2000 టన్నుల ఆక్సిజన్ సరఫరా చేసిన రైల్వే..

భారతీయ రైల్వే నూతన అన్వేషణలతో దేశానికి అనేక విధాలుగా సేవలందిస్తోంది. ఊహించని అనేక సవాళ్లను అధిగమిస్తూ  ఆంధ్రప్రదేశ్‌ రాష్ట్రానికి 16 రోజుల స్వల్ప కాలంలోనే 2000 మెట్రిక్‌ టన్నులకుపైగా వైద్య ఆక్సిజన్‌ను భారతీయ రైల్వే సరఫరా చేసింది. 1 జూన్‌ 2021 తేదీ నాటికి ఆంద్రప్రదేశ్‌ రాష్ట్రానికి ఆక్సిజన్‌ ఎక్స్‌ప్రెస్‌ల ద్వారా మొత్తం మీద 2,125.6 మెట్రిక్‌ టన్నుల ఎల్‌ఎమ్‌ఓ రైల్వే ద్వారా సరఫరా చేసింది.  భారతీయ రైల్వే ఆంధ్రప్రదేశ్‌లోని గుంటూరు, కృష్ణపట్నం, సింహాచలం, తాడిపత్రి వంటి 4 ప్రాంతాలకు ద్రవ రూప వైద్య ఆక్సిజన్‌ను చేరవేసింది.  గుంటూరుకు 720.9 మెట్రిక్‌ టన్నుల ఎల్‌ఎమ్‌ఓ చేరవేయగా, కృష్ణపట్నంకు 756.7  మెట్రిక్‌ టన్నులు, సింహాచలంకు 360 మెట్రిక్‌ టన్నులు మరియు తాడిపత్రికి 368 మెట్రిక్‌ టన్నుల ఎల్‌ఎమ్‌ఓ సరఫరా చేశారు. రాష్ట్రానికి కావాల్సిన వైద్య ఆక్సిజన్‌ అవసరాలను తీర్చడానికి దేశంలోని తూర్పు మరియు పశ్చిమ ప్రాంతాల నుండి ఆక్సిజన్‌ ఎక్స్‌ప్రెస్‌లు నడుపబడినాయి. 33 ఆక్సిజన్‌ ఎక్స్‌ప్రెస్‌లలో 130 ఎల్‌ఎమ్‌ఓ ట్యాంకర్లలో  ఆక్సిజన్‌ సరఫరా అయ్యింది. ఒడిస్సా నుండి 15 రైళ్లు రాగా, జార్ఖండ్‌ నుండి మరో 9 రైళ్లు, గుజరాత్‌ నుండి 7 రైళ్లు మరియు పశ్చిమబెంగాల్‌ నుండి 2 రైళ్లు వచ్చాయి. 

రాష్ట్రాలకు కావాల్సిన ఆక్సిజన్‌ అవసరాలను  వీలైనంత త్వరాగా తీర్చడానికి  రైళ్లు తక్కువ సమయంలో  గమ్యం స్థానాలకు చేరేలా రైల్వే గ్రీన్‌ కారిడార్లను ఏర్పాటు చేసింది. ఆక్సిజన్‌ రైళ్లు వీలైనంత త్వరలా చేరేలా పర్యవేక్షణకు రైల్వేలో వివిధ విభాగాలలో ప్రత్యేక బృందాలను ఏర్పాటు చేసింది.  వీటి ఫలితంగా, ఈ రైళ్లు సగటను గంటకు 60 కిలోమీటర్ల వేగంతో ప్రయాణించాయి.  ఈ క్లిష్ట సమయంలో ఆంద్రప్రదేశ్‌ రాష్ట్రానికి వైద్య ఆక్సి.జన్‌ సరఫరా చేయడంలో శ్రమిస్తున్న అధికారులను మరియు సిబ్బందిని దక్షిణ మధ్య రైల్వే జనరల్‌ మేనేజర్‌ శ్రీ గజానన్‌ మాల్య అభినందించారు. రాష్ట్రాలకు వైద్య ఆక్సిజన్‌ సరఫరాకు అత్యంత ప్రాధాన్యత ఇచ్చి ఈ రైళ్లను వీలైనంత వేగంగా నడుపుతున్నట్లు ఆయన తెలిపారు. ఈ రైళ్ల నిర్వహణలో ఎలాంటి ఆటంకాలు లేకుండా సజావుగా సాగేలా ఇదే తరహ పర్యవేక్షణను ఇక మీదట కూడా కొనసాగించాలని ఆయన రైల్వే బృందాలకు సూచించారు.

జూన్ నెల‌లో శ్రీవారికి విశేష ఉత్స‌వాలు..

తిరుమ‌ల శ్రీ‌వారి ఆల‌యంలో జూన్ నెల‌లో జ‌రుగ‌నున్న విశేష ఉత్స‌వాలకు టిటిడి అధికారులు అన్ని ఏర్పాట్లు చేస్తున్నారు.  న‌ర‌సింహ జ‌యంతి నుండి 10వ రోజైన‌ జూన్ 3న ఉత్త‌ర మాడ వీధిలోని రాతి మండ‌పంలో శ్రీ మ‌ల‌య‌ప్ప‌స్వామివారికి ఆస్థానం వుంటుంది.. జూన్ 4న శ్రీ బేడి ఆంజ‌నేయ‌స్వామివారి ఆల‌యం, 7వ మైలు శ్రీ ప్ర‌స‌న్న ఆంజ‌నేయ‌స్వామివారి విగ్ర‌హం వ‌ద్ద హ‌నుమ‌జ్జ‌యంతి వేడుక‌లు,  జూన్ 6న మ‌త‌త్ర‌య ఏకాద‌శి, జూన్ 12న శ్రీ పెరియాళ్వార్ల ఉత్స‌వారంభం,  జూన్ 15న మిథున సంక్ర‌మ‌ణం, జూన్ 20న ప్ర‌త్యేక స‌హ‌స్ర‌క‌ల‌శాభిషేకం,  జూన్ 21న మ‌త‌త్ర‌య ఏకాద‌శి, శ్రీ పెరియాళ్వార్ల శాత్తుమొర‌,  జూన్ 22 నుండి 24వ తేదీ వ‌ర‌కు శ్రీ‌వారి జ్యేష్ఠాభిషేకం,  జూన్ 24న ఏరువాక పూర్ణిమ‌ ఉత్సవాలు జరగనున్నాయి. కార్యక్రమాలన్నీ ఎస్వీబీసీ ఛానల్ లైవ్ ప్రసారాలు అందించనుంది..

ఎస్వీబీసీ ట్ర‌స్టుకు రూ. కోటి విరాళం..

 శ్రీ వేంక‌టేశ్వ‌ర భ‌క్తి ఛాన‌ల్ ట్ర‌స్టుకు బుధ‌వారం సాయంత్రం ఒక కోటి రూపాయ‌లు విరాళంగా అందింది. క‌ర్ణాట‌క రాష్ట్రం మంగ‌ళూరుకు చెందిన ప్ర‌మ‌తి సాఫ్ట్‌వేర్ ప్ర‌యివేట్ లిమిటెడ్ సంస్థ ఛైర్మ‌న్  పిఎస్‌.జ‌య‌రాఘ‌వేంద్ర ఈ మేర‌కు విరాళం అందించారు.  డిడిని దాత త‌ర‌ఫున టిటిడి బోర్డు స‌భ్యులు  డిపి.అనంత తిరుమ‌ల‌లోని బంగ‌ళాలో టిటిడి అద‌న‌పు ఈవో, ఎస్వీబీసీ ఎండి  ఎవి.ధ‌ర్మారెడ్డికి అంద‌జేశారు. ఈ సందర్భంగా దాతలు మాట్లాడుతూ, స్వామివారి సేవలు ప్రపంచ వ్యాప్తం కావాలని, దేశంలోని అన్ని ప్రధాన భాషల్లోనూ ప్రసారం చేసి అన్ని వర్గాల భక్తులకు చేరువ అయ్యేలా చేయాలని కోరారు. దాతల సూచనల మేరకు టిటిడి అధికారులు ప్రయత్నాలు చేస్తున్నట్టు చెప్పారు.

అలిపిరి కాలిన‌డ‌క‌ మార్గం మూత‌..

తిరుప‌తి నుంచి తిరుమ‌ల‌కు వెళ్లే అలిపిరి కాలిన‌డ‌క మార్గంలో పైక‌ప్పు పున‌ర్నిర్మాణ‌ ప‌నుల‌ను త్వ‌రిత‌గ‌తిన పూర్తి చేసేందుకు జూన్ 1 నుండి జూలై 31వ తేదీ వ‌ర‌కు ఆ మార్గాన్ని మూసివేస్తున్న‌ట్టు టిటిడి తెలిపింది. అయితే కాలిన‌డ‌క‌న తిరుమ‌ల‌కు వెళ్లాల‌నుకునే భ‌క్తులు శ్రీ‌వారి మెట్టు మార్గం ద్వారా వెళ్లాల‌ని కోరింది. ఇందుకోసం అలిపిరి నుండి శ్రీ‌వారి మెట్టు వ‌ర‌కు ఉచిత బ‌స్సుల ద్వారా భ‌క్తుల‌ను త‌ర‌లించేందుకు టిటిడి ఏర్పాట్లు చేప‌ట్టింది. భ‌క్తులు ఈ విష‌యాన్ని గ‌మ‌నించి టిటిడికి స‌హ‌క‌రించాల‌ని కోరింది. పై కప్పు నిర్మాణాలు పూర్తి కాగానే మళ్లీ ఈ మార్గాన్ని తెరవనున్నట్టు టిటిడి పేర్కొంది..

14వ విడ‌త‌ సుందరకాండ పారాయ‌ణం..

కరోనా వైరస్ నుంచి ప్రపంచానికి విముక్తి కల్పించాలని శ్రీవారిని ప్రార్థిస్తూ తిరుమ‌లలోని నాద‌నీరాజ‌నం వేదిక‌పై మే 26న  14వ విడ‌త‌ సుందరకాండ  అఖండ పారాయణం జ‌రుగ‌నుంది. ఇందులో భాగంగా ఉద‌యం 7 గంటల నుండి సుందరకాండలోని 58వ సర్గలో గ‌ల 167 శ్లోకాలను పారాయణం చేస్తారు. తిరుమల ధ‌ర్మ‌గిరి వేద విజ్ఞాన పీఠం, తిరుప‌తిలోని ఎస్వీ వేద విశ్వవిద్యాలయం, జాతీయ సంస్కృత విశ్వవిద్యాలయం, వేదపారాయణదారులతో పాటు సుమారు 200 మంది ఈ అఖండ పారాయ‌ణంలో పాల్గొంటారు. కాగా, సుంద‌ర‌కాండ‌లో మొత్తం 68 స‌ర్గ‌ల్లో 2,821 శ్లోకాలు ఉన్నాయి. వీటిని 16 విడ‌త‌లుగా అఖండ పారాయ‌ణం చేయాల‌ని టిటిడి సంక‌ల్పించింది. ఇప్పటివరకు టిటిడి 13 విడ‌త‌ల్లో అఖండ పారాయణాన్ని విజయవంతంగా నిర్వహించింది.  శ్రీ వేంక‌టేశ్వ‌ర భ‌క్తి ఛాన‌ల్ ఈ కార్య‌క్ర‌మాన్ని ఉద‌యం 7 నుండి 9 గంట‌ల వ‌ర‌కు ప్ర‌త్య‌క్ష ప్ర‌సారం చేయ‌నుంది. ఎస్వీబీసీ ప్ర‌త్య‌క్ష ప్ర‌సారం ద్వారా శ్రీ‌వారి భ‌క్తులు త‌మ ఇళ్ల‌లోనే ఈ పారాయ‌ణంలో పాల్గొని స్వామివారి కృప‌కు పాత్రులు కావాల‌ని టిటిడి కోరుతోంది.

25న తిరుమల‌లో శ్రీ నృసింహ జయంతి..

తిరుమల‌ శ్రీవారి ఆల‌యంలో మే 25న మంగళవారం నృసింహ జయంతి జరుగనుంది. ప్రతి ఏటా వైశాఖ మాసం స్వాతి నక్షత్రంలో నృసింహ జయంతిని నిర్వహిస్తారు. శ్రీ యోగ నరసింహస్వామివారి మూల‌మూర్తికి ఈ సందర్భంగా ప్రత్యేక అభిషేకం చేస్తారు. వసంత మండపంలో శ్రీ నరసింహస్వామి వారి పూజ  వైశాఖ మాస ఉత్సవాల్లో భాగంగా తిరుమల‌ వసంత మండపంలో ఉదయం 8.30 నుండి 10 గంటల‌ వరకు శ్రీనరసింహస్వామి వారి పూజ నిర్వహిస్తారు.  శ్రీవారి ఆల‌య మొదటి ప్రాకారంలో గర్భాల‌యానికి ఈశాన్యం వైపున గల‌ మండపంలో పడమరగా శ్రీ యోగ నరసింహస్వామివారి ఉప ఆల‌యం ఉంది. శ్రీ యోగ నరసింహస్వామివారి విగ్రహాన్ని శాస్త్రాల‌ ప్రకారం రూపొందించారు. ఇక్కడ స్వామివారు యోగముద్రలో ఉంటారు. స్వామివారికి నాలుగు చేతులుంటాయి. పైభాగంలో ఉన్న చేతుల్లో శంఖుచక్రాలు కనిపిస్తాయి. కింది రెండు చేతులు ధ్యాననిష్టను సూచిస్తాయి. క్రీ.శ 1330 నుంచి క్రీ.శ 1360 మధ్య కాలంలో నిర్మితమైన ఈ ఆల‌యంలో శ్రీ రామానుజాచార్యుల‌ వారు శ్రీ యోగ నరసింహస్వామివారి విగ్రహాన్ని ప్రతిష్ఠించారు.  ఈ కార్యక్రమాన్ని శ్రీ వేంకటేశ్వర భక్తి ఛానల్‌ ప్రత్యక్ష ప్రసారం చేస్తుంది.

ఆనందయ్య ఆయుర్వేద మందుపై అధ్యయనం..

నెల్లూరు జిల్లాలో ఆనందయ్య అనే అనువంశిక ఆయుర్వేద వైద్యుడి కరోనా మందుపై  అధ్యయనం ప్రారంభించాలని ఉపరాష్ట్రపతి ముప్పవరపు వెంకయ్య నాయుడు ఆయుష్ ఇన్ చార్జ్ మంత్రి కిరణ్ రిజ్జు, ఐ.సి.ఎం.ఆర్. డైరక్టర్ జనరల్ ప్రొఫెసర్ బలరామ్ భార్గవ్ కు సూచించారు. నెల్లూరు ఆయుర్వేద మందు విషయంలో నెలకొన్న పరిస్థితులు ఉపరాష్ట్రపతి దృష్టికి వెళ్లడంతో ఈ నిర్ణయం తీసుకున్నారు. ఈ నేపథ్యంలో ఆయన వెంటనే కేంద్ర మంత్రి , డైరక్టర్ జనరల్ తో ఫోన్ ద్వారా మాట్లాడారు. వెంటనే ఆ మందు మీద అధ్యయనం ప్రారంభించి, వీలైనంత త్వరగా నివేదిక వచ్చేలా చొరవ తీసుకోవాలని కోరారు. కేంద్రం ద్రుష్టికి వెళ్లిన ఆనందయ్య మందుపై ఇప్పటికే మంచి ఫలితాలు వస్తున్న నేపథ్యంలో ఈ అంశం జాతీయ స్థాయిలో చర్చనీయాంశం అవుతుంది..

కుటుంబ వ్యవస్థను కాపాడుకుందాం..

ఎంతో ప్రాశస్త్యం.. తరతరాల చరిత్ర కలిగిన మన కుటుంబ వ్యవస్థను కాపాడుకునేందుకు ప్రతి ఒక్కరూ కంకణబద్ధులు కావాలంటూ భారత ఉపరాష్ట్రపతి ముప్పవరపు వెంకయ్య నాయుడు పిలుపునిచ్చారు. అంతర్జాతీయ కుటుంబ దినోత్సవం సందర్భంగా భారతీయ కుటుంబ వ్యవస్థ గొప్పదనాన్ని నాయుడు శనివారం ట్విట్టర్ వేదికగా పిలుపునిచ్చారు. ఉమ్మడి కుటుంబ వ్యవస్థ మన సమాజానికి, మన సాంఘిక భద్రత కు మూలాధారం అనే విషయాన్ని ప్రతి ఒక్కరూ గ్రహించాలన్నారు.  పిల్లలకు కుటుంబంలోని పెద్దల తో అనుబంధం, వారి అనుభవాల సారం ఎంతో అవసరం అన్నారు. పెద్దలకు కూడా పిల్లలతో సమయం గడపడం వల్ల మానసికోల్లాసం లభిస్తుందని, విలువలతో కూడిన ఈ వ్యవస్థను కాపాడుకునేందుకు ప్రతి ఒక్కరు కంకణబద్ధులు కావాలని  వెంకయ్య నాయుడు ఆకాంక్షించారు.

సింహాద్రి అప్పన్న నిజ రూపంతో ఈఎన్ఎస్ లైవ్ పాఠకులకు శుభోదయం..!

ఈఎన్ఎస్ లైవ్ పాఠకులకు శుభోదయం..!

కరోనాలోనూ నరకం చూపిస్తున్న మొబైల్ నెట్వర్క్ లు..

భారతదేశంలో మొబైల్ నెట్వర్క్ కంపెనీలు అదును చూసి ప్రజల సహనాన్ని పరీక్షిస్తున్నాయి. సమయానికి రీచార్జ్ చేయకపోతే సేవలు నిలుపుదల చేసేసే ప్రైవేటు మొబైల్ నెట్వర్క్ తోపాటు ప్రభుత్వ రంగ సంస్థ బీఎస్ఎన్ ఎల్ కూడా వినియోగదారులకు కరోనా సమయంలో చుక్కలు చూపిస్తున్నాయి. అన్ని మొబైల్ నెట్వర్క్ సంస్థలు కాల్ క్వాలిటీని తగ్గించేయడంతోపాటు, ఇంటర్నెట్ స్పీడ్ ని కూడా పూర్తిగా కుదించేశాయి. తీసుకున్న ఆఫర్లకు అనుగుణంగా ప్రతీరోజూ, 1జిబీ, లేదా 2జీబీ ఇంటర్నట్ డెటాలో సగం కూడా వినియోగదారులకు అందించడం లేదు. ముఖ్యంగా జియో నెట్వర్క్ వినియోగదారులతో తీవ్రంగా ఆటలాడుతోంది. ఉచిత ఇంటర్నెట్, 4జి అని ప్రచారాలు ఊదరగొట్టి తీరా వినియోగదారులు అత్యధికంగా ఈ నెట్వర్క్ ని ఎంచుకున్న తరువాత కాల్ క్వాలిటీని పూర్తిగా తగ్గించేశాయి. గ్రామీణ ప్రాంతాల్లో అయితే వారంలో సుమారు నాలుగు రోజులు ఎయిర్ టెల్, ఐడియా నెట్వర్క్ లు తమ సిగ్నల్స్ ని ఆపేస్తున్నాయి. ఆ సమయంలో ఎవరినైనా సంప్రదించడానికి కూడా వీలు లేకుండా పోతుంది. నిత్యం బీఎస్ఎన్ఎల్ నెట్వర్క్ అందుబాటులో ఉన్నా ఇంటర్నెట్ స్పీడ్ రావడం లేదు. ఎవరికైనా ఫోన్ చేయాలంటే గంటల తరబడి కాల్ కలిసే వరకూ అలా ఫోన్లు చేస్తూ చే ఉండాల్సి వస్తుంది. తీరా కాల్ కనెక్ట్ అయ్యిందంటే ఇవతలి వ్యక్తి ఏం మాట్లాడుతున్నాడో అవతలి వ్యక్తికి అర్ధం కావడం లేదు...అదే అవతల వ్యక్తి ఏం మాట్లాడుతున్నారో ఇవతల వ్యక్తికి అర్ధం కావడం లేదు. ట్రాయ్ నిబంధనల మేరకు తీసుకున్న మొత్తానికి వినియోగదారులకు నాణ్యమైన కాల్ క్వాలిటీతోపాటు, ప్రకటించిన ఇంటర్నెట్ స్పీడు కూడా అదే స్థాయిలో అందించాల్సివున్న ప్రైవేటు నెట్వర్క్ లు ఏ ఒక్క నిబంధనను కూడా అమలు చేయడం లేదు. కరోణా సమయంలో అత్యవసరంగా వైద్య సహాయం కోసం ఎవరికైనా కాల్ చేయాలంటే సుమారు పది 15సార్లు ట్రై చేస్తే తప్పా కాల్ కనెక్ట్ అయ్యే పరిస్థితి కనిపించడం లేదు. ఒక్క గ్రామీణ ప్రాంతాల్లోనే కాకుండా, పట్టణాలు, నగరాల్లోకూడా ఇదే పరిస్థితి ఉందంటే మొబైల్ నెట్వర్క్ లు ఏ స్థాయిలో వినియోగదారులకు చుక్కలు చూపిస్తున్నాయో అర్ధం చేసుకోవచ్చు. మొబైల్ నెట్వర్కలన్నీ ట్రాయ్, కేంద్ర టెలీకాం మంత్రిత్వశాఖ అధీనంలో ఉన్నప్పటికీ ఆ శాఖ నుంచి అధికారులు గానీ, మంత్రులు గానీ కరోనా సమయంలోనైనా ప్రజలకు నాణ్యమైన సేవలు అందించాలని సూచన చేయకపోవడంతో ప్రైవేటు నెట్వర్క్ లు ఆడింది ఆటగా, పాడింది పాటగా తయారవుతున్నాయి. ఎపుడైనా తప్పిదారి కస్టమర్ కేర్ సెంటర్ కి కాల్ చేస్తే...నెట్వర్క్ లో మరమ్మతు చేస్తున్నారు కొద్ది రోజులు పరిస్థితి ఇలానే వుంటుందని చెప్పడంతో వినియోగదారులు ఏమీ చేయలేని పరిస్థితి నెలకొంది. కేంద్ర ప్రభుత్వం గానీ, జిల్లా కలెక్టర్లు గానీ మొబైల్ నెట్వర్క్ కంపెనీలకు ఆదేశాలు జారీ చేస్తే తప్పా ఈ కరోనా సమయంలో మొబైల్ వినియోగదారుల కష్టాలు తీరేలా కనిపించడం లేదు..