ప్రకాశం జిల్లా కలెక్టర్ గా ఇటీవల  బాధ్యతలు స్వీకరించిన  ప్రవీణ్ కుమార్ ను  ఒంగోలు ఎంపీ మాగుంట శ్రీనివాసులురెడ్డి, ఆయన తనయుడు మాగుంట రాఘవరెడ్డి లు పుష్పగుచ్ఛాలచ్చి, శాలువాలతో ఘనంగా సన్మానించారు.  ఇటీల విధుల్లోకి చేరిన కలెక్టర్ ను మర్యాదపూర్వకంగా కలిసిన వీరు జిల్లా అభివ్రుద్ధిలో భాగస్వామ్యం కావాలని కోరారు. అనంతరం జిల్లా యొక్క స్తితిగతులు, గతంలో పనిచేసిన కలెక్టర్ల అభివ్రుద్ధి, ఇంకా చేపట్టాల్సిన కార్యక్రమాలపై మాగుంట కలెక్టర్ కి వివరించారు. ఎంపీ సూచనలపై సానుకూలంగా స్పందిచిన కలెక్టర్ అన్ని వర్గాల సహకారంతో జిల్లాని అభివ్రుద్ధి పదంలో నిలిపేందుకు శక్తి వంచన లేకుంగా క్రుషి చేస్తానని హామీ ఇచ్చారు.

విజ‌య‌న‌గ‌రం జిల్లాలో స‌కాలంలో గృహ‌నిర్మాణాన్ని పూర్తి చేసేందుకు కృషి చేస్తామ‌ని జాయింట్ క‌లెక్ట‌ర్ (హౌసింగ్‌) కె.మ‌యూర్ అశోక్ అన్నారు. ఆయ‌న జాయింట్ క‌లెక్ట‌ర్‌గా గురువారం బాధ్య‌త‌లు స్వీక‌రించారు. 2018 ఐఏఎస్ బ్యాచ్‌కు చెందిన ఆయ‌న‌, ఇంత‌కుముందు తెనాలి స‌బ్ క‌లెక్ట‌ర్‌గా విధులు నిర్వ‌హించి, జిల్లాకు బ‌దిలీపై వ‌చ్చారు.  బాధ్య‌త‌లు స్వీక‌రించిన‌ సంద‌ర్భంగా చెన్నారెడ్డి భ‌వ‌న్‌లోని త‌న ఛాంబ‌ర్‌లో ఆయ‌న మీడియాతో మాట్లాడుతూ, న‌వ‌ర‌త్నాలు కార్య‌క్ర‌మంలో భాగంగా అర్హులంద‌రికీ ప్ర‌భుత్వం ఇళ్లు కేటాయిస్తోంద‌ని చెప్పారు. ఏడాదికి సుమారు 15ల‌క్ష‌ల ఇళ్లు నిర్మించాల‌న్న‌ది ప్ర‌భుత్వ లక్ష్య‌మ‌ని చెప్పారు. ఇది దేశంలోనే అతిపెద్ద కార్య‌క్ర‌మ‌మ‌ని, ప్ర‌భుత్వం దీనిని ప్ర‌తిష్టాత్మ‌కంగా తీసుకొని, ప్ర‌త్యేకంగా ఒక జాయింట్ క‌లెక్ట‌ర్‌ను నియ‌మించింద‌ని చెప్పారు. గృహ‌నిర్మాణం తోపాటు మౌలిక స‌దుపాయాల‌ను కూడా క‌ల్పిస్తామ‌ని తెలిపారు. జిల్లాలోని అధికారులను స‌మ‌న్వ‌యం చేసుకొని, ప్రభుత్వ ల‌క్ష్యానికి అనుగుణంగా కార్య‌క్ర‌మాన్ని న‌డిపిస్తాన‌ని అన్నారు. ఇళ్ల నిర్మాణానికి సంబంధించి సామాన్య ప్ర‌జ‌లు సైతం నేరుగా త‌న‌ను క‌లిసి, త‌మ స‌మ‌స్య‌లను చెప్పుకోవ‌చ్చ‌ని సూచించారు. జిల్లా గృహ‌నిర్మాణ‌శాఖ పిడి ఎస్‌వి ర‌మ‌ణ‌మూర్తి, ఇత‌ర అధికారులు జెసిని క‌లిసి అభినంద‌న‌లు తెలిపారు.

విశాఖలోని సింహాచలం శ్రీశ్రీశ్రీ వరాహలక్ష్మీ నృసింహస్వామి వారి దేవస్థానానికి విశ్వహిందూపరిషత్ (వీహెచ్పీ) ఒక ఆక్సిజన్ కాన్సంట్రేటర్ విరాళంగా అందించింది. ఈ మేరకు బుధవారం ఆలయ ఈఓ ఎంవీ సూర్యకళకు పెదపూడి శర్మ ఈ ఆక్సిజన్ కాన్సంట్రేటర్ ను అందజేశారు. ఈ సందర్భంగా ఆయన మాట్లాడుతూ, దేవస్థా అధికారుల కోరిక మేరకు మినీ ఆక్సిజన్ ప్లాంట్ నిర్మాణానికి కూడా సమాలోచనలు చేస్తున్నట్టు చెప్పారు. వీహెచ్పీ నాయకులు టీపీవీ రావు, జీ. సుబ్రమణ్యం, మీసా రవీంద్ర కృషివల్ల విశాఖపట్నానికి మూడు ఆక్సిజన్ కాన్సంట్రేటర్లు వచ్చాయని ఆయన చెప్పారు.  ఈ మూడింటిలో రెండు ఆర్ఎస్ఎస్ నిర్వహిస్తున్న కోవిడ్ సెంటర్లకు అందించామని ఒకటి సింహాచలం దేవస్థానం కోసం ఇచ్చామని చెప్పారు. కార్యక్రమంలో దేవస్థాన సిబ్బంది పాల్గొన్నారు.

 దేవాలయాల అద్భివృద్ధి , ఆస్తుల పరిరక్షణ పై పూర్తి స్థాయి లో దృష్టి పెదుతున్నట్లు రాష్ట్ర  దేవాదాయ శాఖా మంత్రి వెల్లంపల్లి శ్రీనివాస రావు తెలిపారు.  జిల్లాలో ఏ ఏ దేవాలయాలు అభివృద్ధికి అవకాశం ఉందో  నియోజక వర్గం వారీగా  ఎమ్మెల్యే  అంగీకారం తో ప్రతిపాదనలు పంపాలని దేవాలయాల అధికారులను ఆదేశించారు. బుధవారం మంత్రి కలెక్టరేట్ ఆడిటోరియం లో ప్రజాప్రతినిధులతో కలసి దేవాదాయ శాఖ  అధికారులతో  సమీక్షించారు.  ఈ సందర్భంగా మాట్లాడుతూ  దేవాలయాల భద్రతకు సి సి కెమెరాలు,  పటిష్టమైన భద్రతను ఏర్పాటు చేయాలని ఆదేశించారు.  నియోజక వర్గం వారీగా  ఉన్న దేవస్థానాల స్థితి గతుల పై పూర్తి నివేదికను 15 రోజుల్లోగా అందించాలని, తదుపరి  ఏ గుడికి ఎలాంటి అభివృద్ధి అవసరం , ఎక్కడ ఎలాంటి చర్యలు తీసుకోవాలనేది నిర్ణయించడం జరుగుతుందని అన్నారు. అన్ని  దేవాలయాల ఈ.ఓ లు ఆయా ప్రజా ప్రతినిధులతో మాట్లాడి నివేదిక నివ్వాలన్నారు. కోవిడ్ ను దృష్టి లో పెట్టుకొని  భక్తుల మనో భావాల కనుగుణంగా  భక్తులను భగవంతుని సన్నిధికి చేర్చేలా ఈ-పూజ విధానాన్ని ప్రవేశ పెట్టడం జరిగిందని  తెలిపారు.  టి టి డి ఆధ్వర్యం లో ఉత్తరంధ్రకు చెందిన మూడు జిల్లాల్లో వెయ్యి దేవాలయాలను అభివృద్ధి చేయడానికి చర్యలు తీసుకోవడం జరిగిందన్నారు. సుమారు 100 కుటుంభాలు ఉన్న ఛోట 10 లక్షల వ్యయం తో  ఎస్.సి., ఎస్.టి , బి.సి , మత్స్యకార  గ్రామాల్లో  అక్కడి ప్రజల కోరిక మేరకు హిందూ దేవాలయాలను నిర్మించడం జరుగుతుందని అన్నారు.  ఈ కార్యక్రమం క్రింద జిల్లా నుండి కనీసం 100  ప్రాంతాలను ఎంపిక చేసి 15 రోజుల్లో  నివేదిక పంపాలని అన్నారు. 

జగనన్న కాలనీల్లో  దేవాలయాల నిర్మాణం:      రాష్ట్ర మున్సిపల్, పట్టణాభివృద్ధి శాఖామంత్రి 

హిందూ ధర్మ శాస్త్రం ప్రకారం దేవాలయాల అభివృద్ధికి కృషి చేయడం అబినందనీయమని టీటీడీ  ఆధ్వర్యం లో చేపట్టనున్న దేవాలయాలను జగనన్న కాలనీలలో కూడా నిర్మించాలని    రాష్ట్ర మున్సిపల్, పట్టణాభివృద్ధి శాఖామంత్రి బొత్స సత్యనారాయణ కోరారు. రాష్ట్రం లో 17 వేల  జగనన్న కాలనీలు గ్రామాలుగా మారాయని, అన్నీ సౌకర్యాలతో నిర్మిస్తున్నామని, ఈ కాలనీలు వర్ణ, జాతి బేధాలు లేకుండా అందరికీ సమానంగా నిర్మించడం జరిగిందని, అక్కడ టీటీడీ ద్వారా ప్రజలు  కోరిన విధంగా దేవాలయాలను నిర్మించడానికి చర్యలు చేపట్టాలని మంత్రిని కోరారు. మొదటి దశ లో కనీసం 100  దేవాలయాల నిర్మాణాలకు శాసన సభ్యుల అంగీకారంతో ప్రతిపాదనలు తయారు చేయాలన్నారు.  దేవాలయాల ఆస్తులను పరిరక్షించడం ముఖ్యమని,  దేవాలయాల సిబ్బంది, అధికారులు వారి పరిధి లోనున్న  ప్రతి దేవాలయాన్ని ప్రత్యక్షంగా తనిఖీ చేసి దేవాలయాల భూములు, ఆభరణాలు,ఇతర  ఆస్తుల పై  సమగ్రంగా నివేదికలు తయారు చేయాలని సూచించారు.  ఏ ఏ దేవాలయాలకు ట్రస్ట్ బోర్డు లు ఏర్పాటు చేయవలసి ఉందో శాసన సభ్యుల సిఫార్శు లతో ప్రతిపాదనలు మంత్రివర్యులకు పంపాలని సూచించారు.  విజయనగరం ఇలవేల్పు పైడి తల్లి అమ్మవారి దేవస్థానం అభివృద్ధికి అన్ని రకాల చర్యలు తీసుకుంటున్నట్లు తెలిపారు.  గుడి ఎదురుగా ఉన్న ఖాళీ స్థలం లోకి దేవాలయం పక్కనున్న దుకాణాలను తరలించి అబివృద్ధి చేయడానికి   దేవాదాయ శాఖ సహకరించాలని కోరారు.  రహదారి విస్తరణకు 5 అడుగులు ఇప్పటికే ఇవ్వడం జరిగిందని, మరో 5 అడుగులు ఇస్తే సమస్య తీరిపోతుందని అన్నారు.  దుకాణాల వారికి ఇబ్బంది లేకుండా, పండగల్లో ఇరుకుగా లేకుండా అందరికీ  సౌకర్యవంతంగా ఉంటుందని, మరో  5 అడుగులు వెనక్కు వెళ్లడానికి దేవాదాయ కమిషనర్ అనుమతిని ఇవ్వాలని కోరారు.  

పార్లమెంట్ సభ్యులు బెల్లాన చంద్ర శేఖర్ , నెల్లిమర్ల శాసన సభ్యులు బద్దుకొండ అప్పల నాయుడు, బొబ్బిలి శాసన సభ్యులు శంబంగి వెంకట చిన్న అప్పల నాయుడు,  పార్వతిపురం శాసన సభ్యులు అలజంగి జోగా రావు ,  ఎస్.కోట శాసన సభ్యులు కడుబండి శ్రీనివాస రావు వారి నియోజక వర్గాల్లో నున్న దేవాలయాల సమస్యలు,  అభివృద్ధి కోసం పలు సూచనలు చేశారు. 

ఈ సమావేశం లో   సంయుక్త కలెక్టర్ జి.సి. కిషోర్ కుమార్, రెవెన్యూ డివిజినల్ అధికారి భవాని శంకర్, దేవాదాయ శాఖ కమిషనర్ అర్జున రావు,  ప్రత్యేక అధికారి భ్రమరాంబ,  డిప్యూటీ కమిషనర్ జ్యోతి మాధవి, మాన్సాస్ ఈ.ఓ వేంకటేశ్వర రావు,  జిల్లా సహాయ కమిషనర్ వినోద్ కుమార్, పలు దేవాలయాల ఈ.ఓ లు పాల్గొన్నారు. 

రామతీర్థంలోని రామస్వామి వారి ఆలయాన్ని మంత్రి వెలంపల్లి శ్రీనివాస రావు బుధవారం ఉదయం దర్శించుకున్నారు. విజయనగరం ఎం.పి. బెల్లాన చంద్రశేఖర్, నెల్లిమర్ల శాసన సభ్యులు బడుకొండ అప్పల నాయుడుతో కలసి మంత్రి ఆలయంలో పూజలు చేసారు. ఈ సందర్భంగా ఆలయం వద్ద మంత్రి మీడియా ప్రతినిధులతో మాట్లాడారు. కొండపై నిర్మించనున్న ఆలయ నమూనా చిత్రపటాలను విడుదల చేశారు.

మీడియాతో మంత్రి వెలంపల్లి మాట్లాడుతూ రాష్ట్రంలో అన్ని దేవాలయాల్లో భద్రతను పటిష్టం చేసేందుకు సాంకేతిక పరిజ్ఞానాన్ని వినియోగిస్తున్నామని, దీనిలో భాగంగా ఆలయాల్లో సి.సి. కెమెరాలను ఏర్పాటు చేశామన్నారు. దేవాలయాలకు సంబంధించిన వ్యవహారాలను రాజకీయం చేయడం తగదని మంత్రి చెప్పారు.

ఈ పర్యటనలో మంత్రి వెంట దేవాదాయ శాఖ కమీషనర్ అర్జున రావు, దేవాదాయ శాఖ జాయింట్ కమీషనర్ భ్రమరాంభ, ప్రాంతీయ కమీషనర్ సురేష్ బాబు, ఆర్.డి.ఓ. భవానీ శంకర్, సహాయ కమీషనర్లు డి.వి.ప్రసాదరావు, వినోద్ కుమార్, పైడితల్లి అమ్మవారి దేవస్థానం ఇ.ఓ. కిశోర్ కుమార్, ఆలయ నిర్మాణ కాంట్రాక్టర్ శ్రీధర్ రెడ్డి, దేవాదాయ ఇంజనీరింగ్ విభాగం డి.ఇ. సైదా, ఏ.ఇ. కృష్ణ, నెల్లిమర్ల తహశీల్దార్ రాము తదితరులు పాల్గొన్నారు.

మహా విశాఖపట్నం నగర పాలక సంస్థ పరిధిలోని దివ్యాంగులకు (వివిధ ప్రతిభావంతులు)  ప్రత్యేక వ్యాక్సినేషన్ ను ఆరిలోవ (ఎఫ్.ఆర్.యు) సెంటర్ లో వేస్తారని నగర మేయర్  గొలగాని హరి వెంకట కుమారి తెలిపారు. మంగళవారం దివ్యాంగుల సంక్షేమ సంఘం ఆధ్వర్యంలో వివిధ ప్రతిభావంతులు నగర మేయర్ ను క్యాంప్ ఆఫీసులో కలసి వారి సమస్యలపై,  కోవిడ్ వ్యాక్సినేషన్ కొరకు ఒక వినతి పత్రాన్ని సమర్పించారు. నగర మేయర్ వెంటనే స్పందించి జివిఎంసి ప్రధాన వైద్యాధికారి కె.ఎస్.ఎల్.జి.శాస్త్రితో మాట్లాడి ఆరిలోవ(ఎఫ్.ఆర్.యు) సెంటర్ లో దివ్యాంగుల కొరకు ప్రత్యేక వాక్సినేషన్ సెంటర్ ను తెరవాలని ఆదేశించారు. స్పందించిన వైద్యాధికారి, రేపటి(బుధవారం) నుంచి ఏర్పాటు చేస్తామని తెలిపారు. వినతిపత్రంలో పొందుపరిచిన ప్రతి అంశాన్ని పరిశీలించి అవి అమలయ్యే విధంగా చూస్తానని మేయర్ వారికి హామీ ఇచ్చారు.  ఈ కార్యక్రమంలో దివ్యాంగుల సంక్షేమ సంఘం సభ్యులు సురేష్ మేనన్,  రామదాసు శ్రీనివాస రావు,  తిరుపతి, మోహన రావు, 11వ వార్డు ఇంచార్జ్ గొలగాని శ్రీనివాసరావు తదితరులు పాల్గొన్నారు.   

విజ‌య‌న‌గ‌రంజిల్లా వెనుకబాటు త‌నాన్ని రూపుమాపి, స‌మ‌గ్రాభివృద్దికి స‌త్వ‌ర చ‌ర్య‌లు తీసుకుంటున్నామ‌ని జిల్లా ఇన్‌ఛార్జి మంత్రి, రాష్ట్ర దేవాదాయ‌శాఖామాత్యులు వెలంప‌ల్లి శ్రీ‌నివాస్ అన్నారు. గ‌త ప్ర‌భుత్వ హ‌యాంలో ఉత్త‌రాంధ్ర ప్రాంతం తీవ్ర నిర్ల‌క్ష్యానికి గుర‌య్యింద‌ని విమ‌ర్శించారు. ఈ ప్రాంతాభివృద్దిపై ముఖ్య‌మంత్రి వైఎస్ జ‌గ‌న్ మోహ‌న‌రెడ్డి ప్ర‌త్యేక దృష్టి సారించారని చెప్పారు. ఇన్‌ఛార్జి మంత్రి వెలంప‌ల్లి శ్రీ‌నివాస్ అధ్య‌క్ష‌త‌న జిల్లా స‌మీక్షా  స‌మావేశం క‌లెక్ట‌రేట్‌లోని ఆడిటోరియంలో మంగ‌ళ‌వారం జ‌రిగింది. ఈ స‌మావేశానికి రాష్ట్ర ఉప ముఖ్య‌మంత్రి, గిరిజ‌న శాఖామాత్యులు పాముల పుష్ప‌శ్రీ‌వాణి, మున్సిప‌ల్‌, ప‌ట్ట‌ణాభివృద్ది శాఖామంత్రి బొత్స స‌త్య‌నారాయ‌ణ, ప‌లువురు ప్ర‌జాప్ర‌తినిధులు, అధికారులు హాజ‌ర‌య్యారు. జిల్లాలో కోవిడ్ క‌ట్ట‌డికి తీసుకుంటున్న చ‌ర్య‌లు, ఖ‌రీఫ్ స‌న్న‌ద్ద‌త‌, ర‌బీ ధాన్యం సేక‌ర‌ణ‌, నీటి పారుద‌ల ప్రాజెక్టులు, గ్రామీణ ఉపాధిహామీ ప‌నుల ప్ర‌గ‌తి త‌దిత‌ర అంశాల‌పై చ‌ర్చించి, ప‌లు నిర్ణ‌యాలు తీసుకున్నారు. ముందుగా జిల్లా క‌లెక్ట‌ర్ డాక్ట‌ర్ ఎం.హ‌రి జ‌వ‌హ‌ర్ లాల్ మాట్లాడుతూ, జిల్లాలో కోవిడ్ రెండోద‌శ నియంత్ర‌ణ‌కు తీసుకున్న చ‌ర్య‌లు, మూడోద‌శ‌కు స‌న్న‌ద్ద‌త‌ను వివ‌రించారు. ప్ర‌స్తుతం జిల్లాలో కోవిడ్ కేసుల సంఖ్య గ‌ణ‌నీయంగా త‌గ్గింద‌ని, రాష్ట్రంలోనే అతి త‌క్కువ‌గా 6శాతం పాజిటివిటీ రేటు న‌మోద‌య్యింద‌న్నారు. ఈ నెల 15 నాటికి పాజిటివిటీ రేటును 5శాతానికి త‌గ్గించ‌డానికి కృషి చేస్తున్నామ‌న్నారు. ఫీవ‌ర్ స‌ర్వే, టెస్టులు, వేక్సినేష‌న్‌, హోమ్ ఐసోలేష‌న్‌, కోవిడ్ కేర్ సెంట‌ర్ల నిర్వ‌హ‌ణ‌, వ్యాధికి చికిత్స త‌దిత‌ర అంశాల‌ను వివ‌రించారు. జిల్లాలో ఆక్సీజ‌న్‌కు ఎటువంటి కొర‌తా లేద‌ని అన్నారు. బ్లాక్ ఫంగ‌స్ కేసులు జిల్లాలో ఇప్ప‌టివ‌ర‌కు 13 న‌మోదు కాగా, ఒక‌రిని డిస్‌ఛార్జి చేశామ‌ని, ముగ్గురిని శ‌స్త్ర‌చికిత్స నిమిత్తం విశాఖ కెజిహెచ్‌కు త‌ర‌లించామ‌ని చెప్పారు. మిగిలిన‌వారికి స్థానికంగానే చికిత్స చేస్తున్నామ‌ని, బ్లాక్ ఫంగ‌స్‌, వైట్ ఫంగ‌స్ చికిత్స కోసం జిల్లా కేంద్రాసుప‌త్రిలో 20 ప‌డ‌క‌ల‌తో ప్ర‌త్యేక వార్డును ఏర్పాటు చేస్తున్న‌ట్లు తెలిపారు. జాయింట్ క‌లెక్ట‌ర్ (అభివృద్ది) డాక్ట‌ర్ ఆర్‌.మ‌హేష్ కుమార్ మాట్లాడుతూ, కోవిడ్‌ మూడోద‌శ‌ను ఎదుర్కొన‌డానికి చేప‌ట్టిన చ‌ర్య‌ల‌ను వివ‌రించారు. జాయింట్ క‌లెక్ట‌ర్ (రెవెన్యూ) డాక్ట‌ర్ జిసి కిశోర్ కుమార్ మాట్లాడుతూ, జిల్లాలో ర‌బీ ధాన్యం సేక‌ర‌ణ ప్ర‌క్రియ‌ను వివ‌రించారు. మ‌రో 8,300 మెట్రిక్ ట‌న్నుల ధాన్యం మిగిలిఉంద‌ని, ఈ నెల 15 లోగా సేక‌ర‌ణ పూర్తి చేస్తామ‌ని చెప్పారు.

              ఉప ముఖ్య‌మంత్రి పాముల పుష్ప శ్రీ‌వాణి మాట్లాడుతూ, ఈ-క్రాప్ న‌మోదు స‌క్ర‌మంగా జ‌ర‌గ‌డం లేద‌ని, దీనివల్ల రైతులు న‌ష్ట‌పోయే అవ‌కాశం ఉంద‌ని అన్నారు. న‌మోదులో సిబ్బంది బాధ్య‌ర‌హితంగా వ్య‌వ‌హ‌రిస్తున్నార‌ని చెప్పారు. అలాగే దీర్ఘ‌వ్యాదిగ్ర‌స్తుల‌కు ఇచ్చే పింఛ‌న్ల మంజూరులో అవ‌క‌త‌వ‌క‌లు చోటుచేసుకుంటున్నాయ‌ని ఆరోపించారు. చాలామంది అర్హుల‌కు ఈ పింఛ‌న్లు అంద‌టం లేద‌ని, ఇదే స‌మ‌యంలో కొంద‌రు అన‌ర్హులు పింఛ‌న్లు పొందుతున్నార‌ని చెప్పారు. వీటిపై స‌మ‌గ్ర విచార‌ణ చేసి, అర్హుల‌కు న్యాయం చేయాల‌ని కోరారు.

             మున్సిప‌ల్ శాఖామంత్రి బొత్స స‌త్య‌నారాయ‌ణ మాట్లాడుతూ, వివిధ అంశాల‌పై కూలంకుషంగా స‌మీక్షించారు. కోవిడ్ మూడోద‌శ‌ను ఎదుర్కొన‌డానికి, పిల్ల‌ల వ‌య‌సుల వారీగా వివ‌రాలు సేక‌రించి, వ‌ర్గీక‌ర‌ణ చేసి, దానికి అనుగుణంగా ప్రణాళిక‌ను సిద్దం చేయాల‌ని సూచించారు.  రైతుకు అవ‌స‌ర‌మైన విత్త‌నాలు, ఎరువుల కొర‌త రాకుండా చూడాల‌ని వ్య‌వ‌సాయాధికారుల‌ను ఆదేశించారు. త‌మ‌ది రైతు ప‌క్ష‌పాత ప్ర‌భుత్వ‌మ‌ని, ఎట్టిప‌రిస్థితిలోనూ రైతుకు న‌ష్టం వాటిల్ల‌కుండా చ‌ర్య‌లు తీసుకుంటామ‌ని స్ప‌ష్టం చేశారు. ధాన్యం సేక‌ర‌ణ‌పై స‌మీక్షిస్తూ, మిల్లుల సామ‌ర్థ్యాన్ని దృష్టిలో ఉంచుకొని, స‌మ‌గ్ర విధానాన్ని రూపొందించాల‌ని సూచించారు. గ్రామీణ ఉపాధిహామీ క‌న్వ‌ర్జెన్సీ ప‌నుల‌ను వేగ‌వంతం చేయాల‌ని, రెండుమూడు రోజుల్లో పెండింగ్ బిల్లుల‌ను విడుద‌ల చేసేందుకు ప్ర‌య‌త్నిస్తాన‌ని అన్నారు. ప్ర‌భుత్వం అత్యంత ప్ర‌తిష్టాత్మ‌కంగా భావిస్తున్న గృహ‌నిర్మాణ కార్య‌క్ర‌మంపై ప‌ర్య‌వేక్ష‌ణ పెంచేందుకు, ఇళ్ల నిర్మాణాన్ని స‌కాలంలో పూర్తి చేసేందుకు, ప‌ట్ట‌ణాల్లో ప‌బ్లిక్‌హెల్త్ ఇంజ‌నీర్లు, వార్డు ఎమినిటిస్ కార్య‌ద‌ర్శుల సేవ‌ల‌ను కూడా వినియోగించుకోవాల‌ని సూచించారు. ప‌లువురు ప్ర‌జాప్ర‌తినిధులు లేవ‌నెత్తిన స‌మ‌స్య‌ల‌ను ప‌రిష్క‌రిస్తాన‌ని హామీ ఇచ్చారు.

              ఎంఎల్‌సి పివిఎన్ మాధ‌వ్ మాట్లాడుతూ, కోవిడ్ నియంత్ర‌ణ‌కు జిల్లా అధికారులు తీసుకున్న చ‌ర్య‌ల‌ను అభినందించారు.  ఏప్రెల్ 26న జిల్లా కేంద్రాసుప‌త్రిలో జ‌రిగిన సంఘ‌ట‌ను ప్ర‌స్తావిస్తూ, మృతులు ఎవ‌రైనా ఉంటే, వారికి ప్ర‌భుత్వం నుంచి పరిహారం ఇప్పించేందుకు కృషి చేయాల‌ని కోరారు. ఆ నాటి సంఘ‌ట‌న‌లో ప్ర‌మాద‌వ‌శాత్తూ ఎవ‌రూ చ‌నిపోలేద‌ని, సాధార‌ణ మ‌ర‌ణాలేన‌ని క‌లెక్ట‌ర్ స్ప‌ష్టం చేశారు. ఉపాధ్యాయ ఎంఎల్‌సి పాక‌ల‌పాటి ర‌ఘువ‌ర్మ మాట్లాడుతూ, జిల్లాలో కోవిడ్ కార‌ణంగా సుమారు 48 మంది ఉపాధ్యాయులు మ‌ర‌ణించార‌ని, కారుణ్య నియామ‌కాల్లో వారికి త‌గిన ప్రాధాన్య‌త‌నివ్వాల‌ని కోరారు. బొబ్బిలి శాస‌న‌స‌భ్యులు శంబంగి వెంక‌ట చిన‌ప్ప‌ల‌నాయుడు మాట్లాడుతూ, గ‌త ఖ‌రీఫ్‌లో 1121 ర‌కం వ‌రి విత్త‌నాలు ఇచ్చార‌ని, దీనివ‌ల్ల జిల్లా రైతుల‌కు పెద్ద‌గా ఉప‌యోగం లేద‌ని అన్నారు. జిల్లా వాతావ‌ర‌ణ ప‌రిస్థితుల‌ను దృష్టిలో పెట్టుకొని, రైతుకు లాభ‌దాయ‌కంగా ఉండే ర‌కాల‌ను ఇవ్వాల‌ని కోరారు. పార్వ‌తీపురం ఎంఎల్ఏ అల‌జంగి జోగారావు మాట్లాడుతూ, స‌బ్‌ప్లాన్ మండ‌లాల్లోని గిరిజ‌న రైతుల‌కు 90శాతం స‌బ్సిడీపై విత్త‌నాలు ఇస్తున్నార‌ని, ఈ అవ‌కాశాన్ని జిల్లాలోని గిరిజ‌న రైతులంద‌రికీ వ‌ర్తింప‌జేయాల‌ని కోరారు. పార్వ‌తీపురంలో గ‌త రెండు నెల‌లుగా విద్యుత్ స‌మ‌స్య ఉంద‌ని, సీతాన‌గ‌రం వంతెన నిర్మాణ ప‌నులు ఆగిపోయాయ‌ని మంత్రుల దృష్టికి తెచ్చారు. ఎస్‌.కోట ఎంఎల్ఏ క‌డుబండి శ్రీ‌నివాస‌రావు మాట్లాడుతూ, ప్ర‌భుత్వ ఆసుప‌త్రుల్లోనే మెరుగైన వైద్య సేవ‌లు అందుతున్నాయ‌ని అన్నారు. ఎస్‌కోట‌లో ఎల‌క్ట్రిక‌ల్ ఏఇ పోస్టు ఏడాది కాలంగా ఖాలీగా ఉంద‌న్నారు.

                చివ‌రిగా ఇన్‌ఛార్జి మంత్రి శ్రీ‌నివాస‌రావు మాట్లాడుతూ, అజెండాలోని అన్ని అంశాల‌నూ కూలంక‌షంగా చ‌ర్చించి, త‌గిన నిర్ణ‌యాల‌ను తీసుకోవ‌డం జ‌రిగింద‌ని చెప్పారు. జిల్లాలో కోవిడ్ సెకండ్‌వేవ్‌ను స‌మ‌ర్థ‌వంతంగా ఎదుర్కొన్నామ‌ని, మూడో ద‌శ‌వ‌స్తే, దానిని ఎదుర్కొనేందుకు కూడా జిల్లా యంత్రాంగం సంసిద్దంగా ఉంద‌ని చెప్పారు. ముఖ్య‌మంత్రి వైఎస్ జ‌గ‌న్‌మోహ‌న‌రెడ్డి హాయంలో స‌కాలంలో రుతుప‌వ‌నాలు కూడా వ‌స్తున్నాయ‌ని, రైతుకు ప్ర‌భుత్వం అన్ని ర‌కాలుగా అండ‌గా ఉంటుంద‌ని చెప్పారు. ప్ర‌జాప్ర‌తినిధులు త‌మ దృష్టికి తెచ్చిన స‌మ‌స్య‌ల‌ను ఎప్ప‌టిక‌ప్పుడు ప‌రిష్క‌రిస్తూ, రాజ‌కీయాల‌కు అతీతంగా జిల్లాను అభివృద్ది ప‌థాన న‌డ‌ప‌డానికి కృషి చేస్తున్నామ‌ని వెలంప‌ల్లి స్ప‌ష్టం చేశారు.

                ఈ స‌మావేశంలో పార్ల‌మెంటు స‌భ్యులు బెల్లాన చంద్ర‌శేఖ‌ర్‌, గొడ్డేటి మాధ‌వి, ఎంవివి స‌త్య‌నారాయ‌ణ‌, ఎంఎల్‌సి పెనుమ‌త్స సురేష్‌బాబు, ఎంఎల్ఏలు బొత్స అప్ప‌ల‌న‌ర‌స‌య్య‌, బ‌డ్డుకొండ అప్ప‌ల‌నాయుడు, వ్య‌వ‌సాయ స‌ల‌హా మండ‌లి జిల్లా ఛైర్మ‌న్ వాకాడ నాగేశ్వ‌ర్రావు, జిల్లా ఎస్‌పి బి.రాజ‌కుమారి, ఐటిడిఏ పిఓ ఆర్‌.కూర్మ‌నాధ్‌, జాయింట్ క‌లెక్ట‌ర్ (ఆస‌రా) జె.వెంక‌ట‌రావు, సిపిఓ జె.విజ‌య‌ల‌క్ష్మి, వివిధ శాఖ‌ల అధికారులు, సిబ్బంది పాల్గొన్నారు. ఈ సంద‌ర్భంగా ఇద్ద‌రు రైతుల‌కు ఎరువులు, విత్త‌నాల‌ను మంత్రుల చేతుల‌మీదుగా అంద‌జేశారు.

కరోనా విపత్తు సమయంలో నిరుపేదలకు సహాయం చేసే దాతల సేవలు మరువలేనివని మహా విశాఖపట్నం నగరపాలక సంస్థ మేయర్ గొలగాని హరి వెంకట కుమారి అన్నారు. మంగళవారం నగర  పరిధిలోని ఇటీవల కోవిడ్  బారినపడి కోలుకున్ననిరుపేద కుటుంబాలకు స్వాంతన సేవా సమితి ఆధ్వర్యంలో మేయర్ నిత్యావసర సరుకులను పంపిణీ చేశారు. ఈ సందర్భంగా ఆమె మాట్లాడుతూ స్వాంతన సేవా సమితి డైరెక్టర్ ప్రజ్ఞా కుమార్, అన్నా గ్రేస్ లకు ఈ నిత్యావసర సరుకులు సమకూర్చి నందుకు కృతజ్ఞతలు తెలిపారు. ఇదే స్ఫూర్తితో మరిన్ని సంస్థలు ముందుకు వచ్చి నిరుపేదలను, నిరాశ్రయులను ఆదుకోవాలని మేయర్ విజ్ఞప్తి చేశారు. ఈ కార్యక్రమంలో సంతన సేవాసమితి డైరెక్టర్ ప్రజ్ఞా కుమార్, అన్నా గ్రేస్, 11వ వార్డు ఇంచార్జ్  గొలగాని శ్రీనివాసరావు తదితరులు పాల్గొన్నారు.