విశాఖ నగరంలో ప్రతిష్టాత్మకంగా జరుగుచున్న మిలాన్ 2024 కార్యక్రమాలలో ఎటువంటి ఆటంకాలు, అవాంతరాలు కలగకుండా నిరంతరం పరిశీలిస్తూ పర్యవేక్షించాలని అధికారులను జీవీఎంసీ కమిషనర్ సీఎం సాయికాంత్ వర్మ ఆదేశించారు. సోమవారం ఆయన జీవీఎంసీ అదనపు కమిషనర్ కె.ఎస్.విశ్వనాథన్ తో కలిసి ఆర్.కె. బీచ్ రోడ్ లో మిలాన్ 2024 కార్యక్రమం ఏర్పాట్లను పరిశీలించారు. ముందుగా బీచ్ రోడ్ విశ్వ ప్రియ ఫంక్షన్ హాల్ నుండి నోవాటల్ పరిసర ప్రాంతాల వరకు సందర్శించి,  మిలాన్ ప్రధాన వేదిక వద్ద ఏర్పాట్లను, సందర్శకుల కోసం ఏర్పాటుచేసిన గ్యాలరీలను పరిశీలించారు. నేటి నుండి మిలన్ కార్యక్రమాలు జరుగుతున్నందున సందర్శకులు అధిక సంఖ్యలో బీచ్ ప్రాంతాలకు వస్తారని, ఏర్పాట్లలో ఎటువంటి ఆటంకాలు లేకుండా నిరంతరం పర్యవేక్షించాలన్నారు.

 బీచ్ నందు పరిశుభ్రత కార్యక్రమాలు చేపట్టాలని, సెంట్రల్ మీడియన్ లలో మొక్కలను అందంగా తీర్చిదిద్దాలని, బీచ్ నందు అన్ని సోలార్ లైట్లను, సీసీ కెమెరాలు పనిచేసేలా చూడాలని, వీక్షకుల కోసం పలుచోట్ల ఎల్ఈడి స్క్రీన్లను ఏర్పాటు చేయాలని, అవసరమైన చోట త్రాగునీటిని ఏర్పాటు చేయాలని, కార్యక్రమంలో సందర్శకులకు, వీక్షకులకు, రవాణా సౌకర్యానికి ఆటంకం కలగకుండా సర్వీస్ రోడ్లలో వున్న వ్యాపార బండ్లను తాత్కాలికంగా తొలగించాలని కమిషనర్ ఇంజనీరింగ్ అధికారులను ఆదేశించారు. ఈ కార్యక్రమంలో పర్యవేక్షక ఇంజనీర్లు కేవిఎన్.రవి, సత్యనారాయణ రాజు, జోనల్ కమిషనర్ విజయలక్ష్మి, ప్రధాన వైద్యాధికారి డాక్టర్ నరేష్ కుమార్,  డైరెక్టర్ ఆఫ్ హార్టికల్చర్ ఎం.దామోదర రావు, చీఫ్ సిటీ ప్లానర్ సురేష్ కుమార్, కార్యనిర్వాక ఇంజనీర్ రత్నాకర్ రెడ్డి, ఏసీపీలు, ఎ ఏం ఓ హెచ్ లు  తదితరులు పాల్గొన్నారు.

విశాఖ నగరంలో రోడ్లు, ఫుట్పాత్తులు, ఫ్లై ఓవర్లు, రోడ్ల సెంటర్ మీడియన్లలో నిద్రిస్తున్న నిరాశ్రయులను జివిఎంసి నిర్వహిస్తున్న నైట్ షెల్టర్లకు తరలించేలా చర్యలు చేపట్టాలని జివిఎంసి కమిషనర్ సిఎం.సాయికాంత్ వర్మ ప్రాజెక్ట్ డైరెక్టర్ (యుసిడి) కె.వి.పాపునాయుడు ను ఆదేశించారు. శుక్రవారం జివిఎంసి ప్రధాన కార్యాలయంలోని సమావేశ మందిరంలో జివిఎంసి అదనపు కమిషనర్ కె.ఎస్.విశ్వనాథన్ తో కలిసి నైట్ షెల్టర్ల నిర్వాహకులతో సమీక్ష సమావేశం నిర్వహించారు.   ఈ సందర్భంగా కమిషనర్ మాట్లాడుతూ నగరంలో రాత్రిపూట నిరాశ్రయులు రోడ్లపైన, బహిరంగ ప్రదేశాలలో నిద్రించకుండా వారిని నైట్ షెల్టర్లకు తరలించే విధంగా చర్యలు చేపట్టాలని, అందుకు మూ డు బృందాలను ప్రత్యేకంగా ఏర్పాటు చేయాలని ఆదేశించారు.

 రాత్రిపూట నిరాశ్రయులు ఎక్కడబడితే అక్కడ నిద్రించడం వలన పలు ప్రమాదాలు, ఇతర సంఘటనలకు గురి అయ్యే  అవకాశం ఉందన్నారు. రాత్రి బసకి తీసుకువచ్చిన నిరాశ్రయులను మరుసటి రోజు వారికి సంబంధించిన ప్రాంతాలకు వెళ్ళేలా వారికి సూచించేలా చర్యలు చేపట్టాలని నైట్ షెల్టర్ నిర్వాహకులకు తెలిపారు. పోలీస్ కేసులో ఉన్న మహిళా నిరాశ్రయులను నైట్ షెల్టర్లకు తరలించకుండా ప్రత్యేకంగా ఐసిడిసిఎస్ వారి ఆధ్వర్యంలో నిర్వహిస్తున్న మహిళా బస కేంద్రాలకు తరలించాలన్నారు. రోడ్లపై తిరిగే వృద్ధులు, అనాధలు, మానసికంగా ఉన్నవారిని గుర్తించి నగరంలో సేవా దృక్పథంతో నిర్వహిస్తున్న పలు వృద్దాశ్రమలకు నిరాశ్రయ కేంద్రాలకు తరలించే ఏర్పాటు చేయాలని అదనపు కమీషనర్ కు,  ప్రాజెక్ట్ డైరెక్టర్ కు కమీషనర్ సూచించారు.  ప్రతి నెల నైట్ షెల్టర్ నిర్వాహకులతో సమావేశాలు ఏర్పాటు చేస్తామని, అందరూ విధిగా సమావేశానికి హాజరు కావాలని కమిషనర్ ఆదేశించారు.

అనంతరం పలువురు నైట్ షెల్టర్ల నిర్వాహకులు, నగరంలో నిరాశ్రయుల సంఖ్య పెరుగుతున్నందున కొత్తగా మరిన్ని రాత్రి బసలు ఏర్పాటు చేయాలన్న విజ్ఞప్తి మేరకు కమిషనర్ స్పందిస్తూ, జివిఎంసి రెవెన్యూ విభాగంతో సమన్వయం చేసుకొని వారికి గాజువాక, అనకాపల్లి జోన్లలో నైట్ షెల్టర్లను ఏర్పాటుకు కేంద్రాలను గుర్తించాలని అదనపు కమిషనర్ కు, ప్రాజెక్ట్ డైరెక్టర్ కు సూచించారు. అలాగే నైట్ షెల్టర్ నిర్వాహకుల యొక్క గౌరవ వేతనాలను పెంచేందుకు చర్యలు చేపడతామని నిర్వాహకులకు కమిషనర్ తెలిపారు.

         జివిఎంసి అదనపు కమీషనర్ మాట్లాడుతూ నగరంలో ఎన్ని నైట్ షెల్టర్లు నిర్వహిస్తున్నారు, ఏ ఏ షెల్టర్లలో ఎంతమంది నిరాశ్రయులు  ఉన్నారు ? వారికి సమకూరుస్తున్న మౌలిక వసతులపై ఆరా తీసి, నిరాశ్రయులు ఏ ఒక్కరు రోడ్లపై నిద్రించకుండా రాత్రి బసలతో బస చేసే విధంగా చర్యలు చేపట్టాలని నిర్వాహకులను ఆదేశించారు.  ఈ సమావేశంలో భూపేష్ నగర్ నైట్ షెల్టర్ నిర్వాహకులు కొల్లి సింహాచలం, టిఎస్ఆర్ నైట్ షెల్టర్ నిర్వాహకులు ప్రగడ వాసు, ఇతర నైట్ షెల్టర్ నిర్వాహకులతోపాటు జివిఎంసి ప్రధాన వైద్యాధికారి డాక్టర్ నరేష్ కుమార్, పట్టణ ప్రణాళిక అధికారి సురేష్ కుమార్ తదితరులు పాల్గొన్నారు.