రాష్ట్ర ప్రభుత్వం పట్టణ పురపాలక శాఖల్లో- ఏర్పాటు చేసిన వార్డు శానిటేషన్,  పర్యావరణ కార్యదర్శులకి ఇచ్చిన జాబ్ చార్ట్ ప్రకారం విధులు నిర్వర్తించాలని జివిఎంసి కమిషనర్ డా. జి. సృజన అధికారులను ఆదేశించారు. జి.ఒ.నెం.650 ప్రకారం వార్డు శానిటరీ కార్యదర్శులకు కొన్ని విధులు ప్రభుత్వం నిర్ణయించిందన్నారు. ముఖ్యంగా సచివాలయం పరిధిలో కనీసం 3 గంటలు అవుట్ డోర్ వర్క్ లకు  వెళ్లడం,  తడి-పొడి చెత్త 100% సేకరణ చేయించడం, బహిరంగ ప్రదేశాల్లో,  కమ్యూనిటీ హాల్ లోనూ,  ప్రజా మరుగుదొడ్లు మొదలైన చోట్ల పరిశుభ్రమైన వాతావరణం కల్పించాలన్నారు.  ఆన్ లైన్ బల్క్ వెస్ట్ మేనేజ్మెంట్ సిష్టం అమలు, ప్రతి ఇంట్లో, బయట వేస్ట్ జనరేటర్ లకు అవసరమైన సాంకేతిక సహాయం అందించాలన్నారు. సేంద్రియ ఎరువుల తయారుచేయు పద్ధతుల పై మహిళలకు అవగాహన కల్పించడంతోపాటు  రోడ్లపై పశు  సంచారం లేకుండా చూడాలన్నారు. సచివాలయ పరిధిలోని ప్రభుత్వ, ప్రైవేట్ ఆస్పత్రిలోని రోగులకు వివరాల సేకరణ, నిషేధిత ప్లాస్టిక్ ను అమ్మకాలు జరగకుండా చూడాలని, లైన్ డిపార్ట్మెంట్ వారితో కలసి వెస్ట్ మేనేజ్మెంట్ అమలుకు అవసరమైన సమాచారం ఇవ్వాలన్నారు. నగరంలో 100% చెట్లు బ్రతికే విధంగా చర్యలు  తీసుకోవడంతో పాటు వార్డులోని సమస్యలను అధికారులకు తెలియజేయాలన్నారు.   వారికి ప్రభుత్వం 15 సాధారణ సెలవులు,  పబ్లిక్ సెలవులు  వర్తిస్తాయని అన్నారు.  వార్డు శానిటేషన్,  పర్యావరణ కార్యదర్శులు వారి విధి నిర్వహణ నిమిత్తం  జివిఎంసి  లోని  ప్రజా ఆరోగ్య శాఖకు  అనుసంధానం చేయబడ్డారన్నారు. వారంతా కేటాయించిన విధులు ప్రకారం ఉదయం 6 గంటల నుంచి పనివేళలు మొదలవుతాయని కమిషనర్ స్పష్టం చేశారు.

రాష్ట్ర పుర‌పాల‌క పట్ట‌ణాభివృద్ధి శాఖ‌ల మంత్రి  బొత్స స‌త్య‌నారాయ‌ణ జూలై 5 నుంచి జిల్లాలో ప‌ర్య‌టించ‌నున్న‌ట్టు జిల్లా క‌లెక్ట‌ర్ డా.ఎం.హ‌రిజ‌వ‌హ‌ర్ లాల్ తెలిపారు. జిల్లా క‌లెక్ట‌ర్ వెల్ల‌డించిన వివ‌రాల ప్ర‌కారం పుర‌పాల‌క మంత్రి 4వ తేదీ ఆదివారం రాత్రి 9 గంట‌ల‌కు విజ‌య‌న‌గ‌రంలోని త‌న నివాసానికి చేరుకుంటారు. 5న ఉద‌యం 11 గంట‌ల‌కు న‌గ‌రంలోని మునిసిప‌ల్ కార్పారేష‌న్ కార్యాల‌యం రెండు, మూడో అంత‌స్థుల‌ను ప్రారంభిస్తారు. మ‌ధ్యాహ్నం 3-00 గంట‌ల‌కు చీపురుప‌ల్లిలో మోడ‌ల్ డిగ్రీ క‌ళాశాల‌ను ప్రారంభిస్తారు. చీపురుప‌ల్లి మండ‌లం క‌ర్లాంలో సొసైటీ భ‌వ‌నానికి శంకుస్థాప‌న చేస్తారు. ఇదే గ్రామంలో ఇంటింటికీ తాగునీటి స‌ర‌ఫ‌రా చేసే ప‌థ‌కాన్ని ప్రారంభిస్తారు. సాయంత్రం విజ‌య‌న‌గ‌రం చేరుకుంటారు. 6న బొబ్బిలి నియోజ‌క‌వ‌ర్గంలో ప‌ర్య‌టిస్తారు. ఉద‌యం 10 గంట‌ల‌కు తెర్లాం మండ‌లం పెరుమాలిలో, 11 గంట‌ల‌కు బొబ్బిలి మండ‌లం పారాదిలో గ్రామ స‌చివాల‌య భ‌వ‌నాల‌ను ప్రారంభిస్తారు. కార్య‌క్ర‌మాల అనంత‌రం మ‌ధ్యాహ్నం విజ‌య‌న‌గ‌రం చేరుకుంటారు. 7,8 తేదీల్లో జిల్లాలో ఏర్పాట‌య్యే కార్య‌క్ర‌మాల్లో పాల్గొంటారు.

రాష్ట్ర ప్రభుత్వం ప్రతిష్టాత్మకంగా చేపట్టిన వైయస్సార్ జగనన్న కాలనీలలో అన్ని రకాల మౌలిక వసతులను కల్పించి సుందరమైన గ్రామాలుగా తీర్చిదిద్దనున్నామని రాష్ట్ర పర్యాటక శాఖ మంత్రి ముత్తంశెట్టి శ్రీనివాసరావు పేర్కొన్నారు. శనివారం పాయకరావుపేట మండలం  పి ఎల్ పురం గ్రామంలో మెగా గ్రౌండింగ్ హౌసింగ్ మేళా కార్యక్రమం లో మంత్రి పాల్గొని గృహ నిర్మాణాలకు శంకుస్థాపన చేశారు.  పాయకరావుపేట శాసనసభ్యులు గొల్ల బాబూరావు మాట్లాడుతూ   ఇల్లు లేని అర్హులైన ప్రతి నిరుపేదకు సొంత ఇంటి కల సాకారం  కల్పించడమే రాష్ట్ర ప్రభుత్వ ధ్యేయమని అన్నారు. పాయకరావుపేట నియోజక వర్గంలో  సుమారు 5218 మంది అర్హులైన లబ్ధిదారులకు 102 లేఅవుట్ లలో ఇళ్ల స్థలాలను కేటాయించడం జరిగింది. పాయకరావుపేట మండలం పీఎల్ పురంలో 1233 మంది లబ్ధి దారులకు ఇళ్ళ స్థలాలను మంజూరు చేశారు. మెగా గ్రౌండింగ్ హౌసింగ్ మేళాలో  నర్సీపట్నం ఇంచార్జ్ ఆర్ డి ఓ ,అనిత, పాయకరావుపేట ప్రత్యేకఅధికారి విశ్వేశ్వరరావు,హౌసింగ్ డి ఇ మల్లికార్జున, తాసిల్దర్ సత్యనారాయణ,ఇతర అధికారులు, సిబ్బంది హాజరయ్యారు.

మహావిశాఖ నగర పరిధిలోని మహిళలకు సేంద్రీయ ఎరువు తయారీపై  అవగాహన పెంచాలని జివిఎంసి కమిషనర్ డా. జి. సృజన అధికారులు ఆదేశించారు. శనివారం ఆమె రెండవ జోన్ ఐదవ వార్డు పరిధిలోని మడురవాడ, గణేష్ నగర్ తదితర ప్రాంతాలలో పర్యటించారు. ఈ సందర్భంగా ఆమె మాట్లాడుతూ సేంద్రీయ ఎరువు తయారు చేయు పద్దతులను మహిళా సంఘాల ద్వారా మహిళలకు అవగాహన పెంచాలని, ఇంటిలో వాడే కాయగూరల తొక్కలు, పండ్లు తొక్కలను ఉపయోగించి సేంద్రీయ ఎరువు తయారుచేయు విధానాన్ని తెలపాలని అన్నారు. గణేష్ నగర్ లో ఒక గృహిణి సేంద్రీయ ఎరువు తయారు చేయు పద్దతిని పరిశీలించి, ఆమెను అభినందించారు. ఈమెను ఆదర్శంగా చేసుకొని మరికొంత మందిని సేంద్రీయ ఎరువు తయారీకు ప్రోత్సహించాలని, డోర్ టు డోర్ చెత్త సేకరణ చేస్తున్నదీ లేనిదీ స్థానిక ప్రజలను అడిగి తెలుసుకున్నారు. తడి-పొడి చెత్తను వేరు చేసి ఇవ్వాలని, ప్రతీ రోజు పారిశుధ్య సిబ్బంది వస్తున్నదీ లేనిదీ అడిగి తెలుసుకున్నారు. వార్డులో మంచి నీటి సమస్యలను అడిగి తెలుసుకున్నారు. ప్రజలకు శుద్ధి చేసిన త్రాగు నీరు అందించాలని, గడువులోపు కొళాయి కనక్షనులు ఇవ్వాలని, సహాయక ఇంజినీరు(వాటర్ సప్ప్లై)ను  ఆదేశించారు.  వార్డులో పందులు అధికంగా ఉన్నాయని, వాటిని వెంటనే తొలగించాలని వెటర్నరి డాక్టరును ఆదేశించారు. రానున్న వర్శాకాలాన్ని దృష్టిలో పెట్టుకొని సీజనల్ వ్యాదులైన మలేరియా, డెంగ్యూ లాంటి వ్యాధులు ప్రబల కుండా ముందు జాగ్రత చర్యలు తీసుకోవాలని, ఇళ్ళ పరిసరాలలో నీటి నిల్వలు లేకుండా చూడాలని, వారంలో ఒక్క రోజు “డ్రై” డే పాటించే విధంగా ప్రజలకు అవగాహన కల్పించాలని ఎఎంఒహెచ్ కిషోర్ ను ఆదేశించారు. ఈ పర్యటనలో ప్రధాన వైద్యాధికారి కె.ఎస్.ఎల్.జి.శాస్త్రి, రెండవ జోనల్ కమిషనర్ బి.రాము,   కార్యనిర్వాహక ఇంజినీర్లు చిరంజీవి (మెకానికల్), శంకర్(వర్క్స్), శ్రీనివాస్(వాటర్ సప్ప్లై), ఎఎంఒహెచ్ / వెటర్నరి డాక్టరు కిషోర్, ఉప కార్యనిర్వాహక ఇంజినీర్ వంశీ, సహాయక ఇంజినీరు శ్రీహరి తదితరులు పాల్గొన్నారు. 

వైఎస్సార్‌ జగనన్న కాలనీలలో పండుగ వాతవరణంలో అనందోత్సహాలతో పేదలందరికీ ఇళ్ళ పథకం లబ్ధిదారులు ముమ్మరంగా ఇంటి నిర్మాణాలకు శంకుస్థాపనలు చేస్తున్నారని జిల్లా కలెక్టర్‌ వివేక్‌ యాదవ్‌ పేర్కొన్నారు. శనివారం తుళ్ళూరు మండలం పెదపరిమి గ్రామంలోని పేదంలందరికీ ఇళ్ళు వైఎస్సార్‌ జగనన్న కాలనీలలో ఇళ్ళ నిర్మాణ శంకుస్థాపన కార్యక్రమంలో జిల్లా కలెక్టర్‌ వివేక్‌ యాదవ్, తాడికొండ శాసన సభ్యులు ఉండవల్లి శ్రీదేవితో కలిసి పాల్గొన్నారు. కాలనీలోని పలు ఇళ్ళకు కలెక్టర్‌ వివేక్‌ యాదవ్, శాసన సభ్యులు ఉండవల్లి శ్రీదేవి లబ్ధిదారులతో కలిసి శంకుస్థాపనలు చేశారు.  ఈ సందర్భంగా జిల్లా కలెక్టర్‌ వివేక్‌ యాదవ్‌ మాట్లాడుతూ నవరత్నలు పేదలందరికీ ఇళ్ళ పథకం ద్వారా జిల్లాలో మొదటి విడతలో దాదాపు 1,22,000 ఇళ్ళకు పైగా నిర్మాణానికి అనుమతులు మంజూరు చేశారన్నారు. రాష్ట్ర ముఖ్యమంత్రి వైఎస్‌ జగన్‌ మోహన్‌ రెడ్డి ఆదేశాల మేరకు జూలై 1, 3, 4 తేదీలలో మెగా హౌసింగ్‌ గ్రౌండింగ్‌ మేళాను నిర్వహిస్తున్నామన్నారు. మెగా హౌసింగ్‌ గ్రౌండింగ్‌ మేళాలో 60,000 ఇళ్ళ నిర్మాణ పనులు ప్రారంభించాలని లక్ష్యంగా పెట్టుకున్నామని శనివారం ఒక్క రోజే దాదాపు 14,000 పైగా ఇళ్ళకు శంకుస్థాపన చేయాలని లక్ష్యాలు నిర్దేశించామన్నారు. మొదటి విడతలో మంజూరు చేసిన 95 శాతం ఇళ్ళ నిర్మాణం పూర్తి చేస్తేనే కేంద్రం వెంటనే రెండవ విడత ఇళ్ళను మంజూరు చేస్తుందన్నారు. ప్రతి ఒక్క లబ్ధిదారులు ఇళ్ళ నిర్మాణాలు చేపట్టేలా నియోజకవర్గ, మండల స్థాయి ప్రత్యేక అధికారులు ఎంపీడీవోలు, తహశీల్దారులు, సచివాలయ ఉద్యోగులు, స్థానిక శాసన సభ్యులు, ఇతర ప్రజా ప్రతినిధులు సమన్వయంతో చర్యలు తీసుకుంటున్నారన్నారు.

 తాడికొండ శాసనసభ్యులు డా. ఉండవల్లి శ్రీదేవి మాట్లాడుతూ రాష్ట్ర ముఖ్యమంత్రి వైఎస్ జగన్మోహన్ రెడ్డి  రూ. 10 లక్షల విలువగల స్ధిరాస్తిని పేదలందరికీ ఇళ్ళ పధకం ద్వారా ఇంటి స్థలం, పక్కా ఇళ్ళు నిర్మించి ఇస్తున్నారని అక్కా, చెల్లమ్మలు ఆనందం వ్యక్తం చేస్తున్నారన్నారు. రాష్ట్ర వ్యాప్తంగా తొలి విడతలో 15 లక్షలకు ఇళ్ళ నిర్మాణాలకు  శంకుస్థాపనలు చేస్తున్నారని, ఇంత భారీ ఎత్తున ఇళ్ళ నిర్మాణం దేశంలో ఎక్కడ జరగటం లేదన్నారు. తాడికొండ నియోజకవర్గంలో 68 వైఎస్సార్ జగనన్న కాలనీలలో 6000 మందికి పైగానే ఇంటి పట్టాలు అందించామన్నారు. పెదపరిమి గ్రామంలో తొమ్మిదిన్నర ఎకరాలలో వైఎస్సార్ జగనన్న కాలనీని ఏర్పాటు చేశారన్నారు. ఇంటి నిర్మాణానికి అవసరమైన మౌలిక సౌకర్యాలు పూర్తిస్థాయిలో కల్పించటం జరిగిందని, ప్రభుత్వం రూ.1.80 లక్షల ఆర్ధిక సహాయంతో పాటు, ఇసుక ఉచితంగా సరఫరా చేస్తుందని, రాయితీ పై సిమెంట్, ఇనుము ఇతర నిర్మాణ సామగ్రి రాయితీపై అందిస్తుందన్నారు. వైఎస్సార్ జగనన్న కాలనీలను   రహదారులు, మంచినీరు, విద్యుత్, డ్రైనేజీ సౌకర్యాలతో   పూర్తి స్థాయిలో అభివృద్ధి చేస్తున్నారన్నారు.  ప్రతి ఒక్క లబ్ధిదారులు ఇంటి నిర్మాణాలు చేసుకునేలా జిల్లా కలెక్టర్ వివేక్ యాదవ్, జిల్లా, మండల స్థాయి అధికారులు, సచివాలయ ఉద్యోగులు, స్థానిక ప్రజా ప్రతినిధులు పూర్తి స్థాయిలో సహకారం అందిస్తున్నారన్నారు.

    అనంతరం మందడం గ్రామంలో గ్రామ సచివాలయం –2 భవనంను, గ్రామంలో సీసీ రోడ్లను జిల్లా కలెక్టర్ వివేక్ యాదవ్, తాడికొండ శాసనసభ్యులు ఉండవల్లి శ్రీదేవితో కలిసి ప్రారంభించారు.

    ఈ కార్యక్రమంలో గుంటూరు రెవెన్యూ డివిజన్ అధికారి భాస్కరరెడ్డి, తాడికొండ నియోజకవర్గం ప్రత్యేక అధికారి భాస్కర నాయుడు, తుళ్ళూరు తహశీల్దారు సంజీవకుమారి, యంపీడీఓ ఏ. శ్రీనివాస్, హౌసింగ్, సచివాలయ, రెవెన్యూ ఉద్యోగులు, స్థానిక ప్రజాప్రతినిధులు పాల్గొన్నారు.