శ్రీకాకుళం జిల్లాలోని ప్రతి సెంటు భూమికి కూడా సాగునీటిని అందించే దిశగా ప్రభుత్వం ప్రయత్నం చేస్తుందని రాష్ట్ర శాసనసభాపతి తమ్మినేని సీతారామ్ పేర్కొన్నారు. శుక్రవారం ఆర్ అండ్ బి వసతి గృహంలో పాత్రికేయుల సమావేశాన్ని నిర్వహించారు. ఈ సందర్భంగా సభాపతి మాట్లాడుతూ  తన నియోజక వర్గంలో గల తొగరాం గ్రామంలో వ్యవసాయ పాలిటెక్నిక్ కళాశాలను మంజూరుచేస్తూ గురువారం జరిగిన మంత్రిమండలి సమావేశంలో నిర్ణయం తీసుకోవడం పట్ల సభాపతి హర్షం వ్యక్తం చేసారు. కళాశాల ఏర్పాటుకు మంత్రిమండలి ఆమోదం తెలిపినందుకు రాష్ట్ర ముఖ్యమంత్రికి, మంత్రివర్గానికి, ప్రధానంగా రాష్ట్ర ఉపముఖ్యమంత్రి మరియు రాష్ట్ర పశు సంవర్ధక శాఖ మంత్రివర్యులకు అభినందనలు తెలిపారు. తాను చేసే ఈ ప్రయత్నానికి సంపూర్ణ ప్రోత్సాహాన్ని అందించిన  శాసనమండలి సభ్యులు, శాసనసభ్యులకు సభాపతి ఈ సందర్భంగా ప్రత్యేక కృతజ్ఞతలు తెలియజేస్తున్నట్లు చెప్పారు.   జిల్లాలో వ్యవసాయ పాలిటెక్నిక్ కళాశాలతో పాటు వెన్నెలవలసలో వెటర్నరి పాలిటెక్నిక్ కళాశాలను గత మంత్రిమండలి సమావేశంలో నిర్ణయం తీసుకోవడం జరిగిందని, ఇది అభినందనీయమని గుర్తుచేసారు. ఇవేకాకుండా పొందూరులో డిగ్రీ కళాశాల, ఆమదాలవలసలో యన్.టి.ఆర్. గ్రీన్ ఫీల్డ్ స్టేడియం, వంశధార హైలెవెల్ కెనాల్, నారాయణపురం, నాగావళి అనుసంధాన ప్రోజెక్ట్, పట్టణ ఆరోగ్య కేంద్రంలో 30 పడకల ఆసుపత్రిని 50 పడకల ఆసుపత్రిగా మార్పుచేసేందుకు ప్రభుత్వం నిర్ణయం తీసుకోవడం పట్ల కృతజ్ఞాతాభివందనాలు తెలియజేస్తున్నట్లు సభాపతి పేర్కొన్నారు. వీటితో పాటు జిల్లాలో మరికొన్ని పెద్ద ప్రోజెక్టులు క్లియర్ కాబోతున్నాయని చెప్పారు. ఇప్పటికే నేరేడి బ్యారెజ్ క్లియరెన్స్ అయిందని, దానిపై ఒడిషా ముఖ్యమంత్రితో చర్చించేందుకు రాష్ట్ర ముఖ్యమంత్రి  ప్రయత్నాలు చేయబోతున్నట్లు తెలిపారు. ఆఫ్ షోర్ రిజర్వాయర్ కూడా త్వరలో క్లియర్ కాబోతుందని, నేరేడి క్లియరెన్స్ వలన  వంశధార – బాహుదా నదుల అనుసంధానానికి పెద్దఎత్తున ప్రయత్నం జరగబోతుందని అన్నారు. నేరెడి బ్యారెజ్ పై  ఇన్విస్టిగేషన్, సర్వే కూడా జరుగుతుందని, ఈ రెండు నదులు అనుసంధానం చేసుకోగలిగితే జిల్లాలో సెంటు భూమికి కూడా సాగునీటిని అందించేందుకు వీలు కలుగుతుందని సభాపతి స్పష్టం చేసారు. ఇది చిరకాలం నాటి  కల అని, ఆ కల త్వరలో నిజం కాబోతుందని, ఆ కల నిజం అయ్యేందుకు     రాష్ట్ర ముఖ్యమంత్రి అవిరళమైన కృషిచేస్తున్నట్లు వివరించారు. ఇవేకాకుండా కిడ్నిరోగుల కోసం ఆసుపత్రి, ఉద్దాన ప్రాంత ప్రజలకు పరిశుద్ధమైన తాగునీరు, నరసన్నపేటలో స్కిల్ డెవలప్ మెంట్ సెంటర్ వంటి వాటిని ప్రభుత్వం ఇప్పటికే మంజూరుచేసిందని గుర్తుచేసారు.  ఉత్తరాంధ్ర సుజల స్రవంతి నుండి జిల్లాకు 70 వేల ఎకరాలు సాగులోకి తీసుకువచ్చే పరిస్థితికి ప్రభుత్వం క్లియర్ చేసిందని అన్నారు. ఉత్తరాంధ్ర సుజల స్రవంతిని జిల్లాకు ప్రయత్నం చేయాలని ముఖ్యమంత్రిని కోరగా తక్షణమే స్పందిస్తూ సుజల స్రవంతిని తీసుకువచ్చేందుకు ప్రయత్నం చేసినట్లు చెప్పారు. దీనివలన  రణస్థలం, పొందూరు, లావేరు మండలాల్లో ప్రతీ సెంటు భూమి కూడా సాగులోకి వచ్చే అవకాశం ఉందని అన్నారు. అలాగే మడ్డువలస రిజర్వాయర్ కు సంబంధించి రైతాంగానికి చెల్లించవలసిన నష్టపరిహారాన్ని త్వరలో అందించి ఆ పనులను కూడా పెద్దఎత్తున పూర్తిచేసుకొని ఎస్.ఎం.పురం పెద్దచెరువుకు దాన్ని కనెక్ట్ చేయబోతున్నట్లు సభాపతి స్పష్టం చేసారు. తద్వారా మరో 18 వేల ఎకరాలకు సాగునీటిని అందించే పరిస్థితి రాబోతుందని సభాపతి వివరించారు. ఈ విధంగా ఇరిగేషన్ , ఎడ్యుకేషన్, అగ్రికల్చర్ పై పెద్ద ఎత్తున దృష్టిసారించి ప్రభుత్వం ముందుకువెళ్తుందని అన్నారు. ప్రభుత్వం ఇన్ని సంక్షేమ కార్యక్రమాలు అమలు చేస్తున్నప్పటికీ విమర్శలు వస్తున్నాయని,  విమర్శలు సహజమని, అయితే సద్విమర్శలు, సహేతుకమైన విమర్శలు చేస్తే తప్పక వాటిని స్వీకరిస్తామని, అంతేగాని లేనిపోని ఆరోపణలు చేయరాదని హితవు పలికారు.  

తిరుమల స్థానికుల విజ్ఞప్తి మేరకు టిటిడి ఈఓ ఆదేశాల ప్రకారం ఈ విద్యాసంవత్సరం నుంచి ఎస్వీ ప్రాథమిక పాఠశాలలో ప్లే క్లాస్ తరగతులు ప్రారంభించినట్టు జెఈఓ  సదాభార్గవి తెలిపారు. ఈ మేరకు జెఈఓ శుక్రవారం పాఠశాలను సందర్శించి ప్లే క్లాస్ తరగతుల విద్యార్థులకు పుస్తకాలు పంపిణీ చేశారు. ఈ సందర్భంగా జెఈఓ మాట్లాడుతూ స్థానికులు వారి పిల్లలను పూర్వ ప్రాథమిక విద్య కోసం తిరుపతికి పంపించలేక ఇబ్బందులు పడుతున్నారని తమ దృష్టికి వచ్చిందన్నారు. ఈ పరిస్థితుల్లో తిరుమల ఎస్వీ పాఠశాలలోనే ఈ తరగతులను ప్రారంభించడానికి చర్యలు చేపట్టామన్నారు. అనంతరం భోజనం నాణ్యతను పరిశీలించారు. త్వరలో విద్యార్థుల తల్లిదండ్రులతో సమావేశం నిర్వహించి కావాల్సిన వసతులపై చర్చించాలని హెచ్ఎంకు సూచించారు. అనంతరం ఆమె విద్యార్థుల తల్లిదండ్రులతో మాట్లాడి ఇక్కడ అందుతున్న వసతులు, విద్య గురించి చర్చించగా వారు సంతృప్తి వ్యక్తం చేశారు. ఈ కార్యక్రమంలో టిటిడి డిఈఓ  గోవిందరాజన్, పాఠశాల హెచ్ఎం  కృష్ణమూర్తి పాల్గొన్నారు.

శ్రీ వేంక‌టేశ్వ‌ర స్వామివారి  ప్రియ భక్తుడు శ్రీ తాళ్ళపాక అన్నమాచార్యులు స్వామి వారిని కీర్తిస్తూ రాసిన కీర్తనలకు శ్రీ వేంకటేశ్వర భ‌క్తి ఛాన‌ల్ ద్వారా  విస్తృత ప్ర‌చారం క‌ల్పించాల‌ని టీటీడీ నిర్ణయించిందని చైర్మన్ వైవి సుబ్బారెడ్డి చెప్పారు. తిరుమల అన్నమయ్య భవన్ లో శుక్రవారం ఆయన ఇందుకు సంబంధించిన ప్రోమో లను విడుదల చేశారు. ఈ సందర్భంగా ఆయన మాట్లాడుతూ, అన్న‌మ‌య్య సంకీర్త‌న‌ల‌కు బ‌హుళ ప్రాచుర్యం క‌ల్పించేందుకు " ఆదివో అల్లదివో '' పేరుతో తెలుగు రాష్ట్రాలతో పాటు చెన్నై, బెంగుళూరు నగరాల్లోని యువ‌త‌కు అన్న‌మ‌య్య సంకీర్త‌న‌లపై పోటీలు నిర్వ‌హించాల‌ని నిర్ణయించామన్నారు. తొలుత జిల్లాస్థాయిలో, ఆ త‌రువాత రాష్ట్ర‌స్థాయిలో యువ‌త‌కు పోటీలు నిర్వ‌హిస్తామని చైర్మన్ వివరించారు. టిటిడి రికార్డు చేసిన 4 వేల  సంకీర్తనల  నుంచే ఈ పోటీలు నిర్వ‌హించ‌డం జరుగుతుందన్నారు. తద్వారా యువతను భక్తి మార్గంలో నడిపించేందుకు ఇదొక వేదిక అవుతుందని ఆయన చెప్పారు. ఇందులో భాగంగా తొలుత చిత్తూరు జిల్లాకు చెందిన 15 నుంచి 25 సంవత్సరాల వయస్సులోపు ఉన్న గాయనీ, గాయకులకు పోటీలు నిర్వహించనున్నట్లు తెలిపారు. శుక్రవారం నుంచి ఈ నెల 24వ తేదీ వరకు ఆసక్తి కలిగిన గాయనీ గాయకుల నుంచి ఎస్వీబీసీ వెబ్సైట్ లోను, నేరుగాను దరఖాస్తులు స్వీకరిస్తారన్నారు. దరఖాస్తు చేసుకున్న వారికి ఈ నెల 25 , 26 వ తేదీల్లో  ఎస్వీబీసీ కార్యాలయంలో సెలెక్షన్స్ నిర్వహిస్తారని శ్రీ వైవి సుబ్బారెడ్డి చెప్పారు.  నేరుగా రాలేని వారికి 27వ తేదీ ఉదయం 10 నుంచి సాయంత్రం 6 గంటల వరకు జూమ్ ద్వారా సెలెక్షన్స్ జరుగుతాయన్నారు. బ్రహ్మోత్సవాల సందర్భంగా ఎస్వీబీసీ కన్నడ, హింది చానళ్ళు ప్రారంభమవుతాయనీ, ఈ చానళ్ల ద్వారా  కూడా పోటీలు నిర్వహిస్తామని చెప్పారు. టీటీడీ ఈవో డాక్టర్ కెఎస్ జవహర్ రెడ్డి, ఎస్వీబీసీ చైర్మన్  సాయి కృష్ణ యాచెంధ్ర, ఎస్వీబీసీ సిఈవో సురేష్ కుమార్, ఎస్వీబీసీ డైరెక్టర్  శ్రీనివాసరెడ్డి పాల్గొన్నారు.

యూపీఎస్సీ సివిల్ సర్వీసెస్ ప్రిలిమినరీ పరీక్షలు అక్టోబర్ 10వ తేదీన  జరగనున్న నేపథ్యంలో జిల్లాలలో ఏర్పాటు చేస్తున్న పరీక్షా కేంద్రాలలో అన్ని రకాల మౌలిక వసతులను కల్పించాలని యూపీఎస్సీ పరీక్షల నిర్వాహకులు సంబంధిత జిల్లా కలెక్టర్లకు ఆదేశించారు. శుక్రవారం యూపీఎస్సి కార్యాలయం నుండి వీడియో కాన్ఫరెన్స్ ద్వారా పరీక్షలు నిర్వహిస్తున్న జిల్లాల కలక్టర్ లతో మాట్లాడారు. 10-10-2021  ఆదివారం ఉదయం పేపర్- I 9.30 నుంచి 11.30 వరకూ, మధ్యాహ్నం పేపర్- II 2.30 నుంచి 4.30 వరకూ జరుగుతాయన్నారు. పరీక్షలకు  అభ్యర్థులు నిర్దేశించిన సమయానికి ముందుగా హాజరవ్వాలన్నారు. పరీక్షా విధివిధానాలను తప్పక పాటించాలన్నారు.పరీక్షలు నిర్వహించే కేంద్రాలలో కుర్చీలు, బెంచీలతో పాటు  నిరంతర విద్యుత్ సరఫరా , ఫ్యాన్స్,టాయిలెట్స్, నీటి సౌకర్యం కల్పించాలన్నారు.  పరీక్షలురాసే అభ్యర్థులు కోవిడ్ నిబంధనలను పాటించేలా చర్యలు చేపట్టాలన్నారు. పరీక్షా కేంద్రాల వద్ద ఫస్ట్ ఎయిడ్ కిట్ తో వైద్య సిబ్బంది ని  అందుబాటులో ఉంచాలన్నారు.          జిల్లా కలెక్టర్ డా.ఏ.మల్లిఖార్జున మాట్లాడుతూ సివిల్స్ ప్రిలిమినరీ పరీక్షల సజావుగా నిర్వహణకు అన్ని ఏర్పాట్లను సిద్ధం చేస్తున్నామన్నారు. విశాఖలో 32 పరీక్షా కేంద్రాల లో 12,166 మంది అభ్యర్థులు పరీక్షలను రాయ నున్నారన్నారు. పరీక్షా కేంద్రాల లో ఏర్పాట్లను పర్యవేక్షించుటకు ప్రత్యేక అధికారులను నియమించనున్నామన్నారు. వీడియో కాన్ఫరెన్స్ లో జిల్లా రెవెన్యూ అధికారి శ్రీనివాసమూర్తి హాజరయ్యారు.

జెడ్పీటీసీ, ఎంపిటిసి ఎన్నికల ఓట్ల లెక్కింపు కార్యక్రమం ఈ నెల 19వ తేదిన జరుగుతోందని జిల్లా కలెక్టర్ శ్రీకేష్ లాఠకర్ తెలిపారు. ఓట్ల లెక్కింపు కార్యక్రమంపై శుక్రవారం మండల అధికారులతో  వీడియో కాన్ఫరెన్స్ నిర్వహించారు. జిల్లాలో పది చోట్ల ఓట్ల లెక్కింపు జరుగుతోందన్నారు. అన్ని లెక్కింపు కేంద్రాలను రిటర్నింగ్ అధికారులు, సహాయ రిటర్నింగ్ అధికారులు తక్షణం తనిఖీ చేసి అవసరమగు ఏర్పాట్లు చేయాలని ఆయన ఆదేశించారు. లెక్కింపు గదుల్లో బారికేడింగ్, స్ట్రాంగ్ రూం నుండి లెక్కింపు గదుల వరకు బారికేడింగ్ చేయడం, బందో బస్తు, సిబ్బంది, తదితర ఏర్పాట్లు పరిశీలించాలని ఆయన ఆదేశించారు. కౌంటింగ్ 19వ తేదీ ఉదయం 8 గంటలకు ప్రారంభించాలని ఆయన ఆదేశించారు. సిబ్బంది, ఏజెంట్లు ఉదయం 6 గంటల నాటికి సిద్దంగా ఉండాలని ఆయన సూచించారు.  ప్రతి కౌంటింగ్ హాల్ లో వెబ్ కాస్టింగ్, వీడియో రికార్డింగ్, జనరేటర్ ఏర్పాటు చేయాలని ఆయన పేర్కొన్నారు. సిసి టివిలు ఇప్పటికే పనిచేస్తున్నాయని, అవి కొనసాగుతాయని ఆయన చెప్పారు. కోవిడ్ నియమ నిబంధనలు పక్కాగా పాటించాలని ఆయన స్పష్టం చేశారు. ప్రతి టేబుల్ కు ఒక పర్యవేక్షక అధికారి, ముగ్గురు సిబ్బంది అవసరం ఉంటుందని, గతంలో రిజర్వ్ సిబ్బందితో పాటు కేటాయింపు సైతం జరిగిందని ఆయన వివరించారు. జిల్లాలో జెడ్పీటీసీ కి 37 టేబుల్స్, ఎంపిటిసికి 590 టేబుల్స్ ఏర్పాటుకు గతంలోనే కార్యాచరణ తయారు చేయటం జరిగిందని ఆయన తెలిపారు. కౌంటింగ్ కేంద్రాల వద్ద వైద్య శిబిరాలు ఏర్పాటు చేస్తున్నామని, సిబ్బందికి వాక్సినేషన్ ఏర్పాటు చేస్తున్నట్లు చెప్పారు.

నేడు కౌంటింగ్ సిబ్బందికి శిక్షణ :

కౌంటింగ్ సిబ్బందికి శని వారం శిక్షణ ఏర్పాటు చేయాలని జిల్లా కలెక్టర్ అన్నారు. కౌంటింగ్ సిబ్బందికి శని వారం ఉదయం 7 గంటల నాటికి కౌంటింగ్ కేంద్రాల వద్ద హాజరు కావాలని ఆయన ఆదేశించారు. ఆదేశాలు ఉల్లంఘించే వారిపై క్రమ శిక్షణ చర్యలు తీసుకుంటామని ఆయన హెచ్చించారు.

కౌంటింగ్ ఏజెంట్ల నియామకం చేయాలి..

కౌంటింగ్ ఏజెంట్ల నియామకం తక్షణం చేపట్టాలని జిల్లా కలెక్టర్ ఆదేశించారు. పోటీ చేసిన అభ్యర్థులకు వెంటనే సమాచారం అందించి ఏజెంట్ల వివరాలు సమర్పించాలని ఈసుకోవాలని ఆయన అన్నారు. ఏజెంట్ల వివరాలు పోలీస్ శాఖతో సమన్వయం చేస్తూ అర్హులకు పాస్ లు జారీ చేయాలని ఆయన సూచించారు. శని వారం నాటికి పాస్ లు జారీ చేయాలని ఆయన ఆదేశించారు.

144 సెక్షన్ విధింపు..

కౌంటింగ్ కేంద్రాల వద్ద 144 సెక్షన్ విధిస్తున్నట్లు జిల్లా కలెక్టర్ తెలిపారు. 50 మీటర్లు, వంద మీటర్ల చొప్పన రెండంచెల భద్రత వ్యవస్థ ఏర్పాటు చేస్తున్నట్ల ఆయన చెప్పారు.  జిల్లా స్థాయి కంట్రోల్ రూం ఏర్పాటు చేస్తున్నట్లు ఆయన పేర్కొన్నారు.

ఊరేగింపులు, ఉత్సవాలకు అనుమతి లేదు..

లెక్కింపు అనంతరం గెలుపొందిన అభ్యర్థులు ఊరేగింపులు, ఉత్సవాలు నిర్వహించుటకు అనుమతి లేదని జిల్లా కలెక్టర్ స్పష్టం చేశారు.  మైక్ లను వినియోగించరాదని ఆయన పేర్కొన్నారు. ఎస్పీ అమిత్ బర్ధార్ మాట్లాడుతూ కౌంటింగ్ కేంద్రాల పరిధిలో పండాల్స్, మైక్ లు, విద్యుత్ దీపాలు ఏర్పాటు చేయరాదన్నారు. అవసరం మేరకు ట్రాఫిక్ మళ్లింపులు చేయాలని, బందో బస్తు ఏర్పాటులో ఎటువంటి లోపాలు ఉండరాదని ఆయన స్పష్టం చేశారు. ఈ వీడియో కాన్ఫరెన్స్ లో జాయింట్ కలెక్టర్లు డా. కె.శ్రీనివాసులు, హిమాంశు కౌశిక్, ఆర్.శ్రీరాములు నాయుడు, రెవెన్యూ డివిజనల్ అధికారి ఐ. కిషోర్, జిల్లా పరిషత్ సీఈఓ బి.లక్ష్మీపతి, జిల్లా పంచాయతీ అధికారి వి.రవికుమార్, జిల్లా నీటి యాజమాన్య సంస్థ ప్రాజెక్ట్ డైరెక్టర్ హెచ్.కూర్మారావు సంబంధిత అధికారులు పాల్గొన్నారు.

ఎంపీటీసి ,జడ్పిటిసి ఎన్నికల కౌంటింగ్ ఏర్పాట్లను ప్రశాంత వాతావరణంలో  ఎటువంటి ఒడిదుడుకులు లేకుండా నిర్వహించి విజయవంతం చేయాల్సిందిగా  రాష్ట్ర ప్రభుత్వ ప్రధాన కార్యదర్శి ఆదిత్యనాథ్ దాస్ జిల్లా కలెక్టర్లను ఆదేశించారు. శుక్రవారం వీడియో కాన్ఫరెన్స్ ద్వారా జిల్లా కలెక్టర్లు ,సీ పీ లు, ఎస్పీలు , జిల్లా పరిషత్ సీఈఓ లతో ఎన్నికల కౌంటింగ్ ఏర్పాట్లపై సమీక్షించారు.  ఈ సందర్భంగా చీఫ్ సెక్రటరీ మాట్లాడుతూ ఈ నెల 19వ తేదీ ఆదివారం ఎంపీటీసి ,జడ్పిటిసి ఎన్నికల ఓట్ల కౌంటింగ్ నిర్వహించనున్న నేపథ్యంలో అన్ని కేంద్రాల వద్దఅవసరమైన  మౌలిక వసతులతో ఏర్పాట్లు సిద్ధం చేయాలన్నారు. కోవిడ్ నియమ నిబంధనలను తూ.చ. తప్పకుండా పాటించాలన్నారు. బారికేడింగ్, సీసీ కెమెరాలు ఏర్పాటు తో పాటు వీడియో కవరేజ్ చేయాలన్నారు.కౌంటింగ్ సిబ్బందికి శిక్షణ ఇవ్వడం, అందుకు అవసరమైన మెటీరియల్ ను అందించాలన్నారు . ఏజెన్సీ ప్రాంత మండలాలలో మరియు సమస్యాత్మక కేంద్రాల వద్ద ఎక్కడా ఎటువంటి అవాంఛనీయ సంఘటనలు జరగకుండా పటిష్టమైన పోలీస్ బందోబస్తు ను ఏర్పాటు చేయాలన్నారు. జిల్లా కలెక్టర్ డాక్టర్ ఏ మల్లిఖార్జున మాట్లాడుతూ విశాఖజిల్లాలో కౌంటింగ్  ఏర్పాట్లు కు అన్నీ సిద్ధం చేయడం జరిగిందని  సీఎస్ కు తెలిపారు. జిల్లాలో ఎన్నికలు జరిగిన 612 ఎం పీ టీ సీ లు, 37 జెడ్ పీ టీ సీ స్థానాలకు 79  కౌంటింగ్ హాల్స్ ను ఏర్పాటు చేస్తున్నామన్నారు. 587 ఎంపీటీసి,568 జెడ్ పీటీసి కౌంటింగ్ టేబుల్స్ ను ఏర్పాటు చేయడం జరుగుతున్దన్నారు . పది శాతం రిజర్వ్ సిబ్బంది తో కలిపి మొత్తం 3811 మంది కౌంటింగ్ సిబ్బంది ని నియమించడం జరిగిందన్నారు. అన్ని కౌంటింగ్ కేంద్రాల వద్ద బారికేడింగ్, సీసీ కెమెరాలు ఏర్పాటు, వీడియో కవరేజ్  ఏర్పాట్లు చేయడం జరుగుతున్నదన్నారు. గురువారం సాయంత్రం  కౌంటింగ్ సిబ్బందికి  మొదటిసారి శిక్షణను ఇవ్వడం జరిగిందని, శుక్రవారం కూడా మరొకసారి శిక్షణ ఇవ్వనున్నామని తెలిపారు. ప్రతీ నియోజక వర్గానికి పరిశీలన నిమిత్తం ప్రత్యేక అధికారి ని నియమించడం జరిగిందన్నారు. కౌంటింగ్ సంబంధిత మెటీరియల్ను సిబ్బందికి ఇవ్వడం జరిగిందన్నారు. అన్ని కౌంటింగ్ కేంద్రాల  వద్ద 144 సెక్షన్ ఏర్పాటు కు ఆదేశాలు ఇవ్వడం జరిగిందన్నారు. ఏజెన్సీ ప్రాంత మండలాలు,మరియూ సమస్యాత్మక కేంద్రాల వద్ద స్పెషల్ పోలీసు ప్రొటెక్షన్ ఏర్పాటుకు ఆదేశాలు ఇవ్వడం జరిగిందన్నారు. కోవిడ్ నియమ నిబంధనలను ఖచ్చితంగా పాటించడం జరుగుతుందన్నారు. అత్యవసర పరిస్థితులలో అవసరమైన  సిబ్బంది కొరకు 10 శాతం అదనపు  కౌంటింగ్ సిబ్బందిని రిజర్వు లో సిద్ధం చేసుకోవడం జరుగుతున్నదన్నారు. వీడియో కాన్ఫరెన్స్ లో నగర పోలీస్ కమిషనర్ మనీష్ కుమార్ సిన్హా, ఎస్ పి బి కృష్ణా రావు, జిల్లా రెవెన్యూ అధికారి శ్రీనివాస మూర్తి, జిల్లా పరిషత్ సీఈఓ నాగార్జున, డి పి ఓ కృష్ణ కుమారి తదితరులు హాజరయ్యారు.

ఐసిడిఎస్ అంగన్వాడీ కేంద్రాల్లో ఇకపై బలవర్ధక ఆహారంతోపాటు, పాలు కూడా యాప్ ద్వారా అందించనున్నట్టు ఐసిడిఎస్ ప్రాజెక్టు డైరెక్టర్ జివి సత్యవాణి తెలియజేశారు. మంగళవారం కాకినాడలో తన కార్యాలయంలో ఆమె మీడియాతో మాట్లాడారు. జిల్లాలోని 28 ప్రాజెక్టుల పరిధిలోని అంగన్వాడీలకు యాప్ వినియోగంపై శిక్షణ ఇచ్చామన్నారు. ఇకపై తల్లులు కూడా ఖచ్చితంగా కేంద్రాని వెళ్లే ఆహారం తీసుకోవాల్సి వుంటుందన్నారు. అదే సమయంలో బలవర్ధక ఆహారంలో తేడాలు వచ్చినా, తక్కువగా అంగన్వాడీలు ఇచ్చినా సిడిపిఓలకు ఫిర్యాదు చేయాలన్నారు.

వైయస్సార్ జగనన్న గృహ నిర్మాణాలు అర్హులైన పేదలందరికీ ఇళ్ల నిర్మాణాల్లో భాగంగా నిర్దేశించిన  లక్ష్యాల  మేరకు త్వరిత గతిన పూర్తి చేయాల్సిందిగా జిల్లా కలెక్టర్ డా ఎ మల్లిఖార్జున సంబంధిత అధికారులను ఆదేశించారు. మంగళవారం స్థానిక కలెక్టర్ కార్యాలయ సమావేశ మందిరం నుండి గృహ నిర్మాణ పనులపై వారంతపు సమావేశాన్ని వీడియో కాన్ఫరెన్స్ ద్వారా మండల అధికారులతో సమీక్షించారు. ఈ సందర్భంగా కలెక్టర్ మాట్లాడుతూ గృహ నిర్మాణాలు, లేఅవుట్లు కు సంబంధించి గ్రౌండింగ్ పనులను పూర్తి చేయాలన్నారు. వర్షాలు పడుతున్న నేపథ్యంలో ఇసుక కొరత ఉంటున్నదని దానిని అధిగమించటానికి ప్రత్యేక చర్యలు చేపట్టాలన్నారు. ఎంపీడీవోలు గృహ నిర్మాణ పనులలో బాధ్యత వహించాలని ఎల్లవేళల పనుల పర్యవేక్షణ చేయాలన్నారు. కొన్ని మండలాల్లో జీరో గ్రౌండింగ్ లేఅవుట్ లున్నాయని వాటిలో గ్రౌండింగ్ పనులను మొదలు పెట్టాలన్నారు. అప్రోచ్ రోడ్ల నిర్మాణాలకు  సంబంధించి  ఎం జి ఎన్ ఆర్ఈ జి ఎస్ ఫండ్స్ ద్వారా వేగవంతంగా పనులను చేయాలన్నారు.

గ్రామ పంచాయత్, మండల పరిషత్తు, జిల్లా పరిషత్తు జనరల్ ఫండ్స్ ను బలహీన వర్గాల ఇళ్ల నిర్మాణాలకు ఉపయోగించాల్సి ఉంటుందన్నారు. వాటికి సంబంధించిన ఎస్టిమేట్స్ ను తయారు చేసి నివేదికను వెంటనే పంపించాల్సిందిగా ఆదేశించారు. అప్రోచ్ రోడ్ల నిర్మాణాలు ఇతర లేఅవుట్ లలో ఉన్నా కూడా సంబంధిత నివేదికను తయారుచేసి రెండు రోజుల్లో పంపిస్తే నిధులను మంజూరు చేయడం జరుగుతుందన్నారు. జీరో గ్రౌండింగ్ లేఔట్లకు సంబంధించి వచ్చే మీటింగ్ నాటికి కొంత పురోగతి కనిపించాలన్నారు. లేఅవుట్లలో భూముల చదును కు సంబంధించి పనులను వేగవంతం చేయాలన్నారు. కొన్ని మండలాలలో పనులు పూర్ పెర్ఫార్మెన్స్ గా ఉందనీ,కాబట్టి  అలసత్వం వహించవద్దన్నారు. పి ఎం ఏ వై వైయస్సార్ గృహ సముదాయాలకు  మ్యాపింగ్ చేసి పనులను మొదలు పెట్టాలన్నారు. లేఅవుట్ లలో ఇంకా జియో ట్యాగింగ్ చేయని వాటికి వెంటనే చేయాలన్నారు. రాష్ట్ర ప్రభుత్వం నూతన గైడ్లైన్స్ ప్రకారం  500 పైబడి  లబ్ధిదారులు ఉన్న పెద్ద లేఅవుట్లలో వర్కర్ల కొరకు షెడ్డు నిర్మించాల్సి ఉంటుందనీ, సంబంధిత నిధులను మంజూరు చేయడం జరుగుతుందని దాని నిర్మాణం పై కూడా దృష్టి పెట్టాలన్నారు. నిర్మాణ పనులు జరుగుతున్న లేఅవుట్లు, గృహ నిర్మాణాలలో నిరంతరం నీటి సరఫరా, విద్యుత్తు సౌకర్యం, ఏర్పాటు చేయాలని ఇసుక, సిమెంటు ,ఐరన్ అందుబాటులో ఉంచాలన్నారు.

          ఈ సమావేశం లో జాయింట్ కలక్టర్ హౌసింగ్ కల్పనా కుమారి, పీ డి హౌసింగ్ శ్రీనివాస రావు, జెడ్ పీ సి ఈ వో నాగార్జున, ఆర్  డబ్ల్యుఎస్ ఎస్ ఈ రవి కుమార్, పీ ఆర్, ట్రాన్స్ కో, మైన్స్ తదితర శాఖ ల అధికారులు హాజరయ్యారు.

అనంతపురంలో వాకర్స్ సమస్యల పరిష్కారంకు కృషిచేస్తానని నగర మేయర్ మహమ్మద్ వసీం పేర్కొన్నారు. మంగళవారం మేయర్ , డిప్యూటీ మేయర్ కొగటం విజయ్ భాస్కర్ రెడ్డి, రాష్ట్ర ఒలంపిక్ అసోసియేషన్ ఉపాధ్యక్షుడు అనంత చంద్రారెడ్డి లతో కలసి పిటీసీ లో పర్యటించారు. వాకర్స్ తోపాటు క్రీడాకారులతో వారు సమస్యలు అడిగి తెలుసుకున్నారు. పిటీసీ గ్రౌండ్ లో వాకింగ్ ట్రాక్ ఏర్పాటు చేయాలని,త్రాగునీటి సౌకర్యం కల్పించాలని వారు కోరారు. అదే విధంగా  వాకింగ్ కోసం వచ్చే వారి కోసం పిటీసీ కి ఎదురుగా ఉన్న మున్సిపల్ స్థలంలో పార్క్  ఏర్పాటు చేయాలని,వాకర్స్ సౌకర్యం కోసం లైట్లు ఏర్పాటు చేయాలని మేయర్ ను కోరారు. దీనిపై మేయర్ వసీం ఆయా సమస్యలను పరిష్కరిస్తామని హామీ ఇచ్చారు. అనంతరం స్థానికంగా శిక్షణ పొందుతున్న క్రీడాకారులతో రాష్ట్ర ఒలంపిక్ అసోసియేషన్ ఉపాధ్యక్షుడు అనంత చంద్రారెడ్డి మేయర్,డిప్యూటీ మేయర్ లు సమావేశమై వారి శిక్షణ తీరును అడిగి తెలుసుకున్నారు. క్రీడాకారులకు అండగా ఉంటామని భరోసా ఇచ్చారు. కార్యక్రమంలో  కార్పొరేటర్లు చంద్రమోహన్ రెడ్డి,కమల్ భూషణ్,  అనిల్ కుమార్ రెడ్డి , పార్టీ నాయకులు ఖాజా , స్పోర్ట్స్ కోచ్ లు తదితరులు పాల్గొన్నారు.