రాష్ట్రంలోని దేవాలయాల అభివృద్ధికి ఈ ప్రభుత్వం చిత్తశుద్ధితో పని చేస్తుందని ఆంధ్రప్ర దేశ్ శాసన సభాపతి తమ్మినేని సీతారాం అన్నారు. స్థానిక మున్సిపల్ కార్యాలయంలో ఎండోమెంట్ అధికారులతో జరిగిన సమీక్ష సమావేశంలో స్పీకర్ తమ్మినేని మాట్లాడుతూ, ఆమదాలవలసలో శ్రీ సత్యనారాయణ స్వామి దేవాలయంకు 60 లక్షలు, తోగారం గ్రామంలో ఉన్న శ్రీ వల్లభ నారాయణ స్వామి దేవాలయంకి 50 లక్షలు,దివంజిపేట లో ఉన్న శ్రీ లక్ష్మీనరసింహస్వామి దేవాలయంకి 50 లక్షలు, కలివరం గ్రామంలో ఉన్న శ్రీ లక్ష్మీనరసింహస్వామి దేవాలయంకి 50 లక్షలు, బెల్లమాం గ్రామంలో ఉన్న శివాలయం కి 40 లక్షలు, రామచంద్రపురం గ్రామంలో ఉన్న శ్రీ వల్లభ నారాయణ స్వామి దేవాలయంకి 40 లక్షలు, గాజులకొల్లివలస గ్రామం లో ఉన్న పురాతన దేవాలయం సంగమేశ్వర దేవాలయం కి 30 లక్షలు, బూర్జ మండలం తమ్మీనాయుడుపేట గ్రామంలో ఉన్న విష్ణుమూర్తి దేవాలయంకి 40 లక్షలు చొప్పున ఈ ఎనిమిది దేవాలయాలకు నూతన దేవాలయాలు నిర్మించుకోవడానికి నిధులు మంజూరయ్యాయని స్పీకర్ తమ్మినేని అన్నారు. సభాపతి కృషివలన త్వరితగతిన దేవాలయాలకు నిధులు మంజూరయ్యాయని ఎండోమెంట్ ఏసి కే శిరీష అన్నారు. అదేవిధంగా గ్రామాలలో దేవాలయ కమిటీలు ఏర్పాటు చేసి ఉమ్మడి బ్యాంక్ ఎకౌంటు ఏర్పాటు చేసి ఆ అకౌంట్లో గ్రామ ప్రజల వాటా 20 శాతం డబ్బులు జమ చేయాలన్నారు ప్రభుత్వము నుండి మిగతా 80 శాతం నిధులను ఆ అకౌంట్లో జమ అవుతాయని ఆమె అన్నారు. త్వరితగతిన గ్రామాలలో దేవాలయ కమిటీలను ఏర్పాటు చేయాలని ఆయన అన్నారు. ఈ కార్యక్రమంలో సహకరించిన మాజీ దేవాదాయ శాఖ మంత్రి వెల్లంపల్లి శ్రీనివాస్ కి ప్రత్యేక ధన్యవాదాలు తెలియజేసుకుంటున్నానని స్పీకర్ తమ్మినేని సీతారాం అన్నారు. ఈ కార్యక్రమంలో ఎంపీపీ ప్రతినిధి కర్నేనా నాగేశ్వరరావు, జడ్పిటిసి బెజ్జీ పురపు రామారావు, మండల పార్టీ అధ్యక్షులు రాష్ట్ర అవుట్సోర్సింగ్ డైరెక్టర్ ఖండపు గోవిందరావు, మార్కెట్ కమిటీ చైర్మన్ గుమ్మడి రాంబాబు ఎండోమెంట్ ఏ సి కె శిరీష మరియు ఈ ఓ లు పాల్గొన్నారు.

ప్రస్తుత ర‌బీ సీజ‌నులో జిల్లాలోని రైతులు పండించిన ధాన్యం కొనుగోలు చేసేందుకు 167 రైతుభ‌రోసా కేంద్రాల ద్వారా సేక‌ర‌ణ‌కు ఏర్పాట్లు చేశామ‌ని జాయింట్ క‌లెక్ట‌ర్ మ‌యూర్ అశోక్ వెల్ల‌డించారు. మే 1వ తేదీ నుంచి ఈ కొనుగోలు కేంద్రాల ద్వారా ధాన్యం కొనుగోలు చేసేందుకు ఏర్పాట్లు చేశామ‌న్నారు. జిల్లాలోని రైతులంతా ర‌బీ సీజ‌నులో తాము పండించిన ధాన్యాన్ని రైతుభ‌రోసా కేంద్రాల్లో విక్ర‌యించి మ‌ద్ధ‌తు ధ‌ర పొందాల‌ని కోరారు. ఈ కొనుగోలు కేంద్రాల‌ను 78 ధాన్యం స‌హాయ‌క సంఘాల‌కు అనుసంధానం చేయ‌డం జ‌రిగింద‌న్నారు. జిల్లాలో ప్ర‌స్తుత ర‌బీలో 8,986 మెట్రిక్ ట‌న్నుల ధాన్యం దిగుబ‌డి వుంటుంద‌ని అంచ‌నా వేస్తున్నామ‌ని, ఇందులో 6,290 మెట్రిక్ ట‌న్నుల ధాన్యం కొన‌గోలుకు ఏర్పాట్లు చేస్తున్న‌ట్లు పేర్కొన్నారు. జిల్లాలోని ర‌బీ ధాన్యం కొనుగోలు కేంద్రాల సిబ్బందికి శిక్ష‌ణ కార్య‌క్ర‌మాన్ని జాయింట్ క‌లెక్ట‌ర్ మ‌యూర్ అశోక్ ఆధ్వ‌ర్యంలో గురువారం ఆనంద‌గ‌జ‌ప‌తి ఆడిటోరియంలో నిర్వ‌హించారు. ఈ సంద‌ర్భంగా జాయింట్ క‌లెక్ట‌ర్ మాట్లాడుతూ రైతులు ధాన్యం తెచ్చేందుకు అవ‌స‌ర‌మైన గోనె సంచుల‌ను పౌర‌స‌ర‌ఫ‌రాల సంస్థ స‌మ‌కూరుస్తుంద‌ని పేర్కొన్నారు. ధాన్యం ర‌వాణాకు కూడా ఏర్పాట్లు చేస్తున్నామ‌ని, రైతులు త‌మ సొంత ఖ‌ర్చుల‌తో ధాన్యం ర‌వాణాచేస్తే ర‌వాణా ఖ‌ర్చులు కూడా చెల్లిస్తామ‌న్నారు. రైతులు ఎవ‌రైనా ఇప్ప‌టివ‌ర‌కూ ఇ-క్రాప్ చేయించుకోనట్ల‌యితే వెంట‌నే రైతుభ‌రోసా కేంద్రాల‌కు వెళ్లి చేయించుకోవాల‌న్నారు. ఇప్ప‌టికే ధాన్యం విక్ర‌యించేందుకు సిద్ధంగా వున్న రైతులు రైతుభ‌రోసా కేంద్రాల్లో షెడ్యూలింగు చేసుకోవాల‌న్నారు.

ఈ సంద‌ర్భంగా జిల్లా వ్యవ‌సాయ అధికారి బి.టి.రామారావు, జిల్లా స‌హ‌కార అధికారి ఎస్‌.అప్ప‌ల‌నాయుడు, పౌర‌స‌ర‌ఫ‌రాల సంస్థ జిల్లా మేనేజ‌ర్ మీనా, పౌర‌స‌ర‌ఫ‌రాల అధికారి పాపారావు, వ్య‌వ‌సాయ మార్కెటింగ్ శాఖ అధికారి శ్యాం త‌దిత‌రులు వ్య‌వ‌సాయ స‌హాయ‌కులు, స‌హ‌కార సంఘాల సిబ్బంది త‌దిత‌రుల‌కు కొనుగోలు ప్ర‌క్రియ‌పై అవ‌గాహ‌న క‌లిగించారు.

ఉత్తరాంధ్రలో కవులు, కళాకారులు, రచయితలు, నటులకు కొదవలేదని, అన్నింటికి ఈ ప్రాంతం పుట్టినిల్లుగా బాసిల్లుతుందని సురక్ష ఆసుపత్రి అధినేత, జనసేన డాక్టర్స్ సెల్ రాష్ట్ర అధ్యక్షుడు డాక్టర్ బొడ్డేపల్లి రఘు అన్నారు. నగరానికి చెందిన ధనుంజయ్ ఆర్ట్స్, క్రాప్ట్స్ సంస్థ 25వ వార్షికోత్సవ వేడుకలు విశాఖ పౌరగ్రంథాలయంలో ఘనంగా నిర్వహించారు. ఈ కార్యక్రమంలో రఘుతో పాటు అప్పన్న ధర్మకర్తల మండలి సభ్యులు గంట్ల శ్రీనుబాబు, ప్రముఖ మెజిషియన్ బి.ఎన్. రెడ్డి, స్నేహాంజలి సంస్థ అధ్యక్షులు మూర్తి, కళాకారులు నాంచారయ్య, వెంకటేశ్వరరావు, నటుడు యాద్ కుమార్, సత్గీత్ క్రియేషన్స్ అధినేత గణేష్ తదితరులు పాల్గొని ధనుంజయ్ సేవలను కొనియాడారు. నిరంతరం తాను కష్టించి పనిచేస్తూ మరికొంత మందికి ఉపాది కల్పించి ధనుంజయ్ ఎంతో మందికి ఆదర్శనీయంగా నిలిచారన్నారు. నటుడిగా, కళాకారుడిగా మంచి గుర్తింపు తెచ్చుకోవడం అభినందనీయమన్నారు. వీరంతా నటుడు ధనుంజయ్ ను ఘనంగా సత్కరించారు. ఈ కార్యక్రమంలో నగరానికి చెందిన పలువురు కళాకారులు, నటులు పాల్గొన్నారు.

అభివృద్ధి పనులు వేగవంతం చేయాలని కాకినాడ నగరపాలక సంస్థ కమిషనర్ సిహెచ్ నాగ నరసింహారావు ఇంజనీరింగ్ అధికారులను ఆదేశించారు. నగరపాలక సంస్థ  కార్యాలయం లోని సమావేశ మందిరంలో మంగళవారం 14,15 ఆర్థిక సంఘ నిధులు, రహదారుల మరమ్మతులు, కార్పొరేషన్ సాధారణ నిధులు. అర్బన్ హెల్త్ సెంటర్ల అభివృద్ధి, నాడు- నేడు, పూడికతీత పనులు, మంచినీటి పై వేసవి కార్యాచరణ, తదితర అంశాలపై ఇంజనీరింగ్ అధికారులతో సమీక్షించారు. పనుల ప్రగతిని అడిగి తెలుసుకున్నారు. అనంతరం  కమిషనర్ నాగ  నరసింహారావు మాట్లాడుతూ వివిధ దశల్లో ఉన్న పనులన్నీ  వేగవంతంగా పూర్తి చేయాలని ఆదేశించారు. కాకినాడ రూరల్ సిటీ ఎమ్మెల్యేలు కన్నబాబు, ద్వారంపూడి చంద్రశేఖర్ రెడ్డి. మేయర్ సుంకర శివ ప్రసన్న, కార్పొరేటర్లు వివిధ అభివృద్ధి పనులను ప్రతిపాదించారని కమిషనర్ చెప్పారు. ప్రతిపాదిత పనులన్నీ సకాలంలో వేగవంతంగా పూర్తయ్యేలా చర్యలు తీసుకోవాలని సూచించారు. మార్చి చివరినాటికి కాంట్రాక్టర్లకు సంబంధించిన వే బిల్లులు కూడా క్లియర్ అయ్యాయని కమిషనర్ చెప్పారు.  సమావేశంలో  ఎస్ ఈ సత్య కుమారి, ఈఈ లు డిఈ లు, ఏఈలు పాల్గొన్నారు. 

 నగరంలోని ట్రాఫిక్ సమస్యలపై ట్రాఫిక్ డిఎస్పి  మురళి కృష్ణారెడ్డి,సి ఐ చైతన్య కృష్ణ,  ఇంజనీరింగ్ అధికారులతో కమిషనర్ నాగ నరసింహారావు సమావేశమయ్యారు. ట్రాఫిక్ సిగ్నల్స్, స్పీడ్ బ్రేకర్లు, సెల్లార్ పార్కింగ్, ట్రాఫిక్ అవరోధంగా ఉన్న పశువుల సమస్య, సిగ్నల్ లైట్లు, సైన్ బోర్డ్స్ వంటి  అంశాల పై  చర్చించారు. అనంతరం కమిషనర్ మాట్లాడుతూ ట్రాఫిక్ క్రమబద్ధీకరణ లో నగరపాలక సంస్థ ను కూడా భాగస్వామ్యం చేసి ప్రజలకు మరింత సౌకర్యవంతంగా ఉండేలా చూస్తామన్నారు.

విజయవాడ ప్రభుత్వ ఆసుపత్రిలో మానసిక పరిస్థితి సరిగ్గా లేని మహిళపై జరిగిన ఆ ఘటన ప్రతి ఒక్కరూ ఖండించాలని, ఆ సంఘటన ద్వారా  రాజకీయంగా  ప్రయోజనం కోసం ప్రతిపక్షాలు ఆరాటపడడం సహేతుకం కాదని రాష్ట్ర హోం మంత్రి డా. తానేటి వనిత పేర్కొన్నారు. మంగళవారం స్థానిక ఆర్ అండ్ బి అతిధి గృహంలో ఎంపి మార్గాని భరత్ రామ్ తో కలిసి మీడియా సమావేశంలో మంత్రి పాల్గొన్నారు.  ఈ సందర్భంగా మంత్రి డా. తానేటి వనిత  మాట్లాడుతూ, విజయవాడ ప్రభుత్వ ఆసుపత్రిలో మానసిక పరిస్థితి సరిగ్గా లేని మహిళపై జరిగిన ఘటన ను ఎవ్వరూ హర్షించరని పేర్కొన్నారు. అటువంటివి సమాజంలో జరగ కూడదన్నారు. ఆ సంఘటన లోని బాధిత కుటుంబాల, బాధితురాలి వివరాలు బహిర్గతం చెయ్యరాదని చట్టాలు స్పష్టంగా తెలియ చేస్తున్నాయన్నారు. ప్రతిపక్ష నేత మీడియా తో కలిసి ప్రచారం కోసం చర్యను ఖండిస్తున్నట్లు పేర్కొన్నారు. కొందరు ప్రతి పక్ష నాయకులకు మహిళలపై ఏమాత్రం గౌరవం లేదని మంత్రి తెలిపారు. అత్యాచార బాధితురాలి పరామర్శను కూడా ప్రతిపక్ష నాయకుడు రాజకీయం చేశారన్నారు. పోలీసు శాఖ మూడు గంటల్లోనే అత్యాచార నిందితులను పట్టుకోవడం జరిగిందన్నారు. అంతే కాదు బాధితురాలికి ప్రభుత్వం తరుపున 10 లక్షల రూపాయల పరిహారం ఇచ్చాము. ఆ కుటుంబంలో ని బాధిత రాలికి, లేదా ఆమె తల్లికీ ఉద్యోగం కోసం సిఫార్సు చేసినట్లు తెలిపారు. స్వంత ఇంటిని , స్థలాన్ని ఇవ్వడానికి కూడా సిద్ధంగా ఉన్నామని, గృహ నిర్మాణ శాఖ మంత్రి తో ఈ విషయం పై మాట్లాడినట్లు తెలిపారు. హోం మంత్రి గా ఉన్న నన్ను ట్రోల్ చేయడం మహిళలకు ఇచ్చే  గౌరవమా..? అని ప్రశ్నించారు. మహిళా కమిషన్ ఛైర్మన్ తో ప్రతిపక్షా లకు చెందిన మహిళలు , వర్గాలు అడ్డు తగలడం   కొట్లాటాలా వ్యవహరించి, మహిళలు పట్ల వారి కున్న వైఖరిని తేటతెల్లం చేస్తున్నాయన్నారు. ఎమ్మార్వో వనజాక్షి విషయంలో అప్పటి సీఎం హోదాలో చేసిన  పంచాయతీని మంత్రి ఒకసారి గుర్తు చేశారు. మహిళలంతా సీఎం జగన్ వెనక ఉండటాన్ని ప్రతిపక్షం తట్టుకోలేక పోతోంది. సర్వేల ఫలితాలు తెలుసుకుని, అధికారం రాదని తెలుసుకుని ప్రతిపక్షాలు రచ్చ చేస్తున్నాయన్నారు. ప్రతి అంశాన్ని ప్రతిపక్షాలు రాజకీయం చేయడానికి ప్రయత్నిస్తున్నాయని ఆరోపించారు. గత ప్రభుత్వంలో  మహిళలపై దారుణాలు జరిగితే బయటకు వచ్చేవి కాదని.. మా ప్రభుత్వంపై  నమ్మకంతో బాధితులు  బయటకు వస్తున్నారు. దిశ యాప్ ద్వారా చాలా మంది మహిళలు తమని తాము రక్షించుకున్న ఘటనలు మంత్రి ప్రస్తావించారు. హక్కుల కోసం పోరాడటాన్ని  ముఖ్యమంత్రి జగన్ మోహన్ రెడ్డి గారు కూడా హర్షిస్తారని తెలిపారు. ఐతే ఇక్కడ జరిగింది ,సీఎం క్యాంప్ ఆఫీస్ ముట్టడికి యు.టి.ఎఫ్  యత్నించడం అని, ఇది ఎంతవరకు సరైనదని ఆలోచించుకోవాలి.రాష్ట్ర ప్రజలందరూ సీఎం జగన్ గారి పాలనపై పూర్తి నమ్మకంతో వున్నారు. ప్రజల నుండి వస్తున్న ఆదరణ చూసి తట్టుకోలేకనే ప్రతిపక్షాలు నాయకులు విషప్రచారం చేస్తున్నారన్నారు. రాష్ట్రంలో జరిగే ప్రతి విషయాన్ని రాజకీయ లబ్దికోసం ఉపయోగించు కోవాలని కొందరు చూస్తున్నారన్నారు.

ఆంధ్రరాష్ట్ర ప్రజలందరూ  రాష్ట్రంలో జరుగుతున్న ప్రతివిషయాన్ని గమనిస్తున్నారని, ప్రభుత్వంపై అన్యాయంగా చేస్తున్న విష ప్రచారాలను గమనిస్తూనే వున్నారని , తగిన సమయంలో గుణపాఠం చెబుతారని తెలిపారు. ఇప్పటికైనా ప్రతిపక్షాలు, కొందరు నాయకులు అసత్య ఆరోపణలు చేయడం మానుకోవాలని హితవు పలికారు. ఎంపి మార్గని భరత్ మాట్లాడుతూ, దిశా చట్టానికి కేంద్ర మహిళా మంత్రిత్వ శాఖ సానుకూలంగా స్పందించి, తదుపరి చర్య కోసం హోం మంత్రిత్వ శాఖ కు సిఫార్సు చేసిందని తెలిపారు.  తదుపరి పార్లమెంట్ లో కూడా తదుపరి సానుకూల నిర్ణయం రావడం దిశగా అడుగులు ముందుకు పడుతున్నట్లు తెలిపారు.