అనకాపల్లి జిల్లాలో ఇంటిగ్రేటెడ్ కలెక్టరేట్ నిర్మాణానికి సంబంధించిన పనులు వేగం పుంజుకుంటున్నాయి. ప్రభుత్వభూముల్లో సువిశాల కలెక్టరేట్ నిర్మాణం చేయడానికి అధికారులు సమాయత్తం అవుతున్నారు. ఈ మేరకు అనకాపల్లి జిల్లా కలెక్టరేట్ కు శాశ్వత భవన నిర్మాణానికి అనువైన ప్రభుత్వ భూములు పరిశీలిస్తున్నట్లు జెసి కల్పనా కుమారి చెప్పారు.  గురువారం ఆమె అనకాపల్లి మండలం లోని కోడూరు, కొండుపాలెం, అనకాపల్లి సౌత్ లలో ప్రభుత్వ భూములను పరిశీలించారు.  ప్రభుత్వ అంచనా మేరకు నిర్మించబోయే కలెక్టరేట్ లోనే సుమారు 75 ప్రభుత్వశాఖలకు చెందిన జిల్లా కార్యాలయాలు కూడా ఉండనున్నాయి. ఈ మేరకు అంతపెద్ద స్థలాన్ని కూడా జిల్లా కలెక్టర్, జెసిల ఆధ్వర్యంలో గుర్తించి ప్రభుత్వానికి నివేదించనున్నారు. ప్రభుత్వ భూముల పరిశీలనలో  జెసి వెంట  రెవిన్యూ డివిజనల్ అధికారి చిన్నికృష్ణ, తాసిల్దార్ శ్రీనివాసరావు ఉన్నారు.

మినుములూరు గ్రామాన్ని ప్రజా భాగస్వామ్యంతో ఆదర్శంగా తీర్చిదిద్దాలని జిల్లా కలెక్టర్ సురేష్ కుమార్ సూచించారు.  గురువారం గ్రామాన్ని సందర్శించిన కలెక్టర్ చెత్త సేకరణ విధానాన్ని పరిశీలించారు. గ్రామంలో 330 గృహాలకు గాను మూడు ట్రై సైకిల్స్, పుష్ కార్టులు ఉన్నప్పటికీ, ఎత్తైన కొండ ప్రాంతంలో గృహాలు ఉన్నందున ఇంటింటికి చెత్త సేకరణ లో కొంత ఇబ్బంది అవుతుందని సర్పంచ్ ఎల్ చిట్టమ్మ కలెక్టర్ దృష్టికి తీసుకువచ్చారు.  చెత్త సేకరణలో భాగంగా గ్రామానికి అవసరమైన ఆటోలను అద్దెకు తీసుకోమని సూచించిన కలెక్టర్ యువత ఐదు వేల రూపాయలు సేకరిస్తే తన వంతుగా మరో ఐదు వేల రూపాయలు రెండు మూడు నెలల పాటు అందజేస్తామని తెలిపారు.  తద్వారా చెత్త సేకరణ సులభతరం అవుతుందన్నారు.  గ్రామంలో యూజర్ చార్జీలు వసూలు చేయడానికి చర్యలు తీసుకోవాలని సర్పంచ్, కార్యదర్శులను కలెక్టర్  కోరారు. నెలకు అరవై రూపాయల యూజర్ చార్జీలు చెల్లించడం ద్వారా చెత్త సేకరణ లో సమస్యలు తొలగిపోతాయని తద్వారా గ్రామం అభివృద్ధి చెందుతుందని, ఆహ్లాదకరమైన వాతావరణం ఏర్పడి పిల్లల భవిష్యత్తు బాగుంటుందని, ఆరోగ్యపరమైన సమస్యలు తొలగిపోతాయని కలెక్టర్ వివరించారు.  గ్రామస్తులతో వెలుగు సిబ్బందిని కలుపుకొని సమావేశమై యూజర్ చార్జీల గురించి అవగాహన కల్పించాలన్నారు. ప్రతి వాలంటీర్ తోపాటు, సచివాలయంలోని డిజిటల్ అసిస్టెంట్, పశుసంవర్ధక సహాయకులు, వ్యవసాయ సహాయకులు, మహిళా పోలీస్ తదితర సిబ్బంది 50 ఇళ్ల నుండి కుటుంబీకులను చైతన్య పరిచి యూజర్ చార్జీలు వసూలు చేసే బాధ్యత తీసుకోవాలన్నారు. గ్రామంలో చెత్త నుండి సంపద కేంద్రాన్ని సందర్శించిన కలెక్టర్  ఎరువును తయారు చేసి లబ్ధి పొందాలన్నారు. సామాజిక భాద్యతతోనే అభివృద్ధి సాధ్యమని హితబోధ చేశారు. 

        పారిశుధ్య కార్మికులు ప్లాస్టిక్ వ్యర్థాలను వేరుగా సేకరించి వాటిని అమ్మి వచ్చిన సొమ్మును  వారే వినియోగించుకోవచ్చని సూచించారు.  పారిశుధ్య కార్మికులకు నెలకు ఒకసారి తప్పనిసరిగా హెల్త్ చెక్ చేయాలని ఆదేశించారు. వారికి గత ఆరునెలలుగా వేతనాలు అందలేదని కలెక్టర్ దృష్టికి తీసుకు రాగా కలెక్టర్ స్పందిస్తూ.. కమిషనర్, కార్యదర్శిల దృష్టికి తీసుకు వెళ్లి వేతనాలు అందేలా చర్యలు తీసుకుంటామని హామీ ఇచ్చారు.  ఈ కార్యక్రమంలో గ్రామ సర్పంచి ఎల్ చిట్టమ్మ, జిల్లా పంచాయతీ అధికారి పిఎస్ కుమార్, ఎంపీడీఒ కెవి నర్సింహ రావు, ఇఒపిఆర్డి పి విజయలక్ష్మి, కార్యదర్శి బి. చిన్ని, గ్రామ సచివాలయ సిబ్బంది, వాలంటీర్లు తదితరులు పాల్గొన్నారు.

ప‌రిశ్ర‌మ‌ల‌ను స్థాపించేందుకు మ‌హిళ‌లు ముందుకు రావాల‌ని జిల్లా క‌లెక్ట‌ర్ ఎ.సూర్య‌కు మారి పిలుపునిచ్చారు. ఔత్సాహిక పారిశ్రామిక వేత్త‌ల‌కు ప్ర‌స్తుతం ప్ర‌భుత్వం ఎన్నో అవ‌కాశాల‌ను క‌ల్పిస్తోంద‌ని, వాటిని స‌ద్వినియోగం చేసుకోవాల‌ని కోరారు. విటి అగ్ర‌హారం టిటిడిసిలో జిల్లా స‌మాఖ్య స‌మావేశం గురువారం జ‌రిగింది. ఈ సంద‌ర్భంగా మ‌హిళా సంఘాల స‌భ్యుల‌కు ప‌రిశ్ర‌మ‌ల స్థాప‌న‌పై అవ‌గాహ‌న క‌ల్పించేందుకు, వివిధ శాఖ‌ల స‌మ‌న్వ‌యంతో క‌న్వ‌ర్జెన్సీ మీటింగ్‌ నిర్వ‌హించారు. ఈ స‌మావేశానికి ముఖ్య అతిధిగా హాజ‌రైన  క‌లెక్ట‌ర్ సూర్య‌కుమారి మాట్లాడుతూ, మ‌హిళ‌లు పారిశ్రామిక‌వేత్త‌లుగా రాణించేందుకు ప్ర‌స్తుతం ఫుడ్ ప్రాసెసింగ్ రంగంలో ఎన్నో అవ‌కాశాలు ఉన్నాయ‌ని అన్నారు. కొత్త ప‌రిశ్ర‌మ‌ల‌ను ఏర్పాటు చేయ‌డంతోపాటు, ఇప్ప‌టికే ఉన్న ప‌రిశ్ర‌మ‌ల‌ను కూడా అభివృద్ది చేసుకోవ‌చ్చ‌ని సూచించారు. ఫ‌లితాన్ని సాధించేవ‌ర‌కూ ప్ర‌యత్నం చేయాల‌ని అన్నారు.  వివిధ ర‌కాల‌ పంట‌ల‌ను, ఉత్ప‌త్తుల‌ను ప్రాసెస్ చేసి, ప్యాకింగ్ చేసి నేరుగా విక్ర‌యించ‌డం, వాటితో ప‌చ్చ‌ళ్లు, ఇత‌ర ప‌దార్ధాల‌ను త‌యారు చేయ‌డం త‌దిత‌ర ప‌రిశ్ర‌మ‌ల‌ను ఏర్పాటు చేయ‌వ‌చ్చ‌ని సూచించారు. మ‌హిళ‌లు దైర్యంగా ముంద‌డుగు వేసి, ఎద‌గ‌డానికి ప్ర‌య‌త్నం చేయాల‌ని కోరారు. అన‌వ‌స‌ర భ‌యాల‌ను విడ‌నాడాల‌ని, తామే మ‌రికొంద‌రికి ఉపాధిని క‌ల్పించేందుకు కృషి చేయాల‌ని సూచించారు. ప్ర‌స్తుతం ప్ర‌తీఒక్క‌రికి డిజిట‌ల్ ఎడ్యుకేష‌న్‌ అవ‌స‌ర‌మ‌ని క‌లెక్ట‌ర్ స్ప‌ష్టం చేశారు. దీనికోసం కేంద్ర‌ప్ర‌భుత్వం ఒక ప్ర‌త్యేక కార్య‌క్ర‌మాన్ని రూపొందించింద‌ని, త్వ‌ర‌లో దీనిని జిల్లాలో అమ‌లు చేయ‌నున్నామ‌ని చెప్పారు. స‌చివాల‌య స్థాయిలో ఉచితంగా అమ‌లు చేయ‌నున్న ఈ కార్య‌క్ర‌మానికి, వ‌లంటీర్ల ద్వారా త‌మ పేర్ల‌ను న‌మోదు చేసుకోవాల్సి ఉంటుంద‌ని సూచించారు. శిక్ష‌ణ పూర్తిచేసుకున్న‌వారికి స‌ర్టిఫికేట్‌ను కూడా అంద‌జేస్తామ‌ని చెప్పారు. అలాగే ప్ర‌తీ మ‌హిళా, ఆంగ్ల భాషా ప‌రిజ్ఞానాన్ని పెంచుకోవాల‌ని క‌లెక్ట‌ర్ కోరారు.

              ఈ స‌మావేశంలో డిఆర్‌డిఏ, వైకెపి ప్రాజెక్ట్ డైరెక్ట‌ర్ డాక్ట‌ర్ ఎం.అశోక్‌కుమార్‌, ఎపిడి సావిత్రి, జిల్లా స‌మాఖ్య అధ్య‌క్షురాలు సిహెచ్ వెంక‌ట‌ల‌క్ష్మి, మెప్మా పిడి సుధాక‌ర‌రావు, ఇండ‌స్ట్రీస్ జిఎం పాపారావు, ఐసిడిఎస్ పిడి శాంత‌కుమారి, మ‌త్స్య‌శాఖ‌ డిడి నిర్మ‌లాకుమారి, ఉద్యాన‌శాఖ‌ డిడి శ్రీ‌నివాస‌రావు, ఎపిఎంఐపి పిడి ల‌క్ష్మీనారాయ‌ణ‌, ప‌శు సంవ‌ర్థ‌క‌శాఖ జెడి డాక్ట‌ర్ వైవి ర‌మ‌ణ‌, ఇత‌ర శాఖ‌ల అధికారులు, మండ‌ల స‌మాఖ్య‌ల ప్ర‌తినిధులు పాల్గొన్నారు. ముందుగా పిఎంఎఫ్ఎంఇ ప‌థ‌కం గురించి, ప‌వ‌ర్ పాయింట్ ప్రెజెంటేష‌న్ ద్వారా ఎపి ఫుడ్‌ప్రాసెసింగ్ ఇండ‌స్ట్రీస్‌ మేనేజ‌ర్ మారుతి వివ‌రించారు.

మిష‌న్ నిర్మాణ్ - 2022 పేరిట స్థానిక‌ ఆనంద గజపతి ఆడిటోరియంలో ఐదు రోజుల పాటు జ‌ర‌గ‌బోయే శిక్ష‌ణా కార్య‌క్ర‌మాల ప్రారంభోత్స‌వం గురువారం అట్ట‌హాసంగా జ‌రిగింది. జిల్లా క‌లెక్ట‌ర్ ఎ. సూర్య‌కుమారి ముఖ్య అతిథిగా పాల్గొని జ్యోతి ప్ర‌జ్వ‌ల‌న చేసి కార్య‌క్ర‌మాన్ని ప్రారంభించారు. శిక్ష‌ణ పొందేందుకు హాజ‌రైన విద్యార్థుల‌ను ఉద్దేశించి ఆమె ప్రారంభోపాన్యాసం చేశారు. విద్యార్థుల్లో స్ఫూర్తి నింపారు. విశ్వాస‌మే ఆయుధంగా నైపుణ్యాల‌కు ప‌దును పెట్ట‌డం ద్వారా చ‌రిత్ర మెచ్చే విజేత‌లుగా నిల‌వాల‌ని ఆకాంక్షించారు. స‌మ‌గ్ర శిక్షా ప‌ర్య‌వేక్ష‌ణ‌లో కేంబ్రిడ్జ్ అసెస్‌మెంట్ ఇంగ్లీషు, ఏస్‌, 21 స్ట్ సెంచ‌రీ ఎడ్యుకేష‌న‌ల్ ఇనిస్టిట్యూష‌న్ సంయుక్త ఆధ్వ‌ర్యంలో నిర్వ‌హిస్తున్నారు. ముఖ్య అతిథిగా హాజ‌రైన క‌లెక్ట‌ర్ ఈ సంద‌ర్భంగా మాట్లాడుతూ జీవితంలో ఉన్న‌త స్థానాల‌కు చేరుకునేందుకు ఇలాంటి శిక్ష‌ణా కార్య‌క్ర‌మాలు ఎంతో దోహ‌ద‌ప‌డ‌తాయ‌ని, విద్యార్థులు ఈ అవ‌కాశాన్ని స‌ద్వినియోగం చేసుకోవాల‌ని సూచించారు. భావిత‌రంలో మీరంతా మంచి స్థానాల్లో స్థిర‌ప‌డడానికి ఇదొక చ‌క్క‌ని వేదికవ‌వుతుంద‌ని, తొలి అడుగులు ఇక్క‌డ నుంచే ప‌డ‌తాయ‌ని పేర్కొన్నారు. నేటి పోటీ ప్ర‌పంచంలో నిల‌దొక్కుకోవాలంటే ఆంగ్ల భాష త‌ప్ప‌నిస‌రి అని అన్నారు. ఆంగ్ల భాష‌పై ప‌ట్టు సాధించాల్సిన ఆవ‌శ్య‌క‌త ఉంద‌ని పేర్కొన్నారు. భ‌యం పోవాల‌ని విశ్వాసం పెర‌గాల‌ని హిత‌వు ప‌లికారు. బిడియం వీడి ధైర్యంగా ఇంగ్లీషు మాట్లాడాల‌ని సూచించారు. ఐదు రోజుల పాటు జ‌రిగే ఈ శిక్ష‌ణా కార్య‌క్ర‌మంపై శ్ర‌ద్ధ పెట్టి ప్ర‌తీ అంశాన్నీ క్షుణ్నంగా నేర్చుకోవాల‌ని చెప్పారు. సందేహాల‌ను నివృత్తి చేసుకొని, నిపుణుల నుంచి స‌ల‌హాలు, సూచ‌న‌లు పొందాల‌ని సూచించారు. ప‌రీక్ష‌లు ముగిసిన‌ నేప‌థ్యంలో విద్యార్థుల సౌక‌ర్యార్థం, సెల‌వుల‌ను స‌ద్వినియోగం చేసుకొనేలా ఈ కార్య‌క్ర‌మం ఏర్పాటు చేశామ‌ని అంద‌రూ పాల్గొని విజ‌య‌వంతం చేయాల‌ని క‌లెక్ట‌ర్‌ పిలుపునిచ్చారు. స్థానిక ఎమ్మెల్యే కోలగట్ల వీరభద్రస్వామి సహకారంతో విద్యార్థులకు భోజన సౌకర్యం కల్పిస్తున్నామ‌ని పేర్కొన్నారు.

అనంత‌రం కేంబ్రిడ్జ్ క‌న్స‌ల్టెంట్ భ‌ర‌త్ సుబ్ర‌మ‌ణ్య అయ్య‌ర్‌, కేంబ్రిడ్జ్ ప్ర‌జెంట‌ర్ షీతల్ బందేక‌ర్‌, సివిల్ స‌ర్వీసెస్ సీనియ‌ర్ మెంటార్ అనుకుల రాజ్ కుమార్ విద్యార్థుల‌ను ఉద్దేశించి మాట్లాడారు. నేటి పోటీ ప్రంపంచంలో మిగ‌తా వారితో పోటీ ప‌డి గెలవాలంటే ఇంగ్లీషు భాష‌లో నైపుణ్యం అవస‌ర‌మ‌ని పేర్కొన్నారు. ఇంగ్లీషు భాష‌లో ప్రావీణ్యం ఉంటే త్వ‌రిత‌గ‌తిన ఉపాధి అవ‌కాశాలు ల‌భిస్తాయ‌ని అన్నారు. కార్య‌క్ర‌మంలో స‌మ‌గ్ర శిక్షా అభియాన్‌ అసిస్టెంట్ ప్రాజెక్టు కో-ఆర్డినేట‌ర్ వి. అప్ప‌ల స్వామినాయుడు, డీఈవో ఎం. జ‌య‌శ్రీ, డైట్ క‌ళాశాల ప్రిన్సిపాల్ ఎన్.టి. నాయుడు, వివిధ క‌ళాశాల‌ల ప్రిన్సిపాళ్లు, వివిధ పాఠ‌శాల‌ల హెచ్‌.ఎం.లు, అధిక సంఖ్య‌లో విద్యార్థులు త‌దిత‌రులు పాల్గొన్నారు. మొద‌టి రోజు శిక్ష‌ణ‌లో భాగంగా ఆంగ్ల భాష ప్రాముఖ్య‌త‌పై, భ‌విష్య‌త్తు అవ‌కాశాల‌పై వివ‌రించారు. ప‌వ‌ర్ పాయింట్ ప్ర‌జెంట్ ద్వారా ప‌లు అంశాల‌పై విశ‌దీక‌రించారు. కేంబ్రిడ్జ్ క‌న్స‌ల్టెంట్ భ‌ర‌త్ సుబ్ర‌మ‌ణ్య అయ్య‌ర్‌, కేంబ్రిడ్జ్ ప్ర‌జెంట‌ర్ షీతల్ బందేక‌ర్‌, సివిల్ స‌ర్వీసెస్ సీనియ‌ర్ మెంటార్ అనుకుల రాజ్ కుమార్ ఆంగ్ల భాషపై విద్యార్థుల‌కు త‌ర్ఫీదు ఇచ్చారు. ఇంగ్లీషు ఎలా నేర్చుకోవాలి.. నేర్చుకుంటే భ‌విష్య‌త్తులో ల‌భించే అవకాశాల గురించి సంపూర్ణంగా వివ‌రించారు. విద్యార్థుల‌తో ప్ర‌త్యేకంగా ఇంట‌రాక్ట్ అవ‌టం ద్వారా తొలి రోజు శిక్ష‌ణ కార్య‌క్ర‌మం నిర్వ‌హించారు.

ధావోస్ లో జరిగే వరల్డ్ ఎకనామిక్ ఫారమ్ సదస్సులో పాల్గొని ఆంధ్రప్రదేశ్ అభివృద్ధికి కావలసిన అన్ని అవకాలను అందిపుచ్ఛుకోవటం జరుగుతుందని రాష్ట్ర పరిశ్రమల శాఖ మంత్రి గుడివాడ అమర్ నాథ్ అన్నారు. గురువారం స్థానిక సర్క్యూట్ హౌస్ లో ఏర్పాటు చేసిన  మీడియా సమావేశంలో ఆయన మాట్లాడుతూ ఈ నెల 24,25,26 తేదీల్లో ధావోస్ లో జరిగే వరల్డ్ ఎకనామిక్ ఫారమ్ సదస్సులో పాల్గొనడం జరుగుతుందన్నారు. ఈ సదస్సు 18 అంశాల్లో జరుగుతుందని, అందు 10 అంశాల్లో ఆంధ్రప్రదేశ్ పాల్గొంటున్నట్లుగా మంత్రి తెలిపారు. కోవిడ్ కు ముందు జరిగిన సదస్సుల కంటే కోవిడ్ తదుపరి జరిగే ఈ సదస్సులో మార్పు ఉంటుందన్నారు. సదస్సులో ఆంధ్రప్రదేశ్ లో వనరులు, అవకాశాలను చూపించే వేదికగా వ్యవసాయ, అధునాతన సాంకేతిక అంశాలలో పాల్గొంటున్నట్లుగా తెలిపారు. రాష్ట్ర వనరులకు సంబంధించి ఒక పెవిలియన్ ఏర్పాటు చేస్తున్నామన్నారు. విశాఖలో ఐటి ను అభివృద్ధి చేసే చర్యల్లో భాగంగా, బీచ్ ఐటి ను ప్రమోట్ చేసే దిశగా సదస్సులో ప్రస్తావిస్తామన్నారు. ఆంద్రప్రదేశ్ లో విశాఖను అభివృద్ధి చేసే దిశగా కృషి చేస్తున్నామని, అన్ని ఇంజినీరింగ్ కాలేజీల్లో స్టార్ట్ఆప్ ఆలోచనలను ప్రోత్సహించడానికి నిర్ణయం తీసుకున్నామన్నారు. రాష్ట్రంలో పోర్టుల అభివృద్ధికి కృషి చేస్తున్నామన్నారు.   రాష్ట్రంలో పెట్టబడులు పెట్టడానికి వచ్చే సంస్థలకు ప్రభుత్వ సహకారం పూర్తిగా ఉంటుందన్నారు. విశాఖను రాష్ట్ర ఐటి హబ్ గా తీర్చుదిద్దడం  జరుగుతుందన్నారు.  ఇప్పటికే ఆంధ్రప్రదేశ్ కు మల్టీ నేషనల్ కంపెనీ వచ్చిందని,   మరికొన్ని ఇంక్యుబేషన్ సెంటర్స్ ప్రతినిధులతో చర్చించడం జరిగిందన్నారు. అదే విధంగా పరిశ్రమల్లో జరుగుతున్న ప్రమాదాల నివారణకు చర్యలు చేపట్టడం జరుగుతుందన్నారు. రాష్ట్రంలో  గడపగడపకు ప్రభుత్వం కార్యక్రమంలో అపూర్వ స్పందన కనిపిస్తుందన్నారు.

ప్రజా జీవితంలో ప్రజా ప్రతినిధులు సామాజిక సేవతో పాటు ఆధ్యాత్మిక చింతన కూడా అలవర్చుకోవాలని శ్రీ శ్రీ శ్రీ శ్రీ త్రిదండి శ్రీమన్నారాయణ రామానుజ చిన్న జీయర్ స్వామి పేర్కొన్నారు. బుధవారం స్థానిక కార్యక్రమంలో పాల్గొనడానికి వచ్చిన చిన్న జీయర్ స్వామి వారిని గోదావరి నదీ తీరాన గల శ్రీ వేంకటేశ్వరస్వామి దేవస్థానంలో మంత్రి  చెల్లుబోయిన శ్రీనివాస వేణు గోపాల కృష్ణ, తదితరులు మర్యాద పూర్వకంగా కలిసి ఆయన ఆశీర్వాదం తీసుకున్నారు. మంత్రి వెంట రాజా నగరం శాసన సభ్యులు జక్కంపూడి రాజా, స్థానిక నాయకులు కర్రీ పాపా రాయుడు, ఆకులవీర్రాజు తదితరులు ఉన్నారు. 

కోనసీమ జిల్లా ఇక డా.బీఆర్. అంభేత్కర్ జిల్లాగా పేరు మారనుంది. ఆ జిల్లా పేరును డా.బీఆర్‌.అంబేడ్కర్‌ కోనసీమ జిల్లాగా మార్చాలని రాష్ట్ర ప్రభుత్వం నిర్ణయం తీసుకుంది. దీనిపై ఇప్పటికే ప్రాధమిక నోటిఫికేషన్ విడుదల చేసింది. అమలాపురం కేంద్రంగా ఏర్పాటు చేసిన కోనసీమ జిల్లాకు డా.బీఆర్‌.అంబేడ్కర్‌ పేరు పెట్టాలని దళిత, ప్రజాసంఘాలు, వివిధ పార్టీలు ప్రభుత్వాన్ని తీవ్రస్థాయిలో కోరాయి. దీనికోసం పలుచోట్ల ఆందోళన కార్యక్రమాలు కూడా చేపట్టారు. ఈ నేపథ్యంలో కోనసీమ జిల్లా పేరులో డా.బీఆర్‌.అంబేడ్కర్‌ పేరును చేరుస్తూ ప్రభుత్వం నిర్ణయం తీసుకుంది. దీనితో ఈ ప్రాంతీయుల చిరకాల కోరిక తీరినట్టు అయ్యింది..

గ్రామ స‌చివాల‌యానికి స‌మ‌యానికి రాకుండా.. ప్ర‌జ‌ల‌కు సంతృప్తిక‌ర సేవ‌లందించ‌కుండా నిర్ల‌క్ష్యం వ‌హించే స‌చివాల‌య ఉద్యోగుల‌ను, వాలంటీర్ల‌ను రెడ్ లిస్టులో పెట్టాల‌ని జిల్లా క‌లెక్ట‌ర్ ఎ. సూర్య‌కుమారి సంబంధిత అధికారుల‌ను ఆదేశించారు. న‌గ‌ర ప‌రిధిలోని వ‌సంత విహార్ స‌చివాల‌యాన్ని ఆమె బుధ‌వారం ఉద‌యం 10.15 గంట‌ల‌కు ఆక‌స్మికంగా త‌నిఖీ చేశారు. ఈ స‌చివాల‌య ప‌రిధిలో సేవ‌లు స‌రిగ్గా అంద‌టం లేద‌ని ప‌రిశీలిద్దామ‌ని ఇక్క‌డికి వ‌చ్చాం.. కానీ ఇక్క‌డెవ‌రికీ క్ర‌మశిక్ష‌ణ ఉన్న‌ట్లు క‌నిపించ‌టం లేద‌ని క‌లెక్ట‌ర్ తీవ్ర అసంతృప్తి వ్య‌క్తం చేశారు. ఆమె వెళ్లిన అర‌గంట‌ త‌ర్వాత కూడా కొంత‌మంది సిబ్బంది రావ‌టంతో వారిని ప్ర‌శ్నించారు. మీకు స‌మ‌య‌పాల‌న లేదా అని ఆగ్రహం వ్య‌క్తం చేశారు. వాలంటీర్లు కూడా ఎవ‌రూ రాక‌పోవ‌టంతో ప‌నితీరు ఆధారంగా నివేదిక‌లు త‌యారు చేయాల‌ని, ప‌నితీరు బాగులేని ఉద్యోగుల‌ను, వాలంటీర్ల‌ను రెడ్ లిస్టులో పెట్టాల‌ని జిల్లా స‌చివాల‌య కో-ఆర్డినేట‌ర్ అశోక్‌ను క‌లెక్ట‌ర్ ఆదేశించారు. ఇక నుంచి ప్ర‌తి స‌చివాల‌యం తాలూక ప్ర‌గ‌తి నివేదిక‌లను ప‌రిశీలించి జాబితా త‌యారు చేయాల‌ని సూచించారు.

స‌చివాల‌య సంద‌ర్శ‌న సంద‌ర్భంగా క‌లెక్ట‌ర్ ప‌లు నివేదిక‌ల‌ను ప‌రిశీలించారు. బీయాండ్ ఎస్‌.ఎల్‌.ఎ. ఎక్కువ‌గా వ‌స్తున్నాయ‌ని, నిర్ణీత వ్య‌వ‌ధిలోగా ప్ర‌తి సమ‌స్య‌ను ప‌రిష్క‌రించాలని సిబ్బందిని ఆదేశించారు. సాంకేతిక ప‌ర‌మైన స‌మస్య‌లుంటే సంబంధిత అధికారుల‌ను సంప్ర‌దించి స‌త్వ‌రమే ప‌రిష్క‌రించాల‌ని, కాల‌యాప‌న చేయ‌రాద‌ని సూచించారు. స‌చివాల‌య ఉద్యోగులు త‌ప్ప‌నిస‌రిగా యూనిఫాం ధ‌రించాల‌ని ఈ సంద‌ర్భంగా ఆదేశించారు. సిబ్బంది హాజరు ప‌ట్టిక‌ను, ప్ర‌గ‌తి నివేదిక‌ల‌ను క‌లెక్ట‌ర్ స్వ‌యంగా ప‌రిశీలించి ప‌నితీరు బాగులేని వారిని మంద‌లించారు. కార్ప‌రేష‌న్ ప‌రిధిలో ఉన్న స‌చివాల‌యాల‌ను త‌ర‌చూ సంద‌ర్శించాల‌ని స్థానిక మున్సిప‌ల్ అధికారి హ‌రీశ్‌ను ఆదేశించారు. సిబ్బందికి క్ర‌మ శిక్ష‌ణ అల‌వ‌ర్చాల‌ని, ప‌నితీరులో ఆశాజ‌న‌క మార్పు వ‌చ్చేలా చ‌ర్య‌లు తీసుకోవాల‌ని సూచించారు. ఆమె వెంట సచివాల‌యాల జిల్లా కో-ఆర్డినేట‌ర్ అశోక్‌, స్థానిక మున్సిపాలిటీ అధికారి హ‌రీశ్, స‌చివాల‌య ఉద్యోగులు త‌దిత‌రులు ఉన్నారు.

విజయనగరం జిల్లాలో ఈ నెల 29 న పాలిటెక్నిక్ ప్రవేశ పరీక్ష జరుగుతుందని డి. ఆర్.ఓ గణపతి రావు తెలిపారు.  విజయనగరం జిల్లాలోని 10 కేంద్రాల్లో, బొబ్బిలి లో 9, గజపతి నగరం లో 4 కేంద్రాల్లో ఉదయం 10 నుండి 1 గంటవరకు పరీక్ష జరుగు తుందన్నారు. పరీక్ష హాల్ లోనికి ఒక గంట ముందు అనుమతిస్తారని, 11 తర్వాత నిమిషం  ఆలస్యమైనా అనుమతించేది లేదని స్పష్టం చేశారు. బుధవారం ఆయన ఛాంబర్ లో సంబంధిత అధికారులతో ఏర్పాట్ల పై సమీక్షించారు.   విద్యా శాఖ నుండి ఫ్లైయింగ్ స్క్వాడ్ లను ఏర్పాటు చేయాలని అన్నారు. పరీక్షలు కట్టుదిట్టంగా జరిగేలా పోలీస్ బందోబస్తు ఏర్పాటు చేయాలన్నారు.  వేసవిని దృష్టి లో పెట్టుకొని ఓ.ఆర్.ఎస్ ప్యాకెట్లను, ప్రధమ చికిత్స కు అవసరమగు మందులను పరీక్షా కేంద్రాల వద్ద అందుబాటులో ఉంచాలని వైద్య ఆరోగ్య శాఖాధికారులను ఆదేశించారు. పరీక్షల కేంద్రం వద్దకు పరీక్షా సమయం లో అవసరమగు బస్ లను నడపాలని ఆర్.టి.సి వారికీ సూచించారు. పరీక్షా సమయంలో విద్యుత్ అంతరాయం లేకుండా చూడాలని విద్యుత్ శాఖ అధికారులకు సూచించారు.అన్ని  శాఖల సమన్వయం తో పరీక్ష ఎలాంటి అవాంఛనీయ సంఘటనలు జరగకుండా ప్రశాంతంగా నిర్వహించాలన్నారు. ఈ సమావేశంలో పోలీటెక్నిక్ ప్రిన్సిపాల్,  జిల్లా పరీక్షల సమన్వయాధికారి  విజయలక్ష్మి, డి.ఈ.ఓ కార్యాలయపు ఏ.డి లక్ష్మణ రావు, ఇతర శాఖల ప్రతినిధులు పాల్గొన్నారు.