ఆంధ్ర ప్రదేశ్ రాష్ట్ర ప్రభుత్వం ప్రవేశ పెట్టిన 104 ప్రత్యేక  వైద్య శిబిరాలను ప్రజలు పూర్తిస్థాయిలో సద్వినియోగం చేసుకోవాలని వైద్యాధికారి శెట్టిబత్తుల శ్రీరామ్ రాజీవ్ కుమార్ కోరారు. సోమవారం కత్తిపూడిలోని సచివాలయం-1 లో 104 ప్రత్యేక వైద్య శిబిరాన్ని నిర్వహించారు. సర్పంచ్ కొల్లు వెంకటసత్యనారాయణ ప్రారంభించిన ఈ వైద్య శిబిరంలో సుమారు 50 మంది రోగులకు వైద్యపరీక్షలు నిర్వహించి ఉచితంగా మందులు పంపిణీచేశారు. ప్రజలకు తగు ఆరోగ్య సూచనలు, ఆహారం నియమాలనూ వైద్యాధికారి వివరించారు. ఈ సందర్భంగా ఆయన మీడియాతో మాట్లాడుతూ, కత్తిపూడి గ్రామ పంచాయతీలో ఉన్న మూడు సచివాలయాల్లోనూ ప్రతీ నెలా మొత్తం మూడు రోజుల పాటు మూడు వైద్య శిబిరాలను నిర్వహిస్తున్నామన్నారు. మంగళవారం  సచివాలయం 2 లోను, బుధవారం సచివాలయం 3 లోనూ ఈ 104 ప్రత్యేక వైద్య శిబిరాలను నిర్వహిస్తా మన్నారు. ఈ కార్యక్రమంలో తుని డివిజనల్ మేనేజర్ కేంద్రం.వీరబాబు, తొండంగి మండలం రావికంపాడు ప్రభుత్వ ఆరోగ్య కేంద్రం పరిధిలోలోకి వచ్చే కత్తిపూడి సచివాలయం 1 ఏఎన్ఎం.నాగమణి, సచివాలయం 2 ఏఎన్ఎం.బేబీసునీత, కత్తిపూడి సచివాలయం-1 సిబ్బంది పాల్గొన్నారు.

పశుసంవర్ధక శాఖలోని సహాయకులు ఎప్పటికప్పుడు నైపుణ్యాలను పెంపొందించు కోవాల్సిన అవసరం వుందని ఆ శాఖ సహాయ సంచాలకులు డా.ఎం.వీరరాజు సూచించారు. సోమవారం శంఖవరం మండల కేంద్రంలో ఆసుపత్రి వేదికగా తన పరిధిలోకి వచ్చే గ్రామసచివాలయ వెటర్నీ సహాయకుల వారంతపు నైపుణ్య పరీక్షలను  నిర్వహించారు. ఈ సందర్బంగా ఆయన మాట్లాడుతూ, ప్రభుత్వ ఆదేశాల మేరకు వీక్లీ స్కిల్ అసెస్ మెంట్ టెస్టులను నిర్వహిస్తామని చెప్పారు. పశుసంవర్ధక శాఖ నిర్దేశించిన లక్ష్యాలతోపాటు, కొత్త విధానాలపై శిక్షణ ఇవ్వడంతోపాటు, ఎలా పాడి రైతల పశువులకు సేవలందిస్తున్నారో ఈ పరీక్ష ద్వారా తెలుస్తుందన్నారు. ఈ కార్యక్రమంలో ఆసుపత్రి సిబ్బంది పాల్గొన్నారు.

విశాఖలోని సింహాచ‌లంలో సామాజిక కార్యకర్త విజినిగిరి.బాలభానుమూర్తి  వ్రుద్ధులకు గొడుగులు వితరణ చేశారు. ఈ మేరకు సోమవారం  98వ వార్డ్ పరిధి విజినిగిరిపాలెం గ్రామంలో ఈ సేవాకార్యక్రమాన్ని చేపట్టారు.  ప్రస్తుతం వర్షాలు, ఎండలకాస్తున్న సందర్భంగా దృష్టిలో ఉంచుకొని నిరుపేద వృద్ధులకు ఉపయోగపడాలనే ఆకాంక్షతో ఈ కార్యక్రమం చేపట్టినట్టు ఆయన తెలియజేశారు. తన తండ్రి వర్ధంతి రోజున ప్రతి సంవత్సరం తమ కుటుంబ సభ్యులు ఒక సేవా కార్యక్రమం చేయడం ఆనవాయితీగా వస్తుంద చెప్పారు.  అందులో భాగంగానే తండ్రి  విజినిగిరి.అప్పారావు ఐదవ వర్థంతిని పురుస్కరించుకొని వ్రుద్ధులకు గొడుగులు పంపిణీ చేసినట్టు చెప్పారు. ఈ కార్యక్రమంలో విజినిగిరి.సత్యసురేంధ్ర తదితరులు పాల్గొన్నారు.

సచివాలయ సిబ్బంది ఉత్తమ సేవల ద్వారా గ్రామీణ ప్రజల అభిమానాన్ని పొందాలని తద్వారా ప్రభుత్వానికి మంచి పేరు తీసుకు రావాలని సబ్ కలెక్టర్ పేర్కొన్నారు. ప్రభుత్వం సచివాలయ సేవలపై ఎన్నో అసలు పెట్టుకుందని, ముఖ్య మంత్రి జగన్ మోహన్ రెడ్డి ఎంతో మంచి ఆశయంతో ప్రవేశపెట్టిన ఈ సచివాలయ వ్యవస్థను విజయవంతం చేసేందుకు అందరూ కృషి చేయాలన్నారు. సబ్ కలెక్టర్ భావన శనివారం బొబ్బిలి మండలం అలజంగి 1,2 గ్రామ సచివాలయాలు సందర్శించారు, ఈ సందర్భంగా సచివాలయాల్లో ప్రజలకు అందిస్తున్న వివిధ సేవలపై ఆరా తీశారు. ఆయా గ్రామాల్లో సచివాలయాలల్లో నిర్వహిస్తున్న రికార్డులు తనిఖీ చేశారు, ప్రజలకు అందిస్తున్న వివిధ సంక్షేమ పథకాలు అందిస్తున్న తీరును పరిశీలించారు. వలంటీర్లు ప్రజలకు అందుబాటులో ఉండి ప్రభుత్వ సంక్షేమ పథకాలు అందేలా చూడాలని హితవు పలికారు. గ్రామాలలో నిర్వహిస్తున్న ఈ. కెవైసి పై ఆరా తీసి త్వరితగతిన పూర్తి చేయాలన్నారు.

  ఈ పర్యటనలో బొబ్బిలి మండలం రెవెన్యూ అధికారులు సిబ్బంది, సచివాలయాల అధికారులు సిబ్బంది పాల్గొన్నారు.