్యోగాలు స్రుష్టించడం వలనే ఇప్పటి వరకూ ఏ శాఖ తరపున జీఓలు, గెజిట్లు విడుదలచేయక వదిలేశామని ఒప్పుకుంటారో.. లేదంటే తాము చెప్పకపోయినా ప్రస్తుత ప్రభుత్వ శాఖల జిల్లా అధికారుల నుంచి ఎందుకు మీరు దాదాపు రెండేళ్ల సమయం పూర్తవుతున్నా తెలుసుకోలేకపోయారని ఉద్యోగులపైనే నెపం అంతా నెట్టేస్తుందో..చూడాలి..!

తాడేపల్లి

2021-08-05 01:42:26

సచివాలయాల్లో సర్వీసు రూల్స్ ఎక్కడ..?

భారతదేశంలోనే ఆంధ్రప్రదేశ్ ప్రభుత్వం ఎంతో ప్రతిష్టాత్మకంగా ప్రవేశపెట్టిన గ్రామ సచివాలయ వ్యవస్థ మరో మూడు నెలల్లో రెండేళ్లు పూర్తిచేసుకోబుతున్నా నేటికీ కొన్నిశాఖల ఉద్యోగులకు సర్వీసు రూల్స్ ప్రభుత్వం తయారు చేయలేదు. ఈ విషయంలో ప్రభుత్వ ముఖ్యకార్యదర్శి సదరు శాఖలను ఆదేశించలేదో.. లేదంటే ఆ శాఖల ముఖ్య కార్యదర్శిలకు ఖాళీలేకనో తెలీదు కానీ ఉద్యోగుల సర్వీసు రూల్స్ ఫ్రేమ్ చేసే విషయంలో మాత్రం నేటికీ ఒక్క అడుగు కూడా పడలేదు. దానికి కారణం కూడా లేకపోలేదు. గ్రామ, వార్డు సచివాలయ శాఖలో కొందరు సిబ్బందిని నాలుగైదు శాఖలను కలుపుతూ ఒక ఉద్యోగంగా తయారు చేసింది ప్రభుత్వం. దీనితో ఏశాఖ తరపున వీరికి సర్వీసు రూల్సు తయారు చేయాలో తెలీక ప్రభుత్వం మధనపడుతోంది. మిగతాశాఖల ఉద్యోగులకు సర్వీసు నిబంధనలు, పదోన్నతల విషయంలో ఒక క్లారిటీ వచ్చినా మరికొన్నిశాఖల సిబ్బందికి క్లారిటీ రాకపోవడంతో వారి ఉద్యోగాలు రెగ్యులర్ అవుతాయా..? లేదా.. తాము జీవితాంతం ఇదే ఉద్యోగం చేయాలా.? అనే అనుమానంతో కొట్టిమిట్టాడుతున్నారు. ఇందులో ముఖ్యంగా విద్య, సంక్షేమ సహాయకులు, ఇంజనీరింగ్ అసిస్టెంట్లు, సర్వేయర్లు ప్రధానంగా ఉన్నారు. విద్య, సంక్షేమ సహాయకులను తీసుకుంటే వీరి ఉద్యోగం(బిసి, ఎస్సీ, ఎస్టీ, మైనార్టీ గల నాలుగు శాఖలను కలిపి ఒక ఉద్యోగాన్ని తయారు చేశారు), ఇక ఇంజనీరింగ్ అసిస్టెంట్ ను తీసుకుంటే(పంచాయతీరాజ్, ఇరిగేషన్, ఆర్ డబ్ల్యూఎస్, హౌసింగ్, ఎస్ఎస్ఏ ఇలా ఐదు ప్రభుత్వ శాఖల)ను కలిపి ఒక పోస్టుగా తయారు చేశారు. ఇక సర్వేయర్ల విషయానికొస్తే వీరు ప్రస్తుతం పనిచేసేది రెవిన్యూశాఖ అయినప్పటికీ, వీరికంటూ సర్వే శాఖ ఒకటుంది. అలాగనీ వీరు ఈ రెండు శాఖల అధికారులద దగ్గరా పనిచేస్తున్నారు. వీరంతా అన్ని శాఖలకు సంబంధించిన పనులూ చేస్తున్నప్పటికీ వీరికి ఏశాఖ నుంచి సర్వీసు నిబంధనలు అమలు చేయాలి, వీరికి సర్వీసులో ఏశాఖ నుంచి పదోన్నతి కల్పించాలి అనే విషయంలో క్లారిటీ లేదు.

ఈ మూడు శాఖలకు చెందిన సిబ్బంది 13 జిల్లాల్లోని 15వేల 4 గ్రామ, వార్డు సచివాలయాల్లో సుమారు 45వేలకు పైనే ఉన్నారు. ప్రస్తుతం అన్నిశాఖలకు సర్వీసు నిబంధనలు, పదోన్నతుల విషయంలో ప్రత్యేకంగా జీఓలు వచ్చినప్పటికీ వీరికి మాత్రం ఎలాంటి జీఓలు రాలేదు. దీనితో తాము ఏశాఖకు చెందిన ఉద్యోగులగా తమను ప్రభుత్వం గుర్తిస్తుందో తెలీక ఇబ్బందులు పడుతున్నారు. మరికొందరు ప్రభుత్వం ఇచ్చే జీతం చాలక.. ఉద్యోగాలకు రాజీనామాలు చేసి, మంచి ఉద్యోగాల్లో చేరిపోయారు. అంతేకాకుండా ప్రస్తుతం గ్రామ, వార్డు సచివాలయ శాఖలో 85శాతం ఉద్యోగులంతా పట్టభద్రులే అయినప్పటికీ, వీరి ఉద్యోగం నాల్గవ తరగతికి చెందినదా, 5వ తరగతికి చెందినదా..లేదంటే వీరిని ప్రభుత్వం ఒక ప్రత్యేక సంఖ్య ఉద్యోగులుగా గుర్తించినదా అనేదీకూడా తెలియడం లేదు. వాస్తవానికి ప్రస్తుతం ప్రభుత్వ శాఖల్లో పనిచేస్తున్న రెగ్యులర్ ఉద్యోగులకు, గ్రామ, వార్డు సచివాలయ శాఖలో పనిచేస్తున్న ఉద్యోగులకు చాలా వ్యత్యాసాలు ఉండటంతో ప్రభుత్వం కల్పించే పదోన్నతుల విషయంలో చాలా నిరసన వ్యక్తం చేస్తున్నారు. పోనీ రెగ్యులర్ ఉద్యోగం కదాని దైర్యం చేసి కొనసాగించుకుందామనుకున్నా..నేటికీ వీరందరికీ సర్వీసు రూల్సు లేకపోవడం, రెండేళ్ల ప్రొబేషన్ కాలం అక్టోబర్ 2తో పూర్తవడంతో తమను ఏ శాఖ కింద ఉద్యోగులుగా ప్రభుత్వం రెగ్యులర్ చేస్తుందోనని వీరిలో ఉత్కంఠ మొదలైంది. ఈ విషయమై ఇప్పటికే ఉద్యోగ సంఘాల నేతలతో ప్రభుత్వం ద్రుష్టికి తమ సమస్యలు తీసుకెళ్లినా ఫలితం లేకుండా పోయిందని ఈ మూడు శాఖల ఉద్యోగులు ఆవేదన చెందుతున్నారు.

మరోపక్క మిగిలిన శాఖలకు సంబంధించి సర్వీసు నిబంధనలు అమలు చేసినా, అవి మిగిలిన ప్రభుత్వశాఖల ఉద్యోగుల కంటే మరీ తక్కువ స్థాయి పదోన్నతులు మాత్రమే ఉన్నాయని చెబుతున్నారు. ఎన్నో ఆశలతో గ్రామ, వార్డు సచివాలయ శాఖలోకి ఉద్యోగులుగా చేరితే తమకి ప్రభుత్వం గుర్తింపు ఇచ్చే విషయంలో కనీసం ప్రాముఖ్యత ఇవ్వడం లేదని ఉద్యోగులంతా ఆగ్రహం వ్యక్తం చేస్తున్నారు. ఇప్పటికే కొందరు ఉద్యోగులు ఈ ఉద్యోగం కంటే మంచి ఉద్యోగాలు వచ్చాయని వెళ్లిపోవడంతో, మరికొంత మంది ప్రభుత్వం ఇచ్చే జీతాలు సరిపోవడం లేదని ఉన్న ఉద్యోగాలను వదిలి వెళ్లిపోతున్నారు. ఇలా రాష్ట్రవ్యాప్తంగా సుమారు రెండు వేల ఉద్యోగాలకు పైగా ఖాళీలు ఏర్పడగా, మరికొన్ని ఉద్యోగాలను ప్రభుత్వం ఇంకా భర్తీచేయకుండానే వదిలేసింది.. ఇంత జరుగుతున్నా ప్రభుత్వం మాత్రం నిమ్మకు నీరెత్తినట్టుగానే వ్యవహరిస్తోంది తప్పితే.. వీరి సర్వీసు రూల్సు, పదోతన్నల విషయంలో ఒక క్లారిటీ ఇచ్చే పనికి మాత్రం పూనుకోవడంలేదు. మరో విచిత్రం ఏంటంటే మరో మూడు నెలల్లో సర్వీసులు రెగ్యులర్ చేయాలనే ఉద్దేశ్యంతో మాత్రం ఉద్యోగులందరికీ సర్వీసు రిజిస్టర్లు ఓపెన్ చేసింది ప్రభుత్వం. అక్టోబరు 2 తరువాత ఆ రిజిస్టర్ లో ఆయా ప్రభుత్వ శాఖలు సర్వీసు నిబంధనల ఆధారంగా ఎంట్రీలు జరపాల్సి వుంటుంది. మరి ఆ సమయంలో ఏ ప్రభుత్వశాఖ కింద ఈ ఉద్యోగులను చేర్చుతూ ప్రభుత్వం నిర్ణయం తీసుకుంటుందో తెలియన పరిస్థితి నెలకొంది. ఏం జరుగుతుందనేది మాత్రం అక్టోబరు 2 దాటేవరకూ ఒక కొలిక్కి వచ్చే సూచనలు మాత్రం కనిపించడం లేదు..!

Tadepalle

2021-08-04 02:09:30

ఈఎన్ఎస్ వార్తకు స్పందన.. సచివాలయ ఉద్యోగుల సిబిఏసీ పరీక్ష రద్దు..

ఆంధ్రప్రదేశ్ ప్రభుత్వం గ్రామ, వార్డు సచివాలయ ఉద్యోగులకు శుభవార్త చెప్పింది. అక్టోబరు 2 నాటికి ఉద్యోగులందరికీ రెండేళ్ల ప్రొభేషన్ పూర్తయ్యే సమయానికి పెట్టాలనుకున్న క్రెడిట్ బేస్డ్ అసెస్ మెంట్ సిస్టం(సిబీఏసి) పరీక్షను రద్దు చేస్తున్నట్టు ముఖ్యమంత్రి వైఎస్.జగన్మోహనరెడ్డి ప్రకటించారు. ఈ పరీక్ష వలన ఉద్యోగులు పడుతున్న ఇబ్బందులను, సాంకేతిక కారణాలను, అవసరమైతే కోర్టుకు వెళ్లాలనుకున్న విషయాన్ని కూడా ఈఎన్ఎస్ నేషనల్ న్యూస్ ఏజెన్సీ మరియు అధికారికి మొబైల్ న్యూస్ యాప్ ఈఎన్ఎస్ లైవ్, www.enslive.net ద్వారా ప్రత్యేక కధనాలను ప్రచురించింది. దీనితో రెండేళ్లపాటు సర్వీసులు అందించిన సచివాలయ ఉద్యోగులకు సిబిఏసీ పరీక్షను రద్దు చేస్తున్నట్టు సీఎం ప్రకటించారని, ఆయన ముఖ్య సలహాదారు అజయ్ కల్లాం వెల్లడించారు. సీఎం సర్వీసు రెగ్యులైజేషన్ కి సంబంధించిన ఈ పరీక్షలో మినహాయింపు ఇవ్వడం పట్ల గ్రామ, వార్డు సచివాలయ ఉద్యోగులు ఆనందం వ్యక్తం చేస్తున్నారు. మొదటి నుంచి గ్రామ, వార్డు సచివాలయ శాఖలోని అన్ని రకాల ముఖ్యవిషయాలను ప్రభుత్వం ద్రుష్టికి తీసుకెళ్లడంలో కీలక పాత్ర వహిస్తూ.. తమకు సహాయ సహకారాలు అందిస్తున్న ఈఎన్ఎస్ న్యూస్ ఏజెన్సీ కార్యాలయానికి సచివాలయ ఉద్యోగులు ఫోన్లు చేసి తమ ఆనందాన్ని పంచుకున్నారు. ఈ విషయంలో ఉద్యోగులంతా సీఎం వైఎస్.జగన్మోహనరెడ్డికి ధన్యవాదములు తెలియజేశారు.

తాడేపల్లి

2021-08-03 02:11:18

ఈఎన్ఎస్ వార్తకు స్పందన.. విలేజ్ క్లినిక్స్ లోనూ మెడికల్ టెస్టులు..

ఆంధ్రప్రదేశ్ ప్రభుత్వం గ్రామ సచివాలయాలకు ఆనుకుని నిర్మిస్తున్న విలేజ్ క్లినిక్స్ లలో 14 రకాల మెడికల్ టెస్టులు చేయడానికి నిర్ణయించింది. గతంలో కేవలం మందులను, సిబ్బందిని మాత్రమే ఏర్పాటు చేస్తున్నట్టు ప్రకటించడంతో, నాటి దివంగత ముఖ్యమంత్రి డా.వైఎస్సార్ కలను ప్రస్తావిస్తూ ఈఎన్ఎస్ నేషనల్ న్యూస్ ఏజెన్సీ మరియు అధికారికి మొబైల్ న్యూస్ యాప్ ఈఎన్ఎస్ లైవ్, www.enslive.net ద్వారా ప్రత్యేక కధనాలను ప్రచురించింది. దీనితో స్పందించిన సీఎం వైఎస్.జగన్మోహనరెడ్డి నేత్రుత్వంలోని ప్రభుత్వం ప్రాధమిక వైద్యం అందించేచోట, ప్రాధమిక వైద్యపరీక్షలు కూడా అందుబాటులో తేవాలని సంకల్పించింది. ఆపై మందుల సంఖ్యను తగ్గిస్తూ.. మెడికల్ టెస్టులను విలేజ్ క్లినిక్ లలో ఏర్పాటు చేయాలని నిర్ణయించింది. ఈమేరకు ముఖ్యమంత్రి అధ్యక్షతన జరిగిన సమీక్షలో రాష్ట్ర అధికారులు ఈ విషయాన్ని వెల్లడించారు. ఈ క్లినిక్ లలో స్టాఫ్ నర్సుతోపాటు, ఏఎన్ఎం, ఆశ వర్కర్లు కూడా అందుబాటులో ఉంటారు. పిల్లకు అన్ని రకాల వేక్సిన్లు ఇక్కడే వేస్తారు. ఆరోగ్యశ్రీకార్డుల సమాచార కూడా వివేజ్ క్లినిక్ లకు మేపింగ్ చేస్తారు. వీటి ద్వారానే ప్రాధమిక వైద్యం అందించి.. మరీ అవసరమైతే ఇక్కడి నుంచే పీహెచ్సీకి, ఆపై జిల్లా ఆసుపత్రులకు రోగులను పంపించే వ్యవస్థను ఏర్పాటు చేశారు. 62 రకాల మందులను కూడా అందుబాటులో ఉంచుతున్నారు. 12 రకాల ప్రాధమిక వైద్యసదుపాయాలు, టెలీమెడిసిన్, వీడియో కాన్ఫరెన్సు విధానం కూడా అందుబాటులో వుంటుంది. అవుట్‌పేషెంట్‌ ఎగ్జామినేషన్‌ రూం, లేబొరేటరీ, ఫార్మసీ, వెయిటింగ్‌ హాల్, ఏఎన్‌ఎం క్వార్టర్స్‌కూడా అక్కడే ఉంచుతున్నామన్న అధికారులు దీనివల్ల 24 గంటలపాటు ఏఎన్‌ఎం అందుబాటులో ఉంటారని, 67 రకాల బేసిక్‌ మెడికల్‌ ఎక్విప్‌మెంట్‌ కూడా అందుబాటులో ఉంటాయని అధికారులు ముఖ్యమంత్రికి వివరించారు. ఈ విలేజ్ క్లినిక్ విధానం దేశంలోనే ఒక వినూత్న విధానమని, వీటి ద్వారా గ్రామీణ ప్రజలు వైద్యం కోసం ప్రైవేటు ఆసుపత్రులను, ఆర్ఎంపీలను ఆశ్రయించే పరిస్థితి ఉండదన్నారు. గ్రామస్థాయిలో వివిధ రకాల మెడికల్ టెస్టులు చేయడం వలన ప్రజల ఆరోగ్యపరమైన భారం పూర్తిగా తగ్గుతుందని అధికారులు చెప్పారు. మొత్తానికి ప్రభుత్వం ఏర్పాటు చేస్తున్న విలేజ్ క్లినిక్ లలో మెడికల్ టెస్టులు చేస్తామని ప్రభుత్వం ప్రకటించడం పై సర్వత్రా హర్షం వ్యక్తం అవుతుంది..

తాడేపల్లి

2021-08-03 01:55:13

Tadepalle

2021-08-01 15:49:55

సచివాలయాలున్నా.. మీ-సేవాలదే హవా..

ఆంధ్రప్రదేశ్ ప్రభుత్వం రాష్ట్రవ్యాప్తంగా 13 జిల్లాల్లో 15వేల 4 గ్రామ, వార్డు సచివాలయాల ను ఏర్పాటుచేసి అందులో 745 సర్వీసులను అందుబాటులోకి తెచ్చినా నేటికీ మీ-సేవ సర్వీసులదే అగ్ర తాంబూలాన్ని అందుకుంటున్నాయి.. విచిత్రంగా ఉన్నా ఇది నిజం. మీసేవా కేంద్రాల్లో 62వేల దరఖాస్తులకు ద్రువీకరణ పత్రాలు ఇస్తే సచివాలయాల్లో కేవలం 21 వేల దరఖాస్తులకు కేవలం 18వేల ద్రువీకరణ పత్రాలు మాత్రమే జారీచేశారు. ఈ సంఖ్య తూర్పుగోదావరి జిల్లాలోని ఓ మండలంలోనిది. ఆధారాలు లేకుండా చెబుతున్న సంఖ్య కాదు, అధికారికంగా తహశీల్దార్ లాగిన్ ద్వారా విడుదల చేసిన సంఖ్య. రాష్ట్రంలోని 13 జిల్లాల్లో తూర్పుగోదావరి రెండవ అత్యధి మండలాలున్న జిల్లాగా ఉంది(64). ఈ జిల్లాలోని ఒక్క మండలంలోనే 16 గ్రామ సచివాలయాలున్నచోట మీసేవా కేంద్రాలు అంతభారీ సంఖ్యలో ద్రువీకరణ పత్రాలు మంజూరు చేశాయంటే..ఇక జిల్లావ్యాప్తంగా ఎన్ని వేలు, రాష్ట్రవ్యాప్తంగా ఎన్ని లక్షల ద్రువీకరణ పత్రాలు మంజూరు చేశారో అర్ధం చేసుకోవచ్చు. వాస్తవానికి గ్రామసచివాలయాలు వచ్చిన తరువాత మీ-సేవ సర్వీసుల సంఖ్య తగ్గాలి. కానీ దానికి విరుద్దంగా సచివాలయాల్లో అత్యల్పంగా సర్వీసులు అందుబాటులోకి వస్తే.. మీ-సేవల ద్వారా సచివాలయాల కంటే నాలుగింతలు ద్రువీకరణ పత్రాలు మంజూరు చేయగలుగుతున్నాయి.

ఇక్కడ ప్రధానంగా ప్రభుత్వం చేసిన తప్పిదమే కనిపిస్తుంది. పంచాయతీరాజ్ శాఖ ద్వారా గ్రామ సచివాలయాలకు ప్రభుత్వం అన్ని గ్రామ సచివాలయాల్లో గ్రేడ్-5 పంచాయతీ కార్యదర్శిలను నియమించింది. వారిని నియమించి 20నెలలు గడుస్తున్నా వారికి చట్టబద్ధంగా జీఓనెంబరు 149 ద్వారా కట్టబెట్టాల్సిన అధికారాలు, బాధ్యతలు ఇవ్వలేదు. అధికారాలు చేతిలో ఏమీ లేకపోవడంతో గ్రేడ్-5 కార్యదర్శిలు కూడా మిన్నకుండిపోయారు. అధికారాలు ఇవ్వకుండా తాము ఎలా పనిచేయాలో తెలియడం లేదని సమాధానం చెబుతున్నారు. తద్వారా ప్రభుత్వం అక్షరాల కోల్పోయిన ఆదాయం చూసుకుంటే కోట్ల రూపాయల్లోనే ఉంది. అటు ప్రభుత్వం కూడా సేవలైతే అందుబాటులోకి తెచ్చింది గానీ, ఆయా ప్రభుత్వశాఖలకు మీసేవాలను అనుసంధానం మాత్రం చేయలేదు. దీనితో ఏ సేవ కోసం సచివాయాలకు వచ్చినా ప్రజలకు ఇక్కడ ప్రస్తుతం ఆ సేవలు అందుబాటులో లేవనే సమాధానమే వచ్చేది. ఇక్కడలేని సేవలు మీ-సేవలోనే ఉంటాయని భావించి అందరూ అక్కడి నుంచే వివిధ రకాల ద్రువీకరణ పత్రాలు పొందుతున్నారు. నాటి నుంచి నేటి వరకూ సచివాలయాల్లో అందించే సేవలపై ప్రజలకు అవగాహన లేకపోవడంతో నేటికీ అత్యవసర పనులకు వారంతా మీ-సేవ కేంద్రాలనే ఆశ్రయిస్తున్నారు. అలా రాష్ట్రంలో మీసేవా కేంద్రాలు 60శాతం సర్వీసు రిక్వెస్టులకు ద్రువీకరణ పత్రాలు మంజూరు చేయగలిగితే.. కేవలం రాష్ట్రవ్యాప్తంగా వున్న గ్రామ, వార్డు సచివాలయాలు కేవలం 40శాతం ఒక్కోసారి తక్కువగా 30 శాతం కూడా కొన్ని జిల్లాల్లో సర్వీసులు మాత్రమే ఇస్తున్నాయంటే పరిస్థితి ఎలా ఉందో అర్ధం చేసుకోవచ్చు.

వాస్తవానికి గ్రామవాలంటీర్లు, 12శాఖల సిబ్బందితో పూర్తిస్థాయిలో సేవలు అందించే సచివాలయాల్లోని గ్రేడ్-5 కార్యదర్శిలకు జీఓనెంబరు 149 ద్వారా అధికారాలు కట్టబెట్టగలిగితే ప్రభుత్వం అనుకున్న లక్ష్యాన్ని చేరుకోగలిగేది. కేవలం పంతానికి పోయి, ఆ అధికారాలన్నింటినీ గ్రేడ్-1,2,3,4 కార్యదర్శిల చేతిలోనే ఉంచేయడంతో వీరి ద్వారా ప్రజలకు అందాల్సిన సేవలు అందకుండా పోయాయి. దానికి కారణం కూడా లేకపోలేదు. సీనియర్ పంచాయతీ కార్యదర్శిలకు ఒక్కొక్కరికీ రెండు నుంచి మూడు పంచాయతీలు ఇన్జార్జి బాధ్యలు, డిప్యూటేషన్లు అప్పగించడం, ప్రధాన సచివాలయంలో పంచాయతీ కార్యదర్శి అందుబాటులోకి లేకపోవడంతో సచివాలయం నుంచి అందించే సేవలు ఏ రకంగా ప్రజలకు అందుతున్నాయో తెలుసుకోలేని పరిస్థితి. మిగిలిన గ్రేడ్-5 పంచాయతీ కార్యదర్శిలు సచివాలయాల్లోనే ఉన్నా..వారికి అధికారాలు ఇవ్వకపోవడంతో.. తమని ప్రభుత్వం ఏ తరహా పనులు పురమాయించిందో అవే పనుల్లో వారు నిమగ్నం అయిపోతున్నారు. ఈ తరుణంలో సచివాలయాలకు రావాల్సిన సర్వీసు రిక్వెస్టులన్నీ మీ-సేవా కేంద్రాలకు తరలిపోతున్నాయి.

ఇలా ప్రభుత్వానికి కోట్ల రూపాయాల్లో ఆదాయం పోతుండటమే కాకుండా, అసలు సచివాలయాల్లో ఎన్ని సేవలు అందుతున్నాయో కూడా ప్రజలకు అవగాహన కలగడం లేదు. ఇదే విషయాన్ని గ్రేడ్-5 కార్యదర్శిలు మండల స్థాయిలో ఎంపీడీఓలు, జిల్లా స్థాయిలో డీపీఓ, కలెక్టర్, రాష్ట్రస్థాయిలో పంచాయతీరాజ్ శాఖ ముఖ్య కార్యదర్శికి వినతిపత్రాలు సమర్పించినా జీఓనెంబరు 149పై ప్రభుత్వం కూడా ఎలాంటి నిర్ణయం తీసుకోలేదు. దీనితో అధికారం ఇవ్వకుండా తామెలా పనిచేయగలమంటూ వారు కూడా ప్రభుత్వాన్నిప్రశ్నిస్తున్నారు. ఫలితంగా సచివాలయాలకు వివిధ సేవల ద్వారా రావాల్సిన ఆదాయం రాకుండా పోయింది. సచివాలయాలున్న.. మీ సేవా కేంద్రాలదే అగ్రరాజ్యమవుతుంది. ఒక రోజులో ఒక్కో సచివాలయంలో సగటు పది సర్వీసు రిక్వెస్టులకు ద్రువీకరణ పత్రాలిస్తే..మీ-సేవా కేంద్రాల్లో మాత్రం రోజుకి 20 నుంచి 60 వరకూ సర్వీసు రిక్వెస్టులు పూర్తిచేయగలుగుతున్నారు. ఇపుడు రాష్ట్రవ్యాప్తంగా అన్ని జిల్లాల్లో కలెక్టర్లు, గ్రామ, వార్డు సచివాలయాలకు జాయింట్ కలెక్టర్లు మారారు. వీరైనా ఈ జీఓనెంబరు 149పై ద్రుష్టిసారితే గ్రేడ్-5 కార్యదర్శిలకు అధికారాలు వచ్చి, గ్రామ సచివాలయాల ద్వారానే ప్రజలకు అన్ని రకాల సేవలు అంది ప్రభుత్వానికి ఆదాయం కూడా కోట్ల రూపాయాల్లో అందుతుంది. అలా కాకుండా అధికారాలన్నీ గ్రేడ్-1,2,3,4 కార్యదర్శిల చేతుల్లోనే ఉంచేస్తే మాత్రం ఇదే పద్దతి కొనసాగడం ఖాయంగా కనిపిస్తుంది..!