విజయనగరం, జులై 26:: జిల్లా కలెక్టర్ గా మూడేళ్లు జిల్లాలో పని చేసిన డా.ఎం.హరి జవహర్ లాల్  జనరంజక పాలనను అందించారని వక్తలు కొనియాడారు.  సోమవారం కలెక్టరేట్ ఆడిటోరియం లో జిల్లా అధికారులు, రెవిన్యూ అసోసియేషన్ అద్వర్యం లో అభినందన  వీడ్కోలు సభ నిర్వహించారు. కలెక్టర్ దంపతులను ఘనంగా సన్మానించారు.  

ఈ సందర్బంగా జిల్లా జడ్జి జి. గోపి మాట్లాడుతూ ప్రకృతిని ప్రజలకు పరిచయం చేసిన వ్యక్తిగా హరి జవహర్ లాల్ నిలిచిపోతారని తెలిపారు. కలెక్టర్ గా  జిల్లాలో పని చేసిన కాలం లో ఎన్నో చక్కని పరిణామాలు చోటు చేసుకున్నాయన్నారు. తన కోపాన్ని ఎప్పుడూ ప్రదర్శించక  అందరితో ఫ్రెండ్లీ కలెక్టర్ గా ఉన్నారన్నారు. అహంకారం, అసూయ తెలియని వ్యక్తి అని జిల్లా ప్రజల మనసుల్లో చెరగని ముద్ర వేశారని పేర్కొన్నారు. 

జిల్లా ఎస్.పి దీపికా పాటిల్ మాట్లాడుతూ ఆయన నిరడంబరత తో,  ప్రశాంత వదనం తో  ప్రజలకు తొందరగా దగ్గరై పోతారని  అన్నారు. సంయుక్త కలెక్టర్  ఆసరా జె. వెంకట రావు మాట్లాడుతూ  కోవిడ్ కాలం లో ఆయన సమర్థతను చూశామని అన్నారు. 5వ బెటాలియన్ కమాండెంట్ విక్రమ్ పాటిల్ మాట్లాడుతూ అతి తక్కువ పరిచయం లొనే తనను స్నేహితునిగా చూసారన్నారు.  

సంయుక్త్ కలెక్టర్ డా.జి.సి.కిషోర్ కుమార్ మాట్లాడుతూ  ముందుండి నడిపించిన నాయకుడని కొనియాడారు. వినయం, సంస్కారం కలగలిపిన మానవతా వాది అన్నారు. ప్రతీ రోజు ఎదో ఒక కొత్త విషయాన్ని నేర్చుకుంటూనే  ఉంటామన్నారు. ఏ పని ఎప్పుడు, ఎలా చేయాలో తెలిసిన వ్యక్తి యని, అందుకే మూడేళ్ళలో జిల్లాను ఉన్నత స్థానం లో నిలిపారని పేర్కొన్నారు. తన పాలనతో ప్రజలకు, అధికారులకు ప్రీతి పాత్రులైనారని అన్నారు.  సంయుక్త కలెక్టర్లు డా.మహేష్,   మాట్లాడుతూ పరిపాలన అనేది ఒక కళ అని, ఆ కళను ప్రదర్శించి అందరి మన్ననలు పొందారని పేర్కొన్నారు. మయూ ర్ అశోక్ మాట్లాడుతూ విజయనగరం వెళ్తున్నామంటే అక్కడ హరి జవహర్ లాల్ కలెక్టర్  ఉంటారు, మీకు అన్ని విధాలా ప్రోత్సహిస్తారని చెప్పారని , వచ్చిన తర్వాత  అనేక విషయాలను తెలుసుకున్నానని అన్నారు.  ఐ.టి.డి.ఏ ప్రాజెక్ట్ అధికారి  ఆర్.కుర్మానాధ్,  సబ్ కలెక్టర్  భావన, సి.పి.ఓ విజయ లక్ష్మి, డిడి సోషల్ వెల్ఫేర్ సునీల్ రాజ్ కుమార్ తదితరులు కలెక్టర్ సేవలను కొనియాడారు. ఈ సందర్బంగా మూడేళ్ళ కలెక్టర్ పాలన పై జిల్లా అధికారులు చిత్రీకరించిన షార్ట్ ఫిల్మ్ ను ప్రదర్శించారు. ఈ కార్యక్రమంలో డి.ఆర్.ఓ గణపతి రావు, ఆర్.డి.ఓ భవాని శంకర్, మత్స్యశాఖ సహాయ సంచాలకులు ఎన్.నిర్మలకుమారి, జిల్లా అధికారులు పాల్గొన్నారు.

రాష్ట్ర ప్రభుత్వం ఆపదలో ఉన్న మహిళల భద్రత కోసం ప్రతిష్టాత్మకంగా తీసుకొచ్చిన దిశ యాప్ మహిళలకు రక్షణగా నిలుస్తుందని కాకినాడ సిటి ఎమ్మెల్యే ద్వారంపూడి చంద్రశేఖర్ రెడ్డి, నగర  మేయర్ సుంకర పావని, జిల్లా ఎస్పీ ఎం.రవీంద్రనాథ్ బాబు స్పష్టం చేశారు. సోమవారం జిల్లా పోలీస్ కన్వెన్షన్ హాల్ లో దిశ యాప్ పై అవగాహన కార్యక్రమం నిర్వహించారు.  జిల్లా ఎస్పీ  మాట్లాడుతూ  ప్రత్యేకంగా మహిళలు, బాలికల పట్ల జరిగే నేరాల సత్వర దర్యాప్తు కోసం ఏర్పాటు దీనిని ఏర్పాటు చేశారన్నారు. యాప్ మహిళల వద్ద వుంటే పక్కనే రక్షణ వున్నట్టేనన్నారు. ఇప్పటికే దిశ యాప్ అనేక ఫలితాలు సాధించి ఆపదలో వున్న మహిళలను రక్షిస్తున్న విషయాన్ని ప్రతీ ఒక్కరూ గుర్తుంచుకోవాలన్నారు. జిల్లాలో 3,44,015 మంది మహిళలు తమ ఫోన్ లలో దిశ యాప్ ను డౌన్లోడ్ చేసుకున్నారని వివరించారు. నెలాఖరు ఈ సంఖ్యను ఐదు లక్షలకు తీసుకెళ్లాలనే లక్ష్యంతో పనిచేస్తున్నామన్నారు. 

రాష్ట్రం లోనే తూర్పుగోదావరి జిల్లా ను ప్రధమ స్థానం లో నిలపాలంటే అధిక స్థాయిలో మహిళలు, విద్యార్ధినిలు ఈ యాప్ ఇనిస్టాల్ చేసుకోవాలన్నారు.

 కాకినాడ సిటి ఎమ్మెల్యే ద్వారంపూడి చంద్రశేఖర్ రెడ్డి  సూచనల మేరకు నగరంలో ఉన్న అందరితో దిశ యాప్ డౌన్లోడ్స్ చేయించే కార్యక్రమం ఏర్పాటు చేస్తామన్నారు. జాయింట్ కలెక్టర్ జి.రాజకుమారి మాట్లాడుతూ ఈ దిశ పోలీస్ స్టేషన్ ను కాకినాడ లో తనతోనే ప్రారంభింప చేయించారని, ఇది తనకు చాలా సంతోషకర విషయమని.. ముఖ్యంగా ఈ యాప్ ఇన్స్టాల్ చేసుకున్న తర్వాత ఇది ఎలా పనిచేస్తుందో అనే ఉద్దేశంతో తను కాల్ చేయగా వెంటనే పోలీస్ వారు ఫోన్ చేసి అమ్మ మీరు ఏమైనా ఆపదలో వున్నారా అని అడిగారని, ఇంత వెనువెంటనే స్పందన రావడం చాల అశ్చర్యం కలిగించిందన్నారు. కుడా చైర్మన్  రాగిరెడ్డి దీప్తి చంద్రకళ, బిసి కార్పొరేషన్ డైరెక్టర్ పసుపులేటి వెంకటలక్ష్మి, ఐసిడిఎస్ అధికారి జివి సత్యవాణి, కాకినాడ స్మార్ట్ సిటీ  అల్లి రాజబాబు, ఇతర అధికారులు సిబ్బంది పాల్గొన్నారు. 

పోలీస్ శాఖ పరంగా వచ్చిన అర్జీల పరిష్కారంలో చొరవ చూపాలని తూర్పుగోదావరి జిల్లా ఎస్పీ స్సీ రవీంద్రనాథ్ బాబు అధికారులను ఆదేశించారు. ఆంధ్రప్రదేశ్ ప్రభుత్వం ప్రజల యొక్క సమస్యలను త్వరితగతిన  పరిష్కరించాలనే సదుద్దేశంతో తలపెట్టిన స్పందన కార్యక్రమాన్ని తిరిగి  సోమవారం ఎస్పీ లాంఛనంగా పునః ప్రారంభించారు. ఈ సందర్భంగా ఎస్పీ మాట్లాడుతూ, జిల్లా కార్యాలయంతోపాటు, సబ్ డివిజన్ కార్యాలయంలో కూడా స్పందన కార్యక్రమం జరుగుతుందన్నారు. ఎవరూ వ్యయప్రయాశలకోర్చి జిల్లా కేంద్రానికే రావాలనే నిబంధన పెట్టుకోవద్దన్నారు. కార్యాలయానికి వివిధ సమస్యల పరిష్కారం నిమిత్తం వచ్చిన ఫిర్యాదు దారుల నుంచిం అర్జీలను స్వీకరించి సంబంధిత పోలీస్ అధికారులను సత్వరంగా పరిష్కరించాలని ఆదేశాలు జారీచేశారు. కరోనా నేపథ్యంలో వాయిదా పడిన స్పందన కార్యక్రమం తిరిగి ప్రారంభం కావడంతో ప్రజలు తమ సమస్యల అర్జీలతో జిల్లాఎస్పీకార్యాలయానికి ఎక్కువ మొత్తంలో అర్జీలతో జనం వచ్చారు.

విశాఖ మహానగరంలో ప్రజల ప్రాణాలకు ప్రమాదకరంగా ఉన్న గోతుల రోడ్లను పక్కాగా వేయాలని డిమాండ్ చేస్తూ ఆదివారం అక్కయ్యపాలెం హైవే జంక్షన్ వద్ద ఆటో డ్రైవర్లు నిరసన తెలియజేశారు. ఈ సందర్భంగా ఆటో అండ్ మోటర్ వర్కర్స్ యూనియన్, AITUCఅనుబంధం రాష్ట్ర ప్రధాన కార్యదర్శి జి.వామనమూర్తి మాట్లాడుతూ, విశాఖ మహా నగరం మాధవధార, మురళి నగర్, ఆర్అండ్ బి జంక్షన్ ,అక్కయ్యపాలెం మెయిన్ రోడ్ లను ప్రమాదకరంగా మారిపోయాయన్నారు. ఆ ప్రాంతంలో ప్రయాణాలు చేస్తున్న ఆటోలు, వ్యాన్లు తరచూ రిపేర్లకు గురవుతున్నాయని ఆవేదన వ్యక్తం చేశారు. చేసిన సర్వీసులన్నీ ఆటోల రిపేర్లకు వస్తున్నాయన్నారు. ఉన్న గోతులు పడిన రోడ్లను పక్కాగా వేయాలని ప్రభుత్వాన్ని డిమాండ్ చేశారు .గత మూడు సంవత్సరాలుగా అండర్ గ్రౌండ్ డ్రైనేజీ ,అండర్ గ్రౌండ్ విద్యుత్ లైన్లు, కేబుల్ లైన్లు వేసుటకు త్రవ్విన గోతులను కప్పలేదని ఆరోపించారు.  దీనివల్ల మోటార్ బైకులు, ఆటోలు నడపాలంటే ప్రాణాలు అరిచేతిలో పెట్టుకోవాల్సిన దుస్థితి ఏర్పడిందని విమర్శించారు. ప్రభుత్వం పక్కా రోడ్ల  నిర్మాణం పేరుతో లీటర్ డీజిల్ పై  రూపాయి.12పైసలు.చొప్పున పెంచి 1200కోట్ల రూపాయలు ప్రభుత్వం ఖజానా నింపుకుంటున్నా.. రోడ్లు మాత్రం పక్కాగా నిర్మాణం చేయలేదని ఆగ్రహం వ్యక్తం చేశారు. రాష్ట్ర వ్యాప్తంగా ప్రజల ప్రాణాలతో చెలగాటం ఆడే గోతుల రోడ్లను పక్కాగా వేసి రోడ్డు ప్రమాదాలనివారణకు చర్యలు తీసుకోవాలని ప్రభుత్వాన్ని డిమాండ్ చేశారు.లేనిపక్షంలో ప్రజావ్యతిరేకతకు గురికావాల్సి వస్తుందన్నారు..

ఈ కార్యక్రమంలోప్రభాకర్, కేలం శివ,పి.బాలు, శ్రీనివాస్, సన్యాసిరావు, సత్తిబాబు, నందీశ్వర రావులు తదితరులు పాల్గొన్నారు .

శ్రీకాకుళం జిల్లాలో కోవిడ్ వేక్సినేషన్ నమోదు సక్రమంగా జరగాలని జిల్లా కలెక్టర్ శ్రీకేష్ లాఠకర్ అధికారులను ఆదేశించారు. ఆదివారం ఈ మేరకు వైద్యాధికారులతో కలెక్టరేట్ లో సమీక్ష నిర్వహించారు. రెండవ డోసు పూర్తి చేసుకున్న వారి పేర్లు కూడా తిరిగి జాబితాలో చేరుతున్న సందర్బాలు వస్తున్నాయని అటువంటి పరిస్థితులు పునరాృతం కాకుండా చూడాలని ఆయన తెలిపారు. పునరావృతం అయితే వాక్సినేషన్ బృందాల పై చర్యలు తీసుకుంటామని ఆయన స్పష్టం చేశారు. వాక్సినేషన్ కు వచ్చేవారి ఫోన్ నంబర్లను రెండు డోసుల సమయంలో జాగ్రత్తగా నమోదు చేయాలన్నారు. డిజిటల్ అసిస్టెంట్ లకు నమోదు కార్య్రమంలో అనుభవం ఉందని ఆయన తెలిపారు. వాక్సినేషన్ కు వచ్చే ప్రతి 50 మందికి పర్యవేక్షణకు ఒక ఉద్యోగిని ఏర్పాటు చేయాలని ఆయన ఆదేశించారు. ఉదయం 8 గంటలకు వాక్సినేషన్ ప్రారంభం కావాలని, ప్రత్యేక అధికారులు, తహశీల్దార్లు, ఎం.పి.డి.ఓలు, మున్సిపల్ కమిషనర్లు కార్యాచరణ ప్రణాళికను తయారు చేసి పక్కాగా నిర్వహించాలని ఆయన ఆదేశించారు.ఈ సమావేశంలో జాయింట్ కలెక్టర్ కే.శ్రీనివాసులు, జిల్లా పరిషత్ ముఖ్య కార్యనిర్వహణ అధికారి బి.లక్ష్మీపతి, పంచాయతీ రాజ్ ఎస్ఇ కే. బ్రహ్మయ్య, జిల్లా నీటి యాజమాన్య సంస్థ ప్రాజెక్టు డైరక్టర్ హెచ్. కూర్మ రావు,  ఎం.పి.డి.ఓలు, ఇంజినీర్లు తదితరులు పాల్గొన్నారు.

తూర్పుగోదావరి జిల్లాలో ఈ నెల 26న  మెగా కోవిడ్ వ్యాక్సినేష‌న్ డ్రైవ్ జ‌ర‌గ‌నుంద‌ని జాయింట్ క‌లెక్ట‌ర్ (అభివృద్ధి) కీర్తి చేకూరి తెలిపారు. ఈ మేర‌కు ఆదివారం మీడియాకి ఓ ప్ర‌క‌ట‌న విడుద‌ల చేశారు. ఈ కార్య‌క్ర‌మానికి రెండు ల‌క్ష‌ల కోవీషీల్డ్ వ్యాక్సిన్ డోసులు అందుబాటులో ఉంచామని పేర్కొన్నారు. అన్ని గ్రామ‌, వార్డు స‌చివాల‌యాల ప‌రిధిలో 45 ఏళ్లు దాటిన వారికి మొద‌టి డోసుతో పాటు, తొలి డోసు తీసుకొని 84 రోజులు అయిన వారికి రెండో డోసు టీకాలు వేయ‌నున్న‌ట్లు జేసీ తెలిపారు. జిల్లాలో 45 ఏళ్ల‌కు పైబ‌డిన వారిలో ఇంకా నాలుగు ల‌క్ష‌ల మంది మొద‌టి డోసు తీసుకోవాల్సి ఉంద‌ని, అదే విధంగా రెండో డోసు తీసుకోవాల్సిన వారు 40 వేల మంది ఉన్నార‌ని వీరంద‌రూ త‌ప్ప‌నిస‌రిగా మెగా వ్యాక్సినేష‌న్ డ్రైవ్‌ను స‌ద్వినియోగం చేసుకోవాల‌ని సూచించారు.  గ‌ర్భిణీ స్త్రీల‌కు, ఉపాధ్యాయుల‌కు కూడా మొదటి డోసు పంపిణీ చేయ‌నున్న‌ట్లు జాయింట్ క‌లెక్ట‌ర్ (డి) తెలిపారు.

స్పందన కార్యక్రమాన్ని  జిల్లాలో సోమవారం నుండి గ్రామసచివాలయాల్లో ప్రారంభి స్తున్నామని జిల్లా కలెక్టర్ శ్రీకేష్ లాఠకర్ తెలిపారు. వాక్సినేషన్, స్పందన కార్యక్రమాలపై ఆదివారం సంభందిత అధికారులతో టెలీ కాన్ఫరెన్స్ నిర్వహించారు. రాష్ట్ర ప్రభుత్వం స్పందన కార్యక్రమం నిర్వహించుటకు ఆదేశాలు జారీ చేసిందని ఆయన తెలిపారు. గ్రామ సచివాలయాలలో స్పందన కార్యక్రమం నిర్వహించి ప్రజల నుండి ఆర్జీలు తీసుకోవాలని ఆయన ఆదేశించారు. పింఛన్లు, రేషన్ కార్డు, ఇళ్లు తదితర సమస్యలకు మొదటి సారిగా అర్జీలు సమర్పించే ప్రజలు గ్రామ సచివాలయంలోనే సమర్పించాలని ఆయన తెలిపారు. సచివాలయ స్థాయిలో సమస్యలు పరిష్కారం అవుతాయని ఆయన చెప్పారు. మొదటి సారిగా అర్జీలు సమర్పించుటకు మండల, జిల్లా స్థాయికి రావలసిన అవసరం లేదని ఆయన స్పష్టం చేశారు. సచివాలయం స్థాయిలో పరిష్కారం కాకుండా ఉన్న సమస్యలకు మాత్రమే మండల, జిల్లా స్థాయికి రావాలని ఆయన సూచించారు. శ్రీకాకుళం జిల్లా కేంద్రంలో కోవిడ్ నిబంధనల మేరకు స్పందన కార్యక్రమం నిర్వహించుటకు చర్యలు చేపట్టడం జరిగిందని ఆయన పేర్కొంటూ జిల్లా పరిషత్ సమావేశ మందిరంలో స్పందన కార్యక్రమం నిర్వహిస్తున్నట్లు ఆయన చెప్పారు. ఈ సమావేశంలో జాయింట్ కలెక్టర్ కే.శ్రీనివాసులు, జిల్లా పరిషత్ ముఖ్య కార్యనిర్వహణ అధికారి బి.లక్ష్మీపతి, పంచాయతీ రాజ్ ఎస్ఇ కే. బ్రహ్మయ్య, జిల్లా నీటి యాజమాన్య సంస్థ ప్రాజెక్టు డైరక్టర్ హెచ్. కూర్మ రావు,  ఎం.పి.డి.ఓలు, ఇంజినీర్లు తదితరులు పాల్గొన్నారు.