ప్రియుడిచేతిలో దాడికి గురై, జిల్లా కేంద్రాసుప‌త్రిలో చికిత్స పొందుతున్న, పూసాటిరేగ మండ‌లం చౌడ‌వాడ‌కు చెందిన రాముల‌మ్మ‌ను, ఆమె కుటుంబ స‌భ్యుల‌ను రాష్ట్ర ఉప ముఖ్య‌మంత్రి పాములు పుష్ప శ్రీ‌వాణి, మున్సిప‌ల్ శాఖామంత్రి బొత్స స‌త్య‌నారాయ‌ణ శుక్ర‌వారం ప‌రామ‌ర్శించారు. ఆసుప‌త్రి వైద్యాధికారుల‌తో మాట్లాడి, వారి ఆరోగ్య ప‌రిస్థితిని వాక‌బు చేశారు.  ప్రాణాపాయం లేద‌ని, ఎటువంటి ఆందోళ‌న చెంద‌వ‌ద్ద‌ని, చికిత్స‌క‌య్యే ఖ‌ర్చునంతా ప్ర‌భుత్వ‌మే భ‌రిస్తుంద‌ని ఆ కుటుంబానికి  ధైర్యం చెప్పారు.ఈ సంద‌ర్భంగా ఉప ముఖ్య‌మంత్రి పాముల పుష్ప శ్రీ‌వాణి మీడియాతో మాట్లాడుతూ,  ఈ సంఘ‌ట‌న చాలా దుర‌దృష్ట‌క‌మంటూ, దానిని ఖండించారు. పెళ్లి చేసుకోవాల్సిన వ్య‌క్తే, త‌న‌కు కాబోయే భార్య‌పై అనుమానంతో దాడి చేశాడ‌ని, పెట్రోలు పోసి నిప్పంటించాడ‌ని చెప్పారు. అయితే బాధితులు త‌క్ష‌ణ‌మే స్పందించి, దిశ యాప్‌ను ఉప‌యోగించ‌డంతో, స‌కాలంలో పోలీసులు అక్క‌డికి చేరుకొని, బాధితుల‌ను జిల్లా కేంద్రాసుప‌త్రికి త‌ర‌లించార‌ని చెప్పారు. మ‌హిళ‌ల ర‌క్ష‌ణ కోసం ముఖ్య‌మంత్రి వైఎస్ జ‌గ‌న్ మోహ‌న‌రెడ్డి తీసుకువ‌చ్చిన దిశ యాప్ వారి ప్రాణాల‌ను కాపాడింద‌ని అన్నారు. దిశ‌యాప్‌లో ఎస్ఓఎస్‌ బ‌ట‌న్‌ను బాధితురాలి సోద‌రి ప్రెస్ చేయ‌డంతో, వెంట‌నే పోలీసుల‌కు స‌మాచారం అందింద‌ని తెలిపారు. రాష్ట్రంలోని ఆడ‌బిడ్డ‌లంతా దిశ‌యాప్‌ను డౌన్‌లోడ్ చేసుకోవాల‌ని కోరారు. ఆప‌ద స‌మ‌యంలో ఎస్ఓఎస్ బ‌ట‌న్ నొక్కితే, పోలీసులు అక్క‌డికి చేరుకొని రక్ష‌ణ క‌ల్పిస్తార‌ని చెప్పారు.

               మంత్రి బొత్స స‌త్య‌నారాయ‌ణ మాట్లాడుతూ, చౌడ‌వాడ ఘ‌ట‌న‌లో బాధితుల‌కు ఎటువంటి ప్రాణాపాయం లేద‌ని చెప్పారు. అయిన‌ప్ప‌టికీ మెరుగైన వైద్యం కోసం విశాఖ‌ప‌ట్నం స్టీలుప్లాంటు బ‌ర్న్స్ ఆసుప‌త్రికి త‌ర‌లించ‌నున్న‌ట్లు తెలిపారు. దాడికి పాల్ప‌డిన రాంబాబును, అత‌నిని ప్రోత్స‌హించిన‌వారిని గుర్తించి, వారికి శిక్ష ప‌డేలా చేస్తామ‌ని అన్నారు. బాధిత‌రాలు రాముల‌మ్మ‌కు, నిందితుడు రాంబాబుతో 8 నెల‌ల నుంచీ ప‌రిచ‌యం ఉంద‌ని, ఇద్ద‌రూ ప్రేమించుకుంటూ, అక్టోబ‌రులో పెళ్లి చేసుకోవ‌డానికి పెద్ద‌ల స‌మ‌క్షంలో ఒప్పందం కుదిరింద‌ని తెలిపారు. అయిన‌ప్ప‌టికీ, రాముల‌మ్మ‌పై అనుమానంతో పెట్రోలు పోసి త‌గ‌ల‌బెట్టేందుకు రాంబాబు ప్ర‌య‌త్నించాడ‌ని చెప్పారు.  ఆ కుటుంబాన్ని ఆదుకొనేందుకు ప్ర‌భుత్వ ప‌రంగా చ‌ర్య‌లు తీసుకుంటామ‌ని మంత్రి అన్నారు.  బాధితుల‌ను ప‌రామ‌ర్శించిన వారిలో జిల్లా క‌లెక్ట‌ర్ ఏ.సూర్య‌కుమారి, ఎస్‌పి దీపిక‌, ఎంఎల్‌సి పెనుమ‌త్స సురేష్ బాబు, ఎంఎల్ఏలు బ‌డ్డుకొండ అప్ప‌ల‌నాయుడు, బొత్స అప్ప‌ల‌న‌ర‌స‌య్య‌, ఇత‌ర అధికారులు ఉన్నారు.

బంగళాఖాతంలో శుక్రవారం ఏర్పడిన అల్పపీడనం రానున్న 48 గంటల కాలంలో తుఫానుగా బలపడే అవకాశం వుందని వాతావరణ హెచ్చరించింది. ఈ నేపధ్యంలో విపత్తు నియంత్రణ, సహయక యంత్రాంగాన్ని జిల్లా కలెక్టర్ సి.హరికిరణ్ అప్రమత్తం చేశారు.  అల్పపీడన ప్రభావంతో ఈ నెల 19 నుండి 22వ తేదీ వరకూ గంటకు 45 నుండి 60 కిమీ వేగంతో తూర్పు తీరంలో ఈదురు గాలులు, భారీ వర్షాలు కురుస్తాయని వాతవారణ కేంద్రం తెలియజేసిందని.. దీని  దృష్ట్యా మత్సకారులెవరూ సముద్రంలోకి వేటకు వెళ్లవద్దని హెచ్చరిక జారీచేశారు.  జిల్లా కేంద్రంతో పాటు, డివిజన్, మండల కేంద్రాలలో  రక్షణ, సహాయక శాఖల సమన్వయతో 24x7 కంట్రోల్ రూమ్ ఏర్పాటు చేయాలంటూ ఆదేశాలు జారీచేశారు. కంట్రోల్ రూమ్ నెంబర్లు – కలెక్టరేట్, కాకినాడ –18004253077, సబ్ కలెక్టరు ఆఫీసు, రాజమహేంద్రవరం – 08832442344, సబ్ కలెక్టర్ ఆఫీసు, ఎటపాక – 08748285279, పిఓ, ఐటిడిఏ ఆఫీసు, రంపచోడవరం –18004252123, ఆర్డిఓ ఆఫీసు, అమలాపురం – 08856233100, ఆర్డిఓ ఆఫీసు, కాకినాడ -08842368100,  ఆర్డిఓ ఆఫీసు, రామచంద్రపురం –08857245166.

తూర్పుగోదావరి జిల్లాలోని ఆలయాలు, చర్చిలకు మరింత భద్రత కల్పించనున్నట్టు జిల్లా ఎస్పీ ఎం.రవీంధ్రనాధ్ బాబు పేర్కొన్నారు. ఈ మేరకు జిల్లాలోని 64 మండాల్లోని అన్ని గ్రామాల్లోని చర్చిలు, ఆలయాల్లో సిసి కెమెరాలు ఏర్పాటు, అవిపనిచేస్తున్న విధానాలపై నివేదికలు సమర్పించాలని ఎస్ఐలను శుక్రవారం ఆదేశించారు. గ్రామ, వార్డు సచివాలయాల్లోని మహిళా పోలీసుల ద్వారా సమాచారం సేకరించడంతోపాటు అక్కడి తాజా పరిస్థితులను అంచనా వేయాలని కూడా ఆదేశించారు. దీనితో స్టేషన్ల పరిధిలోని పోలీసులు, సచివాలయాల పరిధిలోని మహిళా పోలీసులు ఈ సమాచారం సేకరించే పనిలో పడ్డారు. జిల్లా మొత్తం సమాచారం వచ్చిన తరువాత ప్రభుత్వ ఆదేశాల మేరకు నిబంధనలు జారీ చేయనున్నారు.

వ్యక్తిగత పరిశుభ్రత తోనే సంపూర్ణ ఆరోగ్యం లభిస్తుందని జిల్లా వైద్య ఆరోగ్య శాఖాధికారి కె సి చంద్ర నాయక్ వెల్లడించారు. ఆగస్టు 20న ప్రపంచ దోమల దినోత్సవం సందర్భంగా ఆయన ఛాంబర్ లో పాత్రికేయుల సమావేశాన్ని గురువారం నిర్వహించారు. ఈ సందర్భంగా ఆయన మాట్లాడుతూ  2018 సం.రం నుండి జిల్లాలో మలేరియా, డెంగ్యూ కేసులు తగ్గుముఖం పట్టాయని, ఇది శుభ పరిణామమని  అన్నారు. డెంగ్యూ 2018లో 87 కేసులు, 2019లో 164 కేసులు, 2020లో 23 కేసులు, 2021లో ఇప్పటివరకు 10 కేసులు నమోదయినట్లు చెప్పారు. మలేరియా 2018లో 264 కేసులు, 2019లో 125 కేసులు, 2020లో 34 కేసులు, 2021లో ఇప్పటివరకూ 28 కేసులు నమోదయ్యాయని ఆయన వెల్లడించారు. వ్యక్తిగత పరిశుభ్రతతోనే సంపూర్ణ ఆరోగ్యం లభిస్తుందని , అందువలన ప్రతి ఒక్కరూ తమ పరిసరాలను పరిశుభ్రంగా ఉంచుకోవాలని సూచించారు. మలేరియా మరియు డెంగ్యూ వ్యాధులు దోమల నుండి సంక్రమిస్తాయని, ఈ విషయాన్ని ప్రతి ఒక్కరు గుర్తెరిగి దోమల నివారణకై తగు జాగ్రత్తలు పాటించాలని ఆయన సూచించారు. ప్రతి ఒక్కరూ తక్కువ ధరకు లభించే దోమ తెరలను వినియోగించుకోవాలని, తద్వారా దోమల నుండి రక్షణ పొందవచ్చని తెలిపారు. సరైనా జాగ్రత్తలు పాటించకపోవడం వలన సెరిబ్రల్ మలేరియా వంటి వ్యాధుల బారిన పడి లక్షలాది రూపాయలు ఖర్చు చేయవలసి ఉంటుందని హెచ్చరించారు. చిన్నపాటి జాగ్రత్తలతో ఆరోగ్యంగా ఉండవచ్చన్నారు. మలేరియా నివారణకై జిల్లాలో 144 హై రిస్క్ గ్రామాలను గుర్తించడం జరిగిందని, ఈ ప్రాంతాల్లో మొదటి విడత పిచికారి కార్యక్రమాన్ని  2021 మే 15 నుండి జూన్ 30 వరకు పూర్తి చేయడం జరిగిందన్నారు. రెండవ విడత పిచికారి కార్యక్రమాన్ని జూలై 16 నుండి ప్రారంభించి ఇప్పటి వరకు 124 గ్రామాలలో పిచికారి చేయించినట్లు చెప్పారు.

10ఏపిఐ ఉన్న 26 గ్రామాల్లో ప్రత్యేక పర్యవేక్షణ బృందాలతో పిచికారి జరిపించడం జరుగుతుందని పేర్కొన్నారు. 2 లక్షల గంబూషియా చేపలను హైరిస్క్ ప్రాంతాల్లో పెద్ద నీటి నిల్వలు ఉన్నచోట విడిచిపెట్టేందుకు ప్రణాళికలు సిద్ధం చేసామని, ఇంతవరకు లక్ష గంబూషియా చేపలను కుసిమి, దోనుబాయి, అన్నవరం మొదలగు ప్రాథమిక ఆరోగ్య కేంద్రాల పరిధిలోని నీటి నిల్వల్లో విడిచిపెట్టామని తెలిపారు. ఈ సీజనల్ మలేరియాకు సంబంధించిన ఏంటి మలేరియా మందులు అన్ని ప్రాథమిక ఆరోగ్య కేంద్రాలు మరియు ఉప కేంద్రాల్లో నిల్వచేసినట్లు ఆయన వివరించారు. గ్రామాలు, పట్టణాల్లో పంచాయతీరాజ్ శాఖ, పురపాలక శాఖల సహకారంతో దోమల లార్వా నియంత్రణ చర్యలు చేపడుతున్నట్లు స్పష్టం చేసారు. డెంగ్యూ ఏడిస్ దోమల నుండి సంక్రమిస్తుందని,  ఇవి ఇంటి పరిసరాల్లో ఉండే చిన్ననీటి నిల్వల్లో ఉండి పగటిపూట తిరుగుతూ ఉంటాయని చెప్పారు. కావున పగటి వేళల్లో దోమలు కుట్టకుండా ఉండేందుకు పూర్తిగా వస్త్రధారణ చేసుకోవాలని సూచించారు. డెంగ్యూ నిర్ధారణ పరీక్షలు జిల్లా ఆసుపత్రితో పాటు పాలకొండ, రాజాం, టెక్కలి ఆసుపత్రులలో కూడా చేయడం జరుగుతుందని తెలిపారు.  మలేరియా , డెంగ్యు వచ్చేక బాధపడటం కంటే రాకుండా ముందస్తు నివారణ చర్యలు పాటించడం మేలని ఆయన సూచించారు.  ఈ సమావేశంలో అదనపు జిల్లా వైద్య ఆరోగ్య శాఖాధికారి డా. బగాది జగన్నాథరావు, జిల్లా మలేరియా అధికారి డా. జి.వీర్రాజు, జిల్లా మాస్ మీడియా అధికారి పైడి వెంకటరమణ తదితరులు పాల్గొన్నారు. 

సీజనల్ వ్యాధులపై అప్రమత్తంగా ఉండాలని జివిఎంసి కమిషనర్ డా. జి. సృజన  శానిటరీ అధికారులను ఆదేశించారు.  గురువారం ఆమె 2వ జోన్ 6వ వార్డు పరిధిలోని మధురవాడ, బక్కన్నపాలెం బి-2 హౌసింగ్ కాలనీ తదితర ప్రాంతాల్లో పర్యటించారు. ఈ సందర్భంగా కమిషనర్ మాట్లాడుతూ అల్పపీడనం కారణంగా వర్షాలు విస్తారంగా పడుతుండడంతో సీజనల్ వ్యాధులు లైన మలేరియా, డెంగ్యూ వంటి వ్యాధులు ప్రబలే అవకాశం ఎక్కువగా ఉన్నందున ప్రజలకు అవగాహన కల్పించాలని ప్రధాన వైద్యాధికారి డా. కె.ఎస్.ఎల్.జి.శాస్త్రిని ఆదేశించారు.  వర్షపు నీరు నిల్వ లేకుండా చూడాలని,   ఫ్రిడ్జ్  వెనుక భాగం ట్రేలో ఉన్న నీటిని ఎప్పటికప్పుడు తొలగించాలని,  ఇంటి పరిసర ప్రాంతాలలో  కొబ్బరి బొండాలు,   ఖాళీ ప్లాస్టిక్ బాటిల్స్,  పూల కుండీలులోని నీరు నిల్వ లేకుండా చూడాలని,  ప్రతి శుక్రవారం “డ్రై డే” పాటించాలని,  సచివాలయాల పరిధిలో  మలేరియా పై ప్రజలకు అవగాహన కార్యక్రమాలు చేపట్టాలని ఆదేశించారు. సచివాలయాల పరిధిలో ఫీవర్ సర్వే ప్రతి ఇంటికి వెళ్లి సర్వే చేయాలని ఆదేశించారు.

ప్రస్తుతం వర్షాలు పడుతున్నందున గెడ్డ లోని పూడికలు  తొలగించి, వర్షపు నీరు  సాఫీగా వెళ్లే విధంగా ఏర్పాట్లు చేయాలని,  పారిశుధ్య కార్మీకులు ప్రతి ఇంటి నుండి  తడి-పొడి చెత్తను సరిగా సేకరించడంలేదన్నారు.

 తడి-పొడి చెత్తను వేరు వేరుగా ఇచ్చేవిధంగా  ప్రజలకు అవగాహన కల్పించాలని జోనల్ కమిషనర్ ను ఆదేశించారు.  పిన్ పాయింట్ వారిగా పారిశుద్ధ్య కార్మికులను సర్దుబాటు చేసి ఎవరికి నిర్దేశించిన పనిని వారిచే  చేయించాలని, చెత్త తరలించే వాహనాలు రోజుకు 3 ట్రిప్పులు వేయాలని, పుష్ కార్ట్ లోని చెత్త బయట వేయకుండా నేరుగా  చెత్త తరలించే వాహనంలోనే వేయాలని  శానిటరీ అధికారులను ఆదేశించారు. మధురవాడ పరిసర ప్రాంతాలలో పందులు అధికంగా ఉన్నాయని వాటిని వెంటనే నిర్మూలించే చర్యలను చేపట్టాలని వెటర్నరీ అధికారులను ఆదేశించారు.

కోవిడ్ వ్యాక్సినేషన్ ను వేసుకొనేలా సచివాలయాల పరిధిలో వాలంటరీలు  ప్రతి ఇంటింటికి వెళ్లి 18 సంవత్సరాల వయసు పై బడిన వారందరికీ వ్యాక్సిన్ వేయించుకునే విధంగా ప్రజలకు అవగాహన కల్పించాలని కమిషనర్  ప్రధాన వైధ్యాధికారిని ఆదేశించారు.

ఈ పర్యటనలో ప్రధాన వైద్యాధికారి డా. కె.ఎస్.ఎల్.జి.శాస్త్రి, రెండవ జోనల్ కమిషనర్ బొడ్డేపల్లి రాము, ఎఎంఒహెచ్ డా. కిషోర్, ఎసిపి భాస్కర బాబు, కార్యనిరాహక ఇంజినీరు (మెకానికల్) చిరంజీవి, అసిస్టెంట్ ఇంజినీర్లు శ్రీహరి, శ్రీనివాస్, మలేరియా సిబ్బంది తదితరులు పాల్గొన్నారు. 

స‌మ‌స్య‌ల ప‌రిష్కారం కోసం రెవిన్యూ కార్యాల‌యాల‌కు వ‌చ్చే ప్ర‌జ‌లు, అర్జీదారులంద‌రికీ స‌మాన‌ గౌర‌వం ఇవ్వాల‌ని, అర్జీదారులంద‌రి స‌మ‌స్య‌ల ప‌ట్ల ఒకే రీతిలో స్పందించి వాటి ప‌రిష్కారానికి చిత్త‌శుద్ధితో ప్ర‌య‌త్నించాల‌ని జిల్లా క‌లెక్ట‌ర్  ఏ.సూర్య‌కుమారి జిల్లాలోని త‌హ‌శీల్దార్‌ల‌ను ఆదేశించారు. అర్జీలు ఇవ్వడానికి వ‌చ్చే వ్య‌క్తులంద‌రి స‌మ‌స్య‌ల‌ను సావ‌ధానంగా విని వాటిని సాధ్య‌మైనంత మేర‌కు న్యాయ‌బ‌ద్ధంగా ప‌రిష్క‌రించేందుకే ప్ర‌య‌త్నించాల‌న్నారు. అర్జీల‌ను త‌మ స్థాయిలో ప‌రిష్కారం సాధ్య‌మైనప్ప‌టికీ వాటిని తిర‌స్క‌రించే ప‌రిస్థితి రానివ్వొద్ద‌ని స్ప‌ష్టంచేశారు. జిల్లా క‌లెక్ట‌ర్ గా బాధ్య‌త‌లు చేప‌ట్టిన త‌ర్వాత తొలిసారి గురువారం క‌లెక్ట‌ర్ కార్యాల‌యం నుంచి జాయింట్ క‌లెక్ట‌ర్ డా.జి.సి.కిషోర్ కుమార్‌తో క‌ల‌సి జిల్లాలోని అన్ని మండ‌లాల‌ త‌హ‌శీల్దార్‌ల‌తో ఆన్ లైన్ కాన్ఫ‌రెన్సు నిర్వ‌హించారు. స్పంద‌న‌లో వ‌చ్చే ప్ర‌జా విన‌తుల  ప‌రిష్కారం, ప్ర‌భుత్వ భూముల ప‌రిర‌క్ష‌ణ‌, ల్యాండ్ బ్యాంక్ ఏర్పాటు త‌దిత‌ర అంశాల‌పై సమ‌గ్రంగా స‌మీక్షించారు.

జిల్లాలోని ఏ మండ‌లంలోనూ ప్ర‌భుత్వానికి చెందిన భూముల ర‌క్ష‌ణ బాధ్య‌త త‌హ‌శీల్దార్ల‌దేని స్ప‌ష్టంచేశారు. ప్ర‌భుత్వ భూముల‌కు త‌హ‌శీల్దార్‌లు ర‌క్ష‌కులుగా వ్య‌వ‌హ‌రించాల‌న్నారు. మండ‌లంలోని ఏ ప్రాంతంలోనైనా ప్ర‌భుత్వ‌ భూములు, చెరువులు ఆక్ర‌మ‌ణ‌ల‌కు గురైతే త‌క్ష‌ణం స్పందించి ఆక్ర‌మ‌ణ‌లు తొల‌గించి, భూముల‌ ప‌రిర‌క్ష‌ణ‌కు చ‌ర్య‌లు చేప‌ట్టాల‌ని ఆదేశించారు. చెరువుల ఆక్ర‌మ‌ణ‌ల వ‌ల్ల వాటి  నీటి నిల్వ సామ‌ర్ధ్యం కోల్పోయి అనేక న‌ష్టాలు జ‌రిగే అవ‌కాశం వుంటుంద‌ని అందువ‌ల్ల చెరువుల ప‌రిర‌క్ష‌ణ‌కు చ‌ర్య‌లు చేప‌ట్టాల‌న్నారు. మండ‌లంలోని భూవివ‌రాల‌పై త‌హ‌శీల్దార్‌ల‌కు స‌మ‌గ్ర‌మైన అవ‌గాహ‌న వుండాల‌ని క‌లెక్ట‌ర్ స్ప‌ష్టంచేశారు. ఏయే వ‌ర్గీక‌ర‌ణ‌ల‌కు సంబంధించిన భూమి ఎన్ని ఎక‌రాలు వుందో చెప్పే ప‌రిస్థితి వుండాల‌న్నారు. వ‌చ్చే స‌మావేశం నాటికి ఆయా మండ‌లాల్లో భూముల వివ‌రాల‌కు సంబంధించి పూర్తి స‌మాచారంతో, అవ‌గాహ‌న‌తో సిద్ధం కావాల‌న్నారు. జిల్లాకు రానున్న రోజుల్లో ప‌లు ప‌రిశ్ర‌మ‌లు, జాతీయ ప్రాజెక్టులు రానున్నాయ‌ని, వాటి ఏర్పాటు కోసం భూములు అవ‌స‌రం వుంటుంద‌ని, దీనిని దృష్టిలో పెట్టుకొని ల్యాండ్‌బ్యాంక్ ఏర్పాటు చేస్తున్న‌ట్టు క‌లెక్ట‌ర్ చెప్పారు. ఆయా మండ‌లాల్లో ఆక్ర‌మ‌ణ‌లు లేకుండా స్ప‌ష్టంగా అందుబాటులో వుండే ప్ర‌భుత్వ భూముల వివ‌రాలు సిద్ధం చేయాల‌ని చెప్పారు. 

ఈ సంద‌ర్భంగా మండలాల వారీగా రెవిన్యూ శాఖ‌కు సంబంధించి స్పంద‌న విన‌తుల ప‌రిష్కారంపై స‌మీక్షించారు. ఏదైనా మండ‌లంలో పెద్ద ఎత్తున పెండింగ్‌లో వున్న‌ట్ల‌యితే ఏ కార‌ణంగా వున్నాయో తెలుసుకున్నారు. కోర్టు వివాదంలో ఉన్న‌ట్లు తెలియ‌జేస్తే వాటికి సంబంధించి కౌంట‌ర్‌లు సంబంధిత న్యాయ‌స్థానంలో దాఖ‌లు చేసిందీ లేనిదీ స‌మీక్షించారు. ఏయే ర‌క‌మైన విన‌తులు ప‌రిష్కారం కాకుండా మిగిలి వుంటున్నాయో త‌హ‌శీల్దార్‌ల ద్వారా తెలుసుకున్నారు. వై.ఎస్‌.ఆర్‌. జ‌గ‌న‌న్న భూహ‌క్కు భూర‌క్ష కార్య‌క్ర‌మంలో భాగంగా జ‌రుగుతున్న  రెండు గ్రామాల్లో పైల‌ట్ ప్రాజెక్టుగా జరుగుతున్న స‌ర్వేపై స‌మీక్షించారు.