జగనన్న సంపూర్ణ గృహ హక్కు పథకానికి సంబంధించి వన్ టైం సెటిల్మెంట్ ప్రక్రియ ను వేగంగా జరిగే లా చూడాలని జిల్లా కలెక్టర్ ఎ.సూర్య కుమారి మండల  అధికారులను ఆదేశించారు. సోమవారం కలెక్టర్  ఎం పి డి ఓలు, తహసీల్దార్లు, మండల ప్రత్యేకా ధికారులతో ఓ.టి.ఎస్ పై టీమ్ కాన్ఫరెన్స్ ద్వారా మండల వారీగా పురోగతి పై సమీక్షించారు. అనేక మండలాల్లో సున్నా ప్రగతి ఉందని, మంగళవారంలోగా ఎక్కడా  జీరో కనపడకూడదని, వి.ఆర్ ఓ లు తమ పనితీరు చూపించేలా లక్ష్యాలను చేరాలని  అన్నారు.  మండల ప్రత్యేకాధికారులు  గ్రామ సచివాలయ సిబ్బంది, వాలంటీర్ల తో వెంటనే సమావేశం  ఏర్పాటు చేసి ఓ.టి.ఎస్. పై అవగాహన కల్పించి, గ్రామాల్లో ప్రచారం జరిగేలా చూడాలన్నారు. ప్రతి గ్రామంలో గ్రామ సభ జరిపి ఓ.టి.ఎస్ విధి విధానాలను వివరించాలన్నారు. ఎంత  చెల్లించాలి, ఎందుకు చెల్లించాలి  , దాని వలన లాభాలేంటి  అనే విషయాన్ని స్పష్టంగా తెలియజేయాలన్నారు.  పట్టాలు, భూ  సమస్యలు ఉన్న చోట జె.సి రెవిన్యూ పరిష్కరిస్తారని, వారి దృష్టి లో పెట్టాలని అన్నారు. విజయనగరం అర్బన్, రూరల్ లో పురోగతి తక్కువ గా ఉందని, జె.సి రెవిన్యూ ప్రత్యేక దృష్టి పెట్టాలని అన్నారు. 

సంయుక్త కలెక్టర్ మయూర్ అశోక్ మాట్లాడుతూ డేటా ఆమోదం అయితేనే చలానా  జెనరేట్ అవుతుందని,  అప్పుడే చెల్లింపులకు అవకాశం ఉంటుందని, ముందుగా క్షేత్ర స్థాయిలో వెరిఫికేషన్ పూర్తి చేసి డేటా వెరిఫై చేయాలని సూచించారు. ఓ.టి.ఎస్ పై ముద్రించిన కరపత్రాలను వాలంటీర్ ల ద్వారా గ్రామాల్లో అందరికి అందేలా చూడాలని అన్నారు. ఓ.టి.ఎస్ చెల్లింపు చేసిన  వారి వివరాలను పత్రికల ద్వారా ప్రచారం జరగాలన్నారు.  గడువు లోగా లక్ష్యాలను  పూర్తి చేయడానికి ప్రత్యేకధికారులు పూర్తి గా బాధ్యత తీసుకోవాలన్నారు. ఈ టీమ్ కాన్ఫరెన్స్ లో జె.సి రెవిన్యూ డా. కిషోర్ కుమార్,  హౌసింగ్ పి.డి కూర్మినాయుడు, హౌసింగ్ సహాయ ఇంజినీర్లు , మండల స్థాయి అధికారులు పాల్గొన్నారు.

ఏకాదశి పర్వదినాన్ని పురస్కరించుకొని కాకినాడ స్మార్ట్ సిటి శివనామ స్మరణతో మార్మోగిపోయింది. కార్తీకమాసం రెండవ సోమవారం అందునా ఏకాదశి కావడంతో అధిక సంఖ్యలో భక్తులు శివలయాల్లో పూజలు నిర్వహించారు. భానుగుడి దగ్గర్లోని శివాలయంలో నందీశ్వరుడిని దర్శించుకొని శివుని అనుగ్రహం కోసం పూజలు చేపట్టారు. భోళా శంకరుడిని ప్రశన్నం చేసుకోవడానికి ఆలయాల్లో అభిషేకాలు నిర్వహించారు. సూర్యోదయ సమయంలో సాగర తీరంలో పుణ్యస్నానాలు ఆచరించిన భక్తులు శివుడికి దీపోత్సవం నిర్వహించారు. క్షీరాభిషేకాలు చేసి హారతులు పట్టారు. కార్తీక మాసం ఏకాదశి పర్వదినం రోజున శివునికి అభిషేకాలు చేస్తే ఎంతో పుణ్యం దక్కుతుందని శివాలయ ప్రధాన పూజరి శ్రీనివాస శర్మ చెప్పారు. ఉదయం పూజలు చేసింది మొదలు సాయంత్రం వరకూ ఈరోజు భక్తులు ఉపవాసాలు ఉండి మళ్లీ సాయంత్రం శివునికి పూజలు చేస్తే ఉపవాస ఫలితం వుంటుందని పేర్కొన్నారు. తెల్లవారు జామున ఐదుగంటల నుంచే నగరంలోని అన్ని శివాలయాలు భక్తులతో కిటకిటలాడాయి. 

సమాజానికి దిశ నిర్దేశ చేసేది పాత్రికేయులేనని, ప్రజా సమస్యల పరిష్కారంలో వారి కృషి ప్రశంసనీయమని విశాఖ మేయర్ గొలగాని హారి వెంకట కుమారి అన్నారు. వైజాగ్ జర్నలిస్టుల ఫోరం ఆదివారం ఆంధ్రాయూనివర్సిటీ వైవీఎస్ మూర్తి ఆడిటోరియం ప్రాంగణంలో నిర్వహించిన మీడియా అవార్డుల ప్రధానోత్సవం, జర్నలిస్టుల పిల్లల ఉపకార వేతనాల పంపిణీ కార్యక్రమంలో  ముఖ్య అతిధిగా పాల్గొన్నారు. ఈ సందర్భంగా ఆమె మాట్లాడుతూ, నిరంతరం సమాజానికి సేవలందించే జర్నలిస్టులను ప్రతిభకు ప్రోత్సాహం పేరిట గౌరవించుకోవడం అభినందనీయమన్నారు. దీని వల్ల జర్నలిస్టుల్లో మరింత ఉత్సాహం పెరిగి బాధ్యతా యుతంగా పనిచేసేందుకు అవకాశం కలుగుతుందన్నారు. ఈ సందర్భంగా వైజాగ్ జర్నలిస్టుల ఫోరం తమ సభ్యుల కోసం చేపడుతున్న సంక్షేమ కార్యక్రమాలు అభినందనీయమని ప్రశంసించారు. కార్యక్రమంలో గౌరవ అతిథిగా పాల్గొన్న విఎంఆర్డిఏ చైర్ పర్సన్ విజయ నిర్మల, ఆంధ్ర యూనివర్సిటీ వైస్ చాన్సలర్ పి వి జి డి ప్రసాద్ రెడ్డిలు మాట్లాడుతూ, జిల్లా అభివృద్ధిలో జర్నలిస్టుల పాత్ర అభినందనీయమన్నారు. ఎప్పటికప్పుడు ప్రజా సమస్యలను గుర్తించి వారు తెలియజేయడం వల్ల అనేక సమస్యలను సకాలంలో పరిష్కరించడంతో పాటు ప్రజలకు కావాల్సిన మౌళిక సదుపాయాలు కలుగజేసేందుకు అవకాశం కలుగుతుందన్నారు. ఇటీవలే ఇంటర్ మీడియా స్పోర్ట్స్ మీట్ ఘనంగా నిర్వహించిన వీజెఎఫ్ ఆ తరువాత దీపావళి, ఇప్పుడు ప్రతిభకు ప్రోత్సాహం పేరిట అవార్డులు ప్రధానం చేయడం, జర్నలిస్టుల పిల్లలకు ఉపకార వేతనాలు అందించడం ఎంతో సంతోషం కలిగిస్తుందన్నారు. రాష్ట్రంలో ఇతర ప్రాంతాలకు వైజాగ్ జర్నలిస్టుల ఫోరం ఆదర్శనీయంగా నిలుస్తుందన్నారు. గౌరవ అతిధిగా హాజరైన మారిటైమ్ బోర్డ్ చైర్మన్, కాయల వెంకట రెడ్డి మాట్లాడుతూ,      నగరాభివృద్ధిలో జర్నలిస్టుల పాత్ర మరువలేనిదన్నారు. సమాజంలో జర్నలిస్టులు చేస్తున్న కృషి వల్ల ప్రజలకు అనేక మంచి పనులు చేయగలుగుతున్నామన్నారు. జీవీఎంసీ పరంగా తాము చేయాల్సిన పనులను ఎప్పటికప్పుడు గుర్తు చేసి ప్రజలకు మేలు చేసే విధంగా ముందుకు నడిపిస్తున్న పాత్రికేయుల సేవలను ఈ సందర్భంగా మేయర్ అభినందించారు. పోరం అధ్యక్ష, కార్యదర్శులు గంట్ల శ్రీనుబాబు, ఎస్.దుర్గారావులు మాట్లాడుతూ ప్రతీ ఏటా క్రమం తప్పకుండా ప్రతిభకు ప్రోత్సాహం కార్యక్రమం నిర్వహిస్తున్నామన్నారు. అవార్డుల ప్రధానోత్సవం, ఉపకార వేతనాలకు సంబంధించి ప్రత్యేక కమిటీలు ఏర్పాటు చేసి అందరికి సమన్యాయం చేస్తున్నామన్నారు. సభ్యుల సంక్షేమానికి ప్రాధాన్యతనిస్తూ, విద్య, వైద్యంతో పాటు క్రీడలకు, పండుగల నిర్వహణ చేపడుతున్నామన్నారు. జర్నలిస్టుల సంక్షేమమే వైజాగ్ జర్నలిస్టుల ఫోరం లక్ష్యమని త్వరలోనే నార్లభవన్ ఆధునీకరించి లిఫ్ట్ సదుపాయం కల్పిస్తున్నట్లు చెప్పారు. ఈ కార్యక్రమంలో  సెంచూరియన్ యూనివర్సిటీ వైస్ చాన్సలర్ జి ఎస్ ఎన్ రాజు, అవార్డుల కమిటీ చైర్మన్ అర్.నాగరాజుపట్నాయక్ అధ్వర్యంలో బీసీ కమిషన్ సభ్యులు పక్కి దివాకర్, ధ్యక్షులు టి. నానాజీ, జాయింట్ సెక్రటరీ డాడి రవికుమార్, కోశాధికారి పి.ఎస్.మూర్తి, పలువురు కార్యవర్గ సభ్యులు పాల్గొన్నారు.

ఘనంగా మీడియా అవార్డుల ప్రధానోత్సవం..

కపిలగోపాలరావు అవార్డుతో పాటు వివిధ కేటగిరిల్లో విశేష ప్రతిభ కనబర్చిన 31 మంది పాత్రికేయులకు అతిధులు చేతులు మీదుగా ఘనంగా అవార్డులు ప్రదానం చేశారు. ఈ సందర్భంగా పలువురు అవార్డు గ్రహీతలు వారి కుటుంబ సభ్యులతో హాజరై అవార్డులను స్వీకరించారు. మీడియా అవార్డుల కమిటీ చైర్మన్ అర్. నాగరాజుపట్నాయక్ ఆధ్వర్యంలో నిర్వహించిన ఈ కార్యక్రమం కనుల పండుగగా జరిగింది.

ఉపకార  వేతనాలు పంపిణీ ..

జర్నలిస్టుల పిల్లలు విద్యలోనూ ఉన్నతంగా ఉన్నతంగా రాణించి అనేక మందికి ఆదర్శనీయంగా నిలిచారు. దీంతో ప్రతిఏటా మాదిరిగానే ఈ ఏడాది కూడా జర్నలిస్టుల పిల్లలకు సంబంధించి సుమారు 120 మందికి ఉపకార వేతనాలను అతిధులు చేతులు మీదుగా పంపిణీ చేశారు. ఎల్.కె.జీ నుంచి బీటెక్ వరకు ఈ ఏడాది ఉపకార వేతనాలు అందజేశారు. ప్రతిభను గుర్తించాలన్నదే తమ లక్ష్యమని ఫోరం అధ్యక్షులు, స్కాలర్షిప్ కమిటీ చైర్మన్ గంట్ల శ్రీనుబాబు తెలిపారు.

అలరించిన విదేశీయ సాంస్కృతిక కార్యక్రమాలు..

ప్రతిభకు ప్రోత్సాహం కార్యక్రమంలో ఈ ఏడాది విదేశీయ కళాకారులు ప్రదర్శించిన పలు సాంస్కృతిక కార్యక్రమాలు విశేషంగా అలరించాయి. శ్రీలంక నుంచి విచ్చేసిన ప్రత్యేక బృందం ప్రదర్శించిన పలు సాంస్కృతిక కార్యక్రమాలు ఆహుతులను అలరించాయి. అదే విధంగా మహారాష్ట్ర, రాజస్థాన్తో పాటు ఒడిషా కళాకారులు, స్థానిక కళాకారులు ప్రదర్శించిన సాంస్కృతిక కార్యక్రమాలు ప్రశంసనీయంగా సాగాయి.

శ్రీకాకుళం జిల్లాలో టిబి కేసులను గుర్తించాలని జాయింట్ కలెక్టర్ డాక్టర్ కె.శ్రీనివాసులు ఆదేశించారు. క్షయ నివారణ పై జిల్లా స్థాయి కమిటీ సమావేశం కలెక్టర్ కార్యాలయంలో శుక్రవారం జరిగింది. సమావేశంలో జాయింట్ కలెక్టర్ పాల్గొన్నారు. జాయింట్ కలెక్టర్ మాట్లాడుతూ జిల్లాలో విస్తృతంగా సర్వే నిర్వహించి క్షయవ్యాధితో బాధపడుతున్న వారిని గుర్తించాలని స్పష్టం చేశారు. గుర్తించడం వలన అవసరమైన మందులు అందించుటకు చర్యలు చేపట్టవచ్చని చెప్పారు. టిబి నివారణ అధికారి ఎన్.అనురాధ మాట్లాడుతూ జిల్లాలో క్షయ వ్యాధి గుర్తించుటకు అన్ని చర్యలు చేపట్టామని అన్నారు. జిల్లాలో 12 టిబి యూనిట్లు, 31 కఫ పరీక్ష కేంద్రాలు ఉన్నాయని చెప్పారు. క్షయ వ్యాధి నివారణలో భాగస్వామ్యం అవుతున్న ఆశా కార్యకర్తలకు పారితోషికం కూడా అందించడం జరుగుతుందని అనురాధ తెలిపారు. సి బి నాట్ వాహనాల ద్వారా సర్వే చేయడం జరిగిందని చెప్పారు. 35 వేల 752 మందికి స్క్రీన్ చేయగా 245 మందికి పరీక్షలు నిర్వహించడం జరిగిందని, అందులో ఏడు కేసులు గుర్తించడం జరిగిందని చెప్పారు. ఈ సమావేశంలో జిల్లా వైద్య ఆరోగ్యశాఖ అధికారి బి.జగన్నాథరావు, అదనపు డిఎంహెచ్ చ్ఓ కె. రామమూర్తి, వైద్య ఆరోగ్య శాఖ అధికారులు కృష్ణ మోహన్, లీలా, అప్పారావు, జెమ్స్ ఆస్పత్రి ఆర్.ఎం. ఓ పి. తిరుపతిరావు, బెజ్జిపురం యూత్ క్లబ్ అధ్యక్షులు ఎమ్. ప్రసాదరావు, క్షయ వ్యాధి నివారణ కమిటీ గౌరవ కార్యదర్శి మంత్రి వెంకటస్వామి తదితరులు పాల్గొన్నారు.

శ్రీకాకుళం జిల్లాలో స్కానింగ్ కేంద్రాలు నివేదికలు సమర్పించాలని జిల్లా కలెక్టర్ ఆదేశించారు.  లింగ నిర్ధారణ చట్టం జిల్లా స్థాయి సమావేశం కలెక్టర్ అధ్యక్షతన కలెక్టర్ కార్యాలయంలో శుక్రవారం జరిగింది. ఈ సందర్భంగా కలెక్టర్ మాట్లాడుతూ ప్రభుత్వ, ప్రైవేటు స్కానింగ్ కేంద్రాలు విధిగా తమ స్కానింగ్ వివరాలను ఆన్ లైన్ లో సమర్పించాలని స్పష్టం చేశారు. స్కానింగ్ కేంద్రాల్లో నెలరోజుల్లోగా సీసీ కెమెరాలు ఏర్పాటు చేయాలని ఆయన స్పష్టం చేశారు. జిల్లాలో బాలబాలికల నిష్పత్తి వ్యత్యాసం ఎక్కువగా ఉందని, ఇది భవిష్యత్తుకు మంచిది కాదని అన్నారు. గిరిజన ప్రాంతాల్లో లింగ నిష్పత్తి ఎక్కువగా ఉండటం సంతోషాన్ని కలిగించే విషయమని పేర్కొన్నారు. జిల్లా వైద్య ఆరోగ్యశాఖ అధికారి బి. జగన్నాధ రావు మాట్లాడుతూ కంచిలి, ఆమదాలవలస, హిరమండలం, సరుబుజ్జిలి, వజ్రపుకొత్తూరు తదితర ప్రాంతాల్లో బాలబాలికల నిష్పత్తి తక్కువగా ఉందని అన్నారు. స్కానింగ్ కేంద్రాల నిర్వహణపై దృష్టి సారించి తనిఖీలు నిర్వహిస్తున్నామని చెప్పారు. ఈ సమావేశంలో జిల్లా న్యాయసేవాధికార సంస్థ కార్యదర్శి కే.జయలక్ష్మి, జాయింట్ కలెక్టర్ కే. శ్రీనివాసులు, అదనపు ఎస్పి వైద్య ఆరోగ్య శాఖ అధికారులు కె. రామ్మూర్తి, లీల, కే.అప్పారావు, కృష్ణ మోహన్, బి.సూర్యారావు, జెమ్స్ ఆసుపత్రి టి.తిరుపతి రావు, యూత్ క్లబ్ అధ్యక్షులు ఎం. ప్రసాద్ రావు తదితరులు పాల్గొన్నారు.

ఎయిడెడ్ విద్యా సంస్థలు ప్రస్తుతం ఎలా ఉన్నవి  అలా కొనసాగవచ్చని, ప్రభుత్వానికి అప్పగించాలని  ఎటువంటి వత్తిడి లేదని జిల్లా కలెక్టరు డా.ఎ.మల్లిఖార్జున స్పష్టం చేశారు. గురువారం జిల్లా కలెక్టరు ఈ విషయముపై జిల్లాలోని ఎయిడెడ్ విద్యా సంస్థల యాజమన్యాలు/ ప్రతినిధులతో సమావేశం నిర్వహించారు.  ఈ సందర్భంగా జిల్లా కలెక్టరు మాట్లాడుతూ ఎయిడెడ్ విద్యా సంస్థలకు ప్రభుత్వం ఇచ్చిన  అవకాశమునును తప్పుగా అర్ధం చేసుకోవలదని సూచించారు.   విద్యా సంస్థలు, విద్యార్ధుల  ఇంటరెస్ట్ లను దృష్టిలో ఉంచుకుని మాత్రమే తగు చర్యలు  ఉంటాయని, ఎటువంటి వత్తిడి ఉండదన్నారు.  ప్రస్తుత విద్యా సంవత్సరం పూర్తి  అయ్యే వరకు ఎటువంటి మార్పులు ఉండదన్నారు. అంగీకారం తెలిపిన పాఠశాలలోని  విద్యార్దులను అసౌకర్యం లేకుండా దగ్గరలోని పాఠశాలలలో మాత్రమే చేర్చడం జరుగుతుంది.   విద్యార్ధులకు, తల్లిదండ్రులకు ఎటువంటి  ఇబ్బందులు కలుగ నీయమని,   ఆందోళన చెందవద్దని తెలియజేశారు.  ఇప్పటికే అంగీకారం తెలిపిన ఎయిడెడ్ విద్యాసంస్థలు పునరాలోచించుకొని వారి నిర్ణయాన్ని తెలుప వచ్చన్నారు. 

ఈ విషయంలో ఎవరికైనా ఎటువంటి సందేహలున్నా  అడిగి నివృత్తి చేసుకోవచ్చన్నారు.  పాఠశాలల యాజమన్యాలెవరూ కూడా ప్రచారం  కోసం,  అశాంతిని కలుగజేసి సమస్యలు సృష్టించరాదని హెచ్చరించారు.  విద్యార్దులు వారి తల్లి దండ్రులలో పూర్తి నమ్మకం కలుగ జేయాలన్నారు. 

ఎయిడెడ్ పాఠశాలల యాజమాన్యాలు వారిపై ఎటువంటి వత్తిడి లేదన్న విషయాన్ని గ్రహించాలని తెలిపారు.  వ్యక్తిగత ప్రయోజనాలు, ప్రచారం కోసం ఎటువంటి వ్యాఖ్యానాలు చేసినా తీవ్రంగా పరిగణించడం జరుగుతుందని హెచ్చరించారు. 

ఈ సమావేశంలో జాయింట్ కలెక్టర్ పి.అరుణ్ బాబు, జిల్లా విద్యా శాఖాధికారి ఎల్. చంద్రకళ, జిల్లా వృత్తివిద్య అధికారి కె.అప్పలరాము, డిగ్రీ కళాశాలల కోఆర్డినేటర్ విజయకుమార్, 8 డిగ్రీ కళాశాలలు, 15 జూనియర్ కళాశాలలు, 32 పాఠశాలలుకు చెందిన ఎయిడెడ్ విద్యా సంస్థల యాజమాన్యాలు పాల్గొన్నారు.