డాక్టర్ బీఆర్ అంభేద్కర్ ఒక దార్శనీకుడని డాక్టర్ బి.ఆర్ అంబేద్కర్ ఆశాజ్యోతి అవుట్ సోర్సింగ్ ఉద్యోగుల అసోసియేషన్ అధ్యక్షుడు పడాల రమన అన్నారు. ఆదివారం అంబేద్కర్ 64 వ వర్ధంతి సందర్భంగా జీవీఎంసీ జోన్ 3 ఆధ్వర్యంలో సీతమ్మధార పాప హోమ్ లో విద్యార్థులకు అసోసియేషన్ తరఫున ఆర్థిక సహాయం చేశారు. ఈ సందర్భంగా అధ్యక్షులు పడాల రమణ మాట్లాడుతూ, అంభేద్కర్ ఆశయ సాధనలో ఔట్ సోర్సింగ్ ఉద్యోగులంమంతా భాగస్వాములమవుతామని అన్నారు. ప్రతీఏటా ఆ మహాన భావుని పేరుతో ఈ తరహా సేవకార్యక్రమాలు చేపడుతున్నట్టు వివరించారు. ఈ కార్యక్రమంలో సత్యనారాయణ లింగాల వెంకటేష్, డాక్టర్ బి.ఆర్ అంబేద్కర్ ఔట్సోర్సింగ్ ఎంప్లాయిస్ అసోసియేషన్ అధ్యక్షుడు బొట్టా అప్పలరాజు, బోని రామకృష్ణ, పిని పిల్లి కనకరాజు, ఏ.రాంబాబు బి.నాగేశ్వరావు, వేణు తదితరులు పాల్గొన్నారు.
ఉద్యోగ విరమణ చేయడం ఆ స్థానానికి మాత్రమేనని, సేవలకు కాదని శ్రీకాకుళం శాసన సభ్యులు ధర్మాన ప్రసాద రావు అన్నారు. ఒక వ్యక్తి ఓపిక, సహనం మేరకు సామాజిక సేవ ఏ వయస్సు వరకైనా చేయవచ్చని ఆయన పేర్కొన్నారు. ఎచ్చెర్ల ప్రభుత్వ ఐటిఐ ప్రిన్సిపాల్ గా, జిల్లా ఐటిఐల కన్వీనర్ గా పనిచేసి నవంబరు 30న పదవీ విరమణ చేసిన రాడా కైలాసరావుకు అభినందన సభ ఆదివారం జిల్లా పరిషత్ సమావేశ మందిరంలో జరిగింది. ఈ కార్యక్రమానికి ధర్మాన ప్రసాద రావు ముఖ్య అతిథిగా హాజరయ్యారు. రాడా కైలాసరావు దంపతులకు ఘనంగా సన్మానించారు. ఈ సందర్భంగా ప్రసాదరావు మాట్లాడుతూ సమాజ సేవ చేయుటకు వయస్సు అడ్డంకి కాదన్నారు. సమాజంలో ఇంకా అనేక రంగాల్లో మంచి సేవలు అందాల్సిన పరిస్ధితులు ఉన్నాయని వాటిలో నచ్చిన రంగాన్ని ఎన్నుకుని సేవలు అందించుటకు ముందుకు రావాలని ఆయన పిలుపునిచ్చారు. పదవీ విరమణ చేసిన అనంతరం జీవితం సమాప్తం అయిందనే ఆలోచనకు చాలా మంది వస్తుంటారని, అది సరికాదని ఆయన పేర్కొన్నారు. పదవీ విరమణ అనంతరం కొన్ని బాధ్యతల నుండి మాత్రమే తప్పుకోవడం జరుగుతుందని, అనంతరం స్వచ్ఛందంగా సేవలు అందించవచ్చని సూచించారు. కైలాసరావు విధుల నిర్వహణలో అంకితభావం ప్రదర్శించారని, విద్యార్ధులను తీర్చిదిద్దడంలోను, ఐటిఐలను ఉన్నతంగా తీర్చిదిద్దడంలోను చొరవ చూపించారని ప్రశంసించారు. విధులు అంకితభావంతో నిర్వహిస్తే మంచి సంతృప్తి లభిస్తుందని ఆయన పేర్కొన్నారు. సమాజ హితానికి, అయా శాఖలు అందించే సేవలను మనస్ఫూర్తిగా అందించి ప్రజల గుండెల్లో చిరస్ధాయిగా నిలవాలని అన్నారు. కైలాస రావు విధుల నిర్వహణలో ఉంటూ సమాజ హితం గూర్చి ఆలోచించిన వ్యక్తి అన్నారు. తన భౌతిక కాయాన్ని మరణానంతరం వైద్య పరిశోధనలకు దానం చేసిన వ్యక్తి అన్నారు. ఇటువంటి వ్యక్తులు సమాజానికి అవసరమని కొనియాడారు.
ఐటిఐల ప్రాంతీయ ఉప సంచాలకులు ఆర్.వి.రమణ మాట్లాడుతూ కైలాస రావు మంచి సేవలు అందించారన్నారు. ఐటిఐలు అభివృద్ధి కావాలనే తపనతో సేవలు అందించారని పేర్కొన్నారు. సహృదయులని, అందిరితో ప్రేమ పూర్వకంగా ఉంటారని ఆయన అన్నారు. పనిలో పెండింగు సమస్య ఉండదని ఆయన పేర్కొన్నారు.
వంశధార పర్యవేక్షక ఇంజనీరు డోలా తిరుమల రావు, జలవనరుల శాఖ పర్యవేక్షక ఇంజనీరు ఎస్.వి.రమణ, ప్రజారోగ్య శాఖ కార్యనిర్వాహక ఇంజనీరు పి.సుగుణాకర రావు, రెడ్ క్రాస్ రాష్ట్ర ఉపాధ్యక్షులు పి.జగన్మోహన రావు, రెడ్ క్రాస్ జిల్లా ఉపాధ్యక్షులు డా.కె.సుధీర్, ఏపిఐడిసి మాజీ డైరక్టర్ మొదలవలస రమేష్ మాట్లాడుతూ కైలాస రావు సేవలను ప్రశంసించారు. ఈ కార్యక్రమానికి గులోన వ్యాఖ్యతగా వ్యవహరించారు. కార్యక్రమంలో పర్యాటక అధికారి ఎన్.నారాయణ రావు, ప్రైవేటు ఐటిఐల రాష్ట్ర ఉపాధ్యక్షులు చిట్టి నాగభూషణం, సుదర్శన రావు, ఎస్.కె.నాయుడు, వావిలాపల్లి జగన్నాథం నాయుడు, ఎస్.జోగినాయుడు, విశాఖపట్నం, విజయనగరం, శ్రీకాకుళం జిల్లాల్లోని వివిధ ఐటిఐల శిక్షణాధికారులు, సిబ్బంది, కైలాసరావు కుటుంబ సభ్యులు, బంధువులు తదితరులు పాల్గొన్నారు.
ప్రభుత్వ విప్ దాడిశెట్టి రాజాను తన కార్యాలయంలో ఆంధ్రామెడికల్ కాలేజి ప్రిన్సిపల్ డా.సుధాకర్ ఆదివారం మర్యాదపూర్వకంగా కలిశారు. ఈ సందర్భంగా ఆయనకు పుష్ఫగుచ్చం అందజేసి శుభాకాంక్షలు తెలియజేశారు. అనంతరం దాడిశెట్టి రాజా ఆంధ్రామెడికల్ కాలేజీ అభివ్రుద్ధిని, చేపట్టబోయే కార్యక్రమాలను ప్రిన్సిపల్ ను అడిగి తెలుసుకున్నారు. ఈ సందర్భంగా విప్ దాడిశెట్టిరాజా మాట్లాడుతూ, త్వరలోనే కెజిహెచ్ రూపురేఖలు మారిపోతాయని ప్రిన్సిప్ లకు వివరించారు. ప్రభుత్వం విద్య, వైద్యం, ఉపాది రంగాలకు అధిక ప్రాధాన్యత ఇస్తోందన్నారు. అందులో భాగంగానే కెజిహెచ్ లో రోగులకు సేవలు అందించేందుకు పెద్ద సంఖ్యలో స్టాఫ్ నర్సులను భర్తీచేసిందన్నారు. రానున్న రోజుల్లో మిగిలిన పారామెడికల్ పోస్టుల భర్తీ కూడా చేసి ఉత్తరాంధ్రాకే తలమానికంగా కెజిహెచ్ ను ప్రభుత్వం తీర్చిదిద్దుతుందని చెప్పారు. ప్రభుత్వ పరంగా ఏ సమస్య వచ్చినా దానిని తీర్చడానికి తమవంతు సహకారం అందిస్తామని చెప్పారు.
రాజ్యాధికారం సాధించేవరకు నిరంతర పోరాటం చేయాల్సిన ఆవశ్యకత ఎంతైనా ఉందని డాక్టర్ బి.ఆర్ అంబేద్కర్ రాజకీయ చైతన్య వేదిక ఆవిర్భావ సభలో వక్తలుక్తులు అభిప్రాయపడ్డారు. ఆదివారం పబ్లిక్ లైబ్రరీ లో జరిగిన కార్యక్రమంలో అంబేద్కర్ వాది, అంబేద్కర్ మెమోరియల్ సొసైటీ గౌరవ అధ్యక్షులు బొడ్డు కళ్యాణ్ రావు అధ్యక్షతన జరిగిన కార్యక్రమంలో ఆయన మాట్లాడుతూ కేవలం మనువాద పార్టీలే రాజకీయ అధికారాన్ని చలా ఇస్తున్నారన్నారు. బహుజన వాదులందర్ని ఒక వేదిక పైకి తీసుకు వచ్చేందుకు ఈ చైతన్య వేదిక ఏర్పాటు చేశామన్నారు. మన గురించి మనం ఆలోచించుకోవాల్సిన అవసరం ఉందన్నారు. వెబ్సైట్ జైరాజ్ మాట్లాడుతూ సమాజంలో బ్రాహ్మణ వాదం, బహుజనవాదం మాత్రమే ఉన్నాయన్నారు. మోసపూరితంగా బహుజనులను మభ్యపెట్టి బ్రాహ్మణ వాదులు అధికారాన్ని చలాఇస్తున్నారన్నారు. పెట్టుబడిదారీ వర్గం , బ్రాహ్మణ వాదంతో రాజ్యాధికారం పొందుతున్నారు అన్నారు. దళిత హక్కుల పోరాట సమితి రాష్ట్ర అధ్యక్షులు జె వి ప్రభాకర్ రావు మాట్లాడుతూ బహుజనులు రాజ్యాధికారం దిశగా నిరంతరం పోరాటం చేయాలని అన్నారు. అంబేద్కర్ ఆశయ సాధనకు బహుజనలంతా కృషి చేయాలని కోరారు .రాజ్యాంగం కల్పించిన గొప్ప అవకాశాన్ని సద్వినియోగం చేసుకోవాలన్నారు. రాజ్యాధికారం కోసం ఆర్థికంగా బలోపేతం కావాల్సిన అవసరం కూడా ఉందన్నారు .ఎస్సీ, ఎస్టీ, బీసీ , మైనార్టీలు 50 శాతం పైగా ఉన్నా అధికారం చేజిక్కించుకోలేకపోవడంలో ఐక్యత లేకపోవడమే కారణమని అన్నారు. రాజకీయ ప్రణాళిక అవసరమన్నారు. రాజకీయ చైతన్యం కోసం ఈ వేదికను ఏర్పాటు చేశామన్నారు. రైతు నాకు వ్యతిరేకంగా కేంద్రం ప్రవేశపెట్టిన మూడు చట్టాలను రద్దు చేసే వరకు వారు చేస్తున్న పోరాటానికి మద్దతు ఇస్తామని, 8 వ తేదీన తలపెట్టిన బందుకు పూర్తి మద్దతు ప్రకటిస్తూ ఈ సందర్భంగా తీర్మానాన్ని ఆమోదించారు. అదేవిధంగా కరెంటు బిల్లు రద్దు చేయాలని, కాలుష్యం పై పెట్టిన అక్రమ కేసులు రద్దు చేయాలని కోరారు. న్యాయవాది గిరిజన మాట్లాడుతూ దేశంలోని మనువాద పార్టీలు బహుజనులను మింగేస్తున్నారన్నారు. బడుగు వర్గాలను అణగదొక్కడానికి కుట్ర జరుగుతుందన్నారు. ఈ కార్యక్రమంలో డాక్టర్ అర్జున్, ప్రొఫెసర్ ప్రజ్ఞ, టీ గురుమూర్తి,ఐఎం మహ్మద్, గిరిధర్, ప్రసాద్ రావు, పి మల్లేష్, ప్రకాష్ రావు,మాటూరి శ్రీనివాస్, లూధర్ బాబు,డాౠకెఎల్.రావు తదితరులు పాల్గొన్నారు
చదువుతోనే మంచి భవిష్యత్తు, శాశ్వత ఆనందం లభిస్తుందని జిల్లా విద్యాశాఖాధికారి జి.నాగమణి అన్నారు. జీవితంలో గెలుపు కావాలంటే ప్రతీ వ్యక్తి, విద్యార్థీ తప్పకుండా పుస్తక పఠనం అలవాటుగా చేసుకోవాలని పేర్కొన్నారు. రాష్ట్ర ప్రభుత్వం విద్యాశాఖ ఆధ్వర్యంలో ఇటీవల ప్రారంభించిన "చదవడం మాకిష్టం" కార్యక్రమం స్థానిక గురజాడ స్మారక కేంద్ర జిల్లా గ్రంథాలయంలో ఆదివారం నిర్వహించారు. కార్యక్రమంలో ముఖ్య అతిథిగా డీఈవో పాల్గొని మాట్లాడారు. కార్యక్రమంలో ముందుగా "చదవడం మాకిష్టం" పేరుతో ఉన్న ప్రచార పత్రాన్ని, బ్రోచేర్ని ఆవిష్కరించారు. అనంతరం డీఈవో మాట్లాడుతూ మంచి భవిష్యత్తు, ఆనందకరమైన జీవితం కావాలంటే విద్యార్థి దశలోనే కష్టపడాలని సూచించారు. పుస్తక పఠనం అలవాటుగా చేసుకోవాలని, దాని ద్వారా మనోవికాసం సాధ్యమవుతుందని పేర్కొన్నారు. విద్యార్థులకు మంచి భవిష్యత్తు ఇవ్వాలనే సంకల్పంతోనే రాష్ట్ర ప్రభుత్వం చదవడం మాకిష్టం కార్యక్రమాన్ని ప్రవేశపెట్టిందని ఈ అవకాశాన్ని ప్రతి విద్యార్థీ సద్వినియోగం చేసుకోవాలని హితవు పలికారు. దీని అమలులో ప్రతి ఉపాధ్యాయుడు భాద్యతగా ఉండాలని ఆదేశించారు. జిల్లాలో అన్ని ప్రభుత్వ పాఠశాలల్లో ప్రతి ఆదివారం ఈ కార్యక్రమం చేపడతామని చెప్పారు. మండల కేంద్రాల్లో గ్రంథాలయాల్లో, గ్రామీణ ప్రాంతాల్లో ప్రత్యేక ప్రాంతాల్లో రీడింగ్ కేంద్రాలను ఏర్పాటు చేస్తామని వివరించారు. మహనీయుల జీవిత చరిత్రలు, కథలు, బాలల సాహిత్యంతో కూడిన అనేక పుస్తకాలు ఆయా కేంద్రాల్లో అందుబాటులో ఉంచుతామని వెల్లడించారు. విద్యార్థులు సినిమాలు, సీరియల్స్, ఫోన్ ప్రభావం నుంచి బయట పడాలంటే చదువు ఒక్కటే మంచి వేదిక అని పేర్కొన్నారు. ఈ కార్యక్రమాన్ని విజయవంతం చేసేందుకు ప్రతి ఉపాధ్యాయుడు, విద్యార్ధి తల్లిదండ్రులు భాద్యతగా వ్యవహరించాల్సిన ఆవశ్యకత ఎంతైనా ఉందన్నారు.
కార్యక్రమంలో జిల్లా గ్రంథాలయాల సంస్థ కార్యదర్శి ఎన్.లలిత, డైట్ కళాశాల ప్రిన్సిపాల్ ఎన్.తిరుపతి నాయుడు, చదవడం మాకిష్టం ప్రాజెక్ట్ కో - ఆర్డినేటర్ నాగవల్లి, ఏ.ఎం.వో. బి.అప్పారావు, బాల సాహిత్యం కో - ఆర్డినేటర్, తెలుగు పండిట్ జి.ఎస్.చలం విద్యార్థులను ఉద్దేశించి మాట్లాడారు. చదువు ఆవశ్యకతను, పుస్తక పఠనం ప్రాముఖ్యతను వివరించారు. వివిధ పాఠశాలల విద్యార్థులు, గ్రంథాలయ పాఠకులు పాల్గొన్నారు.
అసమానతలు లేని పారదర్శకమైన పాలన ముఖ్యమంత్రి వైఎస్ జగన్ మోహన్ రెడ్డి రాష్ట్ర ప్రజలకు అందిస్తున్నారని రాష్ట్ర సాంఘిక సంక్షేమ శాఖ మంత్రి పినిపే విశ్వరూప్ అన్నారు. ఆదివారం నవభారత రాజ్యాంగ నిర్మాత డా.బాబా సాహెబ్ అంబేద్కర్ 64 వ వర్ధంతిని పురస్కరించుకుని అమలాపురం మద్దాలవారి పేట లో అంబేద్కర్ విగ్రహానికి మంత్రి పూల మాలలు వేసి ఘనంగా నివాళులు అర్పించారు. ఈ సందర్భంగా మంత్రి మాట్లాడుతూ ప్రపంచ మేధావి డా. బాబా సాహెబ్ అంబేద్కర్ ఆలోచనా విధానం తో ముఖ్యమంత్రి జగన్ మోహన్ రెడ్డి రాష్ట్రంలో ఎస్.సి.ఎస్టీ,ఇతర వర్గాలమధ్య తేడా లేకుండా అన్ని వర్గాలవారికి సమాన ప్రాధాన్యత కల్పిస్తూ జనరంజకమైన పాలన రాష్ట్ర ప్రజలకు అందిస్తున్నారని మంత్రి కొనియాడారు. భారత దేశానికి అంబేద్కర్ అందించిన రాజ్యాంగం కారణం గానే ప్రపంచంలోనే అభివృద్ధి చెందుతున్న దేశాలలో ఒక్కటిగా భారత దేశం ఎదిగిందని మంత్రి తెలియ చేసారు. స్త్రీ దాశ్య విమోచకడు బాబా సాహెబ్ మేధస్సును గుర్తించి ఈ రోజు ఆ మహా మేధావి కి దేశ ప్రధాని మొదలుకొని,రాష్ట్ర ముఖ్యమంత్రి, ఇతర రాష్ట్రాల ముఖ్య మంత్రులు మొదలుకొని ప్రపంచ దేశాల అధ్యక్షులు కూడా ఘనంగా నివాళులు అర్పించారని మంత్రి తెలిపారు.అలాగే అమలాపురం గడియార స్తంభం సెంటర్ లోను,మరియు ఈదరపల్లి ఒంతెన వద్ద కూడా మంత్రి అంబేద్కర్ విగ్రహానికి పూలమాలలు వేసి ఘనంగా నివాళులు అర్పించారు. ఈ కార్యక్రమంలో అమలాపురం మాజీ శాసన సభ్యులు కుడుపూడి చిట్టబ్బాయి,పట్టణ నాయకులు మట్ట పర్తి నాగేంద్ర, వాసంసెట్టి సత్యం, వాసంసెట్టి సుభాష్, చెల్లు బోయిన శ్రీనివాస్,ఒంటెద్దు వెంకన్నా యుడు, షేక్ అబ్దుల్ ఖాదర్,సంసాని బులినాని,తోట శ్రీను,అమలాపురం మార్కెట్ కమిటీ చైర్మన్ బొక్కా ఆదినారాయణ,వైస్ చైర్మన్ బాబి, తిరుకోటి సతీష్ కుమార్, ఉండ్రు వెంకటేష్, మెండు రమేష్, కొల్లాటి దుర్గాబాయి,కర్రి రాఘవులు ,నాగారపు వెంకటేశ్వరరావు, పొలమూరి బాలకృష్ణ, తదితరులు పాల్గొన్నారు.
రాష్ట్రం లో ప్రతీ నిరుపేదకు సొంత ఇల్లు ఉండాలనేది ముఖ్యమంత్రి వైఎస్ జగన్ మోహన్ రెడ్డి ఆశయమని రాష్ట్ర సాంఘిక సంక్షేమ శాఖ మంత్రి పినిపే విశ్వరూప్ అన్నారు. ఈ నెల 25 వ తేదీన రాష్ట్ర ప్రభుత్వం ప్రతిష్టాత్మకంగా చేపట్టిన 26 లక్షల ఇళ్ళ పట్టాల పంపిణీ కార్యక్రమంలో భాగంగా అమలాపురం పట్టణ,మరియు గ్రామీణ నిరుపేదలకు ఇండ్ల స్థలాలు కేటాయింపు ప్రక్రియను మంత్రి లాటరీ విధానం ద్వారా ప్రారంచారు. ఆదివారం అమలాపురం లోని మంత్రి క్యాంప్ కార్యాలయంలో అమలాపురం పట్టణ, మరియు గ్రామీణ నిరుపేదలు మొత్తం 4648 మంది లబ్ధిదారులకు మంత్రి లాటరీ ద్వారా ఇండ్ల స్థలాలను కేటాయించడం జరిగింది.ఇందులో పట్టణ నిరుపేదలు(లబ్ధిదారులు) 2454 మంది కాగా గ్రామీణ నిరుపేదలు(లబ్ధిదారులు)2194 మంది. ఈ సందర్భం గా మంత్రి మాట్లాడుతూ నిరుపేదల సంక్షేమమే ధ్యేయంగా ముఖ్యమంత్రి పారదర్శకమైన పాలన ప్రజలకు అందిస్తున్నారని మంత్రి తెలిపారు. ప్రతీ నిరుపేదకు సంక్షేమ ఫలాలు అందాలనే లక్ష్యం తో ముఖ్య మంత్రి పనిచేస్తున్నారని,రాష్ట్రంలో ఇప్పటికే అనేక సంక్షేమ కార్యక్రమాలు ముఖ్యమంత్రి ప్రవేశపెట్టి అమలు చేస్తున్నారని మంత్రి తెలియ చేసారు.ఈ నెల 25 తేదీన రాష్ట్ర ప్రభుత్వం లక్షలాది నిరుపేదలకు ఇళ్ళ పట్టాల పంపిణీ కార్యక్రమాన్ని ఎంతో ప్రతిష్టాత్మకంగా చేపడుతోందని మంత్రి తెలిపారు.అదే రోజు అల్లవరం మండలం బోడసకుర్రు లో అమలాపురం పట్టణ నిరుపేదలు కొరకు నిర్మించిన 1632 టిడ్ కో భవనాలను లబ్ధిదారులకు అప్పగిస్తూ భవనాలకు సంభందించిన రిజిస్ట్రేషన్ ధృవీకరణ పత్రాలను లబ్ధిదారులకు అందజేయడం జరుగుతుందని మంత్రి తెలియ చేసారు. ఈ కార్యక్రమంలో అమలాపురం మునిసిపల్ కమీషనర్ వి.ఐ.పి. నాయుడు,మండల తహసీల్దార్ ఠాగూర్,మండల అభివృద్ధి అధికారి ప్రభాకరరావు,డిప్యూటీ తహసీల్దార్ అశోక్ తదితరులు పాల్గొన్నారు.
విద్యను అనంత శక్తిగా మార్చుకుని తన భవితను దిద్దుకున్న మహోన్నత వ్యక్తిగా బి.ఆర్ అంబేద్కర్ నిలుస్తారని ఏయూ వీసీ ఆచార్యపి.వి.జి.డి ప్రసాద రెడ్డి అన్నారు. అంబేద్కర్ వర్ధంతిని పురస్కరించుకుని ఆదివారం ఉదయం ఆంధ్రవిశ్వవిద్యాలయం పరిపాలనా భవనం ఎదురుగా ఉన్న అంబేద్కర్ విగ్రహానికి పూలమాల వేసి నివాళి అర్పించారు. అనంతరం మాట్లాడుతూ ఆయన జీవితం, విధానాలు నేటి యువతకు ఆదర్శనీయమన్నారు. విద్యతో దేశం గర్వించే నాయకుడిగా ఎదిగిన వ్యక్తిగా అంబేద్కర్ నిలచారన్నారు. ఆయన జీవితం నుంచి యువత స్ఫూర్తిని పొందాలని సూచించారు. కార్యక్రమంలో రెక్టార్ ఆచార్య కె.సమత, రిజిస్ట్రార్ ఆచార్య వి.క్రిష్ణమోహన్, పాలక మండలి సభ్యులు ఆచార్య టి.శోభశ్రీ, కిష్ణమంజరి పవార్, ఎస్సీ, ఎస్టీ ఉద్యోగులు సంఘం అద్యక్షులు ఆచార్య పి.అర్జున్, ఆటా అద్యక్షులు ఆచార్య జాలాది రవి, డీన్లు టి.షారోన్ రాజు, ఎన్.సత్యనారాయణ, జి.సుధాకర్, టి.వెంకట క్రిష్ణ, ఎన్.ఏ.డి పాల్, డాక్టర్ కె.ఎస్.ఎన్ మూర్తి, ఆచార్యులు, ఉద్యోగులు, పరిశోధకులు పెద్దసంఖ్యలో పాల్గొన్నారు
భారత రాజ్యాంగ నిర్మాత డాక్టర్ బిఆర్ అంబేద్కర్ యువతకు ఆదర్శమని డివైఎఫ్ఐ నగర కార్యదర్శి రాజు అన్నారు. ఆదివారం డా.బీఆర్ అంబేద్కర్ 64వ వర్ధంతి సందర్భంగా ఎల్ఐసీ భవనం వద్ద వున్న అంబేద్కర్ విగ్రహానికి పూలమాలలు వేసి ఘనంగా నివాళులు అర్పించారు. ఈ సందర్భంగా ఆయన మాట్లాడుతూ, కేంద్రంలో అధికారంలో ఉన్న బీజేపీ రాజ్యాంగ హక్కులను కాలరాస్తూ యువతకు ఉద్యోగ అవకాశాలు దక్కకుండా చేస్తుందన్నారు. బీజేపి రెండోసారి అధికారంలోకి వచ్చిన తరువాత అత్యధిక స్థాయిలో ఉద్యోగాలు కల్పిస్తామని చెప్పి యువతను మోసం చేసిందని ఆరోపించారు. వెంటనే ఉద్యోగాలకు నోటిఫికేషన్లు ఇవ్వాలని, ఉపాధి కల్పించాలని డిమాండ్ చేశారు. దళితుల పైన దాడులు చేయడం రాజ్యాంగ స్ఫూర్తికి విరుద్ధమని దీనిని ప్రజలంతా ఖండించాలని కోరారు. అంబేద్కర్ ఆశయ సాధన కోసం భారత ప్రజాతంత్ర యువజన సమాఖ్య(డీవైఎఫ్ఐ) నిరంతరం పోరాడుతుందన్నారు. ఈ కార్యక్రమంలో డివైఎఫ్ఐ నగర ఉపాధ్యక్షులు గణేష్ నాయకులు సాయి తేజ, వేణు, భానుప్రకాష్, బబ్లు తదితరులు పాల్గొన్నారు.
భారత రాజ్యాంగ నిర్మాత, దళితుల ఆరాధ్య దైవం డాక్టర్ బిఆర్ అంభేత్కర్ ఆశయ సాధనకు ప్రతీ ఒక్కరూ క్రుషిచేయాలని రాష్ట్ర పర్యాటకశాఖ మంత్రి ముత్తం శెట్టి శ్రీనివాసరావు పిలుపు నిచ్చారు. ఆదివారం డా.బిఆర్ అంబేత్కర్ వర్ధంతి సందర్భంగా విశాఖ పార్టీ కార్యాలయంలో వైఎస్సార్సీపీ ఎస్సీ విభాగం ఏర్పాటు చేసిన కార్యక్రమంలో ఆయన పాల్గొని అంబేత్కర్ విగ్రహానికి పూలమాలలు వేసి ఘనంగా నివాళులు అర్పించారు. ఈ సందర్భంగా మంత్రి మాట్లాడుతూ, అనగారిన వర్గాల అభ్యున్నతికి క్రుషి చేసిన మహా మనిషి అంభేత్కర్ అని కొనియాడారు. ఆయన రచించిన భారత రాజ్యంగం వలనే మనకు ఎన్నో హక్కులు సంక్రమించాయని చెప్పారు. ఆయన స్పూర్తితోనే దళిత సామాజిక వర్గం అభివ్రుద్ధికి కూడా సీఎం వైఎస్ జగన్మోహనరెడ్డి ఎన్నో సంక్షేమ పథకాలు ప్రవేశపెట్టారని అన్నారు. దళితుల అభ్యున్నతికి తమ ప్రభుత్వం ఎల్లప్పుడూ క్రుషి చేస్తూనే ఉంటుందని అన్నారు. తరువాత ఎల్ఐసీ భవనం దగ్గర అంబేత్కర విగ్రహానికి పూల మాలలు వేసి నివాళులు అర్పించారు. ఈ కార్యక్రమంలో ఎస్సీ విభాగం అధ్యక్షులు బోని శివరామక్రిష్ణ, పార్లమెంట్ జిల్లా అధ్యక్షులు రెయ్య వెంకట రమణ, నగర అధ్యక్షులు వంశీక్రిష్ణ శ్రీనివాస్, ఎంపీ ఎంవీవీ సత్యన్నారాయణ, ఎమ్మెల్యేలు గొల్లబాబూరావు, చెట్టిపాల్గున, శాసనమండలి సభ్యులు సురేష్, సమన్వయ కర్త లు మళ్ల విజయ ప్రసాద్, కే.కే రాజు, రాష్ట్ర కార్పొరేషన్ చైర్మన్లు కోలా గురువులు, మధుసూదన రావు, పి సుజాత,మాజీ శాసనసభ్యులు కుంభ రావి బాబు,ఎస్ ఎ రెహ్మాన్, పార్టీ అదనపు కార్యదర్శి రవి రెడ్డి తదితరులు పాల్గొన్నారు.
ఆంధ్రవిశ్వవిద్యాలయం ఇంజీనిరింగ్ కళాశాలలోని సెంటర్ ఫర్ ఎక్సలెన్స్కు రూ 2 కోట్లు నిధులు మంజూరయ్యాయి. ఈ సందర్భంగా ఇంజనీరింగ్ కళాశాల ప్రిన్సిపాల్ ఆచార్య పేరి శ్రీనివాస రావు, టెక్విప్ సమన్వయకర్త ఆచార్య భాస్కర రెడ్డిలను వీసీ ఆచార్య పి.వి.జి.డి ప్రసాద రెడ్డి అభినందించారు. టెక్విప్ 2 పథకంలో ఇప్పటికే ఇంజనీరింగ్ కళాశలకు రూ 7 కోట్లు మంజూరు అయిందని, దీనికి అదనంగా సెంటర్ ఫర్ ఎక్సలెన్స్నుకు అదనంగా రూ 2 కోట్లు మంజూరు చేసినట్లు వీసీకి వివరించారు. సెంటర్ ఫర్ ఎక్సలెన్స్లో భాగంగా నానో టెక్నాలజీ సెంటర్, ఫ్యూయల్ సెల్స్ ల్యాబ్లను ఏయూ ఇంజనీరింగ్ కళాశాల నెలకొల్పి పరిశోధనలు జరుపుతోందన్నారు. ఈ నిధులను ఈ పరిశోధన కేంద్రాలను మరింత బలోపేతం చేసే దిశగా వినియోగిస్తామన్నారు.
ఈ సందర్భంగా వీసీ ఆచార్య పి.వి.జి.డి ప్రసాద రెడ్డి మాట్లాడుతూ వర్సిటీలో పరిశోధనలకు, ఆవిష్కరణలకు అధిక ప్రాధాన్యం కల్పించడం జరుగుతుందన్నారు. ఆచార్యులు, పరిశోధకులు నవ్య, సమాజ ఉపయుక్తంగా పరిశోధనలు, ఆవిష్కరణలు జరపాలన్నారు.ఈ దిశగా వర్సిటీ పరంగా అవసరమైన సహకారాన్ని అందిస్తామన్నారు. నిధులను ఉపయుక్తంగా నిలుపుకుంటూ పరిశోధన కేంద్రాలు పూర్తిస్థాయిలో పనిచేస్తూ నిర్ధేశిత లక్ష్యాలను సాధించాలని సూచించారు. కార్యక్రమంలో రిజిస్ట్రార్ ఆచార్య వి.క్రిష్ణమోహన్ తదితరులు పాల్గొన్నారు.
విద్యార్థుల్లో పుస్తక పఠనాసక్తిని పెంపొందించాల్సిన అవసరం ఉందని ఏయూ వీసీ ఆచార్య పి.వి.జి.డి ప్రసాద రెడ్డి అన్నారు. శనివారం మద్యాహ్నం ఏయూ వీసీ కార్యాలయంలో ఏయూ ఇంజనీరింగ్ కళాశాల ఇంజనీరింగ్ మేథమేటిక్స్ విభాగం ఆచార్యులు వి.వి బసవ కుమార్ రచించిన గ్రాడ్యుయేట్ ఇంజనీరింగ్ మేథమేటిక్స్ పుస్తకాన్ని ఆవిష్కరించారు. అనంతరం మాట్లాడుతూ శాస్త్రీయ అంశాలతో పుస్తకాలను రచించడం ఎంతో క్లిష్ణమైన పక్రియ అన్నారు. విద్యార్థులకు సులభంగా అర్ధమయ్యే రీతిలో, ఆసక్తి కరంగా అంతర్జాతీయ ప్రమాణాలతో పుస్తక రచన చేయడం అభిలషనీయమన్నారు. పుస్తక రచయిత బసవ కుమార్ను అభినందించారు. పుస్తక రచయిత ఆచార్య వి.వి బసవ కుమార్ మాట్లాడుతూ పుస్తకంలో సులభంగా అర్ధమయ్యే విధంగా విషయాలను తెలియజేయడం, ఎక్కువగా ఉదాహరణలో వివరించడం, గణిత భావనలు విపులంగా తెలియజేయడం జరిగిందన్నారు. లీనియర్ ఆల్జీబ్రా-కాలిక్యులస్, న్యూమరికల్ మెథడ్స్, సీరీస్, డిఫరెన్షియల్ ఈక్వేషన్స్, ట్రాన్స్ఫార్మర్స్, కాంప్లెక్స్ అనాలసిస్, స్టాటస్టిక్స్-ప్రోబబులిటీ, లీనియర్ పోగ్రామింగ్ తదితర అంశాలను పొందుపరచడం జరిగిందన్నారు. గతంలో సైతం తాను రచించిన న్యూమరికల్ అనాలసిస్- ఇంటరాటివ్ మెథడ్స్ పుస్తకానికి మంచి ఆదరణ లభించిందన్నారు. కార్యక్రమంలో రిజిస్ట్రార్ ఆచార్య వి.క్రిష్ణమోహన్, ఇంజనీరింగ్ కళాశాల ప్రిన్సిపాల్ ఆచార్య పేరి శ్రీనివాస రావు ఇంజనీరింగ్ మేథమేటిక్స్ విభాగాధిపతి శాంతి సుందర్ రాజ్ తదితరులు పాల్గొన్నారు.
ఆంధ్రవిశ్వవిద్యాలయం వృక్షశాస్త్ర విభాగ పరిశోధకురాలు చికిలే శాంతి దేవికి వర్సిటీ డాక్టరేట్ లభించింది. శనివారం ఉదయం వర్సిటీ వీసీ ఆచార్య పి.వి.జి.డి ప్రసాద రెడ్డి తన కార్యాలయంలో శాంతి దేవికి పుష్పగుచ్చం అందజేసి అభినందించారు. విభాగ ఆచార్యులు డి.సంధ్యా దీపిక పర్యవేక్షణలో ‘అనాలసిస్ ఆఫ్ వాటర్ టు చెక్ ఇట్స్ ప్రోబబులిటీ ఇన్ టెన్ పంచాయత్స్, ఆప్ అనంతగిరి మండల్, విశాఖపట్నం’ అంశంపై జరిపిన పరిశోధనకు డాక్టరేట్ లభించింది. ఈ సందర్భంగా శాంతి దేవిని విభాగ ఆచార్యులు, పరిశోధకులు అభినందించారు.
ఏపి అమూల్ ప్రాజెక్ట్ ద్వారా గ్రామాలలో పాల సేకరణ పెంచేందుకు సంబంధిత మదనపల్లె, రామసముద్రం ఎంపిడిఓ లు మరియు వారి పరిధిలోని సచివాలయ సిబ్బంది చర్యలు తీసుకోవాలని జిల్లా కలెక్టర్ డా. నారాయణ భరత్ గుప్త పేర్కొన్నారు. శనివారం స్థానిక ఆర్ డిఓ కార్యాలయంలో జిల్లా కలెక్టర్ అమూల్ పాల సేకరణ పై మదనపల్లె, రామసముద్రం మండలాల ఎంపిడిఓ లు, వారి పరిధిలోని సచివాలయ సిబ్బందితో జిల్లా కలెక్టర్ వీడియో కాన్ఫరెన్స్ నిర్వహించారు. ఈ సందర్భంగా జిల్లా కలెక్టర్ మాట్లాడుతూ పాలు పొసే వారికి పాలల్లో ఫ్యాట్, ఎస్ ఎన్ ఎఫ్ ఎలా పెంచుకోవాలనే దాని పై అధికారులు అవగాహన కల్పించాలన్నారు. గ్రామ స్థాయిలో రైతులకు ఏ పి అమూల్ ప్రాజెక్ట్ కు పాలు పోసిన యెడల మంచి ధర వస్తుందనే విషయాన్ని పశు సంవర్థ క శాఖ వారు ప్రచురించిన కరపత్రాల ద్వారా అధికారులు రైతులకు అవగాహన కార్యక్రమాలు నిర్వహించి పాల ఉత్పత్తినీ పెంచేందుకు సహకరించాలన్నారు. అమూల్ ప్రాజెక్ట్ కొరకు చిత్తూరు జిల్లాలో వంద సెంటర్ల ద్వారా పాల సేకరణ జరుగుతూ ఉందని తెలిపారు. ఇంకా ఈ పాల సేకరణ ను పెంచాల్సిన అవసరం ఉందన్నారు. ఈ పాల సేకరణ బాధ్యతను సంబంధిత ఎంపిడివో లు చేపట్టాలన్నారు. ఈ కార్యక్రమంలో జాయింట్ కలెక్టర్ (సంక్షేమం) వి. వీరబ్రహ్మం, పశు సంవర్థక శాఖ జె డి వెంకట్రావు, తదితరులు పాల్గొన్నారు.
శ్రీకాకుళం జిల్లా ఎచ్చెర్ల మండలం సంతసీతారాం పురం మహిళా పోలీసు, గ్రామ సచివాలయ అడ్మిన్ పంచాయతీ కార్యదర్శిని సస్పెన్షన్ చేసినట్లు వార్డు, గ్రామ సచివాలయ, అభివృద్ధి విభాగం జాయింట్ కలెక్టర్ డా.కె.శ్రీనివాసులు తెలిపారు. ఈ మేరకు శని వారం ఒక ప్రకటనలో తెలిపారు. సంతసీతారాం పురం మహిళా పోలీసు విధులకు గైర్హాజరు కావడం జరుగుతుందని విచారణలో తేలిందని ఆయన పేర్కొన్నారు. కార్యాలయానికి గైర్హాజరు కావడమే కాకుండా ఇంటి వద్ద నుండి బయోమెట్రిక్ హాజరు వేయడం వంటి కార్యకలాపాలు నిర్వహిస్తుండటం జరుగుతుందని, అందుకు అడ్మిన్ పంచాయతీ కార్యదర్శి సహకరిస్తున్నట్లు ప్రాథమిక విచారణలో నిరూపణ జరగిందన్నారు. ఇద్దరిపై ఫోర్జరీ కేసుతో సహా విధులకు గైర్హాజరుపై క్రమశిక్షణా చర్యలను చేపట్టడం జరుగుతుందని ఆయన స్ఫష్టం చేసారు. ఇద్దరిని సస్పెన్షన్ చేయడం జరిగిందని ఆయన తెలిపారు. గ్రామ సచివాలయ నిర్వహణ పర్యవేక్షణలో అలసత్వం వహించినందుకు గ్రామీణ అభివృద్ధి కార్యనిర్వాహక అధికారి (ఇఓ పిఆర్ డి)కి, మండల పరిషత్ అభివృద్ధి అధికారికి షోకాజ్ నోటీసులు జారీ చేసామని ఆయన పేర్కొన్నారు.
