చంద్రగిరి శ్రీ కోదండరామస్వామివారి ఆలయంలో బుధవారం ఉదయం శ్రీ సీతారాముల కల్యాణం నేత్ర‌ప‌ర్వంగా జరిగింది. ఉదయం 10 గంటలకు శ్రీ సీతారాముల కల్యాణం ప్రారంభమైంది. ముందుగా ఆలయ అర్చకులు పుణ్యాహవచనం, సద్యో అంకురార్పణ, రక్షాబంధనం, విశేషారాధన చేశారు. ఆ తరువాత రక్షాబంధన, అగ్నిప్రతిష్ఠ, మధుపర్కం, కన్యాదానం, మహాసంకల్పం, స్వామి, అమ్మవారికి ప్రవరలు, మాంగళ్యపూజ చేపట్టారు. అనంతరం మాంగళ్యధారణ, ఉక్తహోమాలు, పూర్ణాహుతి, నివేదన, అక్షతారోహణం, ముత్యాల త‌లంబ్రాల స‌మ‌ర్ప‌ణ, విశేష నివేదన, మాల‌మార్పిడి, అక్ష‌తారోహ‌ణ, హారతి, చ‌తుర్వేద పారాయ‌ణం, య‌జ‌మానికి వేద ఆశీర్వాదం, హారతి ఇచ్చారు. కల్యాణం అనంతరం స్వామి, అమ్మవార్ల ఉత్సవర్లను ఆలయ ప్రాంగ‌ణంలో ఊరేగింపు నిర్వహించారు.
అనంతరం సాయంత్రం 6:30 గంటలకు శ్రీ కోదండరామస్వామి వారు గరుడ వాహనాన్ని అధిరోహించి భక్తులను కటాక్షించారు. ఈ కార్యక్రమంలో ఆలయ డెప్యూటీ ఈవో దేవేంద్ర బాబు, ఏఈవో పార్థసారథి, సూపరింటెండెంట్‌ శ్రీనివాసులు టెంపుల్ ఇన్స్పెక్టర్ గోపాలకృష్ణ, ఇతర అధికారులు, విశేష సంఖ్యలో భక్తులు పాల్గొన్నారు.
