వైద్య వసతులలో వెనకబడి ఉన్న అనంతలో విశాఖ లాంటి మెట్రో నగరాలు ఉన్న జిల్లాలతో సమానంగా మౌలిక వసతులు ఏర్పాటు చేసుకున్నామని జిల్లా కలెక్టర్ గంధం చంద్రుడు పేర్కొన్నారు.  మంగళవారం ఉదయం జిల్లా కలెక్టర్ సూపర్ స్పెషాలిటీ ఆసుపత్రి వద్ద నిర్మిస్తున్న 300 పడకల తాత్కాలిక కోవిడ్ ఆసుపత్రి ప్రారంభోత్సవంలో పాల్గొన్నారు.  ఈ సందర్భంగా జిల్లా కలెక్టర్ మాట్లాడుతూ

కరోనా తీవ్రంగా ఉన్న సమయంలో ఆక్సిజన్ పడకలు కావాలని రేయింబవళ్లు ఫోన్లు, మెసేజులు వచ్చేవన్నారు. వైద్యాధికారుల ద్వారా కొందరికి పడకలు అందించగలిగినా అందరికీ సరిపోని పరిస్థితి ఉండేదన్నారు. అలాంటి స్థితిలో మార్పు తెచ్చి అవసరం ఉన్న ప్రతి ఒక్కరికి ఉచితంగా నాణ్యమైన వైద్యం అందించాలనే ముఖ్యమంత్రి జగన్ మోహన్ రెడ్డి ఆశయాలకు అనుగుణంగా మౌలిక వసతులను పెంచేందుకు తాత్కాలిక ఆసుపత్రుల నిర్మాణ పనులను మొదలు పెట్టామన్నారు. తాడిపత్రిలో 500 ఆక్సిజన్ పడకలు, సూపర్ స్పెషాలిటీ ఆసుపత్రి వద్ద 300 ఆక్సిజన్ పడకలతో తాత్కాలిక ఆసుపత్రులను నిర్మించామన్నారు. ముఖ్యమంత్రి జగన్ మోహన్ రెడ్డి, ఇంచార్జ్ మంత్రి బొత్స సత్యనారాయణ, జిల్లా మంత్రి శంకర నారాయణ మరియు ఇతర ప్రజా ప్రతినిధులు సహకారంతో కేవలం నిర్మాణం ప్రారంభించిన 20 రోజుల్లోనే సూపర్ స్పెషాలిటీ వద్దనున్న తాత్కాలిక ఆసుపత్రిలో వైద్యం అందించగలుగుతున్నామన్నారు. రేపో, మాపో తాడిపత్రి తాత్కాలిక ఆసుపత్రిని కూడా ప్రారంభిస్తామన్నారు. 

కరోనాను ఎదుర్కోడానికి వసతులు లేవు, వసతులు సరిపోవు అని చేతులెత్తేయకుండా జిల్లా యంత్రాంగం నిర్మాణాత్మకంగా వ్యవహరించిందని గర్వంగా చెప్పగలనన్నారు.

విజయవాడ నుండి మంత్రి బొత్స నారాయణతో పాటు పుట్టపర్తి ఎమ్మెల్యే శ్రీధర్ రెడ్డి, గుంతకల్ ఎమ్మెల్యే వై.  వి.వెంకటరామిరెడ్డి, ఎమ్మెల్సీ శమంతకమణి, పార్లమెంటు సభ్యులు మిథున్ రెడ్డి వర్చువల్ విధానంలో పాల్గొన్నారు . స్థానిక అనంతపురం సూపర్ స్పెషాలిటీ ఆసుపత్రి నందు ఈ కార్యక్రమానికి ముఖ్యఅతిథి రాష్ట్ర రోడ్లు భవనాల శాఖ మంత్రి ఎం.శంకర్ నారాయణ, అనంతపురం పార్లమెంటు సభ్యులు టి. రంగయ్య, హిందూపురం పార్లమెంటు సభ్యులు గోరంట్ల మాధవ్, స్థానిక శాసన సభ్యులు అనంత వెంకట్రామిరెడ్డి , జిల్లా కలెక్టర్ గంధం చంద్రుడు, నగర మేయర్ మహమ్మద్ వసీం,  జాయింట్ కలెక్టర్లు సిరి, నిశాంత్ కుమార్, డి.ఎమ్.హెచ్.ఓ కామేశ్వర్ ప్రసాద్, మున్సిపల్ కమిషనర్ మూర్తి, సంబంధిత అధికారులు తదితరులు పాల్గొన్నారు .

అనంతపురం పట్టణంలో  సూపర్ స్పెషాలిటీ ఆసుపత్రి వద్ద 300 పడకలతో నిర్మించిన తాత్కాలిక ఆసుపత్రిలో వైద్య సేవలు ప్రారంభమయ్యాయి. మంగళవారం ఉదయం పట్టణంలో జెర్మన్ హ్యాంగర్స్ పద్ధతిలో నిర్మించిన తాత్కాలిక కోవిడ్ ఆసుపత్రిని జిల్లా ఇన్చార్జి మంత్రి బొత్స సత్యనారాయణ విజయవాడ క్యాంపు కార్యాలయం నుండి వర్చువల్ విధానం ద్వారా అధికారికంగా ప్రారంభించారు.  తాత్కాలిక ఆసుపత్రి ప్రారంభోత్సవం సందర్భంగా బొత్స సత్య నారాయణ మాట్లాడుతూ మూడు వందల పడకల తాత్కాలిక ఆసుపత్రిని 20 రోజుల్లో నిర్మించడం అసాధారణమైన విషయం అన్నారు. ఈ అసాధ్యాన్ని సుసాధ్యం చేసిన జిల్లా కలెక్టర్ గంధం చంద్రుడు మరియు ఇతర అధికార యంత్రాంగానికి అభినందనలు తెలిపారు. ఏ ఒక్కరూ కోవిడ్ మహమ్మారి ద్వారా ఆత్మస్థైర్యం కోల్పోకూడదు,  ప్రతి ఒక్క పేదవాడికి  నాణ్యమైన వైద్య సేవలు  అందించాలన్నదే ముఖ్యమంత్రి జగన్ మోహన్ రెడ్డి ఆశయమన్నారు.

ప్రారంభోత్సవం సందర్భంగా ఆసుపత్రిలో నియమితులైన సిబ్బందికి మంత్రి దిశానిర్దేశం చేశారు. ప్రైవేటు ఆసుపత్రుల్లో కంటే ప్రభుత్వ ఆసుపత్రుల్లోనే మంచి వైద్యం అందుతుంది అనే నమ్మకం ప్రజల్లో కలిగే విధంగా పని చేయాలన్నారు.  స్థానికంగా ప్రారంభోత్సవంలో పాల్గొన్న రోడ్లు భవనాల శాఖ మంత్రి శంకర నారాయణ మాట్లాడుతూ ప్రజల ఆరోగ్యం కోసం ప్రభుత్వం ఎంత ఖర్చు చేయడానికైనా సిద్ధంగా ఉందన్నారు. దేశంలో ఎక్కడా లేని విధంగా కరోనా వల్ల తల్లిదండ్రులను కోల్పోయిన పిల్లలకు పదిలక్షల రూపాయలను అందించాలనే ఆలోచన ముఖ్యమంత్రి చేశారు. అందుకు సంబంధించిన చెక్కులను కూడా నేడు పంపిణీ చేశామన్నారు. తాత్కాలిక ఆసుపత్రిని 20 రోజుల్లోనే పూర్తి చేసేందుకు కృషి చేసిన జిల్లా యంత్రాంగానికి, సహకరించిన ప్రజా ప్రతినిధులకు కృతజ్ఞతలు తెలిపారు.

విజయవాడ నుండి మంత్రి బొత్స నారాయణతో పాటు పుట్టపర్తి ఎమ్మెల్యే శ్రీధర్ రెడ్డి, గుంతకల్ ఎమ్మెల్యే వై.  వి.వెంకటరామిరెడ్డి, ఎమ్మెల్సీ శమంతకమణి, పార్లమెంటు సభ్యులు మిథున్ రెడ్డి వర్చువల్ విధానంలో పాల్గొన్నారు . స్థానిక అనంతపురం సూపర్ స్పెషాలిటీ ఆసుపత్రి నందు ఈ కార్యక్రమానికి ముఖ్యఅతిథి రాష్ట్ర రోడ్లు భవనాల శాఖ మంత్రి ఎం.శంకర్ నారాయణ, అనంతపురం పార్లమెంటు సభ్యులు టి. రంగయ్య, హిందూపురం పార్లమెంటు సభ్యులు గోరంట్ల మాధవ్, స్థానిక శాసన సభ్యులు అనంత వెంకట్రామిరెడ్డి , జిల్లా కలెక్టర్ గంధం చంద్రుడు, నగర మేయర్ మహమ్మద్ వసీం,  జాయింట్ కలెక్టర్లు సిరి, నిశాంత్ కుమార్, డి.ఎమ్.హెచ్.ఓ కామేశ్వర్ ప్రసాద్, మున్సిపల్ కమిషనర్ మూర్తి, సంబంధిత అధికారులు తదితరులు పాల్గొన్నారు .

విశాఖ జిల్లాలో కరోనా కేసులు తగ్గుతున్నాయని, అయినప్పటికి ప్రతి ఒక్కరూ కోవిడ్ నిబంధనలు తప్పక పాటించాలని జిల్లా కలెక్టరు వి.వినయ్ చంద్ సూచించారు. రాష్ట్రంలో  కర్ఫ్యూ మొదలయినప్పటి నుండి కేసులలో తగ్గుదల  చూస్తున్నామని, మొదట్లో కేసుల సంఖ్య నిలకడగా  ఉందని,  తదుపరి ప్రతీరోజు తగ్గుతున్నాయన్నారు. జిల్లాలో ప్రస్తుతం 7 శాతం పాజిటివ్  వస్తున్నాయని ఇది ఇంకాతగ్గాలని అందుకే ప్రభుత్వం ఇంకొక 10రోజులు కర్ఫ్యూను పొడిగించిందన్నారు. ఫీవర్ సర్వే ఇంకొంక రౌండ్  జరుగుతుందని, దానివలన, టెస్టుల నిర్వహణ, హోమ్ ఐసోలేషన్ , మందుల వాడకం వలన కరోనా చైన్ బ్రేక్ అవుతుందని మంచి ఫలితాలు వస్తాయన్నారు. సర్వే సమయంలో ఆశా కార్యకర్తలు ఇళ్లలోకి  వెళ్లనక్కర్లేది, వారికి స్థానికంగా  గల కుటుంబాలతో పరిచయాలు ఉంటాయని బయటనుంచే వివరాలు సేకరించ వచ్చన్నారు. ఫీవర్ సర్వేవలన కోవిడ్ పాజిటివ్ లక్షణాలు ఉన్నవారు తెలుస్తారని, తద్వారా తగు చర్యలు చేపట్టవచ్చన్నారు. కరోనా పూర్తిగా తగ్గేవరకు జిల్లా యంత్రాంగం అప్రమత్తంగా వుంటుందన్నారు.

బ్లాక్ ఫంగస్ :  జిల్లాలో బ్లాక్ ఫంగస్ (మ్యూకర్ హైపోసిస్) వ్యాధికి ఇ.ఎన్.టి ఆసుపత్రిని నోడల్ ఏజెన్సీగా ఏర్పాటు చేశామన్నారు.  జిల్లాలో 500 బెడ్స్ తో సన్నద్థంగా ఉన్నామని, వ్యాధికి అవసరమైన స్థాయిలో డ్రగ్స్ అందుబాటులో ఉన్నాయని తెలిపారు. జిల్లాలో బెడ్స్ సంఖ్య బాగా పెంచడం జరిగిందని, క్లినికల్ మేనేజ్మెంటు బాగా తెలిసిందని వివరించారు. డాక్టర్లు, పారామెడికల్ సిబ్బంది జిల్లాలోను, ఏజెన్సీలో కూడా పెరిగారన్నారు. ఆక్సిజన్ కు కొరత లేదని, నాలుగు ఆక్సిజన్ ప్లాంట్స్ వచ్చాయి అని తెలిపారు. ఆరోగ్యశ్రీ : క్యాటగిరీ “ఎ’’ ఆసుపత్రులలో అన్ని బెడ్స్ ఆరోగ్యశ్రీకి కేటాయింపు చేయాలని, క్యాటగిరి “బి” ఆసుపత్రులలో 50 శాతం బెడ్స్ తప్పనిసరిగా  ఆరోగ్యశ్రీకి కేటాయించి అందుబాటులో వుంచాలన్నారు.  నిబంధనలు పాటించని ఆసుపత్రులకు విజిలెన్స్ అధికారులు నోటీసులు ఇస్తున్నారని, కేసులు ఫైల్ చేసి, పెనాల్టీలు విధించిడం జరిగిందని తెలియజేశారు.          

మహావిశాఖ నగరపాలక సంస్థ పరిధిలోని అన్ని వార్డు సచివాలయాల్లో  ఒక చెత్త తరలించే వాహనం ఉండాలని జివిఎంసి కమిషనర్ డా. జి. సృజన అధికారులను ఆదేశించారు. మంగళవారం ఆమె తమ చాంబర్ నుండి సిస్కో వెబెక్స్ ద్వారా జివిఎంసి అదనపు కమిషనర్ డా. వి. సన్యాసి రావు, ప్రధాన వైధ్యాదికారి కె.ఎస్.ఎల్.జి.శాస్త్రి, ఎఎంఒహెచ్ లు, శానిటరి సూపర్వైజర్, శానిటరి ఇన్స్పెక్టర్ లతో వీడియో కాన్ఫరెన్స్ నిర్వహించారు. ప్రతి సచివాలయానికి ఒక చెత్త తరలించే వాహనం ఉండాలని, అది ప్రతి రోజు రెండు ట్రిప్పులు తిరగాలని అధికారులను ఆదేశించారు. డోర్ టు డోర్ చెత్త సేకరణ, కాలువలు శుభ్రం చేయడం వంటి పనులు చేయడం ఎవ్వరికి కేటాయించనివి వారిచే చేయించాలని అన్ని పనులకు ఒకర్ని వాడరాదని, పోరుగుసేవల సూపర్వైజర్లను కాలువలు క్లీనింగు చేయుటకు ఉపయోగించాలని సూచించారు. బహిరంగ ప్రదేశాలలో చెత్త వేయరాదని డోర్ టు డోర్ సేకరించిన చెత్తను వెంట వెంటనే డంపింగు యార్డుకు తరలించాలని ఆదేశించారు. బహిరంగ ప్రదేశాలలో చెత్త కనిపిస్తే శానిటరి ఇన్స్పెక్టర్, వార్డు శానిటరి కార్యదర్శులే బాధ్యత వహించాలని హెచ్చరించారు. ఇపిడిసిఎల్ వారు వైర్ల క్రింద ఉన్న కొమ్మలు తొలగించి అక్కడే వదిలివేస్తున్నారని వారిపై జరిమానా విధించాలని ప్రధాన వైధ్యాదికారిని ఆదేశించారు. 

ప్రతీ దుకాణాల ముందు మూడు డస్ట్ బిన్లు ఉండేలా చూడాలని, దుకాణాలలో నిషేదిత ప్లాస్టిక్ కవర్లు అమ్మిన యడల జరిమానా విధించాలని, యూజర్ చార్జీలు వసూలు చేయాలని ఆదేశించారు. ప్రతి సచివాలయాల పరిధిలో నూతనంగా నిర్మించిన ఇళ్ళు, ఖాళీ స్థలాలు ఎన్ని ఉన్నాయో వార్డు అడ్మిన్ కార్యదర్శిలు, శానిటరి కార్యదర్శిలు గుర్తించి వాటికి పన్నులు, ఖాళీ స్థలాలకు వి.ఎల్.టి. విధించాలని అదేశించారు. వచ్చే వారం నుండి  ప్రతి సచివాలయ పరిధిలో డోర్ టు డోర్ సీజనల్ వ్యాధులు సర్వే జరపాలని, డెంగ్యూ, మలేరియా వంటి వ్యాధులు ప్రబలకుండా చూడాలని వెటర్నరి డాక్టరును ఆదేశించారు. సచివాలయ పరిధిలో స్పందనలో వచ్చిన దరఖాస్తులను, వివిధ పేపర్లు వచ్చిన క్లిప్పింగులపై స్పందించి వాటిని వెంట వెంటనే పరిష్కరించి ప్రజల మన్నలను పొందాలని, ఎటువంటి అలసత్వము ప్రదర్శించకూడదని కమిషనర్ ఆదేశించారు. ఈ వీడియో కాన్ఫరెన్స్ లో అదనపు కమిషనర్ డా. వి. సన్యాసి రావు, ప్రధాన వైధ్యాదికారి కె.ఎస్.ఎల్.జి.శాస్త్రి, వెటర్నరి డాక్టరు కిషోర్,  ఎఎంఒహెచ్ లు, శానిటరి సూపర్వైజర్లు, శానిటరి ఇన్స్పెక్టర్లు తదితరులు పాల్గొన్నారు. 

మహా విశాఖపట్నం నగరపాలక సంస్థ పనిచేస్తున్న పారిశుధ్య సిబ్బది కరోనా జాగ్రత్తలు పాటిస్తే ప్రజలకు సేవలు అందించాలని మేయర్ గోలగాని హరి వెంకట కుమారి కోరారు.  మంగళవారం రెండవ జోన్ పరిధిలో 13వ వార్డు లోని ఫ్రంట్ లైను వారియర్స్ అయిన 100 మంది పారిశుధ్య సిబ్బందికి భోజనం, మాస్కులు, శానిటైజర్సు, గ్లౌజులు పంపిణీ చేసారు. కరోనా కేసులు పెరుగుతున్న సమయంలో పారిశుధ్య కార్మికులకు  13వ వార్డు సెక్టరు-5 బాల్వాడి భవనంలో వార్డు కార్పొరేటర్ కెల్లా సునీత వీటిని అందించడానికి ముందికి రావడం అభినందనీయమన్నారు. ఈ సందర్భంగా 60 సంవత్స రాలు పైబడిన పారిశుధ్య సిబ్బంది ఏడుగురిని ఘనంగా సన్మానించారు.   ఈ కార్యక్రమంలో 13వ వార్డు ఇంచార్జ్ కెల్లా సత్యనరాయణ, ఎస్.సి., ఎస్.టి. జిల్లా మాజీ అధ్యక్షులు పి.రామారావు, గుడ్ వర్క్ స్టేట్ అధ్యక్షులు వేముల కన్నా ప్రసాద్ తదితరులు పాల్గొన్నారు.  

ప్రజారోగ్య పరిరక్షణ కోసమే ప్రభుత్వం సరఫరా చేస్తున్న సూక్ష్మ పోషకాలు కలిగిన బలవర్ధకపు బియ్యం (పోర్టిఫైడ్ రైస్) ప్రజలు సద్వినియోగం చేసుకోవాలని రాష్ట్ర ఉప ముఖ్యమంత్రి పాముల పుష్ప శ్రీవాణి కోరారు.  కురుపాంలో మంగళవారం పోర్టిఫైడ్ బియ్యం పంపిణీని ఉప ముఖ్యమంత్రి ప్రారంభించారు. ఈ సందర్భంగా మంత్రి మాట్లాడుతూ, పోర్టిఫైడ్ బియ్యంపై అపోహలు ఉన్నాయని అయితే ఇవి ప్రజల ఆరోగ్యం కోసం విటమిన్లు పోషకాలను కలిపిన సాధారణ బియ్యమేనని స్పష్టం చేసారు. జిల్లా వ్యాప్తంగా 7 లక్షల కుటుంబాలకు ఈ బియ్యాన్ని ప్రభుత్వం అందిస్తోందని తెలిపారు. రాష్ట్రంలో ప్రజలందరి ఆరోగ్యాలకు పరిరక్షించడమే ప్రధాన లక్ష్యంగా ప్రభుత్వం పని చేస్తోందని పేర్కొన్నారు.

ఇవి సాధారణ బియ్యం కాదని ప్లాస్టిక్ బియ్యమని  కూడా కొందరు అపోహపడుతున్నారని చెప్పారు. ఈ కారణంగానే కొంతమంది ఈ బియ్యాన్ని తాము సద్వినియోగం చేసుకోకుండా మార్కెట్లో ఇతరులకు ఇచ్చేయడం లాంటి పనులు చేస్తున్నారన్నారు. అయితే ఈ బియ్యంపై ప్రజల్లో ఉన్న అపోహల్లో ఏమాత్రం వాస్తవం లేదని తెలిపారు. ఈ బియ్యాన్ని మిల్లింగ్ చేసే సమయంలో వీటిలో ఐరన్, ఫోలిక్ యాసిడ్, విటమిన్ బి 12 కలుపుతారని వివరించారు. ఈ సూక్ష్మసోషకాలను కలగలిపిన ఈ బియ్యాన్ని తిన్నవారికి పోషకాలు బాగా అందుతాయని, శరీరంలో నాడీ వ్యవస్థ మెరుగ్గా పని చేస్తుందని, గర్భిణీ స్త్రీలలో పిండం బాగా అభివృద్ధి చెందుతుందని చెప్పారు. ప్రస్తుతం కురుపాం  నియోజకవర్గంలో 5 మండలాల్లో 73,391 బియ్యం కార్డులు ఉన్నాయని, ప్రతి నెలా 1620 మెట్రిక్ టన్నుల బియ్యం నియోజక వర్గంలో ఫిబ్రవరి 2021 నుండి 108 మొబైల్ డిస్పెన్సింగ్ యూనిట్ ద్వారా ఇంటింటికీ బియ్యం, నిత్యావసర సరుకుల పంపిణీ జరుగుతుందన్నారు. ఈ నెల నుంచి కురుపాం నియోజక వర్గం ఆన్ని మండలాల్లోని ఫోర్ట్ ఫెడ్ బియ్యం సూక్ష్మ పోషకలున్న బలవర్ధక బియ్యాన్ని అందజేయడం జరుగుతుందని తెలిపారు.ప్రజలందరూ ఆరోగ్యంగా ఉండాలన్న ఉద్దేశ్యంతో ప్రభుత్వం ఈ బియ్యాన్ని తయారు చేయించి పంపిణీ చేస్తోందన్నారు. జిల్లా వ్యాప్తంగా 7 లక్షల కార్డుదారులకు ఈ బియ్యాన్ని ప్రభుత్వం సరఫరా చేస్తోందని పుష్ప శ్రీవాణి వెల్లడించారు. కాగా రాష్ట్రంలో ప్రజలందరి ఆరోగ్యాలను పరిరక్షించడానికి, పేదలకు కూడా అత్యాధునికమైన వైద్య సదుపాయాలను అందించడానికి ప్రభుత్వం చర్యలు తీసుకుంటోందని చెప్పారు. ఈ నేపథ్యంలోనే రాష్ట్ర ముఖ్యమంత్రి వైయస్ జగన్మోహన్ రెడ్డి రాష్ట్రంలో రూ.8 వేల కోట్లతో నిర్మించనున్న 16 మెడికల్ కాలేజీల నిర్మాణానికి శంకుస్థాపన చేసిన విషయాన్ని గుర్తు చేసారు. అత్యవసరమైన వైద్య సేవలు, అత్యాధునిక చికిత్సల కోసం రాష్ట్రానికి చెందిన ప్రజలు ఇతర రాష్ట్రాలలోని నగరాలకు వెళ్లాల్సిన అవసరం లేకుండా రాష్ట్రంలోని అన్ని జిల్లా కేంద్రాలతో పాటుగా మొత్తం 16 ప్రాంతాల్లో మెడికల్ హబ్ లను ఏర్పాటు చేసే దిశగా కూడా ప్రభుత్వం చర్యలు ప్రారంభించిందని పుష్ప శ్రీవాణి ఉద్ఘాటించారు. ఈ కార్యక్రమంలో పార్వతీపురం సబ్ కలెక్టర్ విధేకర, కురుపాం గ్రామ సర్పంచ్ గార్ల సుజాత, కళింగ వైశ్య, ఐరక కార్పొరేషన్ డైరెక్టర్లు కె.సురేష్, గవర విజయ్, కళింగ వైశ్య జిల్లా అధ్యక్షుడు అందవరపు కోటేశ్వరరావు, నాయకులు శెట్టి నాగేశ్వరావు, కురుపాం అసెంబ్లీ నియోజకవర్గంలోని ఐదు మండలాల తహశీల్దార్లు పాల్గొన్నారు.

రాష్ట్ర ముఖ్యమంత్రి వైఎస్ జగన్ మోహన్ రెడ్డి కృషితో జిల్లాలో ఆక్సిజన్ నిల్వలు పెంచేలా చర్యలు చేపట్టడంలో భాగంగా శాశ్వత క్రయోజనిక్ ట్యాంకర్ ఏర్పాటు చేశామని అనంతపురం పార్లమెంట్ సభ్యులు తలారి రంగయ్య తెలిపారు. సోమవారం సాయంత్రం జిల్లా కలెక్టర్ గంధం చంద్రుడు తో కలిసి  అనంతపురం ప్రభుత్వ సర్వజన ఆస్పత్రిలో శాశ్వత క్రయోజనిక్ ట్యాంకర్ ను ఎంపీ ప్రారంభించారు. ఈ సందర్భంగా ఆయన మాట్లాడుతూ, ప్రజారోగ్యాన్ని  కాపాడేందుకు ఎంపీలాడ్స్ నిధుల ద్వారా జిల్లాలో నెలకొన్న లిక్విడ్ ఆక్సిజన్ కొరత తీర్చేందుకు 10 వేల లీటర్ల సామర్థ్యం కలిగిన లిక్విడ్ ఆక్సిజన్ శాశ్వత క్రయోజనిక్ ట్యాంకర్ చాలా తక్కువ సమయంలో ఏర్పాటు చేసి ప్రారంభించడం తనకెంతో సంతోషంగా ఉందన్నారు.ఎంపీలాడ్స్ నిధుల ద్వారా రూ .24 లక్షల వ్యయంతో శాశ్వతంగా క్రయోజనిక్ ట్యాంక్ ను ఏర్పాటు చేసినట్లు ఆయన తెలిపారు. గతంలో ఎక్కడైనా ,ఏదైనా ఆసుపత్రిలో ఆక్సిజన్ నిల్వలు అయిపోతే అనేక ఇబ్బందులు ఎదుర్కోవడం జరిగిందన్నారు. ఇదివరకే జిల్లాకు వాహనం పైన అమర్చబడి ఉన్న క్రయోజనిక్ ట్యాంకర్ ను  తెప్పించడం జరిగిందన్నారు. అలాగే రాష్ట్ర ప్రభుత్వం మరియు డి ఆర్ డి ఓ సహకారాలతో జిల్లాలోఆక్సిజన్ ప్రొడక్షన్ ప్లాంట్లు  మంజూరు అయ్యాయని ఎంపీ తలారి రంగయ్య తెలిపారు. ఈ కార్యక్రమంలో మున్సిపల్ కార్పొరేషన్ మేయర్  మహమ్మద్ వసీం సలీం, జాయింట్ కలెక్టర్ ( రెవెన్యూ, రైతు భరోసా ) నిశాంత్ కుమార్ జాయింట్ కలెక్టర్( గ్రామ , వార్డు సచివాలయం )  డా. ఏ. సిరి ఆస్పత్రి సూపరింటెండెంట్ డా. కె ఎస్ ఎస్ వెంకటేశ్వరరావు , మున్సిపల్ కార్పొరేషన్ కమిషనర్ పి.వి ఎస్ ఎన్ మూర్తి , ఆర్ఎం ఓ డా.విజయమ్మ తదితరులు పాల్గొన్నారు.