దేశం అన్ని విధాలుగా అభివృద్ధి పథంలో పైనించాలంటే గ్రామాలు అభివృద్ధి సాధించాలని, అందుకు క్షేత్ర స్థాయి ప్రజాప్రతినిధులు కీలకపాత్ర పోషించాల్సి ఉందని జిల్లా కలెక్టర్ డి మురళీధర్ రెడ్డి పేర్కొన్నారు. గురువారం కాకినాడ జిల్లా పరిషత్ కార్యాలయంలో గత ఏప్రిల్ నెలలో నిర్వహించిన  పంచాయతీ ఎన్నికలలో ఎన్నికైన సర్పంచ్ లకు నిర్వహించిన శిక్షణా కార్యక్రమంలో జిల్లా కలెక్టర్ డి.మురళీధర్ రెడ్డి ముఖ్యఅతిథిగా పాల్గొని, శిక్షణ కార్యక్రమాన్ని ప్రారంభించారు. ఈ సందర్భంగా జిల్లా కలెక్టర్ మాట్లాడుతూ, కేంద్ర, రాష్ట్ర ప్రభుత్వాలు  అమలు చేస్తున్న సంక్షేమ పథకాలను సద్వినియోగం చేసుకుంటూ గ్రామాలను అభివృద్ధి పథంలో నడిపించి,ఉత్తమ గ్రామ పంచాయతీలుగా తీర్చిదిద్దేందుకు కృషి చేయాలన్నారు. ప్రజా సంక్షేమం కోసం కేంద్ర , రాష్ట్ర ప్రభుత్వాలు అమలు చేస్తున్న పథకాలు , కార్యక్రమాలు విజయవంతం కావాలంటే సర్పంచులు కీలక భాగస్వామ్యం వహించాలన్నారు. భారత రాజ్యాంగంలో పంచాయతీలకు, సర్పంచులకు ప్రత్యేక స్థానం ఉందని గ్రామాలే దేశానికి పట్టుకొమ్మలు అని చెప్పిన మహాత్ముని మాటలను స్ఫూర్తిగా తీసుకుని గ్రామాల అభివృద్ధికి కృషి చేయాలన్నారు. రాష్ట్ర ప్రభుత్వం నూతనంగా ఏర్పాటుచేసిన సచివాలయ  వ్యవస్థ ద్వారా సుమారుగా 530 సేవలు అందించబడుతున్నాయన్నారు. తమ సొంత అనుభవాలను ఇతరులతో పంచుకొని తమ గ్రామంలో గతంలో ఎదురైన సమస్యలను దృష్టిలో ఉంచుకొని సర్పంచులు అధికారులతో సమన్వయంతో పనిచేయాలన్నారు. 

జిల్లాలో సచివాలయాలు, రైతు భరోసా కేంద్రాలు, హెల్ నెస్  సెంటర్లు,బల్క్ మిల్క్ సెంటర్ల కు సంబంధించి సుమారుగా 4,500 నూతన భవనాలు నిర్మాణం జరుగుతుందని, త్వరితగతిన నిర్మాణ పనులు పూర్తి అయ్యే విధంగా సర్పంచులు ప్రత్యేక దృష్టి కేంద్రీకరించాలన్నారు. గ్రామాల్లో స్వచ్ఛభారత్ మిషన్ లో భాగంగా బహిరంగ మలవిసర్జన, పారిశుద్ధ్యంలో ఉత్తమ పనితీరు కనబరిచిన సర్పంచులకు జాతీయ స్థాయిలో  ప్రధానమంత్రి చేతుల మీదుగా అవార్డులు అందించ బడుతున్నాయన్నారు. గ్రామాల్లో జరిగే వివిధ కార్యక్రమాల్లో ప్రజలను భాగస్వామ్యం చేస్తూ వారిలో మార్పు తీసుకు రావాలన్నారు. ప్రధానంగా పచ్చదనం , తడి-పొడి చెత్త సేకరణ,  పారిశుద్ధ్యం,త్రాగు నీరు ఇతర అంశాలపై  ప్రత్యేక శ్రద్ధ వహించాలన్నారు. గ్రామాల్లో పారిశుద్ధ్యం సరిగా లేకపోతే అనేక రోగాలకు నిలయంగా ఉంటుందన్నారు. 

కోవిడ్ పాజిటివ్ రేటు అత్యధికంగా ఉన్న గ్రామాల్లో పూర్తిగా ఆంక్షలు విధించడం జరుగుతుందని,కరోనా నియంత్రణకు ఎటువంటి సందేహాలకు పోకుండా సర్పంచులు కఠిన చర్యలు తీసుకోవాలన్నారు. క్లిష్ట పరిస్థితుల్లో బాధ్యతలు చేపట్టిన సర్పంచులు తమకు  ఎదురయే  ప్రతి సవాళ్లను ఒక ఛాలెంజ్ గా తీసుకుని గ్రామాలను  అభివృద్ధి పథంలో నడిపించడం ద్వారా జిల్లాకు మంచిపేరు వస్తుందని కలెక్టర్ తెలిపారు.  జిల్లా పరిషత్ ప్రధాన కార్యదర్శి ఎన్ వివి.సత్యనారాయణ మాట్లాడుతూ జిల్లాలో మొత్తం 1103 గ్రామ పంచాయతీలకు గాను 1072 మంది ఈ శిక్షణా కార్యక్రమలలో పాల్గొంటున్నారు.5 వెలు జనాభా పైనున్న 218 గ్రామాల్లో సర్పంచ్ లకు సామర్లకోట ఈటీసీ కేంద్రంలోను ,854 మందికి ఐదు డివిజన్లలో శిక్షణాతరగతులు ఏర్పాటు చేయడం జరిగిందన్నారు. తొలిరోజు శిక్షణా కార్యక్రమానికి  సంబంధించి కాకినాడ డివిజన్ పరిధిలో ఉన్న కాకినాడ, కరప,తాళ్ళరేవు మండలాల నుంచి సుమారుగా 49 మంది శిక్షణ తరగతులకు హాజరైనట్లుఆయన తెలిపారు.

  గ్రామ ప్రజలకు సుపరిపాలన అందించడంలో ప్రభుత్వ సంక్షేమ పథకాలు అమలులో నిర్మాణాత్మకమైన పాత్రను పోషించే విధంగా గ్రామ సర్పంచులు పరిపాలన విధానం పై అవగాహన పెంపొందించుకోవాలని కాకినాడ ఆర్టీవో ఏజీ.చిన్నికృష్ణ తెలిపారు. క్షేత్ర స్థాయిలో సర్పంచులు ఉత్సాహంగా ఉంటే లబ్ధిదారులకు మంచి జరుగుతుందని జిల్లా పంచాయతీ అధికారి ఎస్ వి నాగేశ్వర నాయక్ తెలిపారు.ఈ శిక్షణ కార్యక్రమంలో ప్రతి అంశం పట్ల పూర్తి అవగాహన పెంపొందించుకొని, ఏ విధమైన సందేహం ఉన్న ఇక్కడే నివృత్తి చేసుకోవాలని ఆయన తెలిపారు.  ఈ కార్యక్రమంలో డిఎల్ డీఓ. మధుసుధన్ రావు ,కో-ఆర్డినేటర్ కెఎస్ .ఆర్మ్ స్ట్రాంగ్ , ఇతర అధికారులు తదితరులు పాల్గొన్నారు.

 సింహాచలంలోని శ్రీశ్రీశ్రీ లక్ష్మీ నరసింహస్వామి( సింహాద్రిఅప్పన్న)వారికి విశాఖ శివాజీపాలెంకు చెందిన కండ్రప ఉష, కృష్ణమూర్తి దంపతులు  లక్షా నూట పదహారు రూపాయలను విరాళంగా ఇచ్చారు. ఈ మేరకు పీఆర్వో ఆఫీసులోని డొనేషన్ల కౌంటర్లో  నగదు చెల్లించి రసీదు పొందారు.  శ్రీస్వామివారి నిత్య అన్నదాన పథకానికి ఈ విరాళమిస్తున్నట్లు దాతలు ప్రకటించారు. తమ పెళ్లిరోజైన జూన్ 21న భక్తులకు అన్నదానం చేయాలని దాతలు కోరారు. అనంతరం స్వామవారిని దర్శించుకొని ప్రత్యేక పూజలు చేశారు.ఈ సందర్భంగా దాతకు ఆలయ సిబ్బంది ప్రసాదాన్ని అందించగా, వేదపండితులు ఆశీర్వచనాన్ని అందజేశారు. కార్యక్రమంలో దేవస్థాన సిబ్బంది పాల్గొన్నారు.

కాకినాడ గ్రామీణ నియోజకవర్గంలో 2 ఏళ్లలో రూ.66 కోట్లుతో వివిధ అభివృద్ధి కార్యక్రమాలు చేపట్టినట్టు రాష్ట్ర వ్యవసాయ, సహకార,మార్కెటింగ్,ఫుడ్ ప్రాసెసింగ్ శాఖ మంత్రి కురసాల కన్నబాబు తెలిపారు. బుధవారం కాకినాడ గ్రామీణం కొత్త గైగోలుపాడు 49వ వార్డులో వివిధ అభివృద్ధి కార్యక్రమాల శంకుస్థాపన కార్యక్రమానికి కాకినాడ నగరపాలక సంస్థ కమిషనర్ స్వప్నిల్ దినకర్ పుండ్కర్ తో కలిసి మంత్రి కురసాల కన్నబాబు ముఖ్యఅతిథిగా పాల్గొన్నారు. ఈ సందర్భంగా మంత్రి కన్నబాబు మాట్లాడుతూ రాష్ట్ర ముఖ్యమంత్రి  జగన్మోహన్ రెడ్డి ముఖ్యమంత్రిగా బాధ్యతలు చేపట్టినప్పటి నుంచి కాకినాడ గ్రామీణ నియోజకవర్గం అభివృద్ధికి పెద్ద ఎత్తున కార్యక్రమాలు చేపట్టి అమలు చేయడం జరిగిందన్నారు. గడిచిన రెండేళ్లలో కాకినాడ గ్రామీణ  నియోజకవర్గంలో స్మార్ట్ సిటీ, జనరల్ ఫండ్స్, 14 ,15- ఆర్థిక సంఘం నిధుల నుంచి సుమారుగా 66 కోట్ల రూపాయలతో అభివృద్ధి కార్యక్రమాలు చేపట్టడం జరిగిందని మంత్రి తెలిపారు. కాకినాడకు జాతీయ స్థాయిలో గుర్తింపు తీసుకు రావడంలో నగరపాలక సంస్థ కమిషనర్,ఇతర అధికారులు ఎంతగానో కృషి చేస్తున్నారన్నారు. ఇప్పటికే కాకినాడకు పెన్షనర్ ప్యారడైజ్ గా మంచి గుర్తింపు ఉందని అదేవిధంగా ఉత్తమ నివాసయోగ్యమైన పట్టణముగా కాకినాడకు  జాతీయ స్థాయిలో గుర్తింపు వచ్చిందన్నారు. 

కాకినాడ  నగరపాలక సంస్థలో అంతర్భాగంగా ఉన్న 49 వ వార్డులో సుమారుగా రూ.80 లక్షల వ్యయంతో సిసి రోడ్లు నిర్మాణానికి నేడు శ్రీకారం చుట్టడం జరిగిందని, నిర్మాణ పనులు వెంటనే ప్రారంభించి త్వరితగతిన పూర్తి చేయడం జరుగుతుందన్నారు. సీసీ డ్రైన్లు, మరుగుదొడ్లు నిర్మించేందుకు చర్యలు చేపట్టడంతో పాటు విద్యుత్ సమస్యలు తొలగించే విధంగా చర్యలు చేపట్టడం జరుగుతుందన్నారు. చెత్తను ప్రాసెస్  చేసి తిరిగి వినియోగించే విధంగా గార్బేజ్ ట్రాన్సఫర్ సెంటర్ ను సుమారుగా రూ.ఏడు కోట్ల రూపాయలతో కాకినాడ గ్రామీణ నియోజకవర్గంలోనే ఏర్పాటు చేయడం జరుగుతుందన్నారు. దీనికి సంబంధించి ఇప్పటికే టెండర్లు ప్రక్రియ పూర్తయిందన్నారు. రాబోయే రెండు,మూడు సంవత్సరాల్లో కాకినాడ స్థాయిని మరింత పెంచే విధంగా ప్రజా ప్రతినిధులు ,అధికారులు సమన్వయంతో కృషి చేయడం జరుగుతుందన్నారు. కాకినాడ చుట్టుపక్కల ప్రాంతాల్లో ఓపెన్ సైట్స్ కి సంబంధించి ఆక్రమణలు చేసే వారిపై నగరపాలక సంస్థ ద్వారా చట్టపరమైన  చర్యలు తీసుకోవాలని  నిర్ణయించామని మంత్రి కన్నబాబు తెలిపారు. 

అనంతరం కొత్త గైగొలుపాడు 49వ వార్డులో ఉన్న శ్మశానశాన వాటిక, రోడ్డును స్మార్ట్ సిటీలో భాగంగా ఆధునీకరించేందుకు  సంబంధించి కమీషనర్ , ఇతర ఇంజనీరింగ్ అధికారులతో మంత్రి కన్నబాబు చర్చించారు. అదేవిధంగా 49 వ వార్డులో సమారుగా రూ.80 లక్షల వ్యయంతో నిర్మాణంలో ఉన్న పీ.హెచ్.సి భవన నిర్మాణ పనులను మంత్రి పరిశీలించి అధికారులను  వివరాలు అడిగి తెలుసుకున్నారు.  నగరపాలక సంస్థ కమిషనర్ స్వప్నిల్ దినకర్ పుండ్కర్ మాట్లాడుతూ పారిశుద్ధ్యం, తడి- పొడి చెత్తను వేరు చేయడం, స్మార్ట్ సిటీ అభివృద్ధికి స్థానిక ప్రజల భాగస్వామ్యం నూరు శాతం ఉంటే ఇంకా మెరుగైన ఫలితాలు సాధించి కాకినాడను జాతీయ స్థాయిలో ప్రథమ స్థానంలో నిలిపేందుకు అవకాశం ఉంటుందన్నారు.  ఈ కార్యక్రమంలో నగరపాలక సంస్థ సూపరింటెండెంట్ ఇంజనీర్ సత్యనారాయణరాజు ,డీఈలు ,ఏఈలు ఇతర ఇంజనీరింగ్ అధికారులు, కార్పొరేటర్లు, నాయకులు పాల్గొన్నారు.

ఆంధ్ర ప్రదేశ్ ప్రభుత్వం నైట్ కర్ప్యూ పొడిగింపు, కరోనా నేపథ్యంలో ప్రజల ఆరోగ్యాన్ని దృష్టిలో పెట్టుకుని సింహాచలం శ్రీశ్రీశ్రీ వరాహ లక్ష్మీ నృసింహస్వామి(సింహాద్రి అప్పన్న)వారి గిరి ప్రదక్షిణ రద్దుచేస్తున్నట్టు దేవస్థాన ఈఓ ఎంవీసూర్యకళ తెలియజేశారు. ఈ సందర్భంగా బుధవారం ఈఓ మీడియాతో మాట్లాడుతూ, కర్ఫ్యూ నేపథ్యంలో గిరిప్రదక్షిణ రద్దు చేశామన్నారు. సింహగిరిపైన కూడా ప్రదక్షిణలకు అనుమతిలేదని తెలిపారు. కాగా ఈ నెల 23, 24వ తేదీల్లో స్వామివారి దర్శనాలు మాత్రం కరోనా నిబంధనలు పాటిస్తూ జరుపనున్నామని చెప్పారు. 23వ తేదీన శ్రీస్వామివారి మాస జయంతి, 24వ తేదీనే తుదివిడత చందన సమర్పణ కార్యక్రమాలకు అన్ని ఏర్పాట్లు చేశామన్నారు. ఆరోజు దర్శనాల కోసం  22 ఉదయం నుంచి రెండు రోజులపాటు అడ్వాన్స్ బుకింగ్ సౌకర్యాన్ని భక్తుల కోసం అందుబాటులోకి తీసుకువచ్చామన్నారు. ఇందులో వంద, మూడు వందల రూపాయల టికెట్లు కౌంటర్లలో అడ్వాన్స్ గా  అమ్ముతున్నామన్నారు. అలాగే 300 రూపాయల టికెట్లు 2,500, వంద రూపాయల టికెట్లు 2,500 అందుబాటులో ఉంచామన్నారు.  అత్యంత పవిత్రమైన 24వ తేదీకోసం  మొత్తం 5వేల టికెట్లు అడ్వాన్స్ గా అమ్మాలని నిర్ణయించినట్టు చెప్పారు.  వీఐపీలకు కూడా లఘు దర్శనాలు మాత్రమే ఉంటాయని, వేద ఆశీర్వాదాలుండవని వివరించారు. ఉదయం6గంటల నుంచి మధ్యాహ్నం3 గంటల వరకూ విరామం లేకుండా దర్శనాలు జరిపిస్తామన్నారు. 8 లడ్డూ కౌంటర్ల ద్వారా లక్ష లడ్డూ ప్రసాదం కూడా అందుబాటులో ఉంచుతున్నామన్నారు. తెల్లవారు జామున 3 గంటలకే సింహాచలం కొండపైకి బస్సులు నడపడంతోపాటు, టికెట్ల కౌంటర్లు, కేశ ఖండనశాల కూడా 3 గంటలకే తెరుస్తామని చెప్పారు. ఈ కార్యక్రమంలో దేవస్థానం స్థానాచార్యులు డా. టీపీ రాజగోపాల్, ప్రధానార్చకులు గోపాల కృష్ణమాచార్య, హవల్దార్ ఈఈలు, ఏఈఓలందరూ పాల్గొన్నారు.

 శ్రీకాకుళం జిల్లాలో ఎన్నికైన సర్పంచ్ లకు ఈనెల 22వ తేదీ నుండి ఆగస్టు 14వ తేదీ వరకు శిక్షణ కార్యక్రమాలు నిర్వహిస్తున్నట్లు జిల్లా పరిషత్ ముఖ్య కార్య నిర్వహణాధికారి,  జిల్లా వనరుల కేంద్రం ప్రిన్సిపాల్ బి.లక్ష్మీపతి తెలిపారు. ఈ మేరకు శిక్షణ కార్యక్రమాల షెడ్యూల్ ను జిల్లా వనరుల కేంద్రంలో బుధవారం పరిశీలించారు. ఈ సందర్భంగా లక్ష్మీపతి మాట్లాడుతూ మూడు డివిజన్లలో శిక్షణ కేంద్రాలను ఏర్పాటు చేశామని ఆయన చెప్పారు. శ్రీకాకుళం డివిజన్ కు చిలకపాలెం శివాని ఇంజనీరింగ్ కాలేజ్ లోను, పాలకొండ డివిజన్ కు సీతంపేట యూత్ ట్రైనింగ్ సెంటర్ లోను,  టెక్కలి నియోజకవర్గానికి సంబంధించి టెక్కలి అయితం కళాశాలల్లోనూ, మందస యూత్ ట్రైనింగ్ సెంటర్ లోను శిక్షణా కార్యక్రమాలను ఏర్పాటు చేశామన్నారు.  బ్యాచ్ ల వారీగా శిక్షణ కార్యక్రమాలు నిర్వహిస్తామని ఆయన చెప్పారు. ఈనెల 22వ నుండి 24వ తేదీ వరకు గార,  ఎల్.ఎన్.పేట, శ్రీకాకుళం, సీతంపేట, మందస, కోటబొమ్మాలి, టెక్కలి మండలాలకు., 20 నుండి  28వ తేదీ వరకు ఆమదాలవలస, సరుబుజ్జిలి, మెలియాపుట్టి, పాతపట్నం, కవిటి, సోంపేట, పలాస, జలుమూరు మండలాలకు., 29 నుండి 31వ తేదీ వరకు ఎచ్చెర్ల, జి.సిగడాం, పాలకొండ, వీరఘట్టం, ఇచ్ఛాపురం, కంచిలి, నందిగాం మండలాలకు., ఆగస్టు 2 నుండి 4వ తేదీ వరకు బూర్జ, పొందూరు, కొత్తూరు, రాజాం, సంతబొమ్మాలి మండలాలకు.,ఆగస్టు 5 నుంచి 7వ తేదీ వరకు లావేరు, నరసన్నపేట, హిరమండలం, ఆర్ ఆమదాలవలస,  వజ్రపుకొత్తూరు మండలాలకు., 9 నుండి 11వ తేదీ వరకు రణస్థలం, పోలాకి, సంతకవిటి, సారవకోట మండలాలకు.,12 నుండి 14 వ తేదీ వరకు వంగర, భామిని మండలాలకు శిక్షణా తరగతులు నిర్వహించడం జరుగుతుందని ఆయన చెప్పారు.

 శిక్షణ తరగతులకు హాజరు అయ్యే సర్పంచుల వివరాలను కేంద్ర ప్రభుత్వ పోర్టల్ లో నమోదు చేయడం జరుగుతుందని అన్నారు.  తదనుగుణంగా వారి హాజరు, పనితీరును గమనించి నిధులు మంజూరు కూడా ఆధారపడి ఉంటుందని ఆయన తెలిపారు. జిల్లాలో నిర్వహిస్తున్న శిక్షణ కార్యక్రమానికి హాజరయ్యే సర్పంచులకు ప్రయాణ, భోజన, వసతి సౌకర్యాలు కల్పస్తున్నట్లు లక్ష్మీపతి తెలిపారు. సామర్లకోట శిక్షణ కేంద్రంలో 112 మంది సర్పంచులు శిక్షణ పొందారనీ ఆయన తెలిపారు. ప్రతి శిక్షణ కార్యక్రమానికి 5 గురుతో  శిక్షణా బృందాన్ని నియమించామని ఆయన చెప్పారు. ఈ శిక్షణ కార్యక్రమంలో గ్రామ పంచాయతీ అభివృద్ధికి అవసరమైన శిక్షణ అందించడం జరుగుతుందని, సర్పంచులు సద్వినియోగం చేసుకావాలని కోరారు. ఈ మేరకు జిల్లా కలెక్టర్ శ్రీకేశ్ లాఠకర్ ప్రత్యేకంగా సర్పంచులకు ఒక లేఖ రాయడం జరిగిందని లక్ష్మీపతి పేర్కొన్నారు. గ్రామాల అభివృద్ధి మీ చేతుల్లో ఉందని అందుకు తగిన విధంగా మంచి పనితీరును కనబరిచాలని, శిక్షణను సర్పంచులు సద్వినియోగం చేసుకోవాలని జిల్లా కలెక్టర్ పిలుపునిచ్చారని ఆయన చెప్పారు. 

రైతు సంక్షేమమే ముఖ్యమంత్రి జగన్ ధ్యేయమని రాష్ట్ర ఉప ముఖ్యమంత్రి ధర్మాన కృష్ణదాస్ అన్నారు. శ్రీకాకుళం జిల్లాలోని పోలాకి మండలంలో బుధవారం రైతు చైతన్య యాత్రలో వ్యవసాయ శాఖ కమిషనర్ హనుమంతు అరుణ్ కుమార్ తో కలిసి ముఖ్య అతిథిగా పాల్గొన్నారు. తొలుత రైతు చైతన్య రథాన్ని ప్రారంభించారు. అనంతరం వ్యవసాయ శాఖ ఏర్పాటుచేసిన పలు స్టాళ్లను పరిశీలించారు. ఈ సందర్భంగా ఆయన మాట్లాడుతు వైఎస్సార్ ఆశయాలకు అనుగుణంగా, రైతాంగం అభ్యున్నతే లక్ష్యంగా జగన్మోహన్ రెడ్డి అనేక సంక్షేమ పథకాలను విజయవంతంగా నిర్వహిస్తున్నారని కొనియాడారు. ఈ కార్యక్రమంలో జిల్లా కలెక్టర్ శ్రీకేష్ లాఠకర్, వ్యవసాయ శాఖ జాయింట్ డైరెక్టర్ కే. శ్రీధర్, డిసిసిబి చైర్మన్ గా నియమితులైన కరిమి రాజేశ్వరరావు తదితరులు పాల్గొన్నారు.