భీమునిపట్నం చేపల మార్కెట్ కు నూతన భవన సముదాయాలు నిర్మించడానికి ప్రతిపాదనలు సిద్ధం చేయాలని జివిఎంసీ కమిషనర్ డా.స్రిజన ఇంజనీరింగ్ అధికారులను ఆదేశించారు. గురువారం ఆమె భీమునిపట్నం జోన్ లో పర్యటించారు. పెద్ద బజారు వద్ద ఉన్న లాల్ బహుదూర్ శాస్త్రి చేపల మార్కెట్ ను, షాపింగ్ కాంప్లెక్స్లను పరిశీలించారు. షాపింగ్ కాంప్లెక్స్ పూర్తిగా శిధిలావస్థకు చేరినందున వాటి స్థానంలో నూతన నిర్మాణాలు చేపట్టడానికి అంచనాలు తయారు చేయాలన్నారు. తద్వారా ఇక్కడి మత్స్యకారులకు సౌకర్యంగా వుంటుందన్నారు. అదే సమయంలో ఈ ప్రాంతంలోని చెత్త అధికంగా ఉండకుండా ఎప్పటికప్పుడు శుభ్రం చేస్తూ, వ్యాధులు ప్రభలకుండా చూడాలని శానిటేషన్ సిబ్బందికి సూచించారు. అంతేకాకుండా ఇక్కడ మంచినీటి సౌకర్యం కూడా ఏర్పాటుచేయాలన్నారు. ఈ కార్యక్రమంలో జోనల్ కమిషనర్ గోవింద రావు, పర్యవేక్షక ఇంజినీరు శివప్రసాద రాజు, కార్యనిర్వాహక ఇంజినీరు, టి.పి.ఆర్.ఓ, శానిటరీ ఇన్ స్పెక్టర్, సచివాలయ కార్యదర్శులు తదితరులు పాల్గోన్నారు.
పాడి పశువులు, గొర్రెలు, మేకలు పంపిణీ ద్వారా పేదలకు ఆర్థికంగా భరోసా కల్పించాలని ప్రభుత్వం నిర్ణయించిందని జిల్లా జాయింట్ కలెక్టర్ (ఆసరా, సంక్షేమం) జె.వెంకటరావు అన్నారు. దీనిలో భాగంగా వైఎస్ఆర్ చేయూత, ఆసరా పథకం లబ్దిదారులు 70,960 మందిని జిల్లాలో ఈ పథకానికి ఎంపిక చేయడం జరిగిందని చెప్పారు. స్థానిక డిఆర్డిఏ సమావేశ మందిరంలో ఈ పథకంపై సంబంధిత అధికారులు, బ్యాంకర్లతో గురువారం సమీక్షా సమావేశాన్ని నిర్వహించారు. వైఎస్ఆర్ ఆసరా, చేయూత పథకం క్రింద జిల్లాలో ఇప్పటికే సుమారు లక్షా,53వేల మందికి కిరాణా, ఇతర చిన్నచిన్న వ్యాపారాల ద్వారా ఉపాధి కల్పించడం జరిగిందని చెప్పారు. రెండో దశలో ఈ పథకం క్రింద 41,339 మంది మహిళలకు ఆవులను, 9,567 మంది మహిళలకు గేదెలను, 8,412 మంది మహిళలకు గొర్రెలను, 11,582 మంది మహిళలకు మేకలకు పంపిణీ చేసేందుకు ఎంపిక చేయడం జరిగిందని డిఆర్డిఏ పిడి కె.సుబ్బారావు తెలిపారు. ఒక్కో యూనిట్ ఖరీదు రూ.75వేలు కాగా, దీనిలో రూ.56,500 ను బ్యాంకు రుణంగా ఇస్తుందని, రూ.18,500ను లబ్దిదారులు భరించాల్సి ఉందని చెప్పారు.
పశు సంవర్థకశాఖ జాయింట్ డైరెక్టర్ ఎంవిఏ నర్సింహులు మాట్లాడుతూ, లబ్దిదారులు తమకు కావాల్సిన పశువులకు సంబంధించి తప్పనిసరిగా అంగీకార పత్రాన్ని ఇవ్వాల్సి ఉంటుందని చెప్పారు. వివిధ శాఖల అధికారుల సమక్షంలో, రైతు భరోసా కేంద్రం వద్దే పశువుల కొనుగోలు, అమ్మకాలకు ఒప్పందం చేయాల్సి ఉందని స్పష్టం చేశారు. ఇతర మండలాల తోపాటు, ఇతర జిల్లాలనుంచి కూడా పశువులను కొనుగోలు చేసుకొనేందుకు ప్రభుత్వం అంగీకరించిందని తెలిపారు. పశువులకు తమ వైద్యులచేత పూర్తిగా వివిధ పరీక్షలను నిర్వహించిన తరువాతే కొనుగోలుకు అనుతించడం జరుగుతుందన్నారు. జాయింట్ కలెక్టర్ వెంకటరావు మాట్లాడుతూ పేదల జీవితాలకు ఆర్థిక భద్రత కల్పించడం ద్వారా, వారి జీవితాల్లో వెలుగును నింపేందుకు ప్రభుత్వం ఎంతో ప్రతిష్టాత్మకంగా ఈ పథకాన్ని అమలు చేస్తోందని చెప్పారు. అర్హులైన వారందరికీ, మంచి మేలు జాతి పాడి పశువులు, మేకలు, గొర్రెలను కొనుగోలు చేసేలా అధికారులు సహకరించాలని కోరారు. వీలైనంత త్వరగా పథకాన్ని అమలు చేయాలని, దీనిలో భాగంగా శుక్రవారం నుంచే క్షేత్రస్థాయిలో లబ్దిదారులకు అవగాహనా కార్యక్రమాలను నిర్వహించాలని ఆదేశించారు. ప్రతీ నియోజకవర్గానికి సంబంధించిన వివరాలను అక్కడి ఎంఎల్ఏలకు అందజేయాలని సూచించారు. నిర్ణీత కాలవ్యవధిని నిర్ణయించుకొని, ప్రణాళికాబద్దంగా డిసెంబరు 5లోగా ఈ ప్రక్రియను పూర్తి చేయాలని చెప్పారు. పశువుల కొనుగోలులో ఏమైనా అవకతవకలు జరిగినా, నిబంధనలు అతిక్రమించినా సంబంధిత సిబ్బందిపై కఠిన చర్యలు తప్పవని జెసి హెచ్చరించారు.
ఆంధ్రవిశ్వవిద్యాలయం ఉపకులపతిగా నియమితులైన ఆచార్య పి.వి.జి.డి ప్రసాద రెడ్డిని గురువారం పలువురు అభినందించారు. పెద్దసంఖ్యలో ఆచార్యులు, ఉద్యోగులు ఆయనకు పుష్పగుచ్చాలు అందజేసి శుభాకాంక్షలు తెలిపారు. ఏయూ ఇయూ నాయకులు వీసీని సత్కరించారు. ఆటా సభ్యులు ఆచార్య ప్రసాద రెడ్డికి శుభాకాంక్షలు అందజేశారు. ఉదయం నుంచి వర్సిటీలో సందడి వాతావరణం నెలకొంది. వర్సిటీకి ఉపకులపతిగా ఆచార్య ప్రసాద రెడ్డిని నియమించడంతో పెద్దసంఖ్యలో ఉద్యోగులు, ఆచార్యులు వర్సిటీ పరిపాలనా భవనానికి చేరుకున్నారు. ఆచార్య ప్రసాద రెడ్డి గురువారం ఉదయం ఏయూలోని మహానేత స్వర్గీయ ముఖ్యమంత్రి వై.ఎస్ రాజశేఖర రెడ్డి విగ్రహానికి పూలమాల వేసి అంజలి ఘటించారు. వీసీ ప్రసాద రెడ్డిని రెక్టార్ ఆచార్య కె.సమత, పాలక మండలి సభ్యులు ఆచార్య టి.శోభశ్రీ, జేమ్స్ స్టీఫెన్, క్రిష్ణమంజరి పవార్, డీన్లు ఆచార్య కె.వెంకట రావు, టి.షారోన్ రాజు, ప్రిన్సిపాల్స్, డీన్లు, అధికారులు తదితరులు అభినందించారు.
ఆంధ్రవిశ్వవిద్యాలయం రిజిస్ట్రార్గా ఆచార్య వి.క్రిష్ణమోహన్ గురువారం ఉద్యోగ బాధ్యతలు స్వీకరించారు. వర్సిటీ వీసీ ఆచార్య పి.వి.జి.డి ప్రసాద రెడ్డి ఈ సందర్భం ఆయనకు ఉత్తర్వులను అందజేశారు. అనంతరం రిజిస్ట్రార్గా ఆయన బాధ్యతలను చేపట్టారు. ఈ సందర్భంగా ఆయన మాట్లాడుతూ, రాజ్యాంగ దినోత్సవరం రోజున ప్రఖ్యాత ఆంధ్రాయూనివర్శిటీలో రిజిస్ట్రార్ గా బాధ్యతలు స్వీకరించడం మరపురాని అంశమన్నారు. విద్యార్ధులకు, అద్యాపకులకు తనవంతు సేవలందిస్తానని ఈ సందర్భంగా రిజిస్ట్రార్ మీడియాకి తెలియజేశారు. కార్యక్రమంలో రెక్టార్ ఆచార్య కె.సమత, ఆచార్య జి.వి రవీంద్రనాథ్ బాబు తదితరులు పాల్గొన్నారు. అనంతరం విభాగంలోని సిబ్బందిని రిజిస్ట్రార్ ను మర్యాదపూర్వకంగా కలిసి అభినందనలు తెలియజేశారు.
రాజ్యాంగమే దేశానికి రక్షణగా నిలుస్తోందని ఏయూ వీసీ ఆచార్య పి.వి.జి.డి ప్రసాద రెడ్డి అన్నారు. గురువారం ఏయూలో నిర్వహించిన రాజ్యాంగ దినోత్సవ వేడుకల్లో ఆయన పాల్గొన్నారు. ముందుగా పరిపాలనా భవనం వద్దనున్న అంబేద్కర్ విగ్రహానికి, న్యాయ కళాశాల వద్దనున్న అంబేద్కర్ విగ్రహానికి పూలమాల వేసి అంజలి ఘటించారు. అనంతరం న్యాయ కళాశాలలో ఆచార్యులు, సిబ్బందితో రాజ్యాంగ ప్రతిజ్ఞ చేయించారు. సుస్తిర రాజ్యాంగం భార్తదేశానికి ప్రత్యేకమన్నారు. రాజ్యాంగ స్ఫూర్తిని, విలువలను పరిరక్షించే విధంగా పౌరులు నడచుకోవాలని సూచించారు. కార్యక్రమంలో రెక్టార్ ఆచార్య కె.సమత, ఇంచార్జి రిజిస్ట్రార్ ఆచార్య జి.వి రవీంద్రనాథ్ బాబు, ప్రిన్సిపాల్స్ ఆచార్య పేరి శ్రీనివాస రావు, కె.శ్రీనివాస రావు, పి.రాజేంద్ర కర్మాకర్, ఎస్.సుమిత్ర, పి.రాజేంద్ర ప్రసాద్, ఆర్.శివ ప్రసాద్, ఆచార్య కె.వెంకట రావు, పాలక మండలి సభ్యులు ఆచార్య టి.శోభశ్రీ, జేమ్స్ స్టీఫెన్, ఎస్సీ,ఎస్టీ, బిసి సి ఉద్యోగుల సంఘం అద్యక్షులు పి.అర్జున్, డీన్ డాక్టర్ టి.షారోన్ రాజు, డీన్లు, అధికారులు, ఉద్యోగులు, పరిశోధకులు పాల్గొన్నారు.
అనంతపురం జిల్లా, కళ్యాణదుర్గం మండలం చాపిరి గ్రామానికి చెందిన షాహిదా బేగం అలియాస్ షాహిదమ్మ (19) హత్య కేసులో ఐదుగురు నిందితులను అరెస్టు చేశామని కళ్యాణదుర్గం డీఎస్పీ ఎన్ రమ్య పేర్కొన్నారు. ఈ మేరకు గురువారం ఆమె బాధితులతో మాట్లాడుతూ, కనేకల్లు మండలం తుంబిగనూరు సమీపంలోని హెచ్చెల్సీ కాలువలో షాహిదా బేగం నిన్నటి రోజున శవమై తేలిన విషయమై ఈనెల 17 వ తేది రాత్రి నుంచి షాహిదాబేగం కన్పించుటలేదని కళ్యాణదుర్గం రూరల్ పోలీసు స్టేషన్లో ఆ అమ్మాయి తల్లి దూదేకుల సతాన్భీ ఈనెల 19 రాత్రి 7 గంటలకు ఫిర్యాదు చేశారన్నారు. వెంటనే మిస్సింగ్ కేసుగా నమోదు చేసి దర్యాప్తు చేపట్టామన్నారు. ఇందులో భాగంగా ఈ హత్యతో సంబంధమున్న చాపిరి గ్రామానికి బి.రఘు, ఇతని చిన్నాన్నలు రాజప్ప అలియాస్ రాజశేఖర్ , ఆనంద్ , పిన్నమ్మ విశాలమ్మ, అమ్మ లింగమ్మలను అరెస్టు చేశామన్నారు. ఈ ఐదుగురిలో ప్రధాన నిందితుడైన బి.రఘు ఈనెల 17 న పెళ్లి చేసుకుంటానని షాహిదా బేగంను నమ్మించి కనేకల్లు మండలం మాల్యం వద్దకు తీసికెళ్లాడన్నారు. ఇద్దరి మధ్య వాగ్వాదం చోటు చేసుకుని మాల్యం సమీపంలోని హెచ్చెల్సీ కాలువలోకి షాహిదా బేగంను తోసేశాడన్నారు. ఈ కేసును త్వరగా ఛేదించిన కళ్యాణదుర్గం రూరల్ సి.ఐ శివశంకర్ నాయక్ , ఎస్సై సుధాకర్ మరియు సిబ్బందిని కళ్యాణదుర్గం డీఎస్పీ అభినందించారు. చాపిరి షాహిదా బేగం హత్య కేసులో ప్రధాన నిందితుడైన బి.రఘుపై రౌడీషీట్ ఓపెన్ చేశామని డీఎస్పీ ఎన్ రమ్య తెలిపారు. అమ్మాయిలు/మహిళలపై నేరాలకు ఒడిగడితే ఉపేక్షించబోమని హెచ్చరించారు.
ప్రపంచంలోనే అతి పెద్ద రాజ్యాంగమైన భారత రాజ్యాంగం ప్రజాస్వామ్యానికి పెట్టని కోటని జిల్లా కలెక్టర్ డా. ఎం. హరి జవహర్ లాల్ అభివర్ణించారు . నవంబర్ 26 దేశ చరిత్ర లోనే అద్భుతమైన ఘట్టమని, ఈ సందర్భంగా భారత రాజ్యాంగ నిర్మాత డా. బాబా సాహెబ్ అంబేద్కర్ ను గుర్తుచేసుకోవడం భారతీయుల కర్తవ్యమని పేర్కొన్నారు. భారత రాజ్యాంగ దినోత్సవాన్ని పురష్కరించుకొని గురువారం కలెక్టరేట్ సమావేశ మందిరం లో రాజ్యాంగ నిర్మాత డా. బి.ఆర్. అంబేద్కర్ చిత్రపటానికి పూల మలాంకరణ గావించి నివాళు లర్పించారు. అనంతరం కలెక్టర్ మాట్లాడుతూ కేంద్ర ప్రబుత్వ ఆదేశాలు మేరకు నవంబర్ 26న సంవిధాన్ దివా స్ (రాజ్యాంగ దినోత్సవం) జరుపుతున్నామని, ఇదే రోజున జాతీయ న్యాయ దినోత్సవం కూడా జరుపుకోవడం విశేషమని న్నారు. 1949 , నవంబర్ 26 న రాజ్యాంగ ముసాయిదాకు రాజ్యాంగ సభ లో అంగీకారం లభించిందని, 1950, జనవరి 26న రాజ్యాంగం అమలులొకి వచ్చిందని పేర్కొన్నారు. 70 ఏళ్ళు గడిచినా మన రాజ్యాంగం చెక్కు చెదరకుండా ఉంటూ, ప్రజలంతా స్వేచ్చ, సమానత్వాలను అనుభవిస్తున్నారంటే అది మన రాజ్యాంగం గోప్పతనమేనని అన్నారు. ఇలాంటి రాజ్యాంగం పట్ల ప్రతి ఒక్కరికి అవగాహన కల్పించడం అవసరమని, అన్నారు. జాతీయ పండుగలు జరుపుకోవడం వలనజాతి సమైఖ్యత, ఐకమత్యం వర్దిల్లుతాయని అన్నారు. ఈ సందర్భంగా సంయుక్త కలెక్టర్ డా.జి.సి కిషోర్ కుమర్ భారత రాజ్యాంగం లోని ప్రియాంబుల్(పీఠిక) ను చదివి సభలో హాజరైన వారితో ప్రతిజ్ఞ చేయించారు. ఈ కార్యక్రమానికి సంయుక్త కలెక్టర్ (ఆసరా) స్వాగతం పలుకగా జిల్లా రెవిన్యూ అధికారి గణపతి రావు, జిల్లా పరిశాత్చి.ఈ.ఓ వెంకటేశ్వర రావు, విజనగరం కార్పొరేషన్ కమీషనర్ ఎస్.ఎస్.వర్మ, వ్యవసాయ శాఖ సంయుక్త సంచాలకులు ఆశా దేవి, ఐ.సి.డి.ఎస్. ఫై.డి రాజేశ్వరి, పలువురు జిల్లా అధికారులు , కల్లెక్టరేట్ సిబ్బంది పాల్గొన్నారు.
రాజమండ్రి ఎంపీ, వైఎస్సార్ సీపీ పార్లమెంటరీ చీఫ్ విప్ మార్గాని భరత్ రామ్ రాష్ట్ర సమాచారశాఖ మంత్రి పేర్ననాని తల్లిగారికి మచిలీపట్నంలో గురువారం ఘనంగా నివాళులు అర్పించారు. ఈ సందర్భంగా ఆమె మృతికి తీవ్ర విచారం వ్యక్తం చేస్తూ సంతాపం తెలిపారు. కుటుంబానికి సానుభూతి వ్యక్తం చేశారు. పేర్నినానితో కొంతసేపు మాట్లాడారు. ఇలాంటి సమయంలోనే మనసు దిటవు చేసుకోవాలని పేర్నిని సముదాయించారు. తల్లిని కోల్పోవడమంటే ఇంటిపెద్దను కోల్పోవడమేనని, ఇలాంటి పరిస్థితి ఎవరికీ రాకూడదని అన్నారు.అనంతరం పలు అంశాలు పేర్నితో చర్చించారు. గత మూడు రోజులు పేర్ని కుటుంబాన్ని వైఎస్సార్సీపీ ప్రభుత్వ పెద్దలు, ఎంపీలు, మంత్రులు, ఎమ్మెల్యేలు పరామర్శిస్తూనే వున్నారు.
భారత రాజ్యాంగం దినోత్సవం సందర్భంగా గురువారం విశాఖ కలెక్టర్ రేట్ లో కలెక్టర్ వినయ్ చంద్ డాక్టర్ బి.ఆర్ అంబేద్కర్ ఫొటో కు పూలమాలలు వేసి ఘనంగా నివాళులు అర్పించారు. భారత రాజ్యాంగ దినోత్సవం సందర్భంగా కలెక్టర్ కార్యాలయ సమావేశ మందిరంలో ఏర్పాటు చేసిన కార్యక్రమంలో పాల్గొని భారత రాజ్యాంగం గూర్చి సిబ్బంది అందరితో చదివి వినిపించారు. నివాళులు అర్పించిన వారిలో కలెక్టర్ తో పాటు జిల్లా జాయింట్ కలెక్టర్ ఎం. వేణుగోపాల్ రెడ్డి ఉన్నారు. ఈ కార్యక్రమంలో జిల్లా రెవెన్యూ అధికారి ఎ. ప్రసాద్, ఎ. ఓ. రామ్మోహన్, కలెక్టర్ కార్యాలయం అన్ని విభాగాల పర్యవేక్షకులు, సిబ్బంది పాల్గొన్నారు.
భారతీయ స్టేట్ బ్యాంక్ (ఎస్.బి.ఐ) విశాఖపట్నం మాడ్యూల్ డిప్యూటి జనరల్ మేనేజర్ (డిజిఎం) కె.రంగరాజన్ అరసవల్లి శ్రీ సూర్యనారాయణ స్వామి వారిని గురువారం దర్శించుకున్నారు. ఆలయ అధికారులు వేదమంత్రోచ్చరణలతో పూజలు నిర్వహించారు. అనివెట్టి మండపంలో స్వామి వారి ఆశీర్వచనాలను అందించారు. జిల్లావాసులు సురక్షితంగా ఉండాలని, కరోనా మహమ్మారి ప్రభావానికి లోనుకాకుండా ఆరోగ్యంగా ఉండాలని రంగరాజన్ ఈ సందర్భంగా ఆకాంక్షించారు. జిల్లాలో ఎస్.బి.ఐ ఖాతాదారులకు మంచే సేవలు అందించాలనే లక్ష్యంతో పనిచేస్తున్నామని ఆయన పేర్కొన్నారు. బ్యాంకు సేవలు అందుతున్న తీరును పరిశీలించుటకు జిల్లా పర్యటనకు విచ్చేసినట్లు ఆయన తెలిపారు. ఈ కార్యక్రమంలో స్టేట్ బ్యాంక్ రీజనల్ మేనేజర్ ఏ.వి.ఎస్.ఎస్.ప్రసాద్, బ్యాంకు సిబ్బంది కిరణ్ బాబు, ఎస్.బి.ఐ ఉద్యోగుల జోనల్ కార్యదర్శి వెంకట రమణ తదితరులు పాల్గొన్నారు.
శ్రీకాకుళం రాజ్యాంగ పరిరక్షణ మనందరి బాధ్యత అని సంయుక్త కలెక్టర్ సుమీత్ కుమార్ పేర్కొన్నారు. గురువారం జిల్లా కలెక్టర్ కార్యాలయపు సమావేశ మందిరంలో 71వ రాజ్యాంగ దినోత్సవ కార్యక్రమానికి జె.సి. ముఖ్య అతిధిగా విచ్చేసారు. ఈ సందర్భంగా మాట్లాడుతూ, మన రాజ్యాంగం అతి పెద్ద రాజ్యాంగమని తెలిపారు. ఇందులో ప్రాధమిక హక్కులు, ఆదేశిక సూత్రాలు పొందుపరచడం జరిగిందన్నారు. రాజ్యాంగం మనకు కల్పించిన హక్కులు, బాధ్యతలను తెలియచేసారు. విభిన్న మతాలు, భాషలు, విభిన్న సంస్కృతులతో విలసిల్లే దేశానికి రాజ్యాంగం దిక్సూచి వంటిదని తెలిపారు. రాజ్యాంగ రూపశిల్పి డా.బాబా సాహెబ్ అంబేద్కర్ ను ఈ సందర్భంగా స్మరించుకోవలసిన ఆవశ్యకతను వివరించారు. ముందుగా అంబేద్కర్ చిత్రపటానికి పూలమాలలు వేసి నివాళులర్పించారు. అనంతరం రాజ్యాంగ పీఠికను చదివి వినిపించారు. రాజ్యాంగ పరిరక్షణకు కృషి చేస్తామని, రాజ్యాంగ స్ఫూర్తిని ఆచరిస్తామని ప్రతిజ్ఞ చేసారు. ఈ కార్యక్రమంలో జిల్లా రెవిన్యూ అధికారి బి.దయానిధి, సివిల్ సప్లైస్ జిల్లా మేనేజరు ఎ.కృష్ణారావు, హార్టికల్చర్ ఎ.డి.సాల్మన్ రాజు, కలెక్టరేట్ ఎ.ఓ. బి.రాజేశ్వరరావు, తదితరులు పాల్గొన్నారు.
ప్రతీ ఒక్కరు రాజ్యాంగంపై అవగాహన పెంచుకుని ఇతరులకు కూడా రాజ్యాంగం యొక్క ఆవశ్యకతను వివరించాలని జెఎన్టియుకె ఉపకులపతి ప్రొ.ఎం.రామలింగరాజు పిలుపునిచ్చారు. 72వ భారత రాజ్యాంగ దినోత్సవ వేడుకలను యూనివర్శిటీలో గురువారం ఘనంగా నిర్వహించారు. ఈ సందర్భంగా డా.బి.ఆర్.అంబేద్కర్ కాంస్య విగ్రహానికి పూలమాలలు వేసి అంజలి ఘటించారు. అనంతరం డాక్టర్ బి.ఆర్.అంబేద్కర్ సెంట్రల్ లైబ్రరీ హాలులో కోవిడ్-19 నిబంధనలను అనుసరిస్తూ కార్యక్రమం నిర్వహించారు. ఉపకులపతి ప్రొ.ఎం.రామలింగరాజు మాట్లాడుతూ, డాక్టర్ బి.ఆర్.అంబేద్కర్ రచించిచ రాజ్యాంగం భారతదేశంలో అమలైన నవంబర్ 26వ తేదీన రాజ్యాంగ దినోత్సవంగా నిర్వహించుకుంటున్నామన్నారు. భారత రాజ్యాంగ పితగా డా.బిఆర్.అంబేద్కర్ చరిత్రలో నిలిచిపోయారని, భారత రాజ్యాంగం ప్రపంచంలో అతిపెద్ద లిఖిత రాజ్యాంగ గ్రంథంగా నిలిచిందన్నారు. ప్రతీ ఒక్కరు భారత రాజ్యాంగం గురించి తెలుసుకుని తద్వారా సమాజాభివృద్ధి తమ వంతు కృషి చేయాలన్నారు. అనంతరం ఉపకులపతి ప్రొ.ఎం.రామలింగరాజు భారత రాజ్యాంగ ప్రవేశికను ప్రతీ ఒక్కరి చేత చదివించి భారత రాజ్యాంగం యొక్క ఔన్నత్యాన్ని తెలియజేశారు. ఈ కార్యక్రమంలో రిజిస్ట్రార్ ప్రొ.సిహెచ్.సత్యనారాయణ, ఓఎస్డి ప్రొ.వి.రవీంద్రనాధ్, చీఫ్ ఇంజనీర్ ప్రొ.జి.ఏసురత్నం, యుసిఇకె ప్రిన్సిపాల్ ప్రొ.బి.బాలకృష్ణ, గ్రీన్ క్యాంపస్ ఇనీషియేటివ్ డైరెక్టర్ ప్రొ.కె.వి.ఎస్.జి.మురళీకృష్ణ, ఉమెన్ ఎంపవర్మెంట్ & గ్రీవెన్సెస్ డైరెక్టర్ ప్రొ.ఏ.స్వర్ణకుమారి, ఐఐఐపిటి డైరెక్టర్ ప్రొ.ఎన్.మోహన్రావు, స్కూల్ ఆఫ్ మేనేజ్మెంట్ స్టడీస్ (ఎస్ఎంఎస్) డైరెక్టర్ ప్రొ.ఏ.కృష్ణమోహన్, ఇంటర్నల్ క్వాలిటీ అస్యూరెన్స్ సెల్ (ఐక్యూఏసి) డైరెక్టర్ ప్రొ.ఎన్.బాలాజీ, టీచింగ్ & నాన్ టీచింగ్ సిబ్బంది తదితరులు పాల్గొన్నారు.
ఆ ఎస్పీ దాత్రుత్వానికి నిజంగా సెల్యూట్ చేయాల్సిందే..నివర్ తుపాను విలయతాండవం చేస్తున్న తరుణంతో నా అనేవారు లేని అనాధల కోసమే ఆలోచించారు..డిఎస్పీకేడర్ అధికారిని వారికి సేవలు చేయమని పంపి వారి కడుపు నింపారు...ఆయన తిరుపతి అర్భన్ జిల్లా ఎస్పీ ఏ.రమేష్ రెడ్డి. అనునిత్యం ప్రజలకు ఫ్రెండ్లీ పోలిసింగ్ ను దగ్గర చేసే ఈయన సేవ కార్యక్రమాల్లో అధికంగా పాల్గొంటారు. తుపానులో ముఖ్యమైన ప్రాంతాల పర్యటనకు వెళుతూ,మార్గ మధ్యలో దిగాలుగా కనిపించిన అనాధలను చూసి తక్షణమే తన సిబ్బందిని ఆదేశించారు. వెంటనే తిరుపతి పట్టణంలో నిరాశ్రయులుగా ఉన్న అనాధలను వెతికి వారికి ఆహారం, బట్టలు ఇవ్వాలని సూచించారు. దీంతో రంగంలోకి దిగిన డిఎస్పీ మురళీ క్రిష్ణ, సిఐ శివప్రసాదరెడ్డిలు నగరంలోని అనాధలను గుర్తించి వారికి ఆహార పొట్లాలు, బట్టలు పంపిణీ చేశారు. నివర్ తుఫానులో ప్రజలను కాపాడటానికే ఖాళీ లేకుండా వరద ప్రాంతాలను తిరుగుతూనే అనాధల కోసం ఆలోచించి మరీ వారికి ఆకలి తీర్చిన ఎస్సీ రమేష్ రెడ్డి సేవకు ప్రశంసల జల్లు కురుస్తోంది..ఐపీఎస్ లంటే విధి నిర్వహణే కాదు..మానవతా ద్రుక్పదం చాటడంలో ముందుంటారని ఈయనను చూస్తే ఎవరికైనా ఇట్టే అర్ధమవుతుంది.!
తిరుపతి అర్బన్ జిల్లా యస్.పి ఏ.రమేష్ రెడ్డి ఆదేశాల మేరకు పోలీసులు గురువారం సహాయక చర్యలు చేపట్టారు. భారీ గాలులు, వర్షాలు పడిన ప్రాంతాల్లో నేలకొరిగిన చెట్లను తొలగింపు చేపట్టారు. తొట్టంబేడు పోలీస్ సిబ్బంది శ్రీకాళహస్తి తొట్టంబేడు, తంగెళ్ళ పాల్యెం, కొలత్తూరు రోడ్డు నివర్ తుఫాన్ ధాటికి రహదారిలో భారీ వృక్షాలు నేలకొరిగి రహదారి మొత్తం దిగ్బంధం జరిగినది. దీంతో ప్రజలు రాకపోకలు స్తంబించాడంతో సమాచారం అందుకున్న తొట్టంబేడు పోలీస్ సిబ్బంది ఉంటాహుటిన సంఘటనా స్థలానికి వెళ్లి నేలకొరిగిన భారీ వృక్షాలను తొలగించి రాకపోకలకు ఏ ఇబ్బంది లేకుండా చేశారు. అదేసమయంలో ఆ ప్రాంత వాసులను కూడా భారీ వర్షాల్లో జరిగే అనర్ధాలపై అప్రమత్తం చేశారు.
శ్రీకాళహస్తి స్వర్ణముఖి నది ఒడ్డున ఉన్న పలు లోతట్టు ప్రాంతాలను పోలీసులు అప్రమత్తం చేస్తున్నారు. గురువారం శ్రీకాళహస్తి ఒకటో పట్టణ పోలీస్ శాఖ సిబ్బంది ఇంటింటికీ తిరిగి ప్రజలకు సూచనలు జారీచేస్తున్నారు. వర్షాల కారణంగా స్వర్ణముఖి నది లో ప్రవాహం పెరిగే అవకాశం ఉన్నందున లోతట్టు ప్రాంతాల వారు అప్రమత్తంగా ఉండాలని పిల్లలను బయటకు పంపొద్దని చెబుతున్నారు. ఈ సందర్భంగా సి.ఐ నాగార్జున రెడ్డి వారి సిబ్బందితో అన్ని ప్రాంతాలను తిరిగి ప్రజలను అప్రమత్తం చేస్తున్నారు. ఆ ప్రాంతంలో పడిపోయిన చెట్టును తొలగించి రాకపోకలకు అంతరాయం లేకుండా చేశారు. వర్షాలు అధికంగా కురుస్తున్న పిడుగులు, చెట్లు పడిపోయే అవకాశం వుందని ప్రజలు చెట్లు ఉన్న చోట వాటిదగ్గరకు వెళ్లకూడదని సూచించారు. కార్యక్రమంలో పోలీసు సిబ్బంది పాల్గొన్నారు.
