కాకినాడలో రూ.30 కోట్లతో నూతన అంబేద్కర్ భవన నిర్మాణానికి రాష్ట్ర ప్రభుత్వానికి ప్రతిపాదనలు పంపినట్టు జిల్లా కలెక్టర్ డా.కృతికా శుక్లా తెలిపారు. మంగళవారం మధ్యాహ్నం కలెక్టరు కృతికా శుక్లా.. సాంఘిక సంక్షేమం, ఇంజనీరింగ్ అధికారులతో కలిసి కాకినాడ పాత బస్టాండ్ వద్దన్న డా. బి.ఆర్ అంబేద్కర్ భవన్ ను పరిశీలించి అత్యవసర మరమ్మత్తుల పనులు చేపట్టవలసిందిగా అధికారులకు ఆదేశించారు. ఈ సందర్భంగా కలెక్టర్ మాట్లాడుతూ కాకినాడలో ఉన్న అంబేద్కర్ భవన్ ను గత రెండు సంవత్సరాలగా కోవిడ్ మెటీరియల్ స్టోర్ చేయడంతో వినియోగం లేకుండా పోయిందన్నారు. ప్రస్తుతం ఇక్కడ నుంచి కొవిడ్ స్టాక్ ను పూర్తిగా తొలగించామన్నారు.  అత్యవసర మరమ్మతులు, ఎయిర్ కండిషన్ కనెక్షన్ ఇతరులకు సంబంధించి రూ.13 లక్షల మంజూరు చేయడం జరిగిందని, సంవత్సర కాలంగా పెండింగ్ లో ఉన్న విద్యుత్ బిల్లును కూడా చెల్లించడం జరిగిందని కలెక్టర్ తెలిపారు. ఆగస్టు15 నాటికి అత్యవసర మరమ్మతుల పనులు పూర్తిచేసి ప్రజలకు వినియోగంలోకి తీసుకువచ్చే విధంగా అధికారులకు ఆదేశించినట్లు కలెక్టర్ తెలిపారు. అదేవిధంగా 30 కోట్ల రూపాయలతో నూతన అంబేద్కర్ భవనాన్ని ఆధునిక వసతులతో నిర్మాణానికి రాష్ట్ర ప్రభుత్వానికి ప్రతిపాదనలు పంపించడం జరిగిందని, రాష్ట్ర ప్రభుత్వం మార్గనిర్దేశాలకు అనుగుణంగా కాకినాడలో నూతన అంబేద్కర్ భవన్ నిర్మాణ పనులు చేపట్టడం జరుగుతుందని కలెక్టర్ ఈ సందర్భంగా తెలిపారు. ఈ పర్యటనలో కలెక్టర్ వెంట సాంఘిక సంక్షేమ శాఖ జేడీ జే.రంగలక్ష్మీదేవి, ఏపీఈడబ్ల్యుఐడీసి ఈఈ వి లక్ష్మణ రెడ్డి డీఈ కె.వెంకటరాజు ఇతర అధికారులు పాల్గొన్నారు.

రానున్న శ్రావణమాసం ప్రతి ఇంటా నోములు, వ్రతాలతో  లక్ష్మీ కళ ఉట్టిపడుతూ కళకళలాడను న్నాయని ఆధ్యాత్మికవేత్త రవిశంకర్ పట్నాయక్ పేర్కొన్నారు. సోమవారం సర్పవరం జంక్షన్ లో విశ్రాంతి తాసిల్దార్ రేలంగి బాపిరాజు సౌజన్యంతో వరలక్ష్మీ వ్రతాన్ని పురస్కరించుకుని పేద మహిళలకు నూతన వస్త్రాలు పంపిణీ జరిగింది. పట్నాయక్ మాట్లాడుతూ మహిళా లోకమంతా భక్తిశ్రద్ధలతో చేసే అనేక వ్రతాలలో  వరలక్ష్మి వ్రతం అతి గొప్పదని ఈ వ్రతం చేస్తే లక్ష్మీ కటాక్షం సిద్ధిస్తుందని అన్నారు. వరలక్ష్మీ వ్రతాన్ని పురస్కరించుకుని నూతన వస్త్రాలు సమకూర్చిన బాపిరాజు   సేవా తత్పరత అభినందనీయమని పట్నాయక్ తెలిపారు .ఈ కార్యక్రమంలో అడబాల రత్న ప్రసాద్, రాఘవరావు, రాజా తదితరులు పాల్గొన్నారు.

చిన్న కుటుంబం ఉన్ననాడే భావితరాలకు సహజ వనరులను అందించేందుకు వీలుకలుగుతుందని, తద్వారా దేశం అభివృద్ధి చెందుతుందని సంయుక్త కలెక్టర్ ఎం.విజయసునీత అభిప్రాయపడ్డారు. జూలై 11న ప్రపంచ జనాభా దినోత్సవం సందర్భంగా జిల్లా వైద్య ఆరోగ్య శాఖాధికారి ఆధ్వర్యంలో ప్రపంచ దినోత్సవ ర్యాలీ కార్యక్రమం స్థానిక డిఎహెచ్ఓ కార్యాలయ ఆవరణలో సోమవారం జరిగింది. ఈ కార్యక్రమానికి జె.సి ముఖ్య అతిధిగా పాల్గొని జెండా ఊపి ర్యాలీని ప్రారంభించారు. ఈ సందర్భంగా ఆమె మాట్లాడుతూ మనకున్న వనరుల్లో అసాధారణమైన వనరు మానవ జనాభా అని, ప్రకృతి విపత్తులను,అనేక అడ్డంకులు,ఆటంకాలను ఎదుర్కొని అప్రహితంగా మనుగడను కొనసాగిస్తుందని ఆమె పేర్కొన్నారు. అసాధారణ రీతిలో జనాభాను పెంచుకుంటూ పోతే ప్రపంచానికే ముప్పు వాటిల్లే అవకాశం ఉందని అన్నారు. కావున ఎప్పటికపుడు మన ప్రగతిని సమీక్షించుకుంటూ మరింత అభివృద్ధి వైపు అడుగులు వేయడానికి ఈ రోజు ఒక మైలురాయిగా చెప్పుకోవచ్చని తెలిపారు. అందులో భాగంగానే ప్రతి ఏడాది జూలై 11న ప్రపంచ జనాభా దినోత్సవాన్ని నిర్వహించుకుంటున్నామని ఆమె గుర్తుచేశారు. ఇప్పటివరకు సాధించిన ప్రగతిని సమీక్షించుకునేందుకు ఇది దోహదపడుతుందని అన్నారు. 1989సం.లో ఐక్య రాజ్య సమితి ప్రపంచ జనాభా దినోత్సవాన్ని ప్రకటించగా, నాటి నుండి  ప్రతి ఏడాది ఒక నినాదంతో ఈ కార్యక్రమాన్ని నిర్వహిస్తున్నట్లు ఆమె వివరించారు.  1951సం. నుండి మనదేశంలో జన గణన ప్రారంభమైందని, నాటి నుండి 7 సార్లు జనాభా గణన జరిగిందని అన్నారు. గతేడాది జనాభా గణన జరగాల్సి ఉన్నప్పటికీ కోవిడ్ కారణంగా వాయిదా వేసినట్లు జెసి తెలిపారు. 2011 జనాభా లెక్కల ప్రకారం రాష్ట్ర జనాభా 8కోట్ల 53 లక్షలు కాగా, ప్రపంచ జనాభా 8 బిలియన్ల వరకు పెరిగిందని అన్నారు. ప్రస్తుతం దేశ జనాభా ప్రపంచంలోనే ద్వితీయ స్థానంలో ఉందని, అందుకు తగిన విధంగా సహజ వనరులను భేరీజు వేసుకోవాలని ఆమె కోరారు. అధిక జనాభాను దృష్టిలో ఉంచుకొని కుటుంబ నియంత్రణ పద్ధతులను పాటిద్దాం..నూతన అధ్యాయానికి నాంది పలుకుదాం అని ప్రతి ఒక్కరూ ప్రతిన బూనాలని ఆమె ఈ సందర్భంగా జిల్లా ప్రజలకు పిలుపు నిచ్చారు. 

చిన్న కుటుంబం ఉన్నపుడే భావితరాలకు సహజ వనరులను అందించగలుగు తామని ఆమె ఆశాభావం వ్యక్తం చేశారు. ఈ సందర్భంగా కుటుంబ నియంత్రణ శస్త్ర చికిత్సలు నిర్వహించడంలో ఉత్తమ సేవలు అందించిన డా.జయలక్ష్మి,పి.రేఖలకు ఒక్కొక్కరికి రూ.10వేలు వంతున, అగర్త తేజ మరియు బి.భారతిలకు రూ.5వేలు వంతున ప్రోత్సాహక బహుమతితో పాటు సర్టిఫికేట్లను బహూకరించారు. అలాగే విధి నిర్వహణలో ఉత్తమ సేవలు అందించిన డెప్యూటీ ఎస్.ఓ డి.శ్రీనివాస పట్నాయక్,డా.ఎన్. శేషగిరి, డా.జి.గణపతి,డా.పి.తార తదితరులకు జ్ఞాపికతో పాటు సర్టిఫికేట్లను బహూకరించారు. అనంతరం ర్యాలీ ఏడు రోడ్ల కూడలి వరకు కొనసాగగా ఆద్యంతం ఆమె ర్యాలీలో పాల్గొన్నారు. ఈ కార్యక్రమంలో జిల్లా వైద్య ఆరోగ్య శాఖాధికారి డా.బి.మీనాక్షి, పైడి వెంకట రమణ,డా.కె.కృష్ణమోహన్,డా.కె.అప్పారావు,డా.ఎన్. షగిరి,డా.జి.గణపతి,డా.పి.తార, రెడ్ క్రాస్ సంస్థ చైర్మన్ పి.జగన్మోహనరావు, సెట్ శ్రీ ముఖ్య కార్యనిర్వహణాధికారి బి.వి.ప్రసాదరావు, మేనేజర్ వి.వి.అప్పల నాయుడు, జిల్లా చీఫ్ కోచ్ మాధవీలత, నటుకుల మోహన్, మంత్రి వెంకటస్వామి,  సోమేశ్వర రావు, కె.ఎల్.నారాయణరావు, పెంకి చైతన్య కుమార్, సూర్యకళ, ఏ.ఎన్.ఎంలు, ఆశావర్కర్లు, నర్సింగ్ విద్యార్థులు తదితరులు పాల్గొన్నారు.

బక్రీద్ సందర్భంగా జంతు, గోవధలను నిషేధించినట్లు శ్రీకాకుళం రెవెన్యూ డివిజనల్ అధికారి బి. శాంతి శుక్రవారం వెల్లడించారు. ఈ నెల 10వ తేదీన బక్రీద్ పండగ సందర్భంగా గోవులు, ఒంటెలు వదించకుండా జిల్లా కలెక్టర్ ఆదేశాల పై ప్రత్యేక చర్యలు తీసుకుంటున్నట్లు తెలిపారు.  బక్రీద్ సందర్భంగా ఆవులను చంపివేసే ప్రమాదం ఉన్నందు వలన ప్రివెన్షన్ ఆఫ్ క్రూయాల్డ్ టు ఏనిమల్ ఆర్ట్ 1960 & AP Prohibition of Cow Slaughter and Animal Prevention Act 1977 & PCA Rules-2000 ప్రకారం చర్యలు తీసుకుంటామని హెచ్చరించారు.  అధికారులందరూ  అప్రమత్తంగా ఉండి  10వ తేదీన ఆవులను, ఒంటెలను క్రూరంగా నరికివేయకుండా, జంతు వధ ప్రాంతాలకు తరలించకుండా అడ్డుకోవాలని పిలుపునిచ్చారు. జంతు వధ ప్రాంతాలకి తరలించకుండా చెక్ పోస్టుల ద్వారా పోలీసులు తనిఖీ చేసి ఆపాలన్నారు.  జంతు వధ కొరకు ఆవులు, ఒంటెలు, తదితర జంతువులు అమ్మకాలు, కొనుగోలు నిషేదిస్తున్నట్లు పేర్కొన్నారు.   జంతు వధ (గోవధ) కి ప్రయత్నించు వారిపై కఠిన చర్యలు తప్పవని హెచ్చరించారు.  మున్సిపాలిటీలలో  గోవధ, ఒంటెల వధ నిషేధమని తెలియజేస్తూ ముఖ్య కూడలిల వద్ద ముఖ్యంగా బక్రీదు సమయంలో బోర్డులు ఏర్పాటు  చేయాలన్నారు.  

జంతు వధ నిషేధం కొరకు జంతువుల కొనుగోలు, అమ్మకాలు నిషేధం ప్రకటించి, అమ్మకాలు జరిగే ప్రాంతంలో అమ్మకాలు నిలుపుదలకు రెవెన్యూ అధికారులు చర్యలు తీసుకోవాలన్నారు.    జంతువులు, గోవులు, తదితరమైనవి వాహనాలలో తరలించకుండా రవాణా శాఖ అధికారులు తగు చర్యలు తీసుకోవాలని,  తగిన సిబ్బందితో చెక్ పోస్టు ఏర్పాటు చేసుకోవాలన్నారు. ఒంటెలు, గోవులు వధ నిషేధం - జంతువుల పట్ల క్రూరంగా ప్రవర్తించరాదని తెలుపుతూ విద్యార్థులచే ర్యాలీలు చేపట్టేందుకు విద్యా శాఖాధికారులు చర్యలు తీసుకోవాలన్నారు. గో వధ, జంతు వధ నిషేధంపై అన్ని గ్రామ పంచాయతీల్లో అవగాహన సదస్సులు ఏర్పాటుకు పంచాయతీ అధికారులు చర్యలు చేపట్టాలని పేర్కొన్నారు. గోవులు, ఇతర జంతువులను తరలించకూడదని ప్రచారం నిర్వహించాలని, బక్రీద్ సమయంలో గో వధ నిషేధంపై ప్రజలను అప్రమత్తం చేయుటకు సమావేశాలు ఏర్పాటు చేసి అన్ని శాఖలను పశు సంవర్థక శాఖ అధికారులు సమన్వయ పరచి జంతు సంరక్షణ చేయాలని పిలుపునిచ్చారు. బక్రీద్ సందర్భంగా జంతు, గో వధ నిషేధంపై అధికారులంతా అప్రమత్తంగా ఉండాలని పిలుపునిచ్చారు.