విశాఖలోని సింహాచలం శ్రీశ్రీశ్రీ వరాహ లక్ష్మీ నృసింహ(సింహాద్రి అప్పన్న) స్వామివారిని జాతీయ జర్నలిస్టుల సంఘం కార్యదర్శి, విజెఎఫ్ అధ్యక్షుడు, దేవస్థానం ప్రత్యేక ఆహ్వానితులు గంట్ల శ్రీనుబాబు దర్శించుకున్నారు. బుధవారం ఈ మేరకు స్వామివారికి ప్రత్యేక పూజలు నిర్వహించి కప్పస్థంబాన్ని ఆలింగనం చేసుకున్నారు. ఈ సందర్భంగా ఆయన మీడియాతో మాట్లాడుతూ, జర్నలిస్టుల సమస్యలపై నిరంతరం పోరాటం చేస్తున్నామని, ప్రభుత్వం ద్రుష్టికి జర్నలిస్టుల ప్రధాన సమస్యలు తీసుకెళ్లినట్టు చెప్పారు. అర్హులైన వారందరికీ అక్రిడిటేషన్లు వచ్చేలా క్రుషి చేస్తున్నట్టు శ్రీనుబాబు వివరించారు.

శ్రీకాకుళం  జిల్లాలో చేపడుతున్న గృహ నిర్మాణాలకు సంబంధించిన బిల్లులు తక్షణమే అప్ లోడ్ చేయాలని, నెల రోజుల తదుపరి బిల్లులు పెండింగులో ఉంటే ఉపేక్షించేది లేదని  సంయుక్త కలెక్టర్ సుమిత్ కుమార్ గృహ నిర్మాణ శాఖ ఇంజినీరింగ్ అధికారులను ఆదేశించారు. మంగళవారం కలెక్టర్ కార్యాలయ సమావేశ మందిరంలో గృహ నిర్మాణాలపై ఆ శాఖ ఇంజినీరింగ్ అధికారులతో జె.సి సమీక్షా సమావేశాన్ని నిర్వహించారు. తొలుత గృహ నిర్మాణాల జాప్యానికి గల కారణాలను అడిగి తెలుసుకున్న ఆయన పెండింగు బిల్లులపై దృష్టి సారించాలని అన్నారు. ఇప్పటివరకు చేపట్టిన నిర్మాణపు పనులకు సంబంధించిన బిల్లులు వారంలోగా వెబ్ సైట్ నందు అప్ లోడ్ చేయాలని ఆదేశించారు. ఇసుక, సిమెంటు, ఐరన్ సరఫరాపై ప్రతి లబ్ధిదారునికి వివరాలు తెలియజేయాలని, నిధులు లేవనే నెపంతో పనుల్లో జాప్యం జరగరాదని జె.సి స్పష్టం చేసారు. ప్రతి ఏ.ఇ.ఇ కూడా వారి  పరిధిలోని గ్రామ సచివాలయాలను తప్పనిసరిగా పర్యటించాలని, ప్రతి రోజూ 5 నుండి 10 మంది లబ్ధిదారులతో మాట్లాడి వారి గృహ నిర్మాణపు పనులు పూర్తయ్యేలా ప్రణాళికను సిద్ధం చేసుకోవాలని సూచించారు. ఇందుకు ఇంజినీరింగ్ అసిస్టెంట్లు, వర్క్ ఇన్ స్పెక్టర్లను వినియోగించుకోవాలని పేర్కొన్నారు.  గృహాలు మంజూరైన స్వయం సహాయక బృందాల్లోని సభ్యులు బ్యాంకుల నుండి రుణాలు పొంది వాటిని పూర్తిచేసుకునే విధంగా విధంగా చర్యలు తీసుకోవాలని అన్నారు. సిమెంటు సరఫరా ఎక్కువగా ఉన్నచోట పనులు వేగవంతం చేయాలని, ఇసుక కొరత సమస్యను త్వరలోనే పరిష్కరించనున్నట్లు జె.సి వివరించారు. 

తక్కువ గృహ నిర్మాణాలు చేపట్టిన  మండలాల్లో ఏ.ఇ.ఇలు ప్రత్యేక దృష్టి సారించి పనులు వేగవంతం అయ్యేలా చూడాలని పేర్కొన్నారు. త్వరలోనే ప్రతీ మండలాన్ని సందర్శించి అక్కడ జరుగుతున్న గృహనిర్మాణాలను పరిశీలిస్తామని అన్నారు. గృహ లబ్ధిదారుల పేర్లు మరియు వారి సెల్ ఫోన్ నెంబర్లు సంబంధిత ఏ.ఇ.ఇల వద్ద అందుబాటులో ఉండాలని, లబ్ధిదారులతో నేరుగా మాట్లాడి సరైన స్పందన లేకపోతే సంబంధిత అధికారులపై చర్యలు తీసుకుంటామని హెచ్చరించారు. ఇప్పటివరకు పూర్తిచేసిన పనులకు సంబంధించిన బిల్లులు తక్షణమే అప్ లోడ్ చేయాలని, నెల రోజుల తదుపరి పెండింగులో బిల్లులు ఉంటే ఉపేక్షించేది లేదని అన్నారు. గృహ నిర్మాణాల్లో సంబంధిత శాఖలను సమన్వయం చేసుకుంటూ పనులు పూర్తిచేయాలని ఆదేశించారు. బిల్లులు చెల్లింపులు జరిగితే మరిన్ని నిధులు జిల్లాకు విడుదల అవుతాయని, దానివలన మరిన్ని గృహాలు నిర్మించుకునేందుకు అవకాశం కలుగుతుందని జె.సి ఆశాభావం వ్యక్తం చేసారు. ఈ సమావేశంలో గృహ నిర్మాణ శాఖ పథక సంచాలకులు ఎన్.గణపతి, ఉప కార్యనిర్వాహక ఇంజినీర్లు, సహాయ కార్యనిర్వాహక ఇంజినీర్లు, తదితరులు పాల్గొన్నారు.  

 

ఆధునిక సాంకేతిక పద్ధతుల ద్వారా వ్యవసాయ, అనుబంధ శాఖలకు సంబంధించిన పరిజ్ఞానాన్ని రైతులు అందుకునేలా అధికారులు కృషి చేయాలని జిల్లా కలెక్టర్ ఏ.మల్లికార్జున ఆదేశించారు. మంగళవారం కలెక్టర్ కార్యాలయ సమావేశ మందిరంలో నిర్వహించిన వ్యవసాయ, పశు సంవర్ధక, ఉద్యానవన, మత్స్యశాఖలకు సంబంధించిన ప్రగతిని ఆయన సమీక్షించారు. గులాబ్ తుఫాను పంట నష్టాలను రైతు భరోసా కేంద్రాల్లో ప్రదర్శించాలన్నారు. ఇప్పటి వరకు నమోదు చేసిన పంట విస్తీర్ణం సాధారణ విస్తీర్ణం లో 86% ఉన్నందున రికన్సిల్ చేసుకోవాలని సూచించారు. ముందుగా ఈ క్రాప్ పూర్తయితేనే పంట నష్టం, బీమా, రైతు భరోసా మొదలైనవన్నీ రైతులు పొందగలరని చెప్పారు. ఎరువులు, పురుగు మందులు రైతులకు అందుబాటులో ఉంచాలని, రైతు శిక్షణలు పెంచాలని క్షేత్ర స్థాయిలో పనిచేసే సిబ్బంది పనితనం మెరుగుపరుచుకోవాలని ఆదేశించారు.

రైతులకు మేలు చేసే కొత్త వంగడాలను గూర్చి అవగాహన కల్పించి ఉద్యానవన పంటలను మరింత అభివృద్ధి చేయాలన్నారు. ఫుడ్ ప్రాసెసింగ్ కు గల అవకాశాలను పరిశీలించాలన్నారు. పట్టు పరిశ్రమ గిరిజన రైతులకు ఎంతో ఉపయోగకరంగా ఉంటుందని గిరిజన రైతులకు లోతైన సంపూర్ణమైన అవగాహన కలిగించాలని ఆదేశించారు. 

ఎక్కువగా క్షేత్ర పర్యటనలు చేయాలని పాడి పశువులు, మేకలు, గొర్రెలు, కోళ్ళు మొదలైన వాటికి తెగులు రాకుండా ముందుగా వ్యాక్సినేషన్, అవసరమైన జాగ్రత్తల గూర్చి తెలియజేయాలని పశుసంవర్ధక శాఖను ఆదేశించారు. జిల్లాలో మత్స్య పరిశ్రమ గురించి సమీక్షిస్తూ కేజ్ కల్చర్ ను మరింత అభివృద్ధి చేయాలన్నారు హేచరీలలోఉత్ప్రేరకాలను వాడకుండా తగిన జాగ్రత్తలు తీసుకోవాలన్నారు. ఈ సమావేశంలో జాయింట్ కలెక్టర్ ఎమ్. వేణుగోపాల రెడ్డి, వ్యవసాయ శాఖ జె.డి. లీలావతి, పశుసంవర్ధక శాఖ జె.డి. రామకృష్ణ, మత్స్య శాఖ జే.డీ. లక్ష్మణరావు ఉద్యానవన శాఖ డి.డి.  పట్టు పరిశ్రమ శాఖ జె.డి. తదితరులు పాల్గొన్నారు

కిశోర బాలికల ఆరోగ్యము, పరిశుభ్రతే లక్ష్యంగా స్వేచ్చ అనే కార్యక్రమాన్ని రూపొందిం చడం జరిగిందని రాష్ట్ర ముఖ్యమంత్రి   వై.ఎస్. జనన్మోహన రెడ్డి తెలిపారు.  మంగళవారం ఉదయం తాడేపల్లి క్యాంప్ కార్యాలయం నుండి వీడియో కాన్పరెన్స్ ద్వారా ‘స్వేచ్చ’   కార్యక్రమాన్ని ప్రారంభించారు.  ఈ కార్యక్రమంలో భాగంగా 7వ తరగతి నుండి 12వ తరగతి వరకు చదివే బాలికలకు నాణ్యమైన బ్రాండెడ్ నాప్కిన్లు నెలకు 10 చొప్పున సంవత్సరానికి 120 నాప్కిన్లు అందజేసే కార్యక్రమంలో జిల్లా పరిషత్ చంద్రంపాలెం, ఉన్నత పాఠశాల నుంచి  పర్యాటక శాఖ మంత్రి ముత్తం శెట్టి శ్రీనివాసరావు, జిల్లా కలెక్టరు డా.ఎ.మల్లిఖార్జున, పార్లమెంటు  సభ్యురాలు గొడ్డేటి మాధవి,   ఈ కార్యక్రమంలో పాల్గొన్నారు.  ఈ సందర్భంగా మంత్రి  మాట్లాడుతూ  ముఖ్యమంత్రి వై.ఎస్.జగన్మోహన రెడ్డి మీకు కావలసిన వాటిని అన్నింటిని అందజేస్తున్నారని, మీరు అందరూ బాగా చదువుకుని దేశ అభివృద్దికి  కృషి చేయాలన్నారు. మీ కోసం ‘దిశయాప్’ప్రవేశ పెట్టి బద్రతను కల్పించారన్నారు.  జిల్లా కలెక్టరు డా.ఎ.మల్లిఖార్జున మాట్లాడుతూ ‘స్వేచ్చ’కార్యక్రమం  ఈ రోజు లాంచింగ్ జరిగిందని,  అందరూ వినియోగించి ఆరోగ్యంగా ఉండాలన్నారు.  ప్రతి పాఠశాలకు ఈ కార్యక్రమం అమలు నిమిత్తం ఒక ‘స్వేచ్చ’నోడల్ అధికారిని నియమిస్తారని తెలిపారు. పార్లమెంటు సభ్యురాలు గొడ్డేటి మాధవి మాట్లాడుతూ ‘స్వేచ్చ’ఇది ఆడపిల్లలందరికి ఎంతో ఉపయోగపడే కార్యక్రమం అని, మన ముఖ్యమంత్రి ఈ సమస్యను అధిగమించడానికి ఈ కార్యక్రమాన్ని అమలు చేస్తున్నారని తెలిపారు.  మనం తీసుకునే జాగ్రత్తలు మనం సంతోషంగా ఆరోగ్యంగా ఉంచుతాయని తెలిపారు. ఈ కార్యక్రమంలో వి.ఎమ్.ఆర్.డి.ఎ ఛైర్ పర్సన్  అక్కరమాని విజయనిర్మల,  జిల్లా పరిషత్ ఛైర్ పర్సన్ జల్లపల్లి సుభద్ర,  జిల్లా విద్యాశాఖాధికారి,  ప్రాజెక్టు అధికారి, (స్త్రీ శిశు సంక్షేమ శాఖ,) పలువురు విద్యార్ధినులు  పాల్గొన్నారు. 

సింహాచలం శ్రీశ్రీశ్రీ వరాహ లక్ష్మీ నృసింహ(సింహాద్రి అప్పన్న)స్వామివారి నిత్యన్నధాన పథకానికి విశాఖలోని వేపగుంట అప్పన్నపాలెంకు చెందిన కేవీఆర్వీ లక్ష్మీ, కృష్ణారావు దంపతులు ఒక లక్షా నూట పదహారు రూపాయలు (రూ.1,00,116 ) విరాళమిచ్చారు. ఆ మొత్తాన్ని దేవస్థానంలో సిబ్బందికి అందజేశారు. ఈ సందర్భంగా దాతలు మాట్లాడుతూ, తమ పెళ్లిరోజైన ఫిబ్రవరి 24వ తేదీన స్వామివారి సన్నిధిలో అన్నదానం చేయాలని కోరారు. ఉపాధ్యాయ వృత్తిలో సుదీర్ఘకాలం పనిచేసిన తాము రిటైరయ్యామని స్వామివారి దయవల్ల చల్లగా ఉన్నామని లక్ష్మీ, కృష్ణారావు దంపతులు తెలిపారు. అనంతరం స్వామివారి దర్శినం చేసుకోని, కప్పస్థంబాన్ని ఆలింగనం చేసుకున్నారు. ఆలయ సిబ్బంది స్వామివారి ప్రసాదాలను దాతలకు అందజేశారు.

శ్రీకాకుళంజిల్లాలో గృహ నిర్మాణాలకు, ప్రభుత్వ భవన నిర్మాణాలకు ఇసుక కొరత ఉండబోదని జేపీ గ్రూప్ స్పష్టం చేసింది. జిల్లాలో ఇసుక పరిస్థితిపై కలెక్టర్ కార్యాలయంలో సంబంధిత అధికారులు, జేపీ గ్రూప్ తో జిల్లా కలెక్టర్ శ్రీకేష్ లాఠకర్ మంగళవారం ఉదయం సమీక్షించారు. జిల్లా కలెక్టర్  మాట్లాడుతూ ఇసుక కొరత ఎక్కడ ఉండరాదని స్పష్టం చేశారు. కృత్రిమ కొరత కూడా సృష్టిస్తున్నారు అనే ఆరోపణలు వచ్చినా చర్యలు తీసుకుంటామని స్పష్టం చేశారు. శ్రీకాకుళం జిల్లా ఇసుక ఉత్పాదనలో ముందు వరుసలో ఉంటుందని ఆయన పేర్కొన్నారు. స్థానిక సమస్యలు ఉంటే తక్షణం పరిష్కరించుకుని ఇసుక సరఫరాలో ఎటువంటి సమస్యలు, లోపాలు లేకుండా చూడాలని ఆయన ఆదేశించారు. ఇసుక రీచ్ లలో లేదా ఇసుక స్టాక్ పాయింట్ లో సమస్యలు, నిర్వహించలేని పరిస్థితి ఉంటే దాన్ని వ్రాతపూర్వకంగా సమర్పించాలని వాటిని అవసరం మేరకు ప్రభుత్వ విభాగాల ద్వారా నిర్వహించుటకు చర్యలు చేపడతామని కలెక్టర్ సూచించారు. జిల్లాలో ప్రస్తుతం 26 రీచ్ లు పనిచేస్తున్నాయని, ఎక్కడ సమస్య ఉన్నా తక్షణం పరిష్కరించాలని ఆదేశించారు. ప్రతి స్టాక్ పాయింట్ వద్ద ప్రభుత్వ భవనాల నిర్మాణం, గృహ నిర్మాణాలకు వచ్చే వాహనాలకు ప్రత్యేక వరుస ఏర్పాటు చేయాలని సూచించారు. అవసరమైతే బోర్డులను ఏర్పాటు చేయాలని ఆయన ఆదేశించారు. ఇసుకకు వచ్చే వాహనాలకు టోకెన్లు ఉండాలని, వెళ్లే సమయం, గమ్యస్థానానికి చేరే సమయం, వాహనాల రిజిస్ట్రేషన్ సంఖ్య కూడా టోకెన్ లో ముద్రించాలని ఆయన సూచించారు. ప్రతి రీచ్ వారీగా పక్కాగా అమలు చేయాలని ఆయన ఆదేశించారు. టెక్కలిలో గురు వారం నాటికి స్టాక్ పాయింట్లు ఏర్పాటు చేయాలని ఆయన సూచించారు.  సమస్యలు ఉంటే వాటిని దీర్ఘకాలం అపరిష్కృతంగా ఉంచరాదని, వాటిని జిల్లా యంత్రాంగం దృష్టికి తీసుకు రావడం వలన అవసరమైన సహాయ సహకారాలు అందిస్తామని కలెక్టర్ చెప్పారు. గనుల శాఖ, ఎస్.ఇ.బి సమన్వయంతో పని చేయాలని ఆయన ఆదేశించారు. 

 జాయింట్ కలెక్టర్ సుమిత్ కుమార్ మాట్లాడుతూ ప్రభుత్వ, ప్రైవేట్ వాహనాలకు ప్రత్యేక వరసలు ఉండటం ద్వారా సమస్యలు పరిష్కారం అవుతాయని అన్నారు.  జేపీ గ్రూప్ సీఈఓ వి.ఎం.విష్ణునాథ్  మాట్లాడుతూ జిల్లాలో 19 రీచ్ లలో మ్యాన్యువల్ నుండి యంత్రాలు  ఉపయోగించుటకు అనుమతులు కోరామన్నారు. గృహ నిర్మాణాలకు, ప్రభుత్వ భవనాల నిర్మాణాలకు ప్రాధాన్యత ఇస్తున్నామని ఆయన చెప్పారు.జగనన్న గృహ నిర్మాణాలకు, ప్రభుత్వ భవనాల నిర్మాణాలకు ఇసుక కొరత ఉండబోదని ఎప్పటికప్పుడు ఇసుక సరఫరా చేయుటకు సిద్ధంగా ఉన్నామని వివరించారు. స్టాక్ పాయింట్ వద్ద ఇసుక ప్రదర్శించనున్నారని, అదే అంశాన్ని ప్రజలకు పత్రికల ద్వారా తెలియజేయుటకు కూడా చర్యలు చేపట్టామని ఆయన వివరించారు. కనీస ధరతో గమ్య స్థానం వరకు చేరుటకు అన్ని చర్యలు చేపడుతున్నామని చెప్పారు. టెక్కలి లో దేవదాయ శాఖ భూమిలో స్టాక్ పాయింట్ నిర్వహించడం జరుగుతుందని, మరో రెండు సంవత్సరాలు నిరభ్యంతర పత్రం జారీ ద్వారా స్టాక్ పాయింట్ నిర్వహించే పరిస్థితి ఉందని ఆయన చెప్పారు. ఈ సమావేశంలో ఎస్ఈబి ఏఎస్పి కే. శ్రీనివాసరావు, గనుల శాఖ ఉపసంచాలకులు సిహెచ్ . సూర్య చందర్రావు, గృహ నిర్మాణ సంస్థ ప్రాజెక్టు డైరెక్టర్ ఎన్.గణపతి, ప్రజా ఆరోగ్య శాఖ కార్యనిర్వాహక ఇంజనీర్ పి. సుగుణకరరావు,  వివిధ శాఖల ఇంజనీర్లు, జేపీ గ్రూప్ మేనేజర్ ఎన్. గంగాధర్ రెడ్డి తదితరులు పాల్గొన్నారు.

పరిశుభ్రత కోసం పిల్లలు తమ తల్లుల్లో అవగాహన పరచాలని జిల్లా కలెక్టర్ శ్రీకేష్ లాఠకర్ విద్యార్థులకు సూచించారు.  మంగళవారం స్వేచ్ఛ కార్యక్రమాన్ని రాష్ట్ర ముఖ్యమంత్రి వీడియో కాన్ఫరెన్స్ ద్వారా ప్రారంభ కార్యక్రమంనకు శ్రీకాకుళంలో ఏవియన్ నగర పాలక సంస్థ ఉన్నత పాఠశాల నుండి హాజరైన అనంతరం పాఠశాల విద్యార్థులతో జిల్లా కలెక్టర్ శ్రీకేష్ లాఠకర్ మాట్లాడారు. పాఠశాలలో రన్నింగ్ వాటర్ వస్తుందా లేదా అని అడుగగా రన్నింగ్ వాటర్ వస్తుందని విద్యార్థులు తెలియజేశారు.  గతంలో ఫ్యాన్ లు ఎన్ని ఉన్నాయని కలెక్టర్ విద్యార్థులను అడుగగా కారుణ్య అనే విద్యార్థి మాట్లాడుతూ  గతంలో రూంలో ఒక ఫ్యాన్ మాత్రమే ఉండేదని, ప్రస్తుతం 8 ఫ్యాన్లు ఉన్నాయని కలెక్టర్ కు వివరించారు.  మేఘన అనే విద్యార్థి మాట్లాడుతూ గతంలో పెయింటింగ్ ఉండేది కాదని, ప్రస్తుతం పాఠశాలలో పెయింటింగ్, బాలికలకు, బాలురకు వేరు, వేరుగా మరుగుదొడ్లు ఉన్నాయని తెలిపారు. పాఠశాల నాడు ఎలా ఉందని, ప్రస్తుతం ఎలా ఉందని విద్యార్థులను అడుగగా  నేడు కలెక్టర్ అడుగగా గతంలో కంటే ప్రస్తుతం చాలా బాగుందని విద్యార్థులు తెలిపారు.  పరిశుభ్రత విషయంలో ఎలాంటి సిగ్గు లేకుండా తల్లులకు కూడా పరిశుభ్రత గూర్చి అవగాహన పరచాలన్నారు.  మొదటి నుండి శుభ్రత పాటస్తేనే వ్యాదులకు దూరంగా ఉండొచ్చునని తెలిపారు.  భోజనాలు ఎలా పెడుతున్నారు, మెనూ అమలు చేస్తున్నారా లేదా అని కలెక్టర్ విద్యార్థులను అడుగగా భోజనాలు బాగున్నాయని, మెనూ కూడా అమలు చేస్తున్నారని విద్యార్థులు కలెక్టర్ కు వివరించారు. భోజనాలు పై ఫిర్యాదులు ఏమైనా ఉన్నాయా లేదా అడిగి తెలుసుకున్నారు. దేశంలో ఎన్ని భాషలు ఉన్నాయని విద్యార్థులను అడిగి తెలుసుకున్నారు.  వంద రూపాయలు నోటు తీసుకొని నోటుపై ఎన్ని భాషలు ఉన్నాయో చూడాలని విద్యార్థులకు ఆయన సూచించారు.  ఈ కార్యక్రమంలో జాయింట్ కలెక్టర్ డా. కె.శ్రీనివాసులు, ఐసిడిఎస్ పిడి జి.జయదేవి, ఇన్ ఛార్జ్ డిఇఓ జి.పగడాలమ్మ, సమగ్ర శిక్ష అభియాన్ ఏపిసి తిరుమల చైతన్య, పి.ఇందిరామణి, తదితరులు పాల్గొన్నారు.

బాలికల ఆరోగ్య పరిశుభ్రతే ధ్యేయం అని రాష్ట్ర ముఖ్యమంత్రి వై.ఎస్.జగన్ మోహన్ రెడ్డి అన్నారు. చిన్న కారణాల వలన విద్యలో వెనుకబాటు ఉండరాదని, విద్యకు స్వస్తి పలుకరాదని ఆయన పేర్కొన్నారు. స్వేచ్ఛ కార్యక్రమాన్ని రాష్ట్ర ముఖ్యమంత్రి మంగళ వారం ముఖ్య మంత్రి క్యాంప్ కార్యాలయం నుండి వీడియో కాన్ఫరెన్స్ ద్వారా ప్రారంభించారు. ముఖ్యమంత్రి మాట్లాడుతూ రాష్ట్రంలో 10 లక్షల మందికి పైగా కిషోర బాలికలకు నాణ్యమైన బ్రాండెడ్ శానిటరీ నాప్కిన్స్ ఉచితంగా పంపిణీ చేస్తున్నట్లు తెలిపారు. ప్రభుత్వ పాఠశాలలు, కళాశాలల్లో చదువుతున్న 7 నుండి 12 వ తరగతి వరకు గల కిషోర బాలికలకు నెలకు 10 చొప్పున ఏదాదికి 120 నాప్కిన్స్ అందిస్తున్నట్లు చెప్పారు. ఇందుకు దాదాపు రు 32 కోట్లు ఖర్చు చేస్తున్నట్లు తెలిపారు. దేశంలో 23 శాతం మంది బాలికల చదువులు ఆగిపోవడానికి నెలసరి పీరియడ్స్ లో ఏర్పడుతున్న ఇబ్బందులు కారణమని ఐక్యరాజ్య సమితి పారిశుధ్య విభాగం నివేదిక తెలియజేసింది. ఈ అంశాలపై అవగాహన కల్పించాలని పేర్కొన్నారు. వయస్సు పరంగా వస్తున్న మార్పుల పట్ల అరోగ్య పరంగా తీసుకోవలసిన సూచనలు, సలహాలు అందించాలని సూచించారు. మహిళా ఉపాధ్యాయులు, ఏఎన్ఎంలు, మహిళా పోలీసులు చైతన్యం కల్పించాలని అన్నారు. దిశా యాప్ డౌన్ లోడ్ చేసుకోవడం పట్ల కూడా ప్రతి నెల అవగాహన కల్పించాలని ఆయన ఆదేశించారు. పాఠశాలలు, కళాశాలల్లో ఒక మహిళా ఉపాధ్యాయులు, అధ్యాపకులు నోడల్ అధికారిగా నియమించడం జరుగుతోందని చెప్పారు. పర్యావరణ హితంగా డిస్పొజ్ చేయుటకు. రాష్ట్రంలో 6417 ఇన్సినేటర్లు ద్వారా డిస్పోజ్ చేయుటకు ఏర్పాట్లు చేస్తున్నట్లు ఆయన తెలిపారు. ఈ కార్యక్రమం శ్రీకాకుళంలో   ఏవియన్ నగర పాలక సంస్థ ఉన్నత పాఠశాలలో ఏర్పాటు చేశారు. జిల్లా కలెక్టర్ శ్రీకేష్ లాఠకర్ మాట్లాడుతూ జిల్లాకు 22 లక్షల శానిటరీ నాప్కిన్ లు సరఫరా అయ్యాయన్నారు. సాంఘిక సంక్షేమ వసతి గృహాల్లో ఉన్న 5,742, గిరిజన సంక్షేమ వసతి గృహాల్లో ఉన్న 2,731, ప్రాథమిక, ప్రభుత్వ, మున్సిపల్ ఉన్నత పాటశాలల్లో చదువుతున్న 60,391 మంది వెరసి 68,864 మందికి పంపిణీ చేశామన్నారు. శారీరక పరిశుభ్రత గూర్చి అవగాహన కలిగించాలని జిల్లా కలెక్టర్ విద్యార్థులను సూచించారు. ఈ కార్యక్రమంలో జాయింట్ కలెక్టర్ డా. కె.శ్రీనివాసులు, ఐసిడిఎస్ పిడి జి.జయదేవి, ఇన్ ఛార్జ్ డిఇఓ జి.పగడాలమ్మ, సమగ్ర శిక్ష అభియాన్ ఏపిసి తిరుమల చైతన్య, పి.ఇందిరామణి, తదితరులు పాల్గొన్నారు.

శ్రీకాకుళం జిల్లాలోని శ్రీ శ్రీ శ్రీ సూర్యనారాయణ స్వామి వారిని రాష్ట్ర పర్యాటక సాంస్కృతిక శాఖ మంత్రి ముత్తంశెట్టి శ్రీనివాసరావు దర్శించుకున్నారు. సోమవారం అరసవల్లి శ్రీ శ్రీ శ్రీ సూర్యనారాయణ స్వామి వారి దేవాలయాన్ని సందర్శించి స్వామి వారిని దర్శించుకున్నారు. భక్తి శ్రద్ధలతో స్వామి వారికి పూజలు నిర్వహించారు. ప్రత్యేక పూజలు నిర్వహించి వేద పండితులు ఆశీర్వచనములు పలికారు. అనంతరం ఆలయ కార్యనిర్వహణాధికారి సూర్య ప్రకాష్ మంత్రికి సన్మానించి సూర్యనారాయణ స్వామి వారి ఛాయాచిత్ర ఫొటో ను అందజేశారు.  ఈ కార్యక్రమంలో శ్రీకాకుళం రెవెన్యూ డివిజనల్ అధికారి ఐ. కిషోర్, తహసీల్దార్ వెంకటరావు, తదితరులు పాల్గొన్నారు.