రాష్ట్ర వ్యాప్తంగా ఈనెల 19న జడ్పిటిసి,ఎంపిటిసి ఓట్ల లెక్కింపు ప్రక్రియ సజావుగా జరిగేందుకు అవసరమైన పటిష్ఠమైన ఏర్పాట్లు చేయాలని ప్రభుత్వ ప్రధాన కార్యదర్శి ఆదిత్యా నాధ్ దాస్ జిల్లా కలెక్టర్లు, ఎస్పిలను ఆదేశించారు. కౌంటింగ్ ఏర్పాట్లపై శుక్రవారం విజయవాడలోని సిఎస్ క్యాంపు కార్యాలయం నుండి ఆయన జిల్లా కలెక్టర్లు ఎస్పిలు, డిపిఓలు,జడ్పి సిఇఓలతో వీడియో సమావేశం నిర్వహించారు.ఈ సందర్భంగా సిఎస్ మాట్లాడుతూ  ఓట్ల లెక్కింపు కేంద్రాలలో కోవిడ్ నిబంధనలను ఖచ్చితంగా పాటిస్తూ కౌంటింగ్ కు పటిష్ట చర్యలు తీసుకోవాలని ఆదేశించారు.కౌంటింగ్ సిబ్బంది, కౌంటింగ్ ఏజెంట్లు తప్పని సరిగా వ్యాక్సిన్ వేయించుకుని ఉండాలని సిఎస్ స్పష్టం చేశారు. కౌంటింగ్ రోజున ఆయా కౌంటింగ్ కేంద్రాలకు 100 మీటర్ల పరిధిలో 144వ సెక్షన్ కింద నిషేధాజ్ఞలు విధించడంతో పాటు పటిష్ఠమైన బందోబస్తు ఏర్పాట్లు చేయాలని ఎస్పి లను సిఎస్ ఆదిత్యా నాధ్ దాస్ ఆదేశించారు.అదే విధంగా కౌంటింగ్ కేంద్రాలకు సమీపంలో ప్రజలు అధిక సంఖ్యలో గుమిగూడ కుండా తగిన చర్యలు తీసుకోవాలన్నారు. జిల్లా కలెక్టర్,ఎస్పిలు కూర్చుని కౌంటింగ్ సజావుగా జరిగేందుకు తగిన విధంగా ప్రణాళిక సిద్దం చేసుకొని సక్రమంగా కౌంటింగ్ జరిగేలా చూడాలని సిఎస్ ఆదిత్యా నాధ్ దాస్ చెప్పారు.ప్రతి కౌంటింగ్ కేంద్రం వద్ద ఏర్పాట్లను పర్యవేక్షణకు జిల్లా అధికారి ఒకరిని ఇన్చార్జి గా పెట్టాలని సిఎస్ కలెక్టర్లును ఆదేశించారు. అంతేగాక జెసిలను పూర్తి స్థాయిలో కౌంటింగ్ ప్రక్రియలో బాధ్యతలు అప్పగించాలని ప్రభుత్వ ప్రధాన కార్యదర్శి ఆదిత్యా నాధ్ దాస్ కలెక్టర్లు ఆదేశించారు.

ఈ వీడియో సమావేశంలో రాష్ట్ర పంచాయతీరాజ్ మరియు గ్రామీణాభివృద్ధి శాఖ ముఖ్య కార్యదర్శి గోపాల కృష్ణ ద్వివేది మాట్లాడుతూ జడ్పిటిసి ఎంపిటిసి ఓట్ల లెక్కింపునకు సంబంధించి ఎమైనా సందేహాలుంటే వాటిని నివృత్తి చేసేందుకు రాష్ట్ర ఎన్నికల సంఘం కార్యాలయం తోపాటు తాము అన్ని వేళలా సిద్ధంగా ఉంటామని తెలిపారు.కౌంటింగ్ కు సంబంధించి రాష్ట్ర పంచాయతీరాజ్ కమీషనర్ కార్యాలయంలో 24గంటలూ పని చేసేలా కంట్రోల్ రూమ్ ను ఏర్పాటు చేస్తున్నట్లు చెప్పారు. ఎటువంటి అవాంచనీయ సంఘటనలకు ఆస్కారం లేకుండా కట్టుదిట్టమైన ఏర్పాట్లు చేసి కౌంటింగ్ సజావుగా జరిగేందుకు తగిన జాగ్రత్తలు తీసుకోవాలని ఆయన కలెక్టర్లను ఆదేశించారు. మంగళగిరి పోలీస్ ప్రధాన కార్యాలయం నుండి వీడియో సమావేశంలో పాల్గొన్న శాంతి భద్రతల అదనపు డిజిపి రవి శంకర్ మాట్లాడుతూ అన్ని కౌంటింగ్ కేంద్రాల పరిధిలో 144వ సెక్షన్ కింద నిషేధాజ్ఞలు విధించడంతో పాటు శాంతి భద్రతల పరిరక్షణకు పటిష్టమైన బందోబస్తు ఏర్పాట్లు చేయడం జరుగుతుందని వివరించారు. అంతేగాక అన్ని కేంద్రాల్లో నిరంతర సిసిటివి నిఘా పర్యవేక్షణకు ఏర్పాట్లు చేస్తున్నట్లు ఆయన వివరించారు.

అంతకు ముందు రాష్ట్ర పంచాయతీరాజ్ శాఖ కమీషనర్ గిరిజా శంకర్ కౌంటింగ్ నిర్వాహణకు సంబంధించిన మార్గ దర్శకాలను వివరిస్తూ ప్రతి కౌంటింగ్ కేంద్రం వద్ద మరియు జిల్లా కేంద్రంలో కంట్రోల్ రూమ్ల లను ఏర్పాటు చేసుకోవాలని కలెక్టర్లను ఆదేశించారు. కౌంటింగ్ కేంద్రాల్లో నిరంతర విద్యుత్ సరఫరా ఉండే విధంగా ఏర్పాట్లు చేయాలని, జనరేటర్లను కూడా ఏర్పాటు చేసుకోవాలని అన్నారు. కౌంటింగ్ సిబ్బందికి వెంటనే మరో విడత శిక్షణా కార్యక్రమం నిర్వహించాలని ఆదేశించారు. స్ట్రాంగ్ రూమ్ నుండి కౌంటింగ్ హాల్లోకి బ్యాలెట్ బాక్సులను తీసుకువచ్చే సమయంలో పూర్తిగా సిసిటివి కవరేజ్ చేయాలని చెప్పారు. కోవిడ్ నిబంధనలకు అనుగుణంగా అన్ని కౌంటింగ్ కేంద్రాల్లో పూర్తిగా శానిటేషన్ చర్యలు తీసుకోవాలని గిరిజా శంకర్ కలెక్టర్లును ఆదేశించారు. అదే విధంగా కౌంటింగ్ సిబ్బంది, కౌంటింగ్ ఏజెంట్లు అందరూ విధిగా మాస్క్,ఫేస్ షీల్డు వంటివి ధరించి గుర్తింపు కార్డుతో  కౌంటింగ్ హాల్లోకి ప్రవేశించేలా చూడాలని  ఆదేశించారు. ఈవీడియో సమావేశంలో రాష్ట్ర ఎన్నికల సంఘం కార్యదర్శి కె.కన్నబాబు తదితరులు పాల్గొన్నారు.

 వేంకటేశ్వర స్వామి వారి బ్రహ్మోత్సవాలు ఈసారి కూడా ఏకాంతంగానే నిర్వహించాలని నిర్ణయించినట్లు టీటీడీ చైర్మన్  వై వి సుబ్బారెడ్డి ప్రకటించారు. తిరుమల అన్నమయ్య భవన్లో శుక్రవారం ఆయన మీడియాతో మాట్లాడారు.కేంద్ర, రాష్ట్ర ప్రభుత్వాలు తాజాగా జారీ చేసిన కోవిడ్ మార్గదర్శకాలను అనుసరించి భక్తులు, సిబ్బంది ఆరోగ్య భద్రత దృష్ట్యా  ఈ నిర్ణయం తీసుకున్నామని ఆయన చెప్పారు. కోవిడ్ మార్గదర్శకాలను పాటిస్తూ రోజుకు 15 నుంచి 20 వేల మంది భక్తులకు మాత్రమే ఎలాంటి ఇబ్బంది లేకుండా స్వామివారి దర్శన భాగ్యం కల్పిస్తున్నామని ఆయన చెప్పారు. మరికొంత కాలం ఇదే పరిస్థితి కొనసాగుతుందని చైర్మన్ వివరించారు. ఆన్లైన్లో సర్వదర్శనం టోకెన్లు విడుదల చేసే కార్యక్రమం సాంకేతిక కారణాల వల్ల ఆలస్యమైందని, త్వరలోనే ఈ సమస్యను అధిగమించి ఆన్లైన్లో సర్వ దర్శనం టోకెన్లు విడుదల చేస్తామని చెప్పారు.

ఆంధ్రప్రదేశ్ హైకోర్టు ప్రధాన న్యాయమూర్తి జస్టిస్  అరుప్ కుమార్ గోస్వామి ఆదివారం  తిరుచానూరు శ్రీ పద్మావతి అమ్మవారిని దర్శించుకున్నారు.  ఆలయం వద్ద టిటిడి  జెఈవో శ్రీమతి సదా భార్గవి  స్వాగతం పలికారు. అనంతరం జస్టిస్  గోస్వామి శ్రీ పద్మావతి అమ్మవారిని దర్శించుకున్నారు.  దర్శనానంతరం ఆలయంలోని ఆశీర్వాద మండపంలో జెఈవో శ్రీమతి సదా భార్గవి హై కోర్టు ప్రధాన న్యాయమూర్తికి అమ్మవారి తీర్థప్రసాదాలు అందించారు.  ఆల‌య డెప్యూటీ ఈవో  కస్తూరి బాయి, ఎఈవో ప్రభాకర్ రెడ్డి, విజిఓ, మనోహర్  ఇత‌ర అధికారులు పాల్గొన్నారు.

అపోలో హాస్పిటల్స్‌ గ్రూప్‌ కార్పొరేట్‌ సోషల్‌ రెస్పాన్స్‌బులిటీ కింద కనెక్ట్‌ టు ఆంధ్రాకు రూ.2 కోట్లు విరాళం ప్రకటించింది. ఆ మొత్తానికి  సంబంధించిన చెక్కులను అపోలో హాస్పిటల్స్‌ గ్రూప్‌ ఎగ్జిక్యూటివ్‌ వైస్‌ ఛైర్‌పర్సన్‌ ప్రీతా రెడ్డి క్యాంప్‌ కార్యాలయంలో సీఎం  వైయస్‌.జగన్‌కు అందజేశారు. ఈ సందర్బంగా వారిని సీఎం వైఎస్ జగన్ అభినందించారు. ఈ కార్యక్రమంలో ఆపోలో  ప్రెసిడెంట్‌ (ప్రొక్యూర్‌మెంట్‌ అండ్‌ కార్పొరేట్‌ డవలప్‌మెంట్‌) నరోత్తమ్‌ రెడ్డి, సీఈఓ (ఏహెచ్‌ఈఆర్‌ఎఫ్‌) కె ప్రభాకర్, సీఈఓ (నాలెడ్జ్‌ వెర్టికల్‌) శివరామకృష్ణన్‌లు తదితరులు పాల్గొన్నారు.

ప్రముఖ ఆదాయ వనరుగా రాష్ట్ర పర్యాటక రంగాన్ని అభివృద్ది పర్చేందుకు అన్ని చర్యలు తీసుకుంటున్నామని రాష్ట్ర పర్యాటక, సాంస్కృతిక,యువజన శాఖ మంత్రి ముత్తం శెట్జి శ్రీనివాసరావు తెలిపారు.  పర్యాటక ప్రాంతాలలో మౌలిక వసతులు, రవాణా, బోటింగ్ సౌకర్యాల మెరుగుతోపాటు పర్యాటక హోటళ్ల నిర్వహణను మెరుగుపర్చి ఆన్లైన్, సోషల్ మీడియా వేదికగా వాటికి మంచి ప్రాచుర్యాన్ని కల్పించేందుకు ప్రణాళికా బద్దంగా చర్యలు తీసుకుంటున్నామని మంత్రి తెలిపారు. బుధవారం అమరావతి సచివాలయం ఐదో బ్లాక్ లో 13 జిల్లాలకు చెందిన పర్యాటక, క్రీడా శాఖలు, పర్యాటక సంస్థ అధికారులతో సమీక్షా సమావేశం నిర్వహించిన అనంతరం పబ్లిసిటీ సెల్ లో పాత్రికేయులతో మంత్రి మాట్లాడారు. ప్రపంచంలో థాయిల్యాండ్, మలేషియా, స్విట్జర్లాడ్ వంటి 40 శాతం దేశాలు కేవలం పర్యాటక రంగం ద్వారా వచ్చే ఆదాయం ద్వారానే అభివృద్ది పథంలో పయనిస్తున్నాయని, అదే తరహాలో రాష్ట్రంలోని పర్యాటక రంగాన్ని కూడా అభివృద్ది పర్చేందుకు వ్యూహాత్మక చర్యలు తీసుకుంటున్నామన్నారు.  కోవిడ్ కు ముందు సాలీనా రూ.120 కోట్ల మేర ఆదాయం పర్యాటక శాఖ ద్వారా వచ్చేదని, ప్రస్తుతం  కోవిడ్ పరిస్థితుల్లో అది రూ.60 కోట్లకు పడిపోయిందన్నారు. కోవిడ్ ఆసుపత్రులు,  కోవిడ్ సెంటర్లలో భోజన సదుపాయం కల్పించే బాధ్యతను పర్యాటక సంస్థ చేపట్టడం వల్ల అంతమాత్రం ఆదాయానన్నా సమకూర్చుకోవడం జరిగిందన్నారు. ఇటు వంటి గడ్డు పరిస్థితుల నుండి పర్యాటక శాఖను కాపాడి, స్థిరమైన ఆదాయాన్ని సమకూర్చుకొనేలా పర్యాటక రంగాన్ని అభివృద్ది పరుస్తున్నామన్నారు. 

రాష్ట్రంలోని ప్రముఖ పర్యాటక కేంద్రాలు, పర్యాటక హోటళ్ల వివరాలు ప్రపంచ వ్యాప్తంగా ప్రతి ఒక్క పర్యాటకునికి తెలిసే విధంగా ఆన్లైన్, సోషల్ మీడియా వేదికగా వాటికి మంచి ప్రాచుర్యాన్ని కల్పించేందుకు ఒక ప్రత్యేక యాప్ ను రూపొందించి దసరా పండుగలోపు రాష్ట్ర ముఖ్యమంత్రి చేతుల మీదుగా ఆ యాప్ ను ప్రారంభిస్తామని మంత్రి తెలిపారు. పర్యాటక ప్రాంతాల ప్రాచుర్యం అందరికీ తెలిసే విధంగా ప్రతి జిల్లాలోనూ ప్రతి మాసం ఒక ఈవెంట్ను నిర్వహిస్తామన్నారు.   రాష్ట్రంలోని ఉత్తరాంధ్ర, గోదావరి జిల్లాలు, కోస్తా మరియు రాయలసీమ పర్యాటక సర్క్యూట్లకు ఒక్కొక్క మేనేజరు చొప్పున మొత్తం నలుగురు మేనేజర్లను నియమించి ప్రత్యేక వోల్వో బస్సుల ద్వారా రెండు  లేక మూడు రోజులపాటు పర్యాటక ప్యాకేజిలను నిర్వహించేందుకు చర్యలు తీసుకుంటున్నామన్నారు. ఆయా సర్క్యూట్లలో గల పర్యాటక ప్రాంతాలకు చుట్టుప్రక్కల నున్న రాష్ట్రాల నుండి కూడా ప్రత్యేక బస్సులను నడిపేందుకు చర్యలు తీసుకుంటున్నామన్నారు.  పర్యాటక ప్రాంతాల్లో ప్రభుత్వ, ప్రైవేటు బోట్ల నిర్వహణ సజావుగా సాగేందుకు రాష్ట్ర వ్యాప్తంగా తొమ్మిది  కమాండ్ కంట్రోల్ సెంటర్లను ఏర్పాటు చేయడం జరిగిందని, వాటి మార్గదర్శకాలకు అనుగుణంగా ప్రస్తుతం ఉన్న 24  ప్రభుత్వ, 164 ప్రైవేటు బోట్లు అన్నింటినీ ఆపరేషన్లోకి తెచ్చేందుకు చర్యలు తీసుకుంటున్నామన్నారు. విశాఖపట్నం, విజయవాడ, నాగార్జునసాగర్, సూర్యలంక తదితర ప్రాంతాల్లో సీ ప్లైన్ లను నడిపేందుకు సంబందిత సంస్థలతో చర్చిస్తున్నట్లు మంత్రి తెలిపారు.   ప్రభుత్వ ప్రైవేటు భాగస్వామ్యంతో రాష్ట్రంలోని విశాఖపట్నం, విజయవాడ, తిరుపతి, బాపట్ల, సూర్యలంక తదితర 13  ప్రాంతాల్లో ఐదు నక్షత్ర హోటళ్లను ఏర్పాటు చేసేందుకు చర్యలు చేపట్టామని, ఇందులో 50 శాతం హోటళ్లను ఈ ఆర్థిక సంవత్సరంలో ఏర్పాటు చేసే లక్ష్యంతో ఉన్నామన్నారు.  అదే విధంగా రాష్ట్రంలో ఉన్న 37 పర్యాటక హోటళ్ల నిర్వహణను మెరుగుపర్చి గూగుల్ సెర్చి టాప్ టెన్ బెస్టు హోటళ్లలో అవి కనిపించే విధంగా తీర్చిదిద్దుతామన్నారు.  కేంద్ర ప్రభుత్వ సహకారంతో “ ప్రసాదం” పథకం  అమల్లో బాగంగా  టెంపుల్ టూరిజం అభివృద్దికి చర్యలు చేపట్టామని, రూ.50 కోట్లతో శ్రీశైల దేవాలయం అభివృద్ది పనులు ఇప్పటికే చేపట్టామని, మరో రూ.50 కోట్లతో సింహాచల దేవస్థానం అభివృద్ది పనులకు త్వరలో శంకుస్థాపన చేయనున్నట్లు మంత్రి తెలిపారు. రాష్ట్ర పర్యాటక, సాంస్కృతి, యువజన శాఖ శాఖ స్పెషల్ చీఫ్ సెక్రటరీ డా.రజత్ భార్గవ్ , ఆంధ్రప్రదేశ్ పర్యాటక సంస్థ సి.ఇ.ఓ. ఎస్.సత్యనారాయణ తదితరులు ఈ సమావేశంలో పాల్గొన్నారు. 

రాష్ట్రంలో విజయనగరం- టిట్లాఘర్ 3వ రైల్వే లైను ప్రాజెక్టు,నడికుడి-శ్రీకాళహస్తి నూతన రైలు మార్గం తోపాటు కడప-బెంగుళూర్ నూతన రైలు మార్గాలకు సంబంధించి మిగతా భూమి సమీకరించి అప్పగించేందుకు గాను మరో మూడు మాసాలు అనగా డిసెంబరు నెలాఖరు వరకు గడువు ఇవ్వాలని ప్రభుత్వ ప్రధాన కార్యదర్శి ఆదిత్యా నాధ్ దాస్ కేంద్ర ప్రభుత్వాన్ని కోరారు. ప్రగతి ప్రాజెక్టులు రైల్వే, బొగ్గు,ఇంధనం,స్టీల్ ప్రాజెక్టులకు చెందిన 13 పెండింగు అంశాలపై ఆంధ్రప్రదేశ్,ఒడిస్సా,ఛత్తీస్గడ్, జార్ఖండ్ రాష్ట్రాల ప్రభుత్వ ప్రధాన కార్యదర్శులతో శుక్రవారం ఢిల్లీ నుండి ప్రగతి ప్రాజెక్టుల మానిటరింగ్ గ్రూపు కో-చైర్మన్ అయిన కేంద్ర ఆరోగ్య,కుటుంబ సంక్షేమ, రసాయన,ఎరువులు శాఖామాత్యులు మనీష్ మాండవీయ,మినిస్టర్ ఆఫ్ స్టేట్ ఇండిపెండెన్స్ చార్జీ ఫర్  సైన్స్ అండ్ టెక్నాలజీ,ఎర్త్ సైన్సెస్, మినిస్టర్ ఆఫ్ స్టేట్ ఫర్ పియంఓ ఫెర్సనల్ అండ్ పబ్లిక్ గ్రీవియెన్సెస్ డా.జితేంద్ర సింగ్ లు వీడియో సమావేశం నిర్వహించారు.ఈసందర్భంగా సిఎస్ ఆదిత్యా నాధ్ దాస్ మాట్లాడుతూ రాష్ట్రంలో విజయనగరం-టిట్లాఘర్,నడికుడి-శ్రీకాళహస్తి,కడప-బెంగుళూరు రైల్వే ప్రాజెక్టులకు సంబంధించి మిగతా భూమి సేకరించి అప్పగించేందుకు మరో మూడు మాసాలు సమయం కావాలని విజ్ఞప్తి చేయుగా కేంద్ర మంత్రులు సానుకూలంగా స్పందించిందించి ఆగడువులోగా భూమి అప్పగించాలని చెప్పారు.ప్రగతి ప్రాజెక్టులను ప్రధాన మంత్రే స్వయంగా పర్యవేక్షిస్తున్నందున  ఆయా రాష్ట్ర ప్రభుత్వాలు ఈవిషయంలో అత్యంత శ్రద్ధ కనపర్చి ఆయా ప్రాజెక్టులు త్వరితగతిన పూర్తయ్యేలా తోడ్పడాలని కేంద్ర మంత్రులు సూచించారు.వివిధ రాష్ట్రాల వారీ ప్రగతి ప్రాజెక్టులు పెండింగ్ అంశాలను వారు సిఎస్ లతో సమీక్షించారు.

ఈసందర్భంగా ప్రభుత్వ ప్రధాన కార్యదర్శి ఆదిత్యా నాధ్ దాస్ మాట్లాడుతూ రైల్వే ప్రాజెక్టులకు భూమి సమీకరణకు ఇప్పటి వరకు రాష్ట్ర ప్రభుత్వం తీసుకున్న చర్యలను వివరిస్తూ డిసెంబరు నెలాఖరు వరకు గడువు ఇవ్వాలని అప్పటికి మిగతా భూమి అప్పగింత ప్రక్రియను పూర్తి చేస్తామని వివరించారు. ఇప్పటికే ఆయా రైల్వే ప్రాజెక్టులకు సంబంధించిన అవసరమైన భూమిలో కొంతమేర రైల్వే శాఖకు అప్పగించగా మిగతా భూమిపై వేగవంతంగా చర్యలు తీసుకుంటున్నామని తెలిపారు.దీనిలో భాగంగా ప్రభుత్వ భూమిని గుర్తించడం తోపాటు ప్రైవేట్ భూమిని సేకరించి ఇచ్చేందుకు ఆయా భూమి యజమానులతో సంప్రదింపులు జరుపుతున్నట్టు సిఎస్ ఆదిత్యా నాధ్ దాస్ కేంద్ర మంత్రులకు వివరించారు.

ఇప్పటి వరకూ ఆయా ప్రాజెక్టులకు భూమి సమీకరించి అందించిన వివరాలను సిఎస్ కేంద్ర మంత్రులకు వివరించారు. అదేవిధంగా కొవ్వూరు- భద్రాచలం నూతన రైల్వే లైను నిర్మాణ ప్రాజెక్టు రాష్ట్ర విభజన అంశంలో ఉందని ఆప్రాజెక్టు అంశానికి సంబంధించి కూడా ప్రభుత్వం అవసరమైన చర్యలు తీసుకుంటుందని సిఎస్ ఆదిత్యా నాధ్ దాస్  పేర్కొన్నారు. ఈవీడియో సమావేశంలో రాష్ట్ర టిఆర్అండ్బి,రెవెన్యూ శాఖల ముఖ్య కార్యదర్శులు కృష్ణ బాబు,వి.ఉషారాణి తోపాటు అర్జా శ్రీకాంత్, డా.చలపతి రావు తదితర అధికారులు పాల్గొన్నారు.

ఆంధ్రప్రదేశ్ ప్రభుత్వం ఏంచేసినా దానికో లెక్కుంటుంది.. అదేంటో కాస్తతిక్క కూడా ఉన్నట్టే కనిపిస్తుందని గగ్గోలు పెడుతున్నారు రాష్ట్రంలోని 13 జిల్లాల్లోని 15వేల4 గ్రామ, వార్డు సచివాలయాల్లోని లక్షా 24వేల మంది ఉద్యోగులు. ఎంతో శ్రమించి ప్రభుత్వ ఉద్యోగాలు అతి తక్కువ జీతానికి రూ.15వేలు(బిపీఎల్ కుటుంబాల సంపాదన కంటే తక్కువ) సంపాదిస్తే.. కేవలం మేము రేషన్ కార్డులో ఉన్నామనే ఒకే ఒక్క కారణంతో ఏకంగా కార్డు మొత్తం రద్దు చేసేస్తే మాకుటుంబాలు ఏం తిని బతకాలని ప్రశ్నిస్తున్నారు ఉద్యోగులంతా. ప్రస్తుతం గ్రామ, వార్డు సచివాలయ ఉద్యోగాలు సంపాదించిన వారంతా నిరుపేదలేనని, కేవలం తాము ఆ కార్డులో ఉన్నందుకు కార్డు రద్దు చేయడం దారుణమంటూ ఆవేదన వ్యక్తం చేస్తున్నారు. ఆంధ్రప్రదేశ్ ప్రభుత్వంలో వివిధ కేటగిరీల్లో ఉద్యోగాలు చేస్తున్న వారిలో చాలా మంది ఉద్యోగులు ప్రస్తుతం గ్రామ, వార్డు సచివాలయశాఖలో అధికంగా ఉన్నారు. అయితే ప్రభుత్వ ఉద్యోగాలు చేస్తున్నవారు బిపీఎల్ కుటుంబాలకిచ్చే రేషన్ కార్డులు వినియగించకూడదనే ఉత్తర్వుతో ఉద్యోగస్తులు స్వచ్చందంగా రేషన్ కార్డులు సరెండర్ చేయాలని ప్రభుత్వం ఆదేశాలు జారీచేసింది. ఏ ప్రభుత్వ ఉద్యోగంలో అయినా ఉద్యోగం వచ్చిన వెంటనే పేస్కేలు ఇస్తారని అదేంటో తాము సాధించిన ఉద్యోగాలకు కేవలం రూ.15వేలు మాత్రమే జీతాలు ఇస్తూ, ఇంకా సర్వీసులు రెగ్యులర్ చేయకుండానే రేషన్ కార్డులు తొలగించడం సరికాదని కన్నీటి పర్యంతం అవుతున్నారు. కావాలంటే కార్డుల్లో ఉద్యోగాలు పొందిన తమను తొలగించి తమ కుటుంబాల కార్డులు అలాగే ఉంచాలని గ్రామ, వార్డు సచివాలయ ఉద్యోగులు ప్రభుత్వాన్ని కోరుతున్నా అవి కనీసం ప్రభుత్వం ద్రుష్టికి చేరడం లేదు. ఏ ప్రభుత్వ శాఖలో అయితే ఏ శాఖ ఉద్యోగం వస్తే అదేశాఖకు సంబంధించిన విధులు నిర్వహిస్తారని, కానీ సచివాలయాల్లో ఉద్యోగులతో ప్రభుత్వం అన్నిశాఖలకు సంబంధించిన విధులను చేయిస్తుందని, అక్కడ కనిపించని నిబంధనలు తక్కువ జీతంలో ఉద్యోగాలు పొందిన తమ కుటుంబాల రేషన్ కార్డులను తొలగించడానికి మాత్రం నిబంధనలు అడ్డొస్తున్నాయా అంటూ ఆగ్రహం వ్యక్తం చేస్తున్నారు. 

ఎన్నో ఆశలతో ఉద్యోగాల్లోకి వస్తే.. రెండేళ్ల ప్రొబేషన్ కాలంలో తమకిచ్చే పేస్కేలు పరంగా చూసుకున్నా ఒక్కో ఉద్యోగి సుమారు రెండున్నర లక్షలకు పైనే జీతం కోల్పోయామని, దాని గురించి ఆలోచించని ప్రభుత్వం తమ రేషన్ కార్డుల విషయంలో ఉత్తర్వులు, ఉద్యోగాలకు ముడిపెట్టడం ఇదేం పద్దతంటూ తీవ్ర స్థాయిలో మండిపడుతున్నారు. నిబంధనల ప్రకారం గ్రామ, వార్డు సచివాలయ శాఖలో ఉద్యోగులకు అధికారాలు విధులు కట్టబెట్టని ప్రభుత్వం తమకు అనుకూలంగా మాత్రం అన్ని నిర్ణయాలను ఆగమేఘాలపై అమలు చేస్తుందని ఆరోపిస్తున్నారు. నిబంధన ప్రకారం ప్రభుత్వ ఉద్యోగులకు రేషన్ కార్డులు ఉండకూడదు వాటిని తొలగించిన ప్రభుత్వం అదే నిబంధనలు అమలు చేస్తూ గ్రేడ్-5 పంచాయతీ కార్యదర్శిలకు జీఓ నెంబరు 149 ప్రకారం అధికారాల బదలాయింపులు చేపడితే ప్రభుత్వం తీసుకునే నిర్ణయాల సహేతుకంగా ఉన్నాయని అంతా భావించేవారమని, ఉద్యోగులను ఇబ్బందులు పెట్టాలంటే ఒక విధానం, ప్రభుత్వం లాభపడాలంటే మరో విధానం అమలు చేయడం పద్దతి కాదని వాపోతున్నారు. ప్రభుత్వం ఉద్యోగాలు చేస్తున్న తమను కార్డుల్లో నుంచి తప్పించి తమ కుటుంబ సభ్యులను అలాగే ఉంచి కార్డులు రద్దు చేయకుండా ఉంచాలని సచివాలయ ఉద్యోగులు కోరుతున్నారు. అయితే ప్రభుత్వం తీసుకున్న నిర్ణయం మేరకు మాత్రమే పనులు జరుగుతున్నాయి తప్పితే అభ్యర్ధనలు పట్టించుకునే సూచనలు కనుచూపు మేరలో కూడా కనిపించడం లేదు. పెద్ద పెద్ద ఉద్యోగాలు చేసేవారి దగ్గర నుంచి రేషన్ కార్డులు తప్పించి, కనీసం అతితక్కువ జీతాలు తీసుకునే గ్రామ, వార్డు సచివాలయ ఉద్యోగుల విషయంలో మినహాయింపు ఇవ్వాలనే డిమాండ్ పై ప్రభుత్వం ఏ విధంగా స్పందిస్తుందనేది్ వేచిచూడాలి..!

ఆంధ్రప్రదేశ్ లోని గ్రామ, వార్డు సచివాలయ శాఖలో పనిచేస్తున్న ఉద్యోగులకు బదిలీలు జరుగుతున్నాయా.. జరుగుతాయా.. ఉంటే ఎపుడు ఉంటాయి.. అసలు ఐదేళ్ల వరకూ ఉండవా.. సర్వీసు రెగ్యులర్ అయిన తరువాత  ఏడాది చేసేస్తారా.. ఏది నిజం.. ప్రస్తుతం ఉద్యోగుల్లో ఇదే విషయమై తీవ్రమైన చర్చజరుగుతోంది. ఎవరో ఒకరు వేసిన ప్రశ్న మొత్తం రాష్ట్రంలోని 13 జిల్లాల్లోని 15వేల 4 గ్రామ, వార్డు సచివాల్లో పనిచేస్తున్న లక్షా 35 వేలయ మంది ఉద్యోగుల మనసులను తీవ్రంగా తొలిచేస్తుంది. ఈ విషయంలో క్లారిటీ తెచ్చేందుకు ఈఎన్ఎస్ నేషనల్ న్యూస్ ఏజెన్సీ, ఈఎన్ఎస్ లైవ్ మొబైల్ న్యూస్ యాప్, www.enslive.net తన నెట్వర్క్ తో రంగంలోకి దిగింది. వాస్తవాలు తెలుసుకునే పనిలో పడింది. ఈ క్రమంలో ఈఎన్ఎస్ నెట్వర్క్ దగ్గరకి వచ్చిన వివరాలు, కొందరు రాష్ట్ర అధికారులతో మాట్లాడిన తరువాత వచ్చిన క్లారిటీ ప్రకారం.. సచివాలయ ఉద్యోగులో ఇప్పట్లో బదిలీలు జరగవనేది సూచన ప్రాయంగా అధికారులు చెబుతున్నారు. దానికి కారణాలను కూడా వారు 5 అంశాలను ఈఎన్ఎస్ వద్ద ప్రస్తావించారు. 1)సచివాలయ ఉద్యోగుల సర్వీసు రెగ్యులైజేషన్ కాలేదు.. దానికి కొన్ని అడ్డంకులు ఉన్నాయి.. 2)ఉద్యోగులకు బదిలీలు జరగాలంటే ట్రాన్స్ ఫర్ పాలసీని ప్రభుత్వం ప్రత్యేక జీఓ ద్వారా ప్రకటించాలి.. 3)నేటికీ గ్రామ,వార్డు సచివాలయ శాఖలోని 19శాఖల ఉద్యోగులకు సరైన జాబ్ చార్ట్ రాలేదు, సర్వీస్ రూల్స్ ఫ్రేమ్ కాలేదు..గెజిట్ లు పబ్లికేషన్ కాలేదు.. 4) ఏ ప్రభుత్వ శాఖలోనైనా బదిలీలు జరగాలంటే కనీసం మూడున్నరేళ్లు నుంచి ఐదేళ్ల సమయం పడుతుంది.. 5) ప్రస్తుతం రాష్ట్రంలో పనిచేస్తున్నవారి ఉద్యోగాల్లో ఎంత మంది సర్వీసులు రెగ్యులర్ అవుతాయో ఎంతమందికి సమయం పడుతుందో..(వారికి డిపార్ట్ మెంటల్ పరీక్షలు ఆధారంగా) అని మొదలు పెట్టారు. ఇదీ వాస్తవమే.. అసలు ఉద్యోగాలే రెగ్యులర్ కాకుండా బదిలీలు ఎలా చేస్తారో ఉద్యోగులకే తెలియాల్సి వుంది. ఒకవేళ సర్వీసులు రెగ్యులర్ అయినా ప్రభుత్వం ప్రత్యేకంగా నిర్ణయం తీసుకునేదాకా ఆ జోలికి వెళ్లే పరిస్థితి లేదు. దానికి కారణం కూడా లేకపోలేదు. ఇప్పటికే మహిళా పోలీసులను పోలీసుశాఖలో విలీనం చేసి జీఓనెంబరు 59 విడుదల చేయడం దానిపై కొంత మంది వ్యతిరేకించడం, వారి పదోన్నతుల్లో డిగ్రీ అర్హత ఉన్నా.. ఎస్ఐగా కాకుండా హెడ్ కానిస్టేబుల్ గా ప్రకటించడం, వారికి ఖాకీ డ్రెస్సు ఇస్తామంట కొందరు వద్దని చెప్పడం, ఇక మిగిలిన శాఖల ఉద్యోగులను తీసుకుంటే ప్రభుత్వం కేటాయించి ఏక రూప దుస్తుల విధానాన్ని వ్యతిరేకించడం. ఇవన్నీ పక్కనపెడితే అసలు నూతనంగా విధుల్లోకి చేరిన ఉద్యోగులను ఎలా బదిలీలు చేయాలనే అంశం. ప్రభుత్వం ప్రస్తుతం పనిచేస్తున్న ఉద్యోగుల సర్వీసు రెగ్యులర్ చేయడానికే వందసార్లు వెయ్యికోణాల్లో ఆలోచిస్తూ.. వారి సర్వీసులకు చాలా నిబందనలు పెట్టి వాటిని అమలు చేయడానికి రెండేళ్లు పూర్తవుతున్న సమయంలో కొత్త కొత్త విధానాలను రూపొందిస్తోంది.

 ఈ తరుణంలో ఉద్యోగుల్లో ఉన్న బదిలీల ఆశలపై సదరు ప్రభుత్వశాఖల ముఖ్యకార్యదర్శిలు నోరు మెదపడం లేదు సరకదా..వారి సర్వీసులకు సంబంధించిన అన్నీ అంశాలూ పూర్తైన వరకూ ‘ఆ ఒక్కటీ అడక్కు’ అన్నట్టుగా వ్యవహరిస్తున్నారు. ఇదిలావుంటే ఉద్యోగులు మాత్రం వారి వారి సామాజిక మాద్యమాల్లో మాత్రం మ్యూచ్ వల్ ట్రాన్స్ ఫర్లు, జిల్లాల పరిధిలోనే జరిగే బదిలీల కోసం పెద్ద పెద్ద చర్చలకు తెరతీస్తున్నారు. ఒక ప్రక్క గ్రేడ్-5 కార్యదర్శిలకు సంబంధించి జీఓనెంబరు 149 పెండింగ్ లో ఉండిపోవడంతోపాటు 8శాఖల సిబ్బందికి డిపార్టమెంటల్ టెస్టుల విషయంలోనూ ఒక్కోశాఖకు సంబంధించి ఒక్కో గెజిట్ పబ్లికేషన్ ను ప్రభుత్వం ఆలస్యంగా విడుదల చేసుకుంటూ వస్తుంది. వాస్తవానికి ఉద్యోగులకు సర్వీసు రూల్స్ దగ్గర నుంచి ప్రొబేషన్ డిక్లరేషన్ తోపాటు, ట్రాన్స్ ఫర్స్ ఎలిజిబిలిటీ వచ్చినా ప్రభుత్వం ప్రత్యేకంగా చొరవ తీసుకొచి బదిలీలకు జీఓ ఇస్తే తప్పా ఆ పని జరగదు. ‘ఆలు లేదు సూలు లేదు కొడుడుపేరు సోమలింగం’ అన్నట్టుగా సచివాలయ ఉద్యోగులు అపుడే బదిలీల కోసం ఆలోచిస్తుండం విచిత్రంగా ఉందంటూ ఈ విషయాన్ని ప్రభుత్వ పెద్దలు జస్ట్ కామెడీగా తీసుకుంటున్నారు. ఇక్కడ ఉద్యోగుల్లో కూడా ప్రభుత్వంపై నమ్మకం సన్నగిల్లడం, ప్రస్తుతం పనిచేస్తున్న సచివాలయాలు, పంచాయతీల్లో ప్రజాప్రతినిధులు, గ్రేడ్-1,4 కార్యదర్శిల నుంచి ప్రోత్సాహం లేకపోవడం, వేరే వేరే జిల్లాల్లో ఉద్యోగాలు లభించడం, ప్రభుత్వం ఇచ్చే రూ.15 వేలు జీతం ఎటూ చాలకపోవడం తదితర ఎన్నో కారణాలను సచివాలయ ఉద్యోగులు చెప్పుకొస్తున్నారు. ఏది ఎలా వున్నా, ప్రభుత్వం సచివాలయ ఉద్యోగుల సర్వీసు డిక్లరేషన్ ప్రకటించి వారందరికీ ప్రభుత్వ రెగ్యులర్ ఉద్యోగులుగా గుర్తించిన తరువాత మాత్రమే పదోన్నతలకు సంబందించి ఏ పనైనా ముందుకి కదులుతుందని అధికారులు చెప్పుకొస్తున్నారు. 

కాగా  రాష్ట్రవ్యాప్తంగా వేర్వేరు జిల్లాల్లో ఉన్న ఉద్యోగులు మాత్రం మ్యూచ్ వల్ ట్రాన్స్ ఫర్లకు మాత్రం లైన్ క్లియర్ చేసుకోవడానికి ప్రయత్నాలు ప్రారంభించారు. మరికొంత మంది ఎమ్మెల్యేలు, మంత్రులు, ఎంపీలు ప్రభుత్వంలోని ఇతర పెద్దలను ప్రసన్నం చేసుకుంటూ పదోన్నతలు(సర్వీస్ రెగ్యులైజేషన్) రాగానే ఒక్కసారే జంప్ అయిపోవాలని వేయి కళ్లతో ఎదురు చూస్తున్నారు. మరికొంత మంది ఉద్యోగులు మాత్రం తమ ఉద్యోగాలు ఎలాంటి ఆటంకాలు లేకుండా సర్వీసులు రెగ్యులర్ అయిపోతే ఒక పనైపోతుందని, కావాలంటే ఆ తరువాత బదిలీలు, పదోన్నతులు, ఇతరత్రా అంశాలు చూసుకుందామన్నట్టుగా కామ్ గా ఉండి పోతున్నారు. మరికొంత మంది తమకు రావాల్సిన అధికారాలు, విధులు, నిధులు, పరిధిల కావాలని పట్టుబడుతున్నారు. ఇవన్నీ పక్కన పెడితే గ్రామసచివాలయాల్లో డిడిఓగా ఉండే కార్యదర్శిలను కాదని పంచాయతీరాజ్ శాఖ ఆ అధికారాలను విద్యార్హత తక్కువగా వున్న వీఆర్వోలకు కట్టబెట్టింది ఆ అంశం కాస్త కోర్టులో ఉంది. గ్రేడ్-5 కార్యదర్శిల అధికారాలు సైతం ఇంకా గాల్లోనే ఉన్నాయి.. ఇంకా భర్తీకానీ చాలా పోస్టులను ప్రభుత్వం ఇంకా భర్తీచేయలేదు. ఇలా ఎటు చూసినా బదిలీలకు సంబధించి ఏ కోణంలోనూ లైన్ క్లియర్ గా ఉన్నట్టు మాత్రం కనిపించం లేదు. అయితే ఇన్ని కారణాలు చెప్పిన అధికారులు ప్రభుత్వ పెద్దలు తలచుకుంటే ఉద్యోగుల సర్వీసు రెగ్యులర్ చేసిన తరువాత ఎన్నికలను ద్రుష్టిలో ఉంచుకొని దగ్గర చేసి బదిలీలు చేయించినా చేస్తారంటూ అధికారులు ముగించడాన్ని బట్టి బదిలీలకు అశకాశం 50-50 చాన్సులు మాత్రమే కనిపిస్తున్నాయి. ఈ తరుణంలో ప్రభుత్వం, ముఖ్యమంత్రి వైఎస్.జగన్మోహనరెడ్డి మానస పుత్రిక అయిన గ్రామ, వార్డు సచివాలయశాఖలో అక్టోబరు 2 తరువాత పరిణామాలు ఎలా ఉండబోతున్నాయో అనే విషయంపై అందరికీ ఉత్కంఠ నెలకొంది..!