విజ‌య‌న‌గ‌రంజిల్లాలోని ప‌లు నియోజ‌క‌వ‌ర్గాల్లో రెండో విడ‌త వై.ఎస్‌.ఆర్‌.ఆస‌రా సంబ‌రాలు ఆదివారం ఘనంగా  నిర్వ‌హించారు. బ‌లిజిపేట‌లో జ‌రిగిన కార్య‌క్ర‌మంలో స్థానిక శాస‌న‌స‌భ్యులు అల‌జంగి జోగారావు పాల్గొని మండ‌లంలోని మ‌హిళా స్వ‌యంశ‌క్తి సంఘాల‌కు రెండో విడ‌త ఆసరా మొత్తాల‌ను అంద‌జేశారు. మండ‌లంలోని 1315 సంఘాల‌కు రూ.7.62 కోట్ల మొత్తానికి సంబంధించిన చెక్కును ఎమ్మెల్యే అందించారు. ఈ సంద‌ర్భంగా ఏర్పాటైన కార్య‌క్ర‌మంలో ఎమ్మెల్యే మాట్లాడుతూ జ‌గ‌న‌న్న అందిస్తున్న ఈ స‌హాయాన్ని వినియోగించుకొని రానున్న రోజుల్లో మ‌హిళా సంఘాలు మ‌రింత‌గా ఆర్ధిక వృద్ధి చెందాల‌ని కోరారు. ఈ కార్య‌క్ర‌మంలో జెడ్పీటీసీ అల‌జంగి ర‌వికుమార్‌, ఎంపిపి గుడివాడ నాగ‌మ‌ణి, వైస్ ఎంపిపి బెవ‌ర హేమ‌ల‌త‌, మండ‌ల ప్ర‌త్యేకాధికారి, ప‌శుసంవ‌ర్ధ‌క శాఖ డి.డి. కె.ముర‌ళీకృష్ణ‌, ఎంపిడిఓ పి.దేవ‌కుమార్‌, త‌హ‌శీల్దార్ ర‌ఫీజాన్ త‌దిత‌రులు పాల్గొన్నారు. ఈ సంద‌ర్భంగా స్వ‌యంశ‌క్తి మ‌హిళ‌ల‌తో క‌ల‌సి ఎమ్మెల్యే జోగారావు ముఖ్య‌మంత్రి వై.ఎస్‌.జ‌గ‌న్ చిత్ర‌ప‌టానికి పాలాభిషేకం చేశారు.

ఎస్సీ, ఎస్టీ, బిసి, కాపు, మైనార్టీ సంక్షేమ నిధులలో సొమ్ముని దారి మళ్లిస్తుంటే కార్పొరేషన్‌ చైర్మన్‌లు ఏం చేస్తునన్నారని జనసేన పార్టీ నర్సీపట్నం నియోజకవర్గ ఇన్‌చార్జ్‌ రాజాన వీర సూర్యచంద్ర ఆరోపించారు. ఆదివారం నర్సీపట్నంలో జరిగిన సమావేశంలో ఆయన మాట్లాడారు. ఎస్సీ, ఎస్టీ, ఒబిసి, మైనార్టీ, కాపు కార్పొరేషన్‌ సంబంధించిన నిధులు దారి మళ్లిస్తుంటే కార్పొరేషన్‌ చైర్మన్‌లు చోద్యం చూస్తున్నారన్నారు. ఆయా జాతులకు సంబంధించి ఉపాధి అవకాశాల కోసం సబ్సిడీ రుణాల కోసం ఆ నిధిని ఖర్చు చేయాలి కానీ ఆ నిధులు దారి మళ్లింపుగా ఉంటే కనీసం ఏ కార్పొరేషన్‌ చైర్మన్‌ కూడా స్పందించిన పాపాన పోలేదన్నారు.  ఆ జాతుల వారికి ఉపాధి కల్పించే విధంగా సబ్సిడీ రుణాలు ఇప్పించి వారి జీవితాల్లో వెలుగులు నింపాలి కానీ చైర్మన్‌ స్థాయిలో ఉన్న వ్యక్తులు కనీసం స్పందించకపోతే ఆ చైర్మన్‌ పదవికి అర్థం ఏముందన్నారు.  ప్రజలలో ఉన్నఅనుమానాలు నివృత్తి చేసేలా ప్రతి కార్పొరేషన్‌ చైర్మన్‌ స్పందించి ప్రజలకు తెలిసే విధంగా ఏఏ కార్పొరేషన్‌లో ఎంత ఉంది, ఆ డబ్బులు దేనికి వినియోగిస్తున్నామనేది ప్రజలకు చెప్పాల్సిన అవసరం కార్పొరేషన్‌ చైర్మన్‌ కు ఉంటుందన్నారు. ప్రజలను మభ్య పెట్టే విధంగా కార్పొరేషన్లో ఎంత నిధులు ఉన్నాయో తెలియపరచకుండా  ప్రతి కార్పొరేషన్‌ చైర్మన్‌ మాత్రమే ఉంది ఆ నిధుల గురించి ప్రజలకు తెలియచేయకుండా అయోమయ స్థితిలో ఉంచి బ్యాంకులో రుణాలు రాకుండా చేస్తున్నారని ఆగ్రహం వ్యక్తం చేశారు. ఈ కార్యక్రమంలో నర్సీపట్నం గ్రామీణ అధ్యక్షుడు వూడి చక్రవర్తి, చెట్టుపల్లి గ్రామ ఉపసర్పంచ్‌ పరవాడ శ్రీను, మోపాడ చిరంజీవి, పరవాడ లోవరాజు, కర్రీ శ్రీను, ఎర్ర ఈశ్వరరావు, రామచంద్ర. మోపాడ వంశీకృష్ణ, మటం వరహాలరావు తదితరులు పాల్గొన్నారు.

నర్సీపట్నంలో ఈ నెల 11వ తేదీ సోమవారం నర్సీపట్నం ఆర్డీవో కార్యాలయంలో జిల్లా కలెక్టర్‌ మల్లికార్జున నిర్వహించే స్పందన కార్యక్రమాన్ని సద్వినియోగం చేసుకోవాలని మాజీ మంత్రి, టీడీపీ పొలిట్‌బ్యూరో సభ్యులు చింతకాయల అయ్యన్నపాత్రుడు కోరారు. ఆదివారం ఆయన స్థానిక విలేకరులతో మాట్లాడారు. సమస్యలపై, అన్యాయాలపై కలెక్టర్‌కు వినతిపత్రం అందజేయాలన్నారు. గతంలో స్పందన కార్యక్రమం విశాఖపట్నంలోనే నిర్వహించేవారని, కానీ కలెక్టర్‌ నర్సీపట్నంలో స్పందన కార్యక్రమం ఏర్పాటు చేయడం జరిగిందన్నారు. రేషన్‌ కార్డులు, పింఛన్లు అన్యాయంగా తీసేశారని, దీనిపై కలెక్టర్‌కు తెలియజేయాలన్నారు. అన్ని సమస్యలపై స్పందన కార్యక్రమంలో వినతిపత్రాలు అందజేయాలని సూచించారు. 

కేంద్రంలో అధికారంలో ఉన్న బిజెపి ప్రభుత్వం ప్రతీ రోజు వంట గ్యాస్‌ ధరలు పెంచి ప్రజలను ఆర్థికంగా దోచుకుంటున్నారని మహిళా సంఘం జిల్లా ఉపాధ్యక్షురాలు ఎల్‌ గౌరీ. అన్నారు. పెంచిన గ్యాస్‌ ధరలను వ్యతిరేకిస్తూ నర్సీపట్నం పాతబజార్‌ వీధిలో మహిళా సంఘం ఆధ్వర్యంలో ధర్నా జరిగింది. ఈ ధర్నాలో గౌరీ మాట్లాడుతూ మోడీ ప్రభుత్వం అధికారంలోకి వచ్చిన తర్వాత గ్యాస్‌ ధరలను 500 రూపాయలకు పైగా పెంచిందన్నారు. గ్యాస్‌తో పాటు నిత్యవసర వస్తువులు, పెట్రోల్‌, డీజిల్‌ అన్నిరకాల ధరలను పెంచుతుందన్నారు. ఫలితంగా ప్రజలు తీవ్ర ఇబ్బందులకు గురవుతున్నారని పెంచిన గ్యాస్‌ ధరలను ఉపసంహరించుకోవాలని లేకుంటే మహిళలు తగిన బుద్ధి చెబుతారని ఆమె అన్నారు. అన్ని రకాల వస్తువులపై ధరలు పెంచి పెట్టుబడిదారులకు లబ్ధి చేకూరుస్తుందని ఆమె అన్నారు. మోడీ ప్రభుత్వం ప్రజలను వంచించడమే పనిగా పెట్టుకుందని ఆరోపించారు. అన్ని రకాల ప్రభుత్వ రంగ పరిశ్రమలను పెట్టుబడిదారులకు దారాదత్తం చేస్తుందని మోడీ చర్యలను వ్యతిరేకించకపోతే దేశాన్ని అమ్మేస్తారన్నారు. గ్యాస్‌ ధరలు తగ్గించుకుంటే మహిళలు మోడీ ప్రభుత్వానికి వ్యతిరేకంగా ఉద్యమిస్తామని మోడీని ఇంటికి పంపిస్తారన్నారు. ఈ  కార్యక్రమంలో మంగ, రమణమ్మ, లక్ష్మివెంకటమ్మ, దుర్గగోవిందమ్మ, రాజేశ్వరి పాల్గొన్నారు.

మహిళా ఆర్ధికాభివృద్ధే ప్రభుత్వ లక్ష్యమని నర్సీపట్నం ఎమ్మెల్యే పెట్ల ఉమాశంకర్‌ గణేష్‌ అన్నారు. శనివారం గొలుగొండ మండల పరిషత్‌ కార్యాలయం ఆవరణలో వైయస్సార్‌ ఆసరా పథకం నిధులు పంపిణీ కార్యక్రమం చేపట్టారు. ఈ కార్యక్రమానికి ముఖ్య ఆతిధిగా అనకాపల్లి ఎంపీ డాక్టర్‌ సత్యవతి, నర్సీపట్నం ఎమ్మెల్యే పెట్ల ఉమాశంకర్‌గణేష్‌ హాజరై చెక్కులు పంపీణీ చేశారు. అనంతరం వారు మాట్లాడుతూ, మహిళలకు ముఖ్యమంత్రి వైయస్‌ జగన్‌మోహన్‌రెడ్డి పెద్దపీట వేస్తున్నారన్నారు. సంక్షేమ పథకాలన్ని మహిళల పేరుతోనే అమలు చేయడమే దీనికి నిదర్శనమన్నారు.  పథకం ద్వారా మండలంలో 1022 సంఘాలలో 13744 మంది మహిళలు ఈ పథకం ద్వారా లబ్దిపొందుతున్నారని చెప్పారు. మొదటి విడతగా గత ఏడాది కూడా ఆసరా పథకం ద్వారా రూ.7కోట్లు అందజేశామన్నారు. ఈ ఏడాది రెండో విడతగా రూ.7.40కోట్లు పంపిణీ చేయడం జరిగిందన్నారు. దీన్ని సద్వినియోగం చేసుకొని ఆర్ధికాభివృద్ధి చెందాలన్నారు. అనంతరం మహిళలకు చెక్కులు పంపిణీ చేశారు. ఈ కార్యక్రమంలో నర్సీపట్నం ఆర్డీవో ఆర్‌.గోవిందరావు, ఎంపిడిఒ డేవిడ్‌ రాజ్‌, తహశీల్దార్‌ వెంకటేశ్వరావు, నర్సీపట్నం మార్కెట్‌ కమిటీ చైర్మన్‌ చిటికెల భాస్కర్‌నాయుడు, గొలుగొండ ఎంపిపి గజ్జల మణికుమారి, జెడ్పీటీసీ సుర్ల గిరిబాబు, వైస్‌ ఎంపిపి సుర్ల బాబ్జి, ఏఎసి చైర్మన్‌ లెక్కల సత్యనారాయణ, గొలుగొండ సర్పంచ్‌ బుజ్జి, స్టేట్‌ బ్యాంక్‌ రీజనల్‌ మేనేజర్‌ సాయి బాబా, ఏపిఎం గోవిందరావు, ఎంపిటిసిలు, సర్పంచ్లు, వైసిపి నాయకులు, కార్యకర్తలు, డ్వాక్రా మహిళలు పాల్గొన్నారు.

అన్నవరం శ్రీశ్రీశ్రీ వీరవేంకట సత్యన్నారాయణస్వామి వారి దేవస్థానంలో ఈనెల 11న జరగాల్సిన హుండీ లెక్కింపు కార్యక్రమం 25వ తేదీ నాటికి వాయిదావేస్తున్నట్టు ఈఓ వేండ్ర త్రినాధరావు తెలియజేశారు. శనివారం ఈమేరకు అన్నవరంలో మీడియాకి ప్రకటన విడుదల చేశారు. విజయవాడలో కనకదుర్గమ్మ అమ్మవారి దేవస్థానంలో దసరా మహోత్సవాలకు హాజరవుతున్న సందర్భంగా ఈ కార్యక్రమాన్ని వాయిదా వేసినట్టు ఆ ప్రకటనలో ఈఓ పేర్కొన్నారు. మార్చిన తేదీలో హుండీల లెక్కింపు జరుగుతుందన్నారు.

అన్నవరం శ్రీశ్రీశ్రీ  వీర వెంకట సత్యనారాయణ స్వామి వారి దేవస్థానంలో కరోనా వైరస్ కారణంగా తాత్కాలికంగా నిలుపుదల చేయబడిన  నిత్య అన్నదానం తిరిగి శుక్రవారం నుంచి భక్తుల సౌకర్యార్థం ప్రారంభిస్తున్నట్టు ఈఓ వేండ్ర త్రినాధరావు తెలియజేశారు. ఈ మేరకు గురువారం ఆయన అన్నవరంలో మీడియాకి ప్రకటన విడుదల చేశారు. స్వామివారిని దర్శించుకునే భక్తులకు రేపటి నుంచి నిత్యాన్నదానం అందుబాటులోకి వస్తుందని, భక్తులు స్వామివారి అన్నప్రసాదాన్ని స్వీకరించాలని ఈ సందర్భంగా ఈఓ ఆ ప్రకటనలో కోరారు.