పొటాష్‌కు బ‌దులు ప్ర‌త్యామ్నాయ ఎరువుల‌ను వాడాల‌ని జిల్లా క‌లెక్ట‌ర్  ఎ.సూర్య‌కుమారి ఒక ప్ర‌క‌ట‌న‌లో సూచించారు. ప్ర‌స్తుతం జిల్లాలో 1,23,650 హెక్టార్లమేర వ‌రి పంట చిరుపొట్ట‌ద‌శ‌లో ఉంద‌ని, దీనికి పొటాష్ మ‌రియు ఎరువులు వేయాల్సి ఉంద‌ని తెలిపారు. ప్ర‌స్తుత ఖ‌రీఫ్ సీజ‌న్లో 10,000 మెట్రిక్ ట‌న్నుల పొటాష్(ఎంఓపి) ఎరువుల‌కు గానూ 7,453 మెట్రిక్ ట‌న్నుల స‌ర‌ఫ‌రా జరిగింద‌ని తెలిపారు. ప్ర‌స్తుతం అంత‌ర్జాతీయంగా ముడిప‌దార్థాల కొర‌త కార‌ణంగా, పొటాష్ ఎరువుల ల‌భ్య‌త త‌క్కువ‌గా ఉంద‌ని, అయిన‌ప్ప‌టికీ జిల్లా అవ‌స‌రాల‌కోసం ఈ నెలాఖ‌రునాటికి సుమారు 600 మెట్రిక్ ట‌న్నుల పొటాష్ వ‌స్తుంద‌ని వివ‌రించారు.  ఈ పొటాష్‌(ఎంఓపి)కి ప్ర‌త్యామ్నాయంగా 13-0-45 (పొటాషియం నైట్రేట్‌), 0-0-50 (స‌ల్ఫేట్ ఆఫ్ పొటాష్‌)  త‌దిత‌ర ప్ర‌త్యామ్నాయ పొటాష్‌ ఎరువుల‌ను పిచికారీ చేయ‌డం ద్వారా, అతిత‌క్కువ ఖ‌ర్చుతోనే, ఎక్కువ ఫ‌లితాల‌ను సాధించ‌వ‌చ్చ‌ని సూచించారు. ఈ ప్ర‌త్యామ్నాయ ఎరువులు రెండు ర‌కాలూ రైతు భ‌రోసా కేంద్రాల‌వ‌ద్దా, డీల‌ర్ల‌వ‌ద్దా త‌గినంత అందుబాటులో ఉన్నాయ‌ని, వీటి ధ‌ర‌లు కూడా కిలోకి రూ.110 నుంచి రూ.130 వ‌ర‌కు మాత్ర‌మేన‌ని తెలిపారు. ఒక లీట‌రు నీటికి 10 గ్రాములు చొప్పున వంద‌లీట‌ర్ల నీటిలో క‌లిపి ఎక‌రాకి వారం, ప‌దిరోజుల వ్య‌వ‌ధిలో రెండు సార్లు పిచికారీ చేయ‌డం ద్వారా మంచి ఫ‌లితాల‌ను సాధించ‌వ‌చ్చ‌ని పేర్కొన్నారు. పూత‌ద‌శ‌లో ఉన్న వ‌రిపంట పుష్పాలు సంప‌ర్క‌ద‌శ‌లో ఉండే స‌మ‌యం ఉద‌యం 8 గంట‌లు నుంచి 11 గంట‌లు కాబ‌టి, ఈ స‌మ‌యంలో  ఎరువుల‌ను పిచికారీ చేయ‌కూడ‌ద‌ని, మ‌ధ్యాహ్నం 2 నుంచి 5 గంట‌లు లోపు మాత్ర‌మే పిచికారీ చేయాల‌ని సూచించారు.

              అంత‌ర్జాతీయ కొర‌త కార‌ణంగా, ర‌బీకి అవ‌స‌ర‌మైన డిఏపి, ఎంఓపి ఎరువుల‌కు ప్ర‌త్యామ్నాయంగా, కాంప్లెక్స్ ఎరువుల‌ను వినియోగించాల‌ని క‌లెక్ట‌ర్ సూచించారు. సుమారు 3,148 మెట్రిక్ ట‌న్నుల కాంప్లెక్స్ ఎరువులు రైతు భ‌రోసా కేంద్రాల‌వ‌ద్దా, స‌హ‌కార సంఘాల‌వ‌ద్దా, ప్ర‌యివేటు డీల‌ర్ల‌వ‌ద్దా సిద్దంగా ఉన్నాయ‌ని తెలిపారు. డిఏపి, ఎంఓపి ఎరువుల‌తో పోలిస్తే, కాంప్లెక్స్ ఎరువుల్లో పొటాష్‌, న‌త్ర‌జ‌ని, భాస్వ‌రం, గంధ‌కం వంటి పోష‌కాలు చాలా ఎక్కువ‌ని, వీటివ‌ల్ల నేల సారం కూడా పెరుగుతుంద‌ని, చీడ‌పీడ‌లు త‌గ్గి, ఇవి పంట‌ల‌కు ఎంతో మేలు చేస్తాయ‌ని, దిగుబ‌డి పెరుగుతుంద‌ని పేర్కొన్నారు.  కాంప్లెక్స్ ఎరువుల ధ‌ర‌లు కూడా చాలాత‌క్కువ‌ని తెలిపారు. ప్ర‌కృతి వ్య‌వ‌సాయంలో భాగంగా, పొటాష్ ఎరువుల‌కు బ‌దులుగా వివిధ ర‌కాల క‌షాయాల‌ను, వృద్ది ద్రావ‌కాల‌ను వినియోగించాల‌ని సూచించారు. వీటిని రైతు భ‌రోసా కేంద్రాల‌వ‌ద్దా, ఎన్‌పిఎం షాపుల‌వ‌ద్దా డ్ర‌మ్ముల్లో త‌యారు చేయించి, విక్ర‌యించేందుకు ఉంచ‌డం జ‌రుగుతోంద‌ని తెలిపారు.  ఈ కోడిగుడ్లు, నూనెల ద్రావ‌ణం, జిల్లేడు క‌షాయం, పుల్ల‌టి మ‌జ్జిగ ద్రావ‌ణం, మీనామృతం త‌దిత‌ర‌ వృద్ది ద్రావ‌కాల‌ను, క‌షాయాల‌ను, సిబ్బంది చెప్పిన విధంగా, నిర్ణీత ప‌ద్ద‌తిలో పిచికారీ చేయాల‌ని క‌లెక్ట‌ర్  సూచించారు.

గ్రామ స్థాయిలో స‌చివాల‌యాల‌కు వ‌చ్చే విన‌తుల‌పై ప్ర‌త్యేకంగా దృష్టి సారించి సాధ్య‌మైనంత వ‌ర‌కు గ్రామ‌స్థాయిలోనే వాటిని ప‌రిష్క‌రించేలా చ‌ర్య‌లు చేప‌ట్టాల‌ని జిల్లా క‌లెక్ట‌ర్ శ్రీ‌మ‌తి ఏ.సూర్య‌కుమారి జిల్లా అధికారుల‌ను ఆదేశించారు. గ్రామాల నుంచి జిల్లా కేంద్రానికి మ‌ళ్లీ విన‌తులు వ‌చ్చి ఇక్క‌డ జాప్యం జ‌రిగే ప‌రిస్థితి వుండ‌కూడ‌ద‌ని స్ప‌ష్టంచేశారు. గ్రామ‌స్థాయి నుంచి వ‌చ్చే విన‌తుల‌ను సానుకూల దృక్ప‌థంతో ప‌రిష్క‌రించాల‌ని చెప్పారు. ఏదైనా విన‌తిని సానుకూలంగా ప‌రిష్క‌రించే అవ‌కాశం లేని ప‌క్షంలో ఏకార‌ణంతో సంబంధిత ద‌ర‌ఖాస్తును తిర‌స్క‌రిస్తున్నారో ఫిర్యాదు దారుకు త‌ప్ప‌నిస‌రిగా కార‌ణం తెలియ‌జేయాల‌న్నారు. ఈ సంద‌ర్భంగా గ్రామ‌, వార్డు స‌చివాల‌యాల‌కు వ‌స్తున్న విన‌తుల ప‌రిష్కారంపై అధికారుల‌తో స‌మీక్షించారు. జ‌న‌న‌, మ‌ర‌ణ ధృవ‌ప‌త్రాల జారీలో కొంత జాప్యం జ‌రుగుతోంద‌ని, దీనిని నివారించాల‌ని ఆదేశించారు. రాష్ట్ర ప్ర‌భుత్వం అమ‌లు చేస్తున్న ప‌థ‌కాలు అర్హుల‌కు ఏమేర‌కు అందుతున్నాయో తెలుసుకొనే సిటిజ‌న్ ఔట్ రీచ్ కార్య‌క్ర‌మాన్ని చిత్త‌శుద్ధితో నిర్వ‌హించాల‌ని చెప్పారు. మండ‌ల ప్ర‌త్యేకాధికారులు త‌మ ప‌రిధిలోని మండ‌లాల్లో గ్రామాల‌ను సంద‌ర్శించి నేరుగా ప్ర‌జ‌ల‌తో మాట్లాడి ఆయా ప‌థ‌కాల అమ‌లుపై తెలుసుకోవాల‌న్నారు. కోవిడ్ వ్యాక్సినేష‌న్ పై ఎవ‌రికైనా అపోహ‌లు ఉన్న‌ట్ల‌యితే వాటిని తొల‌గించే దిశ‌గా కృషి చేయాల‌న్నారు. స‌చివాల‌యాల‌కు అందుతున్న విన‌తుల ప‌రిష్కారంపై జిల్లా క‌లెక్ట‌ర్ సోమ‌వారం క‌లెక్ట‌ర్ కార్యాల‌యంలో నిర్వ‌హించిన స్పంద‌న కార్య‌క్ర‌మంలో స‌మీక్షించారు. జిల్లా క‌లెక్ట‌ర్ కార్యాల‌యంలో నిర్వ‌హించిన గ్రీవెన్స్‌కు సోమ‌వారం 85 విన‌తులు అందాయి. వైద్య ఆరోగ్య శాఖ‌కు సంబంధించి 12, డి.ఆర్‌.డి.ఏ.కు 15, జిల్లా ఆసుప‌త్రుల స‌మ‌న్వ‌య అధికారికి 3, రెవిన్యూ శాఖ‌కు సంబంధించి 50, పౌర‌సర‌ఫ‌రాల శాఖ‌కు 5 వ‌చ్చాయి. క‌లెక్ట‌ర్ కార్యాల‌యంలో సోమ‌వారం నిర్వ‌హించిన స్పంద‌న విన‌తుల కార్య‌క్ర‌మంలో జిల్లా క‌లెక్ట‌ర్ శ్రీ‌మ‌తి ఏ.సూర్య‌కుమారి ప్ర‌జ‌ల నుంచి విన‌తులు స్వీక‌రించారు. జిల్లా క‌లెక్ట‌ర్‌తో పాటు జాయింట్ క‌లెక్ట‌ర్‌లు డా.జి.సి.కిషోర్ కుమార్‌, డా.ఆర్‌.మ‌హేష్ కుమార్‌, మ‌యూర్ అశోక్‌, జె.వెంక‌ట‌రావు, జిల్లా రెవిన్యూ అధికారి ఎం.గ‌ణ‌ప‌తిరావు, స్పెష‌ల్ డిప్యూటీ కలెక్ట‌ర్ ప‌ద్మావ‌తి త‌దిత‌రులు క‌లెక్ట‌రేట్ ఆడిటోరియంలో విన‌తులు స్వీక‌రించారు.

విశాఖజిల్లాలోని ప్రముఖ పుణ్యక్షేత్రం సించలం శ్రీశ్రీశ్రీ వరాహలక్ష్మీ నృసింహ(సింహాద్రి అప్పన్న) స్వామి వారి దర్శన సమయం పెంచినట్టు ఈఓ ఎంవీసూర్యకళ తెలియజేశారు. ఈ మేరకు సింహాచలంలో మీడియాకి ప్రకటన విడుదల చేశారు. ఈ రోజు   వేకువ జాము నుంచి ప్రతీ రాత్రి 9గంటల వరకూ స్వామి వారి దర్శనాల సమయం పెంపుదల చేసినట్టు ఆ ప్రకటనలో వివరించారు.  రాష్ట్ర అధికారుల ఆదేశాల మేరకు ఈ నిర్ణయం తీసుకున్నట్టు ఈఓ తెలియజేశారు. భక్తులు ఈ విషయాన్ని గమనించి కోవిడ్ నిబంధనలు పాటిస్తూ, మాస్కులు ధరించి, భౌతిక దూరం పాటిస్తూ స్వామివారిని దర్శించుకోవాలని ఆ ప్రకటనలో కోరారు. 

ఉత్తరాంధ్ర ఇలవేల్పు శ్రీ శ్రీ శ్రీ పైడి తల్లి అమ్మవారిని ఉత్సవానికి సంబంధించి అన్ని ఏర్పాట్లు పూర్తి చేయడం జరిగిందని  జిల్లా కలెక్టర్ ఏ.సూర్యకుమారి పేర్కొన్నారు.

సోమవారం ఉదయం జిల్లా కలెక్టర్ పైడి తల్లి అమ్మవారిని దర్శించుకున్నారు. అనంతరం మీడియాతో మాట్లాడుతూ పైడి తల్లి అమ్మవారి ఉత్సవానికి సంబంధించి అన్ని ఏర్పాట్లు పూర్తి చేశారని, అమ్మవారి దర్శనానికి నిన్న, ఈ రోజు భక్తులు అధిక సంఖ్యలో తరలి వచ్చారాన్నరు. అమ్మవారి దర్శనానికి వచ్చిన భక్తులు విధిగా మాస్క్ ధరించి పూర్తి స్థాయిలో కోవిడ్ నిబంధనలు పాటిస్తూ సహకరించాలన్నారు. అలాగే పైడి తల్లి అమ్మవారి ఆశిసుల తో ప్రతి ఒక్కరూ ఆయురారోగ్యాలు, సుఖ సంతోషాలతో ఉండాలని పేర్కొన్నారు.

కేంద్ర ప్రభుత్వం అమలు చేస్తున్న సంక్షేమ పథకాలను ఎస్సీ ఎస్టీ బీసీ వర్గాల వారు వినియోగించుకోవాలని కేంద్ర సామాజిక న్యాయం సాధికారత శాఖ మంత్రి రాందాస్ అథవాలే పిలుపునిచ్చారు. ఆదివారం సర్క్యూట్ హౌస్ లో ఆయన విలేకర్ల సమావేశంలో మాట్లాడుతూ డాక్టర్ అంబేద్కర్ ఫౌండేషన్ ద్వారా కులాంతర వివాహాలకు రూ 2.5 లక్షల ప్రోత్సాహకాన్ని అందిస్తున్నట్లు తెలిపారు. అదేవిధంగా ముద్ర యోజన, ఉజ్వల యోజన, ఆవాస్ యోజన, జన్ యోజన మొదలైన పథకాలను కేంద్ర ప్రభుత్వం అమలు చేస్తున్నట్లు వివరించారు. ఆంధ్రప్రదేశ్ లో ముఖ్యమంత్రి జగన్ మోహన్ రెడ్డి పేద బడుగు బలహీన వర్గాల వారికి చాలా సంక్షేమ పథకాలను ప్రవేశపెట్టి అమలు చేస్తున్నారని ప్రశంసించారు.  స్వర్గీయ డాక్టర్ వైయస్ శేఖర్ రెడ్డి తో తనకు గల అనుబంధాన్నితలచుకున్నారు.  మీడియా వారు కేంద్ర ప్రభుత్వం అమలు చేస్తున్న సంక్షేమ పథకాలను కూడా ప్రజల వద్దకు తీసుకు వెళ్లేందుకు తోడ్పడాలని కోరారు.   ఈ సమావేశంలో రిపబ్లికన్ పార్టీ ఆఫ్ ఇండియా ఆంధ్రప్రదేశ్ కార్యనిర్వాహక అధ్యక్షులు బి అనిల్ కుమార్, ఏపీ తెలంగాణ ఇంచార్జ్ బ్రహ్మానంద రెడ్డి తదితరులు పాల్గొన్నారు.

తిరుపతి శ్రీ కపిలేశ్వరస్వామివారి ఆలయంలో అక్టోబరు 20వ తేదీ అన్నాభిషేకం జ‌రుగ‌నుంది. ఈ సందర్భంగా ఆలయంలో ప్రత్యేక కార్యక్రమాలు నిర్వహిస్తారు.ఈ సందర్భంగా ఉద‌యం 11.30 నుంచి మ‌ధ్యాహ్నం 12 గంటల వరకు ఏకాంతంగా శుద్ధోధక అభిషేకం, మధ్యాహ్నం 12 నుంచి 2.30 గంటల వరకు అన్నాభిషేకం అలంకారం ఏకాంతంగా నిర్వహిస్తారు. అనంతరం సహస్రనామార్చన, దీపారాధన చేపడతారు. సాయంత్రం 6 నుంచి 6.30 గంటల వరకు అన్నలింగ ఉద్వాసన చేపడతారు. శుద్ధి అనంతరం సాయంత్రం 6.30 నుండి రాత్రి 8 గంటల వరకు సుగంధద్రవ్య అభిషేకం నిర్వహిస్తారు. ఈ ఉత్సవం కారణంగా ఉద‌యం 8 నుంచి 11 గంటల వరకు భక్తులకు సర్వదర్శనం కల్పిస్తారు. అనంతరం సాయంత్రం 4 నుంచి 6 గంటల వరకు భక్తులను అన్నలింగ దర్శనంకు అనుమ‌తిస్తారు.