శంఖవరం పీహెచ్సీలో 29 మందికి రెండో డోసు కోవిడ్ వేక్సినేషన్ చేసినట్టు వైద్యాధికారి డా..ఆర్వీవి సత్యన్నారాయణ తెలియజేశారు. గురువారం ఆయన  ఆసుపత్రిలో మీడియాలో మాట్లాడుతూ, గతంలో మొదటి డోసు టీకా వేసిన 29 మందికి ఈ రోజు రెండో డోసు వేసినట్టు చెప్పారు. కరోనా నేపథ్యంలో జిల్లా కలెక్టర్ మురళీధర్ రెడ్డి ఆదేశాల మేరకు కోవిడ్ నిబంధనలు పాటిస్తూ వైద్యసేవలు అందిస్తున్నామన్నారు. ప్రజలంతా కరోనా నేపథ్యంలో  బయటకు వెళ్లే సమయంలో ప్రజలు గుంపులు గుంపులుగా కాకుండా సామాజిక దూరం పాటిస్తూ పనులు చూసుకోవాలన్నారు. ప్రతీ ఒక్కరూ ఖచ్చితంగా మాస్కులు ధరించాలన్నారు. ఎవరికైనా ప్రభుత్వం సూచించిన అంశాల్లో ఆరోగ్య సమస్యలు ఉంటే తక్షణమే ప్రాధమిక ఆరోగ్య కేంద్రాల్లో కరోనా పరీక్షలు చేయించుకొని కోవిడ్ కేర్ సెంటర్లు లేదా, హోమ్ ఐసోలేషన్ ద్వారా చికిత్సలు పొందాలన్నారు. ఏ పనిచేసినా శానిటైజర్ ను వినియోగించాలన్నారు. ఆసుపత్రిలో హోమ్ ఐసోలేషన్ కిట్లను కూడా అందిస్తున్నామన్నారు. ప్రజలు అప్రమత్తంగా ఉండటం ద్వారానే కరోనాని నియంత్రించడానికి ఆస్కారం వుంటుందని డాక్టర్  ఆర్వీవీ సత్యన్నారాయణ తెలియజేశారు.

కోవిడ్ సెకండ్ వేవ్ నేపధ్యంలో విశాఖ ఏజెన్సీలోని పర్యాటక ప్రాంతాలను ఈనెల 5 వతేదీ నుంచి మూసి వేస్తున్నట్లు ఐటిడి ఏ ప్రాజెక్టు అధికారి డాక్టర్ వెంకటేశ్వర్ సలిజామల మంగళవారం ఒక ప్రకటనలో వెల్లడించారు. అరకువ్యాలీ మండలంలోని పెదలబుడు గిరి గ్రామ దర్శిని, మండల కేంద్రంలో ఉన్న గిరిజన మ్యూజియం , పద్మాపురం గార్డెన్, డుంబ్రిగుడ మండలం చాపరాయి జలపాతం, జి.మాడుగుల మండలంలోని కొత్తపల్లి జలపాతాల ప్రవేశాలను రద్దు చేసామని ప్రకటించారు. పర్యాటకులను అనుమించ వద్దని సంబంధిత నిర్వహకులను ఆదేశించారు. మన్యంలో ప్రతీ ఒక్కరూ సామాజిక దూరం పాటించాలని కోరారు. అవసరం లేకుండా బయటకు రాకూడదన్నారు. బయటకు వెళ్లే వారు తప్పని సరిగా మాస్క్ ధరించాలని సూచించారు. ప్రతీ ఒక్కరూ శానిటైజర్‌తో చేతులు శుభ్రం చేసుకోవాలని చెప్పారు. సామాజిక బాధ్యతతో కోవిడ్ నిబంధనలు పాటించాలన్నారు.

పాడేరు  కుమ్మరిపుట్టు యూత్ శిక్షణా కేంద్రంలో రెండు వందల పడకలతో కోవిడ్ కేర్ సెంటర్ ఏర్పాటు చేస్తున్నామని ఆర్ డి ఓ కె. లక్ష్మి శివజ్యోతి చెప్పారు. ఈనెల 5 వతేదీ నుంచి కోవిడ్ కేర్ సెంటర్ సేవలు అందుబాటులోకి వస్తాయన్నారు. మంగళవారం యూత్ శిక్షణా కేంద్రాన్ని ఆమె సందర్శించారు. కోవిడ్ కేర్ సెంటర్లో ఏర్పాటు చేసిన వసతులను పరిశీలించారు. మరుగుదొడ్లు ,స్నానపు గదులు, తనిఖీ చేసారు. కోవిడ్ పేషెంట్లకు చన్నీళ్లు, వేడినీటి సౌకర్యం కల్పించాలన్నారు. పూర్తి స్దాయిలో విద్యుత్తు, తాగునీటి సదుపాయాలు , మరుగుదొడ్లకు నిరంతరం నీటి సరఫరా అందించాలని అధికారులకు సూచించారు. ప్రతీ గదిలో డస్ట్‌బిన్లు ఏర్పాటు చేయాలన్నారు. సదుపాయాల కల్పనలో ఎటువంటి లోటుపాట్లు లేకుండా అన్ని ఏర్పాట్లు చేయాలని చెప్పారు. కోవిడ్ కేర్ సెంటర్లో ఉన్న కోవిడ్ పేషెంట్లకు నాణ్యమైన పోషకాహారం, రక్షిత మంచినీరు సరఫరా చేయాలన్నారు , కోవిడ్ కేర్ సెంటర్లో ముగ్గురు డాక్టర్లను, ఐదుగురు స్టాఫ్ నర్సులను,శానిటేషన్ సిబ్బందిని నియమించడం జరిగిందన్నారు. వారు నిరంతరం సేవలందిస్తారని అన్నారు. ఈ కార్యక్రమంలో గిరిజన సంక్షేమశాఖ ఇ ఇ కెవి ఎస్ ఎన్ కుమార్, తాహశీల్దార్ ప్రకాశరావు, డి ఇ ఇ అనుదీప్, సహాయ గిరిజన సంక్షేమాధికారి ఎల్ . రజని తదితరులు పాల్గొన్నారు.

ఆసుపత్రులకు అందుబాటులో ఉండే విధంగా ఆక్సిజన్ స్టోరేజి పాయింట్ ను గుర్తించాలని జిల్లా కలెక్టర్ వి వినయ్ చంద్ ఇండస్ట్రీస్ జనరల్ మేనేజర్ రామలింగరాజు ను ఆదేశించారు.  మంగళవారం కలెక్టర్ కార్యాలయ సమావేశ మందిరంలో కోవిడ్ అడ్మిషన్లు, కోవిడ్ పేషెంట్లకు ఆక్సిజన్ సరఫరా, పరీక్షల పై  ఆయన సమీక్షించారు.  ఈ సందర్భంగా ఆయన మాట్లాడుతూ ఆక్సిజన్ ప్లాంట్లు ఏర్పాటు చేయుటకు కేంద్ర ప్రభుత్వం ప్రతిపాదనలు అడిగిందని, అందుకు అనుగుణంగా జిల్లాలో కెజిహెచ్ లోని సిఎస్ఆర్ బ్లాక్ వద్ద, విమ్స్,  చెస్ట్, ఇఎన్టీ, సైకియాట్రి, ప్రాంతీయ కంటి ఆసుపత్రి, అనకాపల్లి ఆసుపత్రి, నర్సీపట్నం, అరకు, పాడేరు, గాయత్రీ, గీతం, ఎన్నారై మెడికల్ కళాశాలల వద్ద ఆక్సిజన్ ప్లాంట్లు ఏర్పాటుకు ప్రతిపాదనలు త్వరితగతిన తయారు చేయాలని, ఎపిఎంఎస్ఐడిసి ఇఇ డిఎ నాయుడుని ఆదేశించారు. సైకియాట్రి ఆసుపత్రిలో ఉన్న డ్రగ్స్ మెటీరియల్స్ ను ప్రక్కనే నిర్మాణం లో ఉన్న భవనంను త్వరితిన పూర్తి చేసి డ్రగ్స్ మెటీరియల్ ను అందులోకి మార్చితే అందులో ఆక్సిజన్ సరఫరా చేయుటకు వీలుగా కనెక్షన్లు ఉన్నాయని, అందులో కోవిడ్ పడకలు ఏర్పాటు చేయాలని ఇఇ ని ఆదేశించారు. ఒక ఆక్సిజన్ ప్లాంట్ రెండు, మూడు ఆసుపత్రులకు ఉపయోగపడే విధంగా ఉండాలని సూచించారు. నైట్రోజన్ జనరేషన్ ప్లాంట్ లు ఎన్ని ఉన్నాయో డ్రగ్ కంట్రోల్ ఎ. డి. జిఎం ఇండస్ట్రీస్ ను అడిగి తెలుసుకున్నారు. హైల్త్ సిటీ లో ఉన్న ఆసుపత్రులకు ఆక్సిజన్ ప్లాంట్ ఏర్పాటు చేసి ఆక్సిజన్ సరఫరా కు టెక్నీషియన్ తో చర్చించారు. నిరంతర ఆక్సిజన్ సరఫరా పై చర్చించారు. గ్రామీణ ప్రాంతాల్లో ఆక్సిజన్ ప్లాంట్ లు ఉన్నాయో లేదో, ఒక రోజులో  ఆక్సిజన్ సరఫరా, వినియోగంపై

డ్రగ్ కంట్రోల్ సహాయ సంచాలకులు రజిత ను అడిగి తెలుసుకున్నారు. 

ఆసుపత్రుల్లో అడ్మిషన్లు : 

ప్రతీ రోజు ఉదయం ప్రైవేట్ ఆసుపత్రులను సందర్శించి ఖాళీ పడకల సంఖ్య తెలుసుకొని ఆ వివరాలను 104 కాల్ సెంటర్ నోడల్ అధికారి, డిఆర్డిఎ పిడి వి. విశ్వేశ్వరరావు కు తప్పనిసరిగా తెలియజేయాలని డిఎం అండ్ హెచ్ఓ, ఆరోగ్య శ్రీ కోఆర్డినేటర్ లను ఆదేశించారు. 

కోవిడ్ - 19 మెటీరియల్ :

మెటీరియల్ ఎంత ఉన్నది, ఎంత అవసరమో అధికారులను అడిగి తెలుసుకున్నారు. కోవిడ్ మెటీరియల్ పరిశీలించి ఆక్సిజన్ మాస్క్ లు, గ్లౌజులు, N 95 మాస్క్ లు, పిపిపి కిట్స్, NIV మాస్క్ లు, సర్జికల్ మాస్క్ లు, తదితరమైనవి

 ప్రభుత్వ నిబంధనలు ప్రకారం కొనుగోలుకు తగు చర్యలు తీసుకోవాలని ఎఎంసి ప్రిన్సిపాల్, డిఎంహెచ్ఓలను ఆదేశించారు. 

విమ్స్ లో వచ్చే వారం నాటికి 650 పడకలు ఏర్పాటు కు తగు చర్యలు తీసుకోవాలని విమ్స్ సంచాలకులు డాక్టర్ సత్య వరప్రసాద్, ఎపిఎంఎస్ఐడిసి ఇఇలను ఆదేశించారు. పెంచే పడకలకు ఆక్సిజన్ కనెక్షన్లు ఏర్పాటు చేయాలని చెప్పారు. కోవిడ్ మెటీరియల్ కొనుగోలుకు టెండర్లు పిలవాలన్నారు.

         ఈ సమావేశంలో  ఎఎంసి ప్రిన్సిపాల్ డాక్టర్ పివి సుధాకర్, జిల్లా వైద్య ఆరోగ్య శాఖాధికారి డాక్టర్ సూర్యనారాయణ, డిఆర్డిఎ పిడి విశ్వేశ్వరరావు, ఇండస్ట్రీస్ జనరల్ మేనేజర్ రామలింగరాజు, డ్రగ్ కంట్రోల్ అధికారులు రజిత, కళ్యాణి, ఆరోగ్య శ్రీ కోఆర్డినేటర్ డాక్టర్ రాజేష్, తదితరులు పాల్గొన్నారు. 

క్వారంటైన్ కేంద్రంలో పూర్తిస్థాయిలో సదుపాయాలు అందించాలని అని ఐ.టి.డి.ఎ ప్రాజెక్ట్ అధికారి ఆర్.కూర్మనాథ్ అధికారులను ఆదేశించారు.  సోమవారం ఐ.టి.డి.ఎ  ప్రాజెక్ట్ అధికారి బొబ్బిలి పట్టణ పరిధిలో ఉన్న ప్రభుత్వ గిరిజన సంక్షేమ పాఠశాలలో 230 పడకల సామర్థ్యంతో ఏర్పాటు చేసిన కోవిడ్ క్వరెంటైన్ సెంటర్ లో నిర్వహిస్తున్న పనులు పరిశీలించారు, కేంద్రాల కరోనా చికిత్స పొందుతున్న వారికి అందజేస్తున్న సేవల పై అరా తీశారు. ప్రాజెక్ట్ అధికారి మాట్లాడుతూ కరోనా సోకినా ఆందోళన చెందొద్దని ధైర్యంగా ఉంటే కరోనా జయించడం సాధ్యం అన్నారు.  ఎక్కడ ఎటువంటి పొరపాట్లు జరుగ కుండా  ప్రత్యేక దృష్టి సారించాలన్నారు. కేంద్రంలో చికిత్స పొందుతున్న వారికి ఏటువంటి అసౌకర్యం కలుగ కుండా చూడాలని అన్నారు. 24 గంటలు  త్రాగునీరు, విద్యుత్ కు అంతరాయం కలగకుండా ముందస్తు చర్యలు చేపట్టాలి అన్నారు. కేంద్రంలో, పరిసరాలు పరిశుభ్రంగా ఉండేలా చర్యలు చేపట్టాలని సూచించారు. అలాగే కేంద్రం నిర్వహణకు సంబంధించి వైద్యులు, సిబ్బంది, మందులు అందుబాటులో ఉన్నాయని తెలిపారు. చికిత్స తీసుకుంటున్న వారికి సకాలంలో వైద్యం, నిర్దేశిత మెనూ ప్రకారం పోషక విలువలతో కూడిన ఆహారాన్ని అందించాలి అని ఆదేశించారు. 

     ఈ కార్యక్రమంలో డిప్యూటీ డి.ఎం.అండ్.హెచ్.ఓ రవి కుమార్ రెడ్డి, బొబ్బిలి మున్సిపల్ కార్యాలయం, మండల రెవెన్యూ ఆధికారులు, సిబ్బంది వైద్య ఆరోగ్య శాఖ డాక్టర్లు సిబ్బంది, సచివాలయం సిబ్బంది తదితరులు పాల్గొన్నారు.

దివంగత మహారాజు పూసపాటి విజయరామ గజపతిరాజు ఆశయాలే తమకు స్పూర్తి అని శ్రీవరాహలక్ష్మీనృసింహస్వామి దేవాలయం  అనువంశిక ధర్మకర్త, ఛైర్ పర్సన్ సంచయిత అన్నారు. పీవీజీ 97వ జయంతి సందర్భంగా గోశాలలో ఆయన విగ్రహం వద్ద ఘనంగా నివాళులు అర్పించారు. ఈ సందర్భంగా చైర్ పర్శన్  సంచయిత మాట్లాడుతూ, ఆయన సింహాచలం దేవస్థానానికి 100ఏళ్లకు పైగా దేవస్థానం చైర్మన్, ధర్మకర్తగా ఎంతోబాగా పనిచేశారని కొనియాడారు. మా తాత మహారాజ విజయరామ గజపతి ఒక గొప్పదాత, విద్యావేత్త, మానవతావది అని కొనియాడారు. ఆయన దూరదృష్టి స్ఫూర్తిని స్మరించుకుంటూ ముందుకు సాగుతామన్నారు. కరోనా కష్టకాలంలోనూ శ్రీవరాహలక్ష్మీనృసింహస్వామివారి పూజలకు ఎలాంటి లోటు రాకుండా, నిబంధనల మేరకు భక్తులను అనుమతిస్తున్నామని చెప్పారు. ఈఓ సూర్యకళ  పీవీజీ రాజు సేవలను కొనియాడారు. పివిజి రాజు కోరుకొండ సైనిక స్కూల్ కు  వెయ్యి ఎకరాలకుపైగా దానం చేయడంతో దేశంలోనే తొలి సైనిక స్కూల్ ఏర్పడింది. కరోనా నిబంధనలు పాటిస్తూ కార్యక్రమాన్ని నిర్వహించారు.