కె జి.హెచ్ కోవిడ్ వార్డులో  కోవిడ్ బాధితులకు  మెరుగైన వైద్య సేవలు అందించాలని కోవిడ్  నోడల్ అధికారి ,ఐటీడీఏ ప్రాజెక్ట్ అధికారి డాక్టర్ వెంకటేశ్వర్ సలిజామల ఆదేశించారు. జిల్లా కలెక్టర్ ఆదేశాలమేరకు సోమవారం కేజీహెచ్ నోడల్ అధికారిగా గారిగా బాధ్యతలు స్వీకరించారు. ఈసందర్భంగా  కోవిడ్ విభాగం అధికారులతో సమీక్షించారు.

కోవిడ్ పేషేంట్లకు నాణ్యమైన  ఆహారపదార్థాలు అందించాలన్నారు. తాగునీటి ని ఎప్పటికప్పుడు సరఫరా చేయాలని సూచించారు. అన్ని కోవిడ్ వార్డుల్లో అవసరమైన వెంటిలేటర్ లు ,బెడ్లు ఏర్పాటు చేయాలన్నారు. పేషెంట్ బంధువులు ఎక్కువమంది రాకుండా తగిన జాగ్రత్తలు తీసుకోవాలని సూచించారు. పేషేంట్ల సమాచారాన్ని ఎప్పటికప్పుడు సహాయక కేంద్రానికి అందించాలని పేర్కొన్నారు.

నిరంతరం పారిశుద్ధ్య పనులు చేపట్టి వార్డులను పరిశుభ్రంగా ఉంచాలని ఆదేశించారు. ప్రతి షిప్టులోను60 మంది శానిటేషన్ సిబ్బంది విధులు నిర్వహించాలని చెప్పారు

ఇటీవల కోవిడ్ సేవలకు నియమించిన డాక్టర్లు, సిబ్బంది వెంటనే విధులకు చేరాలన్నారు.కోవిడ్ బాధితులకు నిరంతరం ఆక్సిజన్ అందించాలన్నారు. సి ఎస్ ఆర్ బ్లాక్ లో ఏర్పడ్డ చిన్న చిన్న మరమ్మతులు చేయాలని  ఇంజినీరింగ్ అధికారులను ఆదేశించారు. కోవిడ్ పేషెంట్ మృతి చెందితే 30 నిమిషాల్లో వార్డ్ నుంచి బయటకు తరలించాలని చెప్పారు. కోవిడ్ పరిక్షలకు నమూనాలను సేకరించి కేజీహెచ్లోనే పరీక్షలు నిర్వహించి జాప్యం చేయకుండా ఫలితాలు వెల్లడించాలని స్పష్టం చేశారు.

ఈ సమావేశంలో సూపరింటెండెంట్ మైథిలి ఏ సి పి శిరీష  తదితరులు పాల్గొన్నారు.

కె.జి.హెచ్ సి.ఎస్.ఆర్. బ్లాకులో కోవిడ్ పేషెంట్లకు వైద్య సేవలు అందించడంలో ఎటువంటి లోటు పాట్లు వుండరాదని. ఈ విషయంలో ప్రత్యేక శ్రద్ద కనపరచాలని జిల్లా కలెక్టరు వి.వినయ్ చంద్  వైద్యాధికారులను ఆదేశించారు. సోమవారం ఉదయం కలెక్టరు సి.ఎస్.ఆర్.బ్లాకులో వైద్య సేవలు, శానిటేషన్, సెక్యూరిటీ, పేషెంట్ల డిశ్చార్జి, ఎక్వీప్ మెంటు , టెస్టింగ్ ఏజెన్సీ  ఏర్పాట్లు గావించిడం, తదితర అంశాలపై  చర్చించారు. సి.ఎస్.ఆర్ బ్లాకు ప్రత్యేకాధికారిగా  ఎస్. వెంకటేశ్వర్, పి.ఒ.ఐ.టి.డి.ఎ.పాడేరు ను  కలెక్టరు నియమించారు. సి.ఎస్.ఆర్.బ్లాకు లో వైద్యసేవలు, కోలుకుంటున్న పేషెంట్లు డిసార్చి గావించడం అన్ని విషయాలపై  ప్రత్యేక శ్రద్ద వహించాలని పి.ఒ. ఐ.టి.డి.ఎ.ను ఆదేశించారు. పేషెంట్లసు వివిధ వైద్య పరీక్షలు నిర్వహించేందుకు పి.పి.పి. క్రింద టెస్టింట్ ఏజెన్సీని గుర్తించాలని ఆదేశించారు. ఈ టెస్టింగ్ ఏజెన్సీని సి.ఎస్.ఆర్.బ్లాకు లోనే ఏర్పాటు గావించాలన్నారు.  పేషెంట్లను చేర్చుకునే విషయంలో టెస్టింగ్ ముఖ్యం కాదని, కోవిడ్  లక్షణాలు  వుంటే చేర్చుకుని అవసరమైన వైద్యసేవలు అందించాలని సూచించారు.  ఇ.సి.జి., ఎక్స్ రే , డయాలసిస్ మొదలగు టెక్నీషియన్స్ ను నియమించుకోవాలన్నారు. ఈ సమావేశంలో జాయింట్ కలెక్టరు –2 పి.అరుణ్ బాబు, ఆంధ్రా మెడికల్ కాలేజి ప్రిన్సిపాల్ డా.పి.వి.సుధాకర్,  పి.ఒ. ఐ.టి.డి.ఎ. ఎస్ .వెంకటేశ్వర్ , తదితరులు హాజరయ్యారు.

హెల్త్ సిటీ, విమ్స్ లకు ఆక్సిజన్ సరఫరా 

జిల్లాలో హెల్త్ సిటీలోని ఆసుపత్రులు కోవిడ్  పేషెంట్లకు వైద్య సేవలు అందిస్తున్నాయని,  వాటికి ఆక్సిజన్ సరఫరాకు ఎటువంటి  ఇబ్బంది లేకుండా చూడాలని  డ్రగ్ ఇన్స్పెక్టర్లు రజిత, కళ్యాణిలను జిల్లా కలెక్టరు వి.వినయ్ చంద్ ఆదేశించారు. హెల్త్ సిటి ఆసుపత్రులకు  ఆక్సిజన్ అవసరాలను  దృష్టిలో  పెట్టుకొని తగు ఏర్పాట్లు గావించాలన్నారు.  విమ్స్ ఆసుపత్రిలో అన్ని పడకలకు ఆక్సిజన్ సరఫరాకు తగు ఏర్పాట్లు చేయాలని ఎ.పి.ఎమ్.ఎస్.ఐ.డి.సి. ఇ.ఇ.డి.ఎ.నాయుడును ఆదేశించారు. ఈ విషయంపై కలెక్టరు ఎ.పి.ఎమ్.ఎస్.ఐ.డి.సి. ఇ.ఇ. డి.ఎ.నాయుడును, ప్రత్యేకాధికారి ఎస్.ఎస్.ఎ.పి.ఒ.లతో చర్చించారు.

 

విధి నిర్వహణలో అలసత్వం వహిస్తే కఠిన చర్యలు

వైద్య విధాన పరిషత్ ఆసుపత్రులనన్నింటిని  ప్రతిరోజూ పరిశీలన గావించి కోవిడ్ పేషెంట్లకు అవసరమైన వైద్యసేవలు అందేలా చర్యలు చేపట్టాలని జిల్లా కలెక్టరు వి.వినయ్ చంద్ డి.సి.హెచ్.ఎస్. లక్ష్మణ్ ను ఆదేశించారు. సదరు ఆసుపత్రులలో పడకలు, ఆక్సిజన్ , సేవలు, వివరాలను తెలియజేయాలన్నారు. విధి నిర్వహణలో అలసత్వం వహిస్తే  కఠిన చర్యలు తప్పవని హెచ్చరించారు. సి.హెచ్.సి.లలో వున్న పల్మనాలజిస్టలను  కె.జి.హెచ్.కు డెప్యూట్ గావించాలన్నారు.  ప్రైవేటు ఆసపత్రులను  తనిఖీ నిర్వహించాలని, నిబంధనలు ప్రకారం ఖాళీ పడకల వివరాలను 104 కాల్ సెంటర్ ఇంచార్జికి ఎప్పటికప్పుడు తెలియజేయాలని  డి.ఎమ్ అండ్.హెచ్.ఒ.ను  ఆదేశించారు.  ప్రైవేటు ఆసుపత్రులకు  ఇచ్చిన నోటీసులపై వారి వివరాలను వెంటనే అందించాలని తెలిపారు. ఈ సమావేశంలో జిల్లా వైద్య ఆరోగ్యశాఖాధికారి డా.సూర్యనారాయణ, జిల్లా ఆరోగ్యశ్రీ కో ఆర్డినేటర్ డా.రాజేష్ పాల్గొన్నారు.

కరోనా వైరస్ కేసులు అధికంగా పెరుగుతున్న సమయంలో సింహాచలంలోని శ్రీశ్రీశ్రీ వరాహ లక్ష్మీనరసింహ స్వామి ఆలయాన్ని అధికారులు అనునిత్యం పరిశుభ్రంగా ఉంచుతున్నారు. భక్తుల ఆరోగ్యాన్ని ద్రుష్టిలో పెట్టుకొని హైపో క్లోరైడ్ ద్రావణాన్ని పిచికారి చేస్తున్నారు. అంతేకాకుండా సామాజిక దూరాన్ని అమలు చేస్తూ..స్వామివారి దర్శనాన్ని కలిగిస్తున్నారు. వీటి కోసం దేవస్థానంలో ప్రత్యేక క్యూలైన్లు ఏర్పాటు చేశారు. దీనితో ప్రభుత్వ నిబంధనలు పాటిస్తూ భక్తులు దేవస్థానంలో స్వామిని దర్శించుకుంటున్నారు.

 విజయనగరం రవాణా శాఖ కార్యాలయంలో, లెర్నర్ లైసెన్సులు, డ్రైవింగ్ లైసెన్సులు, వాహన సంబంధిత ఫిట్నెస్,  ఇతర పనులు తాత్కాలికంగా నిలుపుదల చేస్తున్నట్లు రవాణా శాఖ ఉప కమిషనర్ సి.హెచ్. శ్రీదేవి తెలిపారు. కరోనా రెండో విడత విస్తృతంగా వ్యాపిస్తున్న నేపథ్యంలో రాష్ట్ర రవాణా కమిషనరు ఆదేశాలు జారీ చేశారని ఆమె పేర్కొన్నారు. ఈ మేరకు శనివారం ఒక ప్రకటన విడుదల చేస్తూ సోమవారం అనగా 3.5.2021 నుంచి 31.5.2021 వరకూ రవాణా శాఖ కార్యాలయంలో ఎటువంటి కార్యకలాపాలు నిర్వహించడం లేదని, ఇందుకు ప్రజలు సహకరించాలని కోరారు. ఉన్నత అధికారుల నుంచి వచ్చే తదుపరి ఆదేశాల మేరకు కార్యకలాపాలు ప్రారంభిస్తామని ఆమె వివరించారు. ప్రజలకు అవసరమైన సమాచారం కోసం ఆదినారాయణ ఆర్టీవో  9154294202,  కృష్ణమోహన్ ఏవో 9848528305, మోటార్ వెహికల్ ఇన్స్పెక్టర్స్ జె.రాంకుమార్ 9154294411 , ఎం.బుచ్చిరాజు 9154294412 నెంబర్లకు ఫోన్ చేసి తెలుసుకోవచ్చని తెలిపారు.

ఆంధ్రప్రదేశ్ లో విపరీతంగా పెరుగుతున్న కరోనా వైరస్ కేసుల నేపథ్యంలో 10వ తరగతి, ఇంటర్ పరీక్షలను వాయిదా వేయాలని సామాజికవేత్త, ప్రముఖ న్యాయవాది రహిమున్నీసాబేగమ్ ప్రభుత్వాన్ని కోరారు. శనివారం ఆమె విశాఖలో మీడియాతో మాట్లాడుతూ, కరోనా కేసులు అధికంగా మారుతున్న వేళ విద్యార్ధుల పరీక్షలను రద్దు చేయాలని, కుదరకపోతే వాయిదా వేయాలన్నారు. ప్రస్తుతం రోజుకు వేలల్లో కేసులు, పదుల సంఖ్యలో మరణాలు పెరుగుతున్నాయని ఆమె గుర్తు చేశారు. విశాఖలో సాధారణ ప్రజలతోపాటు చిన్నపిల్లలు కూడా కరోనా వైరస్ భారిన పడి మ్రుత్యువాత పడుతున్నారని ఆవేదన వ్యక్తం ప్రభుత్వం. ప్రభుత్వం పరీక్షలను వాయిదా వేయడం ద్వారా విద్యార్ధులు మరింతగా పరీక్షలకు సిద్ధం కావడానికి కూడా ఆస్కారం వుంటుందని ఆమె ప్రభుత్వాన్ని కోరారు. పెద్దలను వెంటాడుతున్న కరోనా రేపు పిల్లలను కూడా పట్టి పీడిస్తుందని, ప్రభుత్వం తక్షణమే పరీక్షల నిర్వహణను వాయిదా వేయాలన్నారు. చాలా చోట్ల ఉపాధ్యాయులు కూడా ఈ కరోనా భారిన పడి మరణిస్తున్న తరుణంలో ముఖ్యమంత్రి వైఎస్ జగన్మోహనరెడ్డి సత్వరమే నిర్ణయం వెనక్కి  తీసుకొని ప్రజల ప్రాణాలను కాపాడాలని ఆమె కోరారు.

కరోనా కేసులు అధికంగా పెరుగుతున్న ద్రుష్ట్యా మే2వ తేది నుంచి ప్రముఖ పుణ్యక్షేత్రం సింహాచలంలోని   శ్రీశ్రీశ్రీ వరాహ లక్ష్మీ నృసింహస్వామి వారి దర్శనాలు ఉదయం 6.30 నుంచి మధ్యాహ్నాం 2.30 వరకే అనుమతిస్తున్నట్టు ఆలయ ఈఓ ఎంవీసూర్యకళ తెలియజేశారు. శనివారం దేవస్థానంలో ఆమె మీడియాతో మాట్లాడారు. కరోనా కారణంగా వైరస్ వ్యాప్తిని నిరోధించడానికి ఉన్నతాధికారుల ఆదేశాల మేరకు ఈ నిర్ణయం తీసుకున్నామన్నారు. భక్తులు ఈ విషయాన్ని గమనించాలన్నారు. మొత్తం 22 మంది ఆలయ అర్చకుల్లో 14 మంది అనారోగ్య కారణాల వల్ల సెలవులో ఉన్నారన్నారు. కరోనా కాకపోయినా ఆ లక్షణాలు ఉన్నా జాగ్రత్తల కోసం సెలవుల్లో ఉన్నారని వివరించారు. ఉద్యోగులకు, అర్చకులకు కరోనీ పరీక్షలు చేశారని ఇంకా ఫలితాలు రావాల్సి వుందన్నారు. కాగా స్వామివారికి నిర్వహించే సేవలన్నీ ఏకాంతంగా నిర్వహిస్తారని వివరించారు. భక్తులు స్వామివారి ఆలయ దర్శనం సమయాలను గమనించి కేవలం ఉదయం పూట మాత్రమే రావాలన్నారు. 

కోవిడ్ నేపథ్యంలో ప్రైవేట్ ఆస్పత్రుల్లో ప్రభుత్వం నిర్దేశించిన ధరల కన్నా అధిక ఫీజులు వసూలు చేస్తే జిల్లా కలెక్టర్ గంధం చంద్రుడు హెచ్చరించారు. ఆదివారం కోవిడ్ నేపథ్యంలో జాయింట్ కలెక్టర్లు, పెనుకొండ సబ్ కలెక్టర్  ఆర్ డి వో లు, నోడల్ ఆఫీసర్ లతో జిల్లా కలెక్టర్ టెలికాన్ఫరెన్స్ నిర్వహించారు. ఈ సందర్భంగా జిల్లా కలెక్టర్ మాట్లాడుతూ ప్రైవేట్ ఆస్పత్రుల్లో కోవిడ్ చికిత్స కోసం వెళితే ఎక్కువ ఫీజులు వసూలు చేస్తున్నట్లు తన దృష్టికి వచ్చిందన్నారు. ఒక హాస్పిటల్లో రెమిడెసివిర్ ఆరు డోసులకు లక్షన్నర రూపాయలు వసూలు చేసినట్లు తెలిసిందన్నారు. రెమిడెసివిర్ కు రూ..2500 ల చొప్పున 6 డోసులకు , మిగిలిన అన్ని ఛార్జీలు కలుపుకున్న రూ.20వేల నుండి రూ.30 వేల వరకు ఖర్చవుతుందని, అయితే లక్షల రూపాయలు వసూలు చేస్తున్నారన్నారు.. ప్రభుత్వం నిర్దేశించిన ధరల కన్నా ఒక రూపాయి ఎక్కువ వసూలు చేసినా అలాంటి వాటిపై కఠిన చర్యలు తీసుకుంటామన్నారు.   హెల్ప్ డెస్క్ మేనేజర్లు ప్రతి ప్రైవేట్ ఆస్పత్రిలోనూ ప్రభుత్వం నిర్దేశించిన ధరలు ప్రదర్శించాలని, ఏ చికిత్సకు ఎంత డబ్బులు వసూలు చేయాలో అంత మాత్రమే వసూలు చేసేలా చూడాలని కలెక్టర్ ఆదేశించారు. అధికంగా డబ్బులు వసూలు చేయరాదన్నారు. ఈ ఆస్పత్రుల్లో ఎన్ని పడకలు ఉన్నాయి, ఎన్ని ఐసీయూ, నాన్ ఐసీయూ పడకలు ఉన్నాయి, ఎన్ని అందుబాటులో ఉన్నాయి అనే వివరాలను కూడా ప్రదర్శించాలన్నారు. అందుకు సంబంధించిన ఫోటో లను తనకు పంపించాలన్నారు

కోవిడ్ మేనేజ్మెంట్ పై నోడల్ అధికారులు ప్రత్యేక దృష్టి సారించాలి

కోవిడ్ మేనేజ్మెంట్ పై నోడల్ అధికారులు ప్రత్యేక దృష్టి సారించాలని జిల్లా కలెక్టర్ ఆదేశించారు. కొన్ని ఆస్పత్రుల్లో ఆక్సిజన్ సరఫరా సరిగా లేదని, శాని సరిగా లేదని తన దృష్టికి వస్తున్నాయన్నారు. ఇలాంటి సమస్యలు రాకుండా  అన్ని అంశాలకు సంబంధించిన నోడల్ అధికారులు సమన్వయం చేసుకుని పనిచేయాలన్నారు. డివిజన్ స్థాయిలో సబ్ కలెక్టర్, ఆర్డీవో లు కోవిడ్ మేనేజ్మెంట్ పై ప్రత్యేక దృష్టి సారించాలని, ఆస్పత్రుల్లో ఆక్సిజన్ సరఫరా, భోజనం ఏర్పాట్లు, శానిటేషన్ ఏర్పాట్లు తదితర అంశాలలో ఏమైనా సమస్యలు ఉంటే అక్కడికక్కడే పరిష్కరించాలన్నారు. కరోనా సోకిన వారికి పాజిటివ్ వచ్చాక వారితో మాట్లాడడం, ఏఎన్ఎం, ఆశావర్కర్లు పాజిటివ్ వచ్చిన వారి వద్దకు వెళ్లి సమాచారం సేకరించడం, వారికి అవసరమైన కిట్లు అందించడం చేయాలని, మెడికల్ ఆఫీసర్లు యాక్టివ్ గా పని చేయాలన్నారు. సబ్ కలెక్టర్, ఆర్డీవోలు పాజిటివ్ రిజల్ట్ వచ్చాక ఎక్కడెక్కడ పాజిటివ్ కేసులు వచ్చాయి, మెడికల్ అధికారులు,ఏఎన్ఎం, ఆశావర్కర్లు వారి వద్దకు వెళ్తున్నారా లేదా అనేది పరిశీలించాలన్నారు. పాజిటివ్ వచ్చినవారిని హోమ్ ఐసోలేషన్ లో పెట్టాక వారికి మెడికల్ కిట్స్ ఇచ్చారా లేదా అనే దాని పై ప్రత్యేక దృష్టి సారించాలన్నారు. 

ఆస్పత్రుల నోడల్ అధికారులు పూర్తి స్థాయిలో పర్యవేక్షించాలి

ప్రతి హాస్పిటల్ కు నోడల్ అధికారిని నియమించామని , ఆయా హాస్పిటల్ లకు నియమించిన నోడల్ అధికారులు హాస్పిటల్ లో కోవిడ్ మేనేజ్మెంట్ పై పూర్తి స్థాయి పర్యవేక్షణ చే సేలా చర్యలు తీసుకోవాలని   హాస్పిటల్ మేనేజ్మెంట్ నోడల్ అధికారి వరప్రసాద్ ను ఆదేశించారు.ఆస్పత్రిలో ఎంతమంది పేషెంట్లు ఉన్నారు , బెడ్స్ అందుబాటు తదితర సమాచారాన్ని సంబంధిత నోడల్ అధికారులు  తెలియజేయాలన్నారు. ఉదయం 8 గంటల నుంచి రాత్రి భోజనం సమయం వరకు హాస్పిటల్ నోడల్ ఆఫీసర్లు వారికి కేటాయించిన ఆస్పత్రుల్లో ఉండాలని, లేకపోతే వారిపై  కఠినచర్యలు తీసుకుంటామన్నారు. ఆస్పత్రులకు నోడల్ ఆఫీసర్లు సరిగా వెళ్లడం లేదని, సక్రమంగా స్పందించడం లేదని రాష్ట్ర స్థాయి నుంచి, కంట్రోల్ రూం నుంచి ఫోన్లు వస్తున్నాయని, అలాకాకుండా నోడల్ ఆఫీసర్లు ఆసుపత్రులకు సక్రమంగా వెళ్లాలని సూచించారు.హెల్ప్ డెస్క్ మేనేజర్లు సక్రమంగా పనిచేసేలా చూడాల ని హాస్పిటల్ నోడల్ అధికారులను ఆదేశించారు.. 

నోడల్ ఆఫీసర్ లు సమన్వయం చేసుకుని పని చేయాలి

కోవిడ్ నేపథ్యంలో టెస్టింగ్, కేర్ అండ్ కౌన్సిలింగ్, కోవిడ్ కేర్ సెంటర్లు, హాస్పిటల్ మేనేజ్మెంట్ ఇలా అన్ని రకాల అంశాలకు సంబంధించి నోడల్ ఆఫీసర్ లను నియమించామని, నోడల్ అధికారులు అంతా సమన్వయంతో పనిచేయాలన్నారు. పాజిటివ్ వచ్చాక కేర్ అండ్ కౌన్సిలింగ్ సెంటర్ నుంచి ఫోన్ చేసి హోమ్ ఐసోలేషన్ లో ఉంటారా లేక కోవిడ్ కేర్ సెంటర్ కి వెళ్తారా, లక్షణాలనుబట్టి ఆస్పత్రికి తరలించాలా అనేది నిర్ణయించాలని, ఇందుకు సంబంధించి క్షేత్రస్థాయిలో మెడికల్ అధికారులు, తహసీల్దార్ ల నుంచి సహకారం అందించాలన్నారు.

ఆక్సిజన్ వృధాను అరికట్టాలి

కోవిడ్ నేపథ్యంలో ప్రతి ఆసుపత్రికి సంబంధించి  ఆక్సిజన్ మానిటరింగ్ కమిటీలను ఏర్పాటు చేశామని, పాజిటివ్ వచ్చినవారికి ఎంత స్థాయిలో ఆక్సిజన్ అవసరం అని గైడ్ లైన్స్ ప్రకారం  పెట్టాలన్నారు. కొన్ని చోట్ల ఆక్సిజన్ మాస్క్ ను పెట్టేసి అలా వదిలేసి వెళ్ళడం లేక పోతే పాజిటివ్ వ్యక్తులు మాస్క్ తీసేసి పక్కన పెట్టినా చూసుకోక పోవడం వల్ల ఆక్సిజన్ చాలా వృధా జరుగుతోందన్నారు.ఇతర రాష్ట్రాల్లో ఆక్సిజన్ లేక చాలా మంది చనిపోతున్నారని పరిస్థితిని అర్థం చేసుకుని ఆక్సిజన్ వృధాను అరికట్టాలని సూచించారు. 

104 కాల్ సెంటర్ గురించి అందరికీ తెలియజేయాలి 

కరోనా నేపథ్యంలో ఏర్పాటు చేసిన 104 కాల్ సెంటర్ గురించి ప్రజలందరికీ తెలియజేయాలని, కరోనా గురించి ఏ సమాచారానికైనా, ఎలాంటి వివరాలు కావాలన్నా 104 కి కాల్ చేస్తే వైద్యానికి సంబంధించిన ఏ సమాచారం అయినా అందుతుందన్న విషయాన్ని  ప్రతి ఒక్కరికి అవగాహన కల్పించాలని జిల్లా కలెక్టర్ సూచించారు.  కరోనా లక్షణాలు ఉంటే ఏం చేయాలి టెస్ట్ కు ఎక్కడికి వెళ్ళాలి, డాక్టర్లతో మాట్లాడించడం, హోమ్ ఐ సొలేషన్ లో ఎలాంటి జాగ్రత్తలు తీసుకోవాలి తదితర అన్ని సలహాలు,సమాచారం 104కు ఫోన్ చేస్తే అందుతుంద న్న విషయాన్ని ప్రజలకు తెలిసేలా ప్రచారం చేయాలన్నారు.. కరోనా  నివారణకు టీమ్ అనంతపురం బాగా పని చేయాలని, కరోనాని అరికట్టాలని జిల్లా కలెక్టర్ సూచించారు.